20/02/2026
Julianadorp, Kòrsou – 13 febrüari 2026 –
Den un ambiente agradabel Arko-Iris Kindercentrum a organisá djabièrnè 13 di febrüari su spich kòntèst anual bou di e grupo di "peuter". For di aña 2011 e aktividat speshal aki a bira un tradishon mashá gustá, kaminda muchanan entre 2 i 4 aña ta siña papia ku konfiansa dilanti di un públiko na un manera "speels".
E tema di e aña aki, kuenta di hada, a trese aún más magia i kreatividat. Hopi mayor a usa inspirashon di kuentanan konosí manera Roodkapje i Kompa Nanzi, loke a yena e tarima ku figuran konosí, bistí kolorido i presentashonnan kreativo. E partisipantenan chikí a subi tarima ku orguyo i a presentá nan spich ku palabra, mímika i ekspreshon. Publiko tabata sumamente entusiasmá.
Arko-Iris Kindercentrum ta ekspresá su mas sinsero apresio pa e kreatividat i kompromiso di mayornan. Dor di prepará un spich hunto ku nan yu, nan ta kontribuí aktivamente na un eksperensia balioso i ta fortifiká e desaroyo di konfiansa i abilidat di idioma di nan yu. Nos ta gradisí tambe Juf Noraima pa tur preparashon i miembronan di jurado señor Ed Ansano, señora Glenda Cristina i señor Marcel Frans.
E spich kòntèst ta stimulá e desaroyo di mucha den diferente area: nan ta siña ekspresá nan mes liber, nan ta krea konfiansa dor di papia dilanti di un publiko i nan ta engrandesé nan vokabulario i abilidat di komuniká di un forma natural. Organisá i presentá un spich ta stimulá kreatividat i yuda mucha ordená nan idea i pensamentu.
Pa mayornan, e aktividat tambe tin gran balor. Prepará e spich huntu ku e yu ta fortifiká e relashon entre mayor i yu, ta duna mayornan mas bista riba e desaroyo i talento di nan yu i ta krea un eksperensia positivo ku ta komparti, i henter famia por sinti orguyo di dje.
Arko-Iris Kindercentrum ta felisita tur partisipantenan Devion, Xander, Adenah, Mohamed, Sebastian, Prisha, Cybelle, Taïno, Zenna, Neoma, Nyjah i Nahir pa nan presentashonnan yen di kurashi. Kada mucha ta meresé rekonosementu pa e logro speshal aki i ta hasi un paso bunita den nan desaroyo personal.
Tokante Arko-Iris Kindercentrum
Arko-Iris Kindercentrum, situa na Julianadorp, e aña aki ta selebrá 35 aña ofresiendo un ambiente sigur, kordial i stimulante kaminda muchanan por desaroyá nan mes optimalmente. Pa medio di aktividatnan edukativo i kreativo, e sentro ta kontribuí na e kresementu sosial, emosional i kognitivo di mucha (entre 0 pa 12 aña) i ta sostené mayor den e desaroyo di nan yu.
Pa mas informashon por tuma kontakto via [email protected] of WhatsApp +599 986 93113/ +5999563 33 13
