27/09/2016
Qədim zamanlarda müdrik bir hökmdar: ”Əlinizə böyük bir sərvət düşsə, nə edərdiniz?”-deyə əyan-əşrəfindən soruşur. ”Karvansaralar, hamamlar, məsçidlər, kitabxanalar tikdirərdik” şəklində cavablar alır. Onları dinləyən müdrik hökmdar: ”Bu dediklərinizin hamısı gözəl işlərdir, lakin mən olsaydım, o sərvəti fəzilətli və bilikli insanlar yetişdirməyə sərf edərdim. Çünki insanlar yaxşı tərbiyə və təhsil alandan sonra bu arzularınızın hamısı həyata keçər. Kamil insanlar olmadan isə, bunların heçbiri istənilən faydanı verməz” deyir.
Cəmiyyətimizin milli-mənəvi dəyərlərini yaşatmaq, əmin-amanlığını qorumaq, müntəzəm tərəqqisini təmin etmək istəyiriksə, övladlarımızı gələcəyə yaxşı hazırlamalı, onlara tərbiyə verərkən yaşadığımız dövrün şərt və tələblərini diqqətlə qiymətləndirməliyik.
Əgər bir ailə və ya məktəb olaraq yetişdirdiyimiz nəsillər cəmiyyətimizin köklərinə, inanclarımıza, adət-ənənələrimizə və dünya görüşümüzə, mənəvi dəyərlərimizə, bizi biz edən anlayışlara bağlı deyilsə, hörmət eləmirsə, deməli öz kökümüzə balta çalmaqla məşğul olmuşuq. Uşaqlar bar-bəhər gözlədiyimiz bu günün fidanları, gələcəyin ağaclarıdır. Onların qayğısına qalmasaq, vaxtlı-vaxtında suyunu verməsək, lazım gələndə budamasaq və başdan sovdu böyütsək, özləri də, meyvələri də çürük və “xəstə”olacaq.
PM Akademiya Kollektivi
