Ucar rayon Abdulla Abdullayev adına Alpı kənd tam orta məktəb

24/08/2026

26 avqust Laçın şəhəri günü

Ölkəmizdə Laçın şəhəri günü böyük qürur hissi ilə qeyd edilir. 44 günlük Vətən müharibəsində Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusu möhtəşəm tarixi Qələbə qazanaraq, doğma torpaqlarımızı 30 ilədək davam edən işğaldan azad etdi.
Azərbaycanın döyüş meydanında əldə etdiyi böyük qələbə siyasi müstəvidə də öz təsdiqini tapdı və ordusu tamamilə darmadağın edilən, kapitulyasiya aktını imzalamağa məcbur olan Ermənistan üç rayonumuzdan, o cümlədən Laçından öz qoşunlarını çıxardı. Laçın rayonu 2020-ci il dekabrın 1-də Azərbaycan Silahlı Qüvvələrinə təhvil verilərək, öz azadlığına qovuşdu.
2022-ci ilin avqustun 26-da isə Laçın şəhəri, Zabux və Sus kəndləri Ordumuz tərəfindən nəzarətə götürüldü. Bununla da Laçının işğalına tamamilə son qoyuldu. Prezident İlham Əliyevin Sərəncamına əsasən, 26 avqust – Laçın şəhəri günü kimi qeyd olunur.
Rəşadətli Azərbaycan Ordusunun əsgər və zabitlərinin canı, qanı bahasına Vətən müharibəsində Cəbrayıl, Füzuli, Zəngilan, Qubadlı şəhərləri, Zəngilan rayonunun Mincivan, Ağbənd, Bartaz qəsəbələri, Xocavənd rayonunun Hadrut qəsəbəsi və bir çox kəndləri, Tərtər rayonunun Suqovuşan kəndi, Xocalı və Laçın rayonlarının bir neçə kəndi daxil olmaqla, ümumilikdə 300-dən çox yaşayış məntəqəsi, həmçinin Ağdərə, Murovdağ və Zəngilan istiqamətlərində mühüm strateji yüksəkliklər işğaldan azad edilib. Qarabağın tacı Şuşa şəhərinin azad edilməsi və Ermənistanın kapitulyasiya aktını imzalamağa məcbur olması ilə müharibə başa çatıb.
Azərbaycanın döyüş meydanında qazandığı böyük qələbə siyasi müstəvidə də öz təsdiqini tapıb – Ermənistan Ağdam, Kəlbəcər və Laçın rayonlarını işğaldan azad etmək məcburiyyətində qalıb və bununla da tarixi ədalət bərpa olunub. Vətən müharibəsi Azərbaycanın qələbəsi ilə başa çatandan sonra Azərbaycan, Rusiya və Ermənistan liderlərinin imzaladığı üçtərəfli bəyanata əsasən, Laçın rayonu 2020-ci ilin dekabrın 1-də təhvil verilib.
30 illik işğal dövründə Ermənistan tərəfindən şəhərlərimiz, kəndlərimiz, qəsəbələrimiz viran edilib, mədəni irsimizə böyük zərbə vurulub, tarixi-mədəni və dini abidələrimiz, məscidlərimiz dağıdılaraq vandalizmə məruz qalıb. İşğaldan azad edilmiş Qarabağ və Şərqi Zəngəzur hazırda yenidən qurulur, ərazilər minalardan təmizlənir, sürətlə genişmiqyaslı bərpa və yenidənqurma işləri aparılır.
Məcburi köçkünlərin doğma yurdlarına dönüşü üçün Azərbaycan Prezidentinin 2022-ci il 16 noyabr tarixli 3587 nömrəli Sərəncamı ilə təsdiq edilmiş “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nın icrasına başlanılıb. Artıq Laçın şəhərinə məcburi köçkünlərin qayıdışına başlanılıb və bu istiqamətdə işlər davam etdirilir.
Bütün azad edilmiş ərazilərimiz kimi, ölkəmizin dilbər bölgələrindən biri olan, əsrarəngiz təbiət mənzərələri, gözəlliyi ilə seçilən, doğma sakinlərinə qovuşaraq azad günlərini yaşayan Laçın da genişmiqyaslı bərpa-quruculuq işlərinin məkanına çevrilib. Ardıcıl şəkildə aparılan bu işlər nəticəsində Laçın yeni inkişaf dövrünü yaşayır və gündən-günə daha da gözəlləşir

A.Abdullayev adına Alpı kənd tam orta ümumtəhsil məktəbinin müəllimi Əsgərova Şəbnəm

24/08/2026

Prezident İlham Əliyevin Özbəkistanın Milli İnformasiya Agentliyinə verdiyi müsahibə ilə əlaqədar

Prezident İlham Əliyevin Özbəkistanın Milli İnformasiya Agentliyinə verdiyi müsahibə həm də türk dünyasının gələcəyinə yönəlik yol xəritəsidir. Çünki müsahibədə səsləndirilən fikirlər Azərbaycanla Mərkəzi Asiya ölkələri, xüsusilə də Özbəkistan arasında yüksələn əməkdaşlığın miqyasını və dərinliyini açıq şəkildə ortaya qoyur. Müsahibə zamanı bir çox məsələlərə toxunan cənab Prezident qeyd edib ki, Azərbaycan və Mərkəzi Asiya ölkələrinin formalaşdırdığı tarixi, mədəni və geosiyasi məkan bu gün yeni reallıqların, yüksələn əməkdaşlıq dinamikasının təməlində dayanır. Xəzər dənizi isə bu böyük coğrafiyanın yalnız xəritədəki sərhədlərini deyil, xalqların strateji birliyini, iqtisadi gücünü və ortaq tarixini birləşdirən müqəddəs bir körpü rolunu oynayır. Prezident vurğulayıb ki, onu Mərkəzi Asiya Dövlət Başçılarının Məşvərət görüşünə etdiyi səfərlər Azərbaycanla region ölkələri arasında dərinləşən əməkdaşlığın simvoludur.
Müsahibədə Prezident son illər ərzində Azərbaycanla Mərkəzi Asiya ölkələri arasında yüksək səviyyəli səfərlərin əhəmiyyətini xüsusi qeyd edib. Bildirib ki, təkcə son üç ildə qardaş ölkələrin liderlərinin Azərbaycana 30 səfər etməsi və dövlət başçımızın həmin ölkələrə 13 rəsmi səfəri münasibətlərin sürətlə genişləndiyini nümayiş etdirir. Orta Dəhlizin aktuallığı artdıqca, bu əməkdaşlıq yeni iqtisadi və nəqliyyat imkanları yaradır və regionun qlobal əhəmiyyətini daha da gücləndirir. Bu kontekstdə Özbəkistan xüsusi yer tutur. Azərbaycan üçün qardaş ölkə olan Özbəkistanla münasibətlər bu gün ən yüksək müttəfiqlik səviyyəsinə çatıb. Prezident İlham Əliyev dövlət başçısı Şavkat Mirziyoyevlə səmimi dostluq münasibətlərinin ölkələr arasında strateji tərəfdaşlığın inkişafında mühüm rol oynadığını qeyd edib və bildirib ki, son bir il yarımda baş tutan beş yüksək səviyyəli səfər münasibətlərimizin səviyyəsinin sübutudur. Həmçinin Daşkənd və Bakı şəhərlərində keçirilən Ali Dövlətlərarası Şuranın iclasları iki ölkə münasibətlərinin inkişafında mühüm mərhələdir. İmzalanan sənədlər arasında Strateji tərəfdaşlığın möhkəmləndirilməsi haqqında Bəyannamə, Müttəfiqlik barədə Müqavilə, 2025–2029-cu illəri əhatə edən Yol Xəritəsi Azərbaycan–Özbəkistan əlaqələrinin sistemli, uzunmüddətli və dayanıqlı inkişafına zəmin yaradır.
Cənab Prezident qeyd edib ki, “Özbəkistanın Azərbaycanın ərazi bütövlüyünə göstərdiyi dəyişməz dəstək, Qarabağın bərpasına verdiyi töhfə, xüsusilə Füzulidə Mirzə Uluqbəy adına məktəbin tikintisi – qardaşlıq münasibətlərinin sarsılmaz nümunəsidir. Bu, sadəcə bir tikili deyil, xalqlarımız arasındakı sevgi və hörmətin canlı rəmzidir.”
Ölkə başçısı bildirib ki, “İqtisadi-ticari əməkdaşlıq sahəsində əldə olunan nəticələr xüsusi diqqət çəkir. 2024-cü ildə 252 milyon dollar olan ticarət dövriyyəsinin 2025-ci ildə 87,5 faiz artaraq 319 milyon dollara çatması dinamikanın sürətini göstərir. Bu sahədə qarşılıqlı sərmayələr də genişlənir. Artıq Azərbaycanda 120-dən çox özbək şirkəti fəaliyyət göstərir, iki ölkə arasında yaradılan 500 milyon dollarlıq investisiya şirkəti isə gələcək iri layihələr üçün möhkəm bazadır. Həmçinin Xankəndidə açılan birgə tikiş fabriki həm iqtisadi, həm də mədəni baxımdan yeni əməkdaşlıq mərhələsini simvolizə edir. Əlavə olaraq, nəqliyyat-logistika sahəsində əməkdaşlıq iki ölkəni Avrasiya məkanında mühüm tərəfdaş edir. Orta Dəhliz çərçivəsində Azərbaycan Özbəkistan üçün əsas tranzit ölkəyə çevrilib. 2024-cü ildə daşımaların həcminin 18 faiz artaraq 1,3 milyon tona çatması bu potensialı aydın göstərir. Ələt Beynəlxalq Ticarət Limanı, Bakı-Tbilisi-Qars dəmir yolu, geniş ticarət donanması və 9 beynəlxalq hava limanı Azərbaycanın bu rolunu daha da möhkəmləndirir. Zəngəzur dəhlizinin açılması isə bütün Mərkəzi Asiya regionu üçün yeni nəfəs olacaq. Hətta hava əlaqələrinin genişləndirilməsi – Bakı-Daşkənd, Bakı-Səmərqənd, Bakı-Ürgənc və Daşkənd-Bakı arasında müntəzəm reyslər – xalqlarımızı daha da yaxınlaşdıran mühüm addımlardır.”
Cənab Prezident vurğulayıb ki, “Biz ortaq tarixi və mədəni dəyərləri qorumaq, bütün səviyyələrdə sıx əməkdaşlıq etmək üçün birgə səylər göstəririk. Belə ki, 2023-cü ildə Azərbaycanda Özbəkistan Mədəniyyəti Günləri, 2024-cü ildə isə Özbəkistan Elm və Mədəniyyət Günləri keçirilib. Elə həmin il Özbəkistanda Azərbaycan Mədəniyyəti Günləri, Xivə şəhərində isə “Şuşa günləri” təşkil olunub. Bu tədbirlər xalqlarımızın zəngin mədəni irslərini bölüşmək, qarşılıqlı anlaşmanı dərinləşdirmək və bir-birinin mənəvi məkanını qarşılıqlı şəkildə zənginləşdirmək istəyini əks etdirir. Ölkələrimizin regionları arasında əməkdaşlığa xüsusi diqqət yetirilir. İsmayıllı-Riştan, Şuşa-Xivə, Lənkəran-Buxara, Şəki-Kokand, Biləsuvar-Termez, Mingəçevir-Namanqan, Füzuli-Gülüstan, Quba-Cizak və Beyləqan-Şəhrisəbz şəhərləri arasında qardaşlaşma və tərəfdaşlıq münasibətləri qurulub. Bu cür regionlararası əlaqələrin fəallaşması xalqların yaxınlaşmasına, təcrübə mübadiləsinin aparılmasına və əməkdaşlığın mədəni-humanitar gündəliyinin möhkəmləndirilməsinə kömək edir. Ölkələrimiz arasında dostluğun rəmzi ifadəsi mədəni əhəmiyyəti olan obyektlərdir: Daşkənddə Heydər Əliyev meydanı var və bu ilin iyulunda Bakıda “Özbəkistan” parkının təməli qoyulub. Fürsətdən istifadə edərək, həmçinin Azərbaycan xalqının Ümummilli Lideri, özbək xalqına həmişə böyük sevgi hissləri bəsləyən Heydər Əliyevin xatirəsinə göstərilən ehtiram və həqiqətən qardaşlıq münasibətinə görə Özbəkistan rəhbərliyinə, bütün qardaş xalqa minnətdarlığımı bildirmək istəyirəm. Həmçinin idman sahəsində əməkdaşlıqda yaxşı nəticələr var. İki ölkənin birgə səyləri sayəsində FIFA İcraiyyə Komitəsi 2027-ci ildə keçiriləcək futbol üzrə U-20 Dünya çempionatının final mərhələsini Azərbaycanda və Özbəkistanda təşkil etmək qərarına gəlib. Bu, Avropa ilə Asiyanı birləşdirəcək ortaq tarixi nailiyyətdir.”

A.Abdullayev adına Alpı kənd tam orta ümumtəhsil məktəbinin müəllimi Niyazova İlahə

22/08/2026

Azərbaycan Respublikasının Təhsil İnstitutu Müəllimlərin işə qəbulu müsabiqəsinin (MİQ) və təhsilverənlərin sertifikatlaşdırılması prosesinin Azərbaycan və rus bölməsi üzrə müsahibə mövzularını təqdim edir.

Aşağıdakı keçidə daxil olaraq müsahibə mövzuları ilə tanış ola bilərsiniz:

https://arti.edu.az/2026/08/21/miq-v%C9%99-t%C9%99hsilver%C9%99nl%C9%99rin-sertifikatlasdirilmasi-prosesinin-az%C9%99rbaycan-v%C9%99-rus-bolm%C9%99si-uzr%C9%99-musahib%C9%99-movzulari/

17/08/2026

📢 Şagirdlərin elektron yerdəyişməsi prosesinə başlanılır

🗓️ 20 avqust saat 15:00-dan etibarən 2026–2027-ci tədris ili üzrə şagirdlərin elektron yerdəyişməsi prosesi aktivləşdiriləcək. Proses 2–9-cu və 11-ci sinif şagirdlərini əhatə edəcək.

💻 Şagirdlərin elektron yerdəyişməsi sy.edu.az portalı vasitəsilə həyata keçirilir.

📌 Nəzərinizə çatdırırıq ki, internetə çıxış imkanı olmayan vətəndaşlar yerdəyişmə prosesi ilə bağlı aidiyyəti üzrə Agentliyin və təhsili yerli idarəetmə bölmələrinin çağrı mərkəzlərinə, Agentliyin Vətəndaşlara Xidmət Mərkəzinə, eləcə də ASAN xidmət mərkəzlərinə müraciət edə bilərlər.

17/08/2026

📢 Orta ixtisas təhsil müəssisələrinə təhsilalanların qeydiyyatı prosesinə başlanılır!

❗Qeydiyyat prosesi my.gov.az platforması üzərindən 19 avqust saat 15:00 - 31 avqust saat 18:00 tarixləri aralığında həyata keçiriləcək.

Müraciət edəcək şəxslərdən aşağıdakı məlumatları nəzərə almaları xahiş olunur:

▶️ Tələbə qəbulu üçün qeydiyyat yalnız my.gov.az platforması vasitəsilə aparılır.
▶️ Şəkilsiz köhnə nəsil şəxsiyyət vəsiqəsi olan şəxslər my.gov.az-da qeydiyyatdan keçmək üçün şəxsiyyət vəsiqəsini yeniləməlidirlər.
▶️ 15 yaşına çatmamış vətəndaşlar my.gov.az-da şəxsi kabinetlərini "SİMA rəqəmsal imza" ilə açmalıdırlar.

15/08/2026

Prezident İlham Əliyevin 11 avqust 2026-cı il tarixində Naxçıvana səfəri zamanı Azərbaycan televiziyasına verdiyi müsahibə ilə əlaqədar

Prezident İlham Əliyevin avqustun 11-də Naxçıvan Muxtar Respublikasına sayca 17-ci səfəri regionun təhlükəsizliyi, iqtisadi inkişafı və Azərbaycanın ümumi geoiqtisadi strategiyasında oynadığı rol baxımından strateji dönüş nöqtəsi kimi qiymətləndirilə bilər. Dövlət başçısının səfər zamanı iştirak etdiyi açılışlar və verdiyi bəyanatlar səfərin əsas strateji və regional əhəmiyyətini ifadə edir. Hazırda bölgədə hərbi və təhlükəsizlik siyasətinin gücləndirilməsi xüsusi diqqət mərkəzindədir. Naxçıvanda komando hərbi hissələrinin yaradılması da bunu təsdiqləyir. Əlahiddə Ümumqoşun Orduda yeni komando bölmələrinə Döyüş bayraqlarının verilməsi Naxçıvanın müdafiə qabiliyyətinin ən müasir standartlara çatdırılmasının göstəricisidir. Bununla da, Azərbaycan Silahlı Qüvvələrinin bölgədə söz sahibi olması mesajı bir daha verildi və Muxtar Respublikanın təhlükəsizliyinin sarsılmazlığı nümayiş etdirildi.
Alternativ enerji potensialının gücləndirilməsi də dövlətimizin siyasətində prioritetdir.
Bu baxımdan, Naxçıvanın da yaşıl enerji zonası elan olunması xüsusi vurğulanmalıdır. Təsadüfi deyil ki, bu gün yaşıl enerjinin Avropaya ixracı yeni hədəflər sırasındadır. Dövlət başçısının “Şəms 1” və “Qərbi Üfüq” stansiyalarındakı işlərlə tanışlığı da Naxçıvanın ölkədə günəş enerjisi istehsalı üçün ən əlverişli məkan olduğunu təsdiqlədi. Bu tipli layihələrin icrası Avropaya enerji çıxışını sürətləndirəcək. Bu mənada, Naxçıvan üzərindən Avropaya elektrik enerjisinin ixracı hədəflərinin reallaşdırılması imkanları böyükdür.
Beləliklə, dövlət başçısının səfəri Naxçıvanı sadəcə təbii coğrafi təcriddən çıxarmaqla qalmır, həm də onu regionun hərbi cəhətdən keçilməz qalasına, logistik mərkəzinə və gələcəyin “yaşıl enerji” mərkəzinə çevirmək məqsədi naminə dövlətimizin siyasi iradəsini birmənalı şəkildə ortaya qoyur.

A.Abdullayev adına Alpı kənd tam orta ümumtəhsil məktəbinin müəllimi Əsgərova Şəbnəm

14/08/2026

📢 Hörmətli valideynlər və əziz şagirdlər!

Azərbaycan Respublikası Nazirlər Kabinetinin 17 mart 2022-ci il tarixli qərarına əsasən, dövlət ümumi təhsil müəssisələrində vahid məktəbli geyim forması tətbiq edilir.

📌 2026–2027-ci tədris ilində də əvvəlki illərdə təsdiq edilmiş məktəbli geyim forması qüvvədə qalacaqdır.

Bütün şagirdlərdən məktəbli geyim formasına riayət etmələri xahiş olunur.

11/08/2026

11/08/2026

📢 Ümumi təhsil müəssisələrinin məzunlarına elektron attestatlar təqdim olunur

🎓 2025–2026-cı tədris ilindən etibarən ümumi təhsil müəssisələrinin məzunlarına təhsil haqqında dövlət sənədləri ilk dəfə elektron formatda təqdim olunur. Belə ki, 2026-cı il məzunları attestatlarını artıq myGov platformasından əldə edə bilərlər.

📊 Yeni tətbiq çərçivəsində təxminən 300 min məzunun attestatı elektron sənəd formasında hazırlanıb. Təhsil müəssisələrinin rəhbərləri tərəfindən elektron imza ilə təsdiqlənmiş attestatlar artıq myGov platformasında əlçatandır.

💻 Məzunlar elektron attestatlarını myGov (web) → “Təhsil məlumatlarım” → “Elektron təhsil sənədlərim” bölməsindən əldə edə bilərlər. Valideynlər isə övladlarına aid təhsil sənədlərinə “Övladlarımın təhsil sənədləri və məlumatları” bölməsi vasitəsilə baxa bilərlər.

🔎 Elektron attestatın üzərindəki QR kodu oxutmaqla və ya edu.gov.az saytının “Sənəd yoxlama” bölməsində sənədin nömrəsi və doğum tarixini daxil etməklə attestatın həqiqiliyini yoxlamaq mümkündür.

📌 Qeyd edək ki, elektron attestatların yaxın günlərdə myGov mobil tətbiqində də əlçatan olması təmin ediləcək.

🎯 Elektron attestatların tətbiqi məzunlara təhsil sənədlərini daha rahat, operativ və əlçatan şəkildə əldə etmək imkanı yaradır.

11/08/2026

📢 Təhsil sənədləri artıq myGov-da!

💻 Təhsil haqqında dövlət nümunəli sənədlər artıq mygov platformasında əlçatandır.

🎓 2026-cı il məzunları təhsil müəssisələri tərəfindən imzalanmış elektron təhsil sənədlərini mygov (web) → “Təhsil məlumatlarım” → “Elektron təhsil sənədlərim” bölməsindən əldə edə bilərlər.

📌 Elektron sənədin üzərindəki QR kodu oxudaraq və ya edu.gov.az saytının “Sənəd yoxlama” bölməsində sənədin nömrəsi və doğum tarixini daxil etməklə sənədin həqiqiliyini yoxlamaq mümkündür.

📱 Yaxın günlərdə elektron təhsil sənədləri mygov mobil tətbiqində də əlçatan olacaq.

🎯Təhsil sənədləri artıq rəqəmsal formatda — daha rahat və əlçatan.