23/06/2026
🤩🤩📚📚
⛅️ Mas bo lesa, mas bo sa…
Mas bo sa, sabí bo ta! 🎓🤓
Share, share, share! 📲
Komentá bo emoji di buki akibou! ⬇️📚
🇨🇼 𝐊𝐎𝐋𝐄𝐆𝐈𝐎 𝐒𝐀𝐍𝐓𝐀 𝐂𝐋𝐀𝐑𝐀 𝐓𝐀 𝐒𝐄𝐋𝐄𝐁𝐑Á 𝐓𝐑𝐄𝐒 𝐀Ñ𝐀 𝐃𝐈 𝐁𝐈𝐁𝐋𝐈𝐎𝐓𝐄𝐊𝐀.
Kolegio Santa Clara RKCS, skol básiko na Jan Doret, ta selebrá e di tres aniversario di su biblioteka eskolar.
Loke a kuminsá komo un inisiativa pa stimulá e gana pa lesa bou di mucha a krese bira un programa di lesamentu kompleto ku 1.500 título, kuater boluntario i resultadonan ku por wòrdu midí: e aña eskolar aki, kasi tur mucha a lesa diesdos buki, algun asta dieseis.
E biblioteka di Kolegio Santa Clara no ta djis un bentana di fia buki.
Tur klas ta risibí un buki kada dos siman.
Pa gruponan 1 te ku 4, e boluntarionan ta selektá e bukinan i ta match nan ku e nivel di lesamentu.
For di grupo 5 e muchanan mes ta skohe nan buki, pero nunka sin guia.
E boluntarionan ta yuda nan den konsulta ku e maestro di klas pa asina e buki kuadra ku e nivel di lesa di e mucha.
Kompartí
Ora di entregá, e studiantenan di e klasnan mas haltu tin ku kompartí algu riba e buki: por ehèmpèl e esena ku mas nan a gusta, òf nan momentu faborito di e buki.
Tin be nan tin ku lesa un pida di e buki sin ku a prepará adelantá.
Tambe ta puntra e mucha si nan ta rekomendá e buki pa otro muchanan den klas.
Títulonan ku ta wòrdu rekomendá be tra’i be ta wòrdu usá mas frekuentemente dor di e supervisornan ora e muchanan no por hasi un eskoho riba nan mes.
"Pa logra ku muchanan lesa, ta importante pa e bukinan ta liñá ku nan interesnan", asina Jorge Cuartas, fundadó di e biblioteka, ta bisa. "Lesamentu tin dos komponente importante. Promé, bo mester siña lesa, i despues muchanan mester disfrutá di lesamentu.
Nos biblioteka ta yuda ku e último.”
E buki korekto
E kurason di e biblioteka ta un sistema di registrashon ku ta mustra kua buki kada studiante a lesa, kiko su interesnan ta, i kon fásil òf difísil e la hañá e buki.
Asina ku un mucha mustra un preferensia pa un género, un seri òf un tema, e boluntarionan ta bai buska mas título ku ta kuadra ku nan interes.
E guiamentu personal ei ta bayendo hopi bon. Tur hende di grupo 3 bai ariba por nombra por lo menos un buki faborito ku nan a lesa den e aña eskolar aki.
Sierto títulonan ta hopi gustá: e seri di Boomhut, Dolfje Weerwolfje, Fantasia, e seri di Loser, Dagboek van een Muts, Kippenvel, e seri di Mummie i Heksje Lilly ta riba e lista di faborítonan apsoluto.
“Nos skol tin un programa di lesamentu amplio,” direktora Sjadezka Dewindt ta bisa. “Ademas di e biblioteka, nos ta midi regularmente e nivel di lesamentu di AVI den gruponan chikí.
Tambe, huntu ku e biblioteka, nos ta ofresé un programa di lesamentu den kua e supervisornan ta yuda e muchanan ku palabranan ku nan no ta komprondé òf ku e pronunsiashon korekto.
Naturalmente, nos ta partisipá tambe den e programa di lesamentu dilanti klas di nos Biblioteka Nashonal.
Dor di tur e esfuersonan aki, e resultadonan di lesamentu na skol a mehorá
signifikantemente.”
Tres aña di dedikashon
E biblioteka ta wòrdu manehá kompletamente pa kuater boluntario, kada un ta partisipá den un òf mas parti di e programa.
Nan ta selektá buki, tene kombersashon ku e muchanan, mantené e sistema di registrashon i konstantemente ta kordiná ku e maestronan. Tur buki den e biblioteka ta na Hulandes, loke tambe ta duna e biblioteka un ròl den desaroyo di idioma Hulandes di e alumnonan.
