Fundashon Material Pa Skol

Nos ta warda bo(so).

Awe nos ta rekòrdá ku Gobièrnu di Kòrsou a proklamá e dia akí komo Dia Nashonal di nos Lenga Materno Papiamentu. Danki na e inisiativa persistente di sr. Richard Hooi (d.f.m.) ku a para riba e importansia pa ta na konosementu di un i tur riba e kurashi i amor inmenso ku sr. Modesto Apostel “Chano” Margaretha tabatin pa su idioma pa a papia Papiamentu den Parlamento. E aña akí ta konmemorá 64 aña ku a papia Papiamentu den Parlamento. Por medio di e informashon athunto, Fundashon Material pa Skol ta para ketu riba e dia importante akí.

Modesto Apostel “Chano” Margaretha
Libertadó di Papiamentu

8 di febrüari 1958

E aña akí ta konmemorá 64 aña ku a papia Papiamentu den Parlamento.

Esaki ta debí na e kurashi i determinashon di nos baluarte mayó sr. Chano Margaretha (d.f.m.) pa trese kambio esensial ku ta di gran balor pa tur yu di tera. Sr. Chano a nase dia 24 di febrüari 1914 den bario di Rooi Santu i a fayesé dia 5 di mart 1990. E tabata kasá di sra. Sarah Margaretha-Phelipa (d.f.m.), tata di 7 yu, tawela i (bisa)wela. E tabata karpinté pa diferente kontratista, a nabegá den korto tempu, traha na Shell i tambe na Lago na Aruba i Kòrsou.

E tabata den polítika pa un gran parti di su bida. E tabata Miembro di Konseho Insular di Teritorio Insular di Kòrsou pa Partido Democraat (DP) pa hopi aña. Hustisia sosial, kaba ku pobresa introdusiendo penshun di behes, tabata algun di e motibunan ku el a drenta polítika.

Nos idioma materno Papiamentu, ta balorá i aktivamente usá durante di reunionnan ku ta hibá den e órgano mas haltu di Pais Kòrsou ku ta nos Parlamento.

Riba un djasabra mainta, dia 8 di febrüari 1958, sr. Chano a tuma kurashi i papia Papiamentu durante debate den Konseho Insular, loke e tempu ei a kousa un revolushon kompleto komo ku ta Ulandes so tabata e idioma ofisial den Parlamento.

Apesar ku a strob’é, el a pèrsistí i kontinuá na Papiamentu.

E no a hasi esaki pa kousa problema. E tabata konvensí ku e hendenan ku a vota p’é mester por a komprondé ora e ta trese su puntonan dilanti den Konseho Insular. Pa sr. Chano, demokrasia no tin sentido si e hende ku bo ta representá no por sigui su parlamentario. Dia 5 di mart 2015 representantenan di gobièrnu i komishon Nòmbernan di Kaya huntu ku sr. Richard Hooi (d.f.m), un luchadó inkansabel pa e kousa pa duna rekonosementu na e akto heroiko di sr. Chano Margaretha pa nombra un kaya na su nòmber.

Minister sra. Irene Dick komo un gran papiamentista a komprondé e nifikashon profundo di e hazaña di sr. Chano i a tuma e desishon pa proklamá dia 8 di febrüari komo Dia Nashonal di nos Lenga Materno Papiamentu i e periodo entre 8 i 21 di febrüari (Dia Internashonal di Idioma Materno) pa pone atenshon na i alsa nos Lenga Materno.

Komo ku sr. Chano tabata fiel na su pueblo di Rooi Santu, despues di 57 aña, dia 7 mei 2015 ta nombra Kaya Rooi Santu, Kaminda Modesto A. “Chano” Margaretha, Libertadó di Idioma Papiamentu. Por mira mas di e informashon akí riba Youtube.

S u, manera nos konosé bo
H ustu, sinsero i dediká
U nda ku bo a pasa, un simia positivo bo a planta
L ucha pa desaroyo i adelanto di hende tabata bo karisma
A we destino ta mustra nos ku nos tin ku sigui sin bo
I nspirá pa bo ehèmpel i siñansa nos ta kontinuá
K onforme e plan di Todopoderoso, ku doló nos ta bisa bo
A yó Su, te despues.

Gerensia i pèrsonal di FMS ta sinti bo falta.