Üçüncü Tala kənd tam orta məktəbi

21/08/2026

📢 Müəllimlərin işə qəbulu üzrə müsabiqənin ümumi vakansiya seçimi mərhələsinin nəticələri şəxsi səhifələrə göndərildi

12-15 avqust tarixlərində keçirilmiş müəllimlərin işə qəbulu üzrə müsabiqənin ümumi vakansiya seçimi mərhələsinin nəticələri namizədlərin şəxsi səhifələrinə göndərilib. Vakansiya seçimi mərhələsində uğur qazanan namizədlər müsahibə mərhələsində iştirak hüququ əldə ediblər.

ℹ️ Nəzərinizə çatdırırıq ki, uğur qazanmayan və ya vakansiya seçimində iştirak etməyən namizədlər müsabiqənin növbəti vakansiya seçim mərhələsində iştirak edə bilərlər.

📌Qeyd edək ki, müsahibə mərhələsi ilə bağlı məlumat əvvəlcədən namizədlərin şəxsi səhifələrinə göndəriləcəkdir.

🤝🏻Növbəti mərhələdə iştirak edəcək namizədlərə uğurlar arzulayırıq!

17/08/2026

📢 Orta ixtisas təhsil müəssisələrinə təhsilalanların qeydiyyatı prosesinə başlanılır!

❗Qeydiyyat prosesi my.gov.az platforması üzərindən 19 avqust saat 15:00 - 31 avqust saat 18:00 tarixləri aralığında həyata keçiriləcək.

Müraciət edəcək şəxslərdən aşağıdakı məlumatları nəzərə almaları xahiş olunur:

▶️ Tələbə qəbulu üçün qeydiyyat yalnız my.gov.az platforması vasitəsilə aparılır.
▶️ Şəkilsiz köhnə nəsil şəxsiyyət vəsiqəsi olan şəxslər my.gov.az-da qeydiyyatdan keçmək üçün şəxsiyyət vəsiqəsini yeniləməlidirlər.
▶️ 15 yaşına çatmamış vətəndaşlar my.gov.az-da şəxsi kabinetlərini "SİMA rəqəmsal imza" ilə açmalıdırlar.

17/08/2026

📢 Şagirdlərin elektron yerdəyişməsi prosesinə başlanılır

🗓️ 20 avqust saat 15:00-dan etibarən 2026–2027-ci tədris ili üzrə şagirdlərin elektron yerdəyişməsi prosesi aktivləşdiriləcək. Proses 2–9-cu və 11-ci sinif şagirdlərini əhatə edəcək.

💻 Şagirdlərin elektron yerdəyişməsi sy.edu.az portalı vasitəsilə həyata keçirilir.

📌 Nəzərinizə çatdırırıq ki, internetə çıxış imkanı olmayan vətəndaşlar yerdəyişmə prosesi ilə bağlı aidiyyəti üzrə Agentliyin və təhsili yerli idarəetmə bölmələrinin çağrı mərkəzlərinə, Agentliyin Vətəndaşlara Xidmət Mərkəzinə, eləcə də ASAN xidmət mərkəzlərinə müraciət edə bilərlər.

13/08/2026

İcma Əsaslı Məktəbəqədər Təhsil Layihəsi çərçivəsində tərbiyəçi-müəllim seçimi üzrə imtahan keçirilib.
---
Şəki-Zaqatala Regional Təhsil İdarəsi üzrə həyata keçirilən İcma Əsaslı Məktəbəqədər Təhsil Layihəsi çərçivəsində tərbiyəçi-müəllim vəzifəsinə namizədlərin seçimi məqsədilə imtahan mərhələsi təşkil olunub.

İmtahan psixoloji test mərhələsindən ibarət olub. Bu mərhələdə namizədlərin peşəyə uyğunluğu, analitik düşünmə və qərarvermə bacarıqları, emosional sabitliyi, ünsiyyət xüsusiyyətləri, eləcə də işə motivasiyası qiymətləndirilib.

Seçim prosesinin əsas məqsədi məktəbəqədər təhsil sahəsində peşəkar, məsuliyyətli və uşaqların inkişafına töhfə verə biləcək tərbiyəçi-müəllimlərin müəyyən edilməsidir. Qiymətləndirmə obyektivlik, şəffaflıq və bərabər imkanlar prinsipləri əsasında həyata keçirilib.

Şəki-Zaqatala Regional Təhsil İdarəsi seçim prosesində iştirak edən bütün namizədlərə göstərdikləri marağa görə təşəkkür edir, onlara gələcək peşə fəaliyyətlərində və növbəti mərhələlərdə uğurlar arzulayır.

13/08/2026

📢 Təhsil sənədləri artıq myGov-da!

💻 Təhsil haqqında dövlət nümunəli sənədlər artıq mygov platformasında əlçatandır.

🎓 2026-cı il məzunları təhsil müəssisələri tərəfindən imzalanmış elektron təhsil sənədlərini mygov (web) → “Təhsil məlumatlarım” → “Elektron təhsil sənədlərim” bölməsindən əldə edə bilərlər.

📌 Elektron sənədin üzərindəki QR kodu oxudaraq və ya edu.gov.az saytının “Sənəd yoxlama” bölməsində sənədin nömrəsi və doğum tarixini daxil etməklə sənədin həqiqiliyini yoxlamaq mümkündür.

📱 Yaxın günlərdə elektron təhsil sənədləri mygov mobil tətbiqində də əlçatan olacaq.

🎯Təhsil sənədləri artıq rəqəmsal formatda — daha rahat və əlçatan.

12/08/2026

Ümummilli lider Heydər Əliyevin 2001-ci ildə imzaladığı fərmana əsasən, avqustun 1-i ölkəmizdə Azərbaycan Əlifbası və Azərbaycan Dili Günü kimi qeyd edilir. Rəğbət, ehtiram və vətəndaşlıq qüruru ilə qeyd etdiyimiz bu gün milli şüurumuzun, dövlətçiliyimizin və mədəni irsimizin təntənəsidir. Azərbaycan dili dövlətimizin müstəqilliyini, xalqımızın milli birliyini və mənəvi bütövlüyünü ifadə edən ən mühüm amillərdən biridir. Yüzilliklərin sınağından keçərək bu günümüzə qədər gəlib çatan, zəngin leksik tərkibi, yüksək ifadə imkanları, ahəngdarlığı və bədii-estetik xüsusiyyətləri ilə dünya dilləri sırasında özünəməxsus yer tutan Azərbaycan dili hər bir azərbaycanlının ən böyük dəyərdir.
Tarixə nəzər salsaq görərik ki, SSRİ dövründə milli dillərin sıxışdırılması prosesi həyata keçirilirdi. SSRİ Konstitusiyasının qəbulundan sonra bu proses daha da gücləndirildi. Belə bir şəraitdə hətta milli respublikaların rəhbərləri belə ana dili məsələsini gündəmə gətirməkdə aciz idilər. Lakin, yaranmış əngəllərə baxmayaraq, dövlət dili uğrunda ardıcıl mübarizə aparan Ulu Öndər Heydər Əliyev ziyalıları, xalqı ana dilinin dövlət dili kimi yaşamaq hüququ uğrunda mübarizəyə cəlb edərək bütün qüvvələri səfərbər etdi. 1978-ci il aprelin 2-də Heydər Əliyevin təkidi ilə yeni konstitusiyaya dövlət dilinin Azərbaycan dili olduğunu əks etdirən maddə əlavə olundu. Bütün çətinliklərə baxmayaraq, Ümummilli Liderin bu cür tarixi qərara nail olması mənəvi varlığımızın əsası sayılan dilimizin inkişafında böyük addım oldu.
Müstəqillik illərində də respublikada dil siyasətinin formalaşdırılması, Azərbaycan dilinin beynəlxalq aləmdə rolu və nüfuzunun yüksəlməsi Ümummilli lider Heydər Əliyevin adı ilə bağlıdır. Ölkə rəhbərinin təşəbbüsü və fəal iştirakı ilə Konstitusiyanın dövlət dili haqqında maddəsi ilə bağlı keçirilən müzakirələr nəticəsində Azərbaycan dilinin qanuni haqqı özünə qaytarıldı. 1995-ci ilin noyabrın 12-də qəbul olunan Konstitusiyada Azərbaycan dili Azərbaycan Respublikasının Dövlət dili kimi təsbit olundu.
Ulu öndərimiz Heydər Əliyevin Azərbaycan dilinin inkişafı və qorunması məqsədilə imzaladığı “Dövlət dilinin tətbiqi işinin təkmiləşdirilməsi haqqında” 2001-ci il 18 iyun tarixli fərman və 2002-ci il 30 sentyabr tarixində qəbul edilmiş “Azərbaycan Respublikasında Dövlət dili haqqında” Azərbaycan Respublikasının Qanunu mühüm dövlət sənədləridir.
Bəli, Azərbaycan dilinin hərtərəfli inkişafı, onun təkcə sözdə deyil, gündəlik təcrübədə də ümumişlək dilə, dövlət dilinə çevrilməsi, beynəlxalq münasibətlər sisteminə, diplomatiya aləminə yol açması, zənginləşməsi və dünyanın mötəbər kürsülərindən səslənməsi məhz Heydər Əliyevin yorulmaz fəaliyyəti və müdrik dil siyasətinin nəticəsidir. Müasir dövrdə Azərbaycan dilinin inkişafı istiqamətində həyata keçirilən dövlət siyasəti Prezident İlham Əliyev tərəfindən uğurla davam etdirilir. Onun rəhbərliyi ilə Azərbaycan dilinin saflığının qorunması, dövlət idarəçiliyində və informasiya məkanında düzgün tətbiqi istiqamətində mühüm addımlar atılır. Dövlət başçısının “Azərbaycan dilində latın qrafikası ilə kütləvi nəşrlərin həyata keçirilməsi haqqında”, “Azərbaycan Milli Ensiklopediyasının nəşri haqqında”, “Dünya ədəbiyyatının görkəmli nümayəndələrinin Azərbaycan dilində nəşri nəzərdə tutulan əsərlərinin siyahısının təsdiq edilməsi haqqında” sərəncamları, “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı”nı 2013-cü il 9 aprel tarixli Sərəncamı ilə təsdiq etməsi ana dilimizin saflığının və zənginliyinin qorunması baxımından mühüm tarixi hadisədir. Prezident İlham Əliyevin “Azərbaycan dilinin elektron məkanda daha geniş istifadəsinin təmin edilməsi ilə bağlı bir sıra tədbirlər haqqında” 2018-ci il 17 iyul tarixli Sərəncamı, 2018-ci il noyabrın 1-də imzaladığı “Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı tədbirlər haqqında” Fərmanı ölkəmizdə dövlət dilinin daim diqqət mərkəzində saxlanıldığını bir daha təsdiq edir.
Dil yalnız ünsiyyət vasitəsi deyil, xalqın varlığını qoruyan ən mühüm dayaqlardan biridir. Tarixi keçmişimizi, milli kimliyimizi və milli-mənəvi dəyərlərimizi yaşadan, bizlərə ulu babalardan miras qalan ən qiymətli milli sərvətimizi-ana dilimizi qorumaq hər bir Azərbaycan vətəndaşının müqəddəs borcudur.

Kəmalə Əhmədova
Şəki-Zaqatala Regional Təhsil İdarəsinin
Zaqatala üzrə Təhsil sektorunun müdiri

11/08/2026

Hörmətli valideynlər və şagirdlər!

Azərbaycan Respublikası Nazirlər Kabinetinin 17 mart 2022-ci il tarixli qərarına əsasən, dövlət ümumtəhsil müəssisələrində vahid məktəbli geyim forması tətbiq edilir.
Məktəbdə nizam-intizamın, vahid geyim mədəniyyətinin və təhlükəsiz təhsil mühitinin təmin edilməsi məqsədilə aşağıdakı qaydalara ciddi əməl olunması xahiş olunur:
‼️ 2026-2027-ci tədris ilində Zaqatala rayonu Abduraman Qurbanov adına Üçüncü Tala kənd tam orta ümumtəhsil məktəbinin məktəbli forması nümunədə olduğu kimidir.

Şagird geyim forması

✅ Məktəbə yalnız təsdiq edilmiş məktəbli forması ilə gəlmək mütləqdir.
✅ Oğlan şagirdlər üçün:

Mavi rəngdə polo köynək (qısa və ya uzunqol);

Boz rəngdə klassik şalvar;

Soyuq havalarda məktəb gödəkçəsi.

✅ Qız şagirdlər üçün:

Mavi polo köynək (qısa və ya uzunqol);

Boz rəngdə dizdən olan ətək (klassik, pliseli və ya digər təsdiq olunmuş model) və ya klassik şalvar;

Soyuq havalarda məktəb gödəkçəsi.

Xarici görünüş

Oğlanların saçları qısa və səliqəli olmalıdır.

Qızların saçları hörülmüş və ya səliqəli şəkildə toplanmış olmalıdır.

Dırnaqlar təmiz, qısa və baxımlı saxlanılmalıdır.

Ətəklərin uzunluğu dizdən yuxarı olmamalıdır.

Qadağandır

❌ Cins şalvar, idman geyimləri və məktəb formasından fərqli rəngli geyimlər.
❌ Zinət əşyaları və müxtəlif aksessuarlar.
❌ Ağıllı telefon, ağıllı saat və məktəbə aid olmayan digər əşyaların məktəbə gətirilməsi.
❌ Məktəb qaydalarına uyğun olmayan saç düzümü, makiyaj və görünüş.

Məktəb qaydalarına riayət etmək hər bir şagirdin məsuliyyəti və nümunəvi davranışının göstəricisidir.

08/08/2026

https://muallim.edu.az/seki-zaqatalada-tehsil-infrastrukturu-yenilenir?fbclid=IwdGRjcATii5djbGNrBOKLlXBkb2YBZXh0bgNhZW0CMTEAc3J0YwZhcHBfaWQMMzUwNjg1NTMxNzI4AAEe4gCC8NCmtREyHDgZyUo-wp3uvtl3v83OEv4DG7BZcOx57eGG9ciJaUDS87g_aem_30QWh6Ucg4wx9oEitL28pg

Yeni tədris ilinə hazırlıq çərçivəsində Şəki-Zaqatala bölgəsinin ümumi və məktəbəqədər təhsil müəssisələrində genişmiqyaslı təmir-tikinti işləri həyata keçirilir. Regionda təhsil müəssisələrinin mövcud vəziyyətinin yaxşılaşdırılması, şagird və müəll...

23/07/2026

Prezident İlham Əliyevin rəhbərliyi ilə həyata keçirilən uğurlu və çoxşaxəli xarici siyasət nəticəsində Azərbaycan beynəlxalq münasibətlər sistemində etibarlı tərəfdaş kimi mövqeyini daha da möhkəmləndirmiş, Avropa dövlətləri ilə siyasi dialoqu, iqtisadi əlaqələri və humanitar əməkdaşlığı ardıcıl şəkildə inkişaf etdirmişdir. Bu siyasətin mühüm istiqamətlərindən biri də Azərbaycan Respublikası ilə Almaniya Federativ Respublikası arasında qarşılıqlı hörmət, bərabərhüququlu tərəfdaşlıq və ortaq maraqlara əsaslanan münasibətlərin davamlı inkişafıdır. Azərbaycan Respublikasının Prezidenti İlham Əliyevin 20 iyul 2026-cı il tarixində Almaniya Federativ Respublikasına rəsmi səfəri ölkəmizin Avropa istiqamətində həyata keçirdiyi çoxşaxəli xarici siyasətin növbəti mühüm uğuru kimi qiymətləndirilir.
İki ölkə arasında diplomatik münasibətlər 20 fevral 1992-ci il tarixində qurulub. Keçən müddət ərzində iki ölkə arasında 70-dən çox sənəd imzalanıb, həmçinin ticari dövriyyənin artması məqsədi ilə 2011-ci il tarixində Ticarət və investisiyalar üzrə Almaniya-Azərbaycan yüksək səviyyəli İşçi Qrupu təsis edilib. Bu gün Azərbaycan və Almaniya arasında əməkdaşlıq uğurla həyata keçirilir.
21 iyul 2026-cı il tarixində Prezident İlham Əliyevin Almaniya Federativ Respublikasına rəsmi səfəri çərçivəsində Berlində yüksək səviyyəli görüşlər keçirilib, “Azərbaycan Respublikası və Almaniya Federativ Respublikası arasında ikitərəfli tərəfdaşlıq üçün strateji gündəliyə dair Birgə Bəyannamə”, həmçinin Azərbaycan-Almaniya Biznes Şurasının yaradılmasına və fəaliyyətinə dair Birgə Bəyannamə imzalanıb. Azərbaycan Respublikasının Prezidenti İlham Əliyev və Almaniya Federativ Respublikasının Kansleri Fridrix Merts mətbuata bəyanatlarla çıxış ediblər.
Prezident İlham Əliyev mətbuata verdiyi bəyanatında ikitərəfli gündəliyin kifayət qədər geniş olduğunu, Azərbaycan-Almaniya əlaqələrinin təkcə ikitərəfli münasibətlərə yox, bütövlükdə bölgəmizdə əməkdaşlığa, sülhə və əmin-amanlığa töhfə verəcəyini vurğulayıb. Bir çox Alman şirkətlərinin Azərbaycanda uğurla fəaliyyət göstərdiyini diqqətə çatdıran dövlətimizin başçısı Alman şirkətlərinin daha geniş çərçivədə Azərbaycanda fəaliyyəti üçün konkret təkliflər irəli sürüldüyünü qeyd edib.
Prezident İlham Əliyevin bəyanatında enerji əməkdaşlığı xüsusi yer tutub. Dövlət başçısının da qeyd etdiyi kimi, bu ildən etibarən Azərbaycan öz təbii qazını Almaniyaya ixrac etməyə başlayıb. Bununla da Azərbaycan qazı artıq Avropa İttifaqına üzv 10 ölkəyə çatdırılır. Bu fakt ölkəmizin Avropanın enerji təhlükəsizliyində oynadığı mühüm rolu bir daha təsdiqləyir.
Bağlantılarla və tranzit imkanları ilə bağlı Azərbaycan-Almaniya əməkdaşlığının çox böyük əhəmiyyəti olduğunu və Almaniya şirkətlərinin bu istiqamətdə çox böyük uğurlar əldə etdiyini qeyd edən prezident İlham Əliyev bildirib ki, “Azərbaycan öz nəqliyyat infrastrukturunu təkmilləşdirir. Keçən il Orta Asiya məşvərət formatına tamhüquqlu üzv olmaqla, Azərbaycan bir növ Orta Asiya ilə Avropa arasında körpü rolunu oynayır və bu rol getdikcə artacaqdır.”
Bəyanatında Cənubi Qafqazda yaranmış yeni siyasi reallıqları da geniş şəkildə əks etdirən Prezident İlham Əliyev bildirib ki, “Vaşinqtonda, Ağ Evdə Prezident Trampın iştirakı və imzası ilə Birgə Bəyannamənin imzalanması faktiki olaraq 30 il davam edən münaqişəyə son qoydu. Azərbaycan bu razılaşmadan dərhal sonra praktiki addımlara keçdi.”
Bəli, Azərbaycan sülh prosesinə yalnız siyasi bəyanatlarla deyil, konkret addımlarla da töhfə verir. Prezident İlham Əliyevin qeyd etdiyi kimi, Azərbaycan tərəfindən Ermənistana benzin və dizel yanacağının tədarükü həyata keçirilir, eyni zamanda Azərbaycan ərazisindən Ermənistana tranzit yüklərin daşınması sürətlə artır. Qısa müddət ərzində 40 min tondan artıq yükün ölkəmizin ərazisindən tranzit daşınması yeni əməkdaşlıq mühitinin real nəticəsidir.
Dövlətimizin başçısı çıxışında Azərbaycanın son illərdə əldə etdiyi tarixi nailiyyətləri də diqqətə çatdıraraq, torpaqları uzun illər işğal altında olan Azərbaycanın bu gün çox tarixi bir dövr yaşadığını, öz gücü ilə işğala son qoyduğunu, ərazi bütövlüyünü və suverenliyini bərpa etdiyini, Ermənistana sülh təklif etdiyini və müsbət cavab aldığını qeyd edib və Almaniya hökumətinin bu prosesdə oynadığı rolu da yüksək qiymətləndirib.
Prezident İlham Əliyev bəyanatında Avropa İttifaqı ilə münasibətlərin inkişafına da toxunub: "Bu il biz həm Avropa İttifaqı Şurasının Prezidenti cənab Koştanın, həm Avropa Komissiyasının Prezidenti xanım Fon derLyayenin Azərbaycana səfərlərinin şahidi olmuşuq. Bu səfərlərin çox böyük siyasi mənası var. Bu, Avropa İttifaqı ilə Azərbaycan arasındakı əlaqələri daha da gücləndirəcək. Almaniya Avropa İttifaqına üzv olan ölkələr arasında lider olduğu üçün burada təbii ki, həm Almaniyanın rolu çox böyükdür, eyni zamanda, gələcək əməkdaşlıq üçün də əminəm ki, Almaniya öz səylərini göstərəcək.”
Etibarlı tərəfdaşlığın yüksələn xətlə inkişafının əyani göstəricisi olan bu səfər ölkələrimiz arasında siyasi dialoqun daha intensiv xarakter almasına, iqtisadi əlaqələrin genişlənməsinə yeni imkanlar açacaq.

Eldar Mustafayev
RİHBA-nın Hüquq və kadr məsələləri sektorunun müdiri