11/07/2026
U ndanë çmimet letrare në Edicionin e Dytë të Panairit të Librit Shqip “Preshevë 2026”
Në kuadër të Edicionit të Dytë të Panairit të Librit Shqip “Preshevë 2026”, me moton “Libri dhe Tradita”, u ndanë çmimet letrare dhe mirënjohjet për autorë, botues, krijues dhe institucione që kanë dhënë kontribut të çmuar në letërsinë, librin dhe kulturën shqiptare.
Juria e panairit vlerësoi veprat më të spikatura të vitit, duke shpërblyer autorët dhe personalitetet që, përmes krijimtarisë dhe veprimtarisë së tyre, kanë lënë gjurmë të rëndësishme në kulturën shqiptare.
Çmimi “Proza më e mirë” iu nda romanit “Shtëpia pa pasqyrë” të autores Majlinda Bregasi, me motivacionin: Për fuqinë artistike me të cilën autorja rrëfen fatet njerëzore, si dhe për eksplorimin e ndjerë të kujtesës kolektive përmes një romani që fton lexuesin në një reflektim të thellë mbi vetveten.
Çmimi “Libri më i mirë në publicistikë” iu nda veprës “Drita e Shejzave” të Ernest Koliqit, me motivacionin: Për një vepër të rrallë dhe një dëshmi të jashtëzakonshme të mendimit intelektual shqiptar, që mishëron vizionin, përkushtimin kombëtar dhe përgjegjësinë kulturore të një prej figurave më të mëdha të letërsisë, arsimit dhe kulturës shqiptare.
Çmimi “Libri më i mirë për fëmijë” iu nda librit “Bota në një fëmijë” të autores Drenusha Zajmi Hoxha, me motivacionin: Për përcjelljen me ndjeshmëri artistike të vlerave universale, duke frymëzuar dashurinë për librin, natyrën dhe jetën, si dhe për mesazhin e fuqishëm human mbi barazinë, respektin dhe pranimin e tjetrit si themele të një shoqërie më të drejtë e më të ndërgjegjshme.
Çmimi Special i Panairit iu nda romanit “Brenga” të autorit Pashko Camaj, me motivacionin: Për forcën e rrëfimit me të cilën autori shndërron dramën e mërgimit në një dëshmi të thellë njerëzore, duke sjellë me ndjeshmëri plagët e individit dhe të historisë shqiptare, nëpërmjet një reflektimi universal mbi atdheun, moralin dhe përkatësinë.
Çmimi i Karrierës iu nda shkrimtarit Namik Dokle, me motivacionin: Për kontributin dhe përkushtimin e jashtëzakonshëm dhe shumëdimensional si shkrimtar, gazetar dhe politikan në vlerat kombëtare dhe kulturore shqiptare, duke pasuruar mendimin publik dhe letrar me një zë të matur, të përgjegjshëm dhe human.
Mirënjohja e Panairit iu nda Shoqatës së Shkrimtarëve “Feniks”, me motivacionin: Për kontributin e vyer në kultivimin e letërsisë shqipe, nxitjen e krijimtarisë letrare dhe promovimin e vlerave kulturore e kombëtare në Luginën e Preshevës. Me përkushtimin e saj në bashkimin e krijuesve dhe afirmimin e fjalës artistike, Shoqata e Shkrimtarëve “Feniks” është bërë një vatër e rëndësishme e frymëzimit, kulturës dhe identitetit shqiptar.
Mirënjohja e Panairit iu nda Shtëpisë Botuese “Fan Noli”, me motivacionin: Për kontributin e shquar në pasurimin e kulturës shqiptare përmes botimit dhe promovimit të veprave me vlera letrare, filozofike, shkencore e kombëtare, si dhe për përkushtimin në shërbim të librit shqip.
Çmimi Special i Panairit iu nda antologjisë “Kalendar i përjetësisë së fjalës”, përgatitur nga Shkëlzen Halimi, me motivacionin: Për kontributin e veçantë në përjetësimin e kujtesës poetike shqiptare përmes një përzgjedhjeje të kujdesshme të poetëve të ndjerë, si dhe për ndërtimin e një ure shpirtërore mes brezave përmes fjalës së pavdekshme artistike. Kjo antologji përfaqëson një akt të lartë nderimi ndaj trashëgimisë letrare shqiptare dhe fuqisë së saj të përjetshme.
Çmimi i Karrierës iu nda shkrimtarit, diplomatit dhe skenaristit Ylljet Aliçka, me motivacionin: Për kontributin e shquar dhe shumëdimensional si diplomat, shkrimtar dhe skenarist, duke ndërthurur përvojën institucionale me krijimtarinë letrare e kinematografike. Me një stil origjinal dhe një qasje kritike ndaj realitetit shoqëror, ai ka pasuruar kulturën shqiptare dhe ndërkombëtare, duke sjellë vepra që reflektojnë thellësisht mbi njeriun, shoqërinë dhe kohën.
Çmimi Special iu nda librit “Dëshmitë e një dekade” të autorit Nexhat Agushi, me motivacionin: Për vlerën e spikatur dokumentare dhe historike, me të cilën autori ka dëshmuar me përgjegjësi intelektuale një nga periudhat më vendimtare të historisë së shqiptarëve. Përmes ndërthurjes së kujtesës personale me atë kolektive, të mbështetur në fakte, dëshmi dhe përjetime autentike, vepra shndërrohet në një kontribut të çmuar për ruajtjen e së vërtetës historike, forcimin e kujtesës kombëtare dhe edukimin e brezave të rinj në frymën e përgjegjësisë ndaj historisë.
Çmimi i Karrierës iu nda poetes dhe shkrimtares Afërdita Salihu, me motivacionin: Për kontributin e çmuar dhe të pandërprerë në letërsinë shqipe, si poete dhe shkrimtare për fëmijë e të rritur, duke pasuruar me një krijimtari të gjerë botën letrare shqiptare. Me ndjeshmërinë artistike, përkushtimin ndaj fjalës së shkruar dhe dashurinë për edukimin estetik të brezave, ajo ka krijuar një opus të pasur që promovon vlerat njerëzore, kulturore dhe kombëtare, duke zënë një vend të veçantë në letërsinë bashkëkohore shqipe.
Çmimi Special iu nda autorit Skender Latifi, me motivacionin: Për kontributin e tij të çmuar në dokumentimin dhe ruajtjen e historisë, kulturës dhe identitetit shqiptar, duke sjellë përmes veprës së tij dëshmi me vlerë të veçantë për kujtesën kolektive dhe trashëgiminë kombëtare. Krijimtaria e tij përbën një pasuri të rëndësishme për studiuesit dhe brezat që vijnë.
Panairi i Librit Shqip “Preshevë 2026” dëshmoi edhe këtë vit se libri mbetet ura më e fortë që bashkon shqiptarët, promovon kulturën dhe ruan identitetin kombëtar. Përmes këtyre vlerësimeve u nderuan jo vetëm autorët dhe veprat e tyre, por edhe misioni i përbashkët për ta bërë librin një pjesë të pandashme të jetës kulturore të Preshevës dhe të gjithë hapësirës shqiptare.
