03/03/2021
Shkëlqesia e saj, zonja Vjosa Osmani-Sadriu, kryetare e Parlamentit dhe u.d. e kryetares së Republikës së Kosovës priti në një takim në ambientet e ambasadës së Republikës së Kosovës në Bernë përfaqësues të mërgatës shqiptare në Zvicër.
Ajo në fjalën e saj përshëndetëse, ndër prioritetet e qeverisë që do të formohet pas certifikimit të zgjedhjeve, theksoi rëndësinë e institucionalizimit të mësimit plotësues në gjuhën shqipe për mërgatën tonë. Ajo, ndër të tjera theksoi se legjislatura e ardhshme e Parlamentit të Kosovës do të miratojë ligjet që kanë të bëjnë me mërgatën ku parashihet edhe rregullimi i çështjes së mësimit plotësues në mërgatë.
Në këtë takim ishte i pranishëm edhe kryetari i Lidhjes së Arsimtarëve dhe Prindërve Shqiptarë në Zvicër, Nexhat Maloku, i cili theksoi se është koha e fundit që çështja e mësimit plotësues në gjuhën shqipe në Zvicër të institucionalizohet, në mënyrë që në të ardhmen sa më shumë nxënës ta ndjekin këtë mësim.
Mbetemi me shpresë se kjo çështje shumë e rëndësishme e mërgatës shqiptare do të zgjidhet në mënyrën më të mirë të mundshme.
