Nizami Sərxanov adına 256 nömrəli tam orta ümumtəhsil məktəbi

13/06/2026

08/06/2026

Şagirdlər Şahmat Yarışında Bacarıqlarını Nümayiş Etdiriblər

Ayın İdman Növü Aylığı çərçivəsində məktəbin 5-ci və 6-cı sinif şagirdləri arasında şahmat yarışı keçirilib.

Yarışın əsas məqsədi şagirdlərdə məntiqi düşünmə bacarıqlarını inkişaf etdirmək, onların intellektual potensialını üzə çıxarmaq və şahmat idman növünə marağı artırmaq olub.

Məktəbin fiziki tərbiyə müəllimi Nihat Dadaşovun təşkilatçılığı ilə keçirilən yarışda şagirdlər yüksək fəallıq nümayiş etdirərək maraqlı mübarizə aparıblar. Yarış iştirakçıları strateji düşüncə və diqqət bacarıqlarını nümayiş etdirərək rəqabət şəraitində öz qüvvələrini sınayıblar.

Sonda fərqlənən şagirdlər müəyyənləşdirilib və onların uğurları təqdir olunub.

07/06/2026

Məktəbli Kimyaçılar layihəsinin bağlanış mərasimi keçirilib

04.06.2026-cı il tarixində 256, 262 və 119 nömrəli tam orta ümumtəhsil məktəblərin şagirdlərinin iştirakı ilə “Məktəbli Kimyaçılar” layihəsinin bağlanış mərasimi keçirilib.

Tədbirdə layihə müddətində həyata keçirilən fəaliyyətlər, əldə olunan nailiyyətlər və şagirdlərin qazandıqları bilik və bacarıqlar təqdim olunub. Məktəbimizin kimya müəllimi Sarışın Yaşarqızı layihə müəllimi olaraq fəal iştirak edib, şagirdlərin kimya elminə marağının artırılması istiqamətində göstərdiyi səmərəli fəaliyyətə görə təşəkkür və rəğbətlə qarşılanıb.

Layihə çərçivəsində şagirdlər müxtəlif təcrübələr aparıb, elmi araşdırmalar həyata keçirib və kimya sahəsində nəzəri biliklərini praktik fəaliyyətlərlə möhkəmləndiriblər. Bağlanış mərasimində iştirakçılara sertifikatlar təqdim olunub, layihənin əhəmiyyəti və gələcək perspektivləri barədə çıxışlar edilib.

Tədbir şagirdlərin elmə olan marağının daha da artırılmasına, onların tədqiqatçılıq bacarıqlarının inkişafına mühüm töhfə verib.

07/06/2026

Məktəb Həyətində Mütaliə Günü

Məktəbin 3b sinif rəhbəri Bəsti Rəsulovanın təşəbbüsü ilə şagirdlərin asudə vaxtlarının səmərəli təşkili məqsədilə məktəbin həyətində kitab mütaliəsi təşkil edilmişdir. Tədbirin əsas məqsədi şagirdlərdə mütaliə vərdişlərini inkişaf etdirmək, onların dünyagörüşünü zənginləşdirmək və kitaba marağını artırmaq olmuşdur.

Şagirdlər açıq havada, məktəbin yaşıllıqlarla əhatə olunmuş həyətində müxtəlif mövzularda kitablar oxumuş, oxuduqları əsərlər barədə fikir mübadiləsi aparmışlar. Mütaliə zamanı uşaqlar həm maraqlı məlumatlar əldə etmiş, həm də vaxtlarını faydalı və mənalı şəkildə keçirmişlər.

Belə tədbirlər şagirdlərin intellektual inkişafına müsbət təsir göstərməklə yanaşı, onların müstəqil düşünmə, düzgün oxu və nitq bacarıqlarının formalaşmasına da xidmət edir. Tədbir şagirdlər tərəfindən böyük maraq və həvəslə qarşılanmışdır.

07/06/2026

Məktəb Həyətində Abadlıq İşləri Həyata Keçirilib

Məktəbimizdə şagirdlərin iştirakı ilə abadlıq və yaşıllaşdırma işləri təşkil olundu. Tədbirin əsas məqsədi məktəb ərazisinin daha səliqəli, gözəl və ekoloji cəhətdən sağlam mühitə çevrilməsinə töhfə vermək idi.

Şagirdlər məktəb həyətində müxtəlif rəngləmə işləri apararaq hasarları, gül qablarını və digər dekorativ elementləri yenidən boyadılar. Görülən işlər nəticəsində məktəb həyəti daha baxımlı və estetik görünüş qazandı.

Abadlıq tədbiri çərçivəsində güllərin əkilməsi üçün gül qabları hazırlanıb rəngləndirildi, mövcud yaşıllıqlara qulluq göstərildi və ərazi təmizləndi. Şagirdlər böyük həvəslə çalışaraq məktəbin gözəlləşdirilməsinə öz töhfələrini verdilər.

Belə tədbirlər şagirdlərdə əməyə hörmət, ətraf mühitə qayğı və kollektiv fəaliyyət bacarıqlarının formalaşmasına xidmət edir. Məktəbimizin abadlaşdırılması istiqamətində görülən işlər bundan sonra da davam etdiriləcəkdir.

07/06/2026

X siniflərdə Böyük Summativ Qiymətləndirmə Keçirilib

Məktəbin illik fəaliyyət planına uyğun olaraq Böyük Summativ Qiymətləndirmə (BSQ) X siniflərdə təşkil edilmişdir. Qiymətləndirmənin keçirilməsində əsas məqsəd şagirdlərin tədris ili ərzində əldə etdikləri bilik, bacarıq və vərdişlərin qiymətləndirilməsi, təlim nəticələrinin müəyyənləşdirilməsi və tədris prosesinin səmərəliliyinin yoxlanılması olmuşdur.

BSQ məktəbdaxili qiymətləndirmə qaydalarına uyğun şəkildə hazırlanmış, şagirdlər üçün bərabər və şəffaf şərait yaradılmışdır. Qiymətləndirmə prosesinə nəzarət edilmiş, nəticələrin obyektivliyi təmin olunmuşdur.

Qiymətləndirmənin nəticələri təhlil edilərək müvafiq tədbirlərin görülməsi və tədrisin keyfiyyətinin daha da yüksəldilməsi istiqamətində istifadə olunacaqdır.

05/06/2026

“Zərərli Vərdişlər və İnsan Alveri” mövzusunda maarifləndirici tədbir keçirilib

Məktəbin psixoloqu Günel Məmmədova tərəfindən şagirdlərlə “Zərərli Vərdişlər və İnsan Alveri” mövzusunda maarifləndirici tədbir keçirilib.
Tədbir zamanı şagirdlərə zərərli vərdişlərin insan sağlamlığına, psixoloji vəziyyətinə və sosial həyatına mənfi təsirləri barədə ətraflı məlumat verilib. Həmçinin insan alverinin mahiyyəti, onun yaratdığı təhlükələr, insan alverinin qurbanına çevrilməmək üçün diqqət edilməli məqamlar və təhlükəsizlik qaydaları izah olunub.

Görüş zamanı şagirdlərlə mövzu ətrafında fikir mübadiləsi aparılıb, onları maraqlandıran suallar cavablandırılıb. Tədbirin əsas məqsədi şagirdlər arasında maarifləndirmə işinin gücləndirilməsi, sağlam həyat tərzinin təşviqi və onların müxtəlif risklərdən qorunmasına dəstək olmaq olub.

05/06/2026

Siniflərdə profilaktik tibbi baxış keçirilib

Məktəbin tibb bacısı Babayeva Lübuzə tərəfindən aparılan baxış zamanı şagirdlərin sağlamlıq vəziyyəti yoxlanılmış, onlara şəxsi gigiyena qaydalarına riayət etməyin vacibliyi barədə tövsiyələr verilmişdir. Eyni zamanda, şagirdlərlə sağlam həyat tərzi mövzusunda maarifləndirici söhbət aparılmış, düzgün qidalanma, fiziki aktivlik, zərərli vərdişlərdən uzaq durma və gündəlik rejimə əməl etməyin əhəmiyyəti haqqında ətraflı məlumat verilmişdir.

Tədbirin əsas məqsədi şagirdlərin sağlamlığının qorunmasına diqqətin artırılması, onlarda sağlam həyat tərzi vərdişlərinin formalaşdırılması və xəstəliklərin profilaktikası sahəsində məlumatlılığın yüksəldilməsi olmuşdur.