Shoqata Kulturore "Dituria" - Preshevë

17/08/2026

THIRRJE PËR VULLNETARË – 2026/2027

Shoqata Kulturore “Dituria” hap thirrjen për të rinjtë nga Presheva dhe Bujanoci që dëshirojnë të bëhen pjesë e ekipit tonë vullnetar gjatë aktiviteteve të sezonit 2026/2027.

Duke u bërë pjesë e ekipit tonë, do të keni mundësi:

– të fitoni përvojë praktike;
– të zhvilloni aftësitë komunikuese, organizative dhe punën në ekip;
– të përfshiheni në organizimin e aktiviteteve edukative, kulturore dhe rinore;
– të njihni të rinj të tjerë dhe të kontribuoni në komunitetin tuaj.

Përvoja paraprake nuk është e nevojshme. Mjaftojnë motivimi, përgjegjësia dhe gatishmëria për të mësuar e bashkëpunuar.

Aplikoni përmes QR-kodit në poster ose në linkun:
(https://forms.gle/NxC8c58dsxvaF1436)

Bëhu pjesë e ekipit tonë, zhvillo aftësitë e tua dhe kontribuo në krijimin e një komuniteti më aktiv!

17/08/2026

15/08/2026

Përfundon me sukses programi kulturor në Turqi

Sot përfundoi programi kulturor dhe edukativ për grupin e djemve nga Lugina e Preshevës, pas disa ditësh të mbushura me vizita, aktivitete dhe njohje me historinë e kulturën e Turqisë.

Në përmbyllje të programit, nxënësit u pajisën me certifikata pjesëmarrjeje, si dëshmi e angazhimit të tyre gjatë gjithë programit.

Me shumë përvoja, kujtime dhe miqësi të reja, grupi i djemve tashmë po kthehet shëndoshë e mirë drejt Luginës së Preshevës.

Falënderojmë YTB-në dhe Ministrinë e Rinisë dhe Sportit të Republikës së Turqisë dhe të gjithë organizatorët për mikpritjen, kujdesin dhe mundësinë e ofruar për të rinjtë tanë.

14/08/2026

Dita e katërt – Bursa

Programi vazhdoi në Bursa, një nga qytetet më të rëndësishme historike dhe kulturore të Turqisë. Pjesëmarrësit nisën ditën me teleferik drejt Uludağut, duke shijuar pamjet e veçanta të qytetit dhe natyrës përreth.

Vizitat vazhduan në Xhaminë dhe Kompleksin e Emir Sulltanit, Tyrbet e Osman Gazit dhe Orhan Gazit dhe Xhaminë e Madhe të Bursës (Ulu Xhami), vende me rëndësi të veçantë për historinë osmane.

Pjesëmarrësit vizituan Pazarin e Madh të Bursës dhe Zonën e Haneve (Hanlar Bölgesi), duke u njohur nga afër me traditën, kulturën dhe atmosferën karakteristike të qytetit.

13/08/2026

12/08/2026

Dita e dytë – Stamboll

Dita e dytë e programit vazhdoi me vizita në disa prej pikave më të njohura historike dhe kulturore të Stambollit. Pjesëmarrësit vizituan Pallatin e Topkapısë, Qendrën Rinore Çemberlitaş, Pazarin e Madh (Kapalı Çarşı) dhe Pazarin Egjiptian (Mısır Çarşısı).

Dita u përmbyll me një shëtitje me anije në Bosfor, duke shijuar pamjet e Stambollit nga deti dhe ndërthurjen unike të dy kontinenteve, Evropës dhe Azisë.

11/08/2026

Dita e parë – Stamboll

Grupi i djemve nga Lugina e Preshevës nisi programin kulturor në Turqi me një ditë të pasur me vizita në disa prej vendeve më të rëndësishme historike dhe kulturore të Stambollit.

Gjatë ditës u vizituan Xhamia Sulltan Ahmet, Xhamia e Madhe Aja Sofja, Cisterna e Bazilikës (Yerebatan), Panorama 1453, Miniatürk dhe Kulla e Gallatës.

Një ditë e veçantë kushtuar njohjes nga afër me historinë, kulturën dhe trashëgiminë e pasur të Stambollit.

10/08/2026

Ekskursioni gjashtë ditor në Stamboll - Çanakala dhe Bursa i grupit të djemve mundësuar nga YTB Turqi.

08/08/2026

Sot patëm një bashkëbisedim të hapur me dy bashkatdhetarë tanë, Vasuf Bajrami nga Corrotica, i cili ka jetuar dhe vepruar për shumë vite në Zvicër dhe tashmë është pensionist, si dhe Martanesh Mehmedi nga Presheva, i cili jeton dhe vepron në Gjermani. Në diskutim morën pjesë gjithashtu nxënës, studentë dhe përfaqësues të organizatave vendore nga Presheva.

Gjatë bashkëbisedimit u ndanë përvoja nga jeta në diasporë, sfidat e integrimit në një shoqëri të re, puna dhe përshtatja, ruajtja e gjuhës dhe identitetit, si dhe lidhja e vazhdueshme me vendlindjen. Një vëmendje e veçantë iu kushtua edhe largimit të të rinjve, arsyeve që i shtyjnë ata të kërkojnë të ardhmen jashtë vendit dhe mundësive për të forcuar lidhjen ndërmjet diasporës dhe komunitetit lokal.

Të rinjtë patën mundësi të parashtrojnë pyetje dhe të dëgjojnë drejtpërdrejt përvojat e bashkatdhetarëve tanë, duke e bërë diskutimin të hapur dhe interaktiv.

Aktiviteti “Jeta ndërmjet Vendlindjes dhe Diasporës” u organizua nga Shoqata Kulturore “Dituria”, në bashkëpunim me Zyrën për të Rinj në Preshevë, në kuadër të projektit “Forcimi i përgjigjes së Serbisë ndaj sfidave të migracionit dhe përfshirjes”, i financuar nga Bashkimi Evropian.

06/08/2026