Xidmət Sahələri üzrə Sumqayıt Dövlət Peşə Təhsil Mərkəzi

28 May - Müstəqillik Günü xalqımızın milli qürur və birliyinin simvoludur!🇦🇿

Qurban bayramınız mübarək!

🇦🇿 Xidmət Sahələri üzrə Sumqayıt Dövlət Peşə Təhsil Mərkəzinin tələbələri 28 May – Müstəqillik Günü münasibətilə təşkil olunan “Azərbaycan bu dünyanın incisi” adlı tədbirdə iştirak ediblər.

Əvvəlcə Azərbaycan Respublikasının Dövlət Himni səsləndirilib, müstəqillik uğrunda canından keçən qəhrəmanların əziz xatirəsi ehtiramla yad olunub.

Tədbirin aparıcıları Turanə Vəliyeva və Əlipaşa Paşayev çıxışlarında bildiriblər ki, Şərqdə ilk demokratik parlamentli respublika olan Azərbaycan Xalq Cümhuriyyətinin yaradılması xalqımızın milli dövlətçilik tarixində mühüm və qürurverici mərhələdir. Qeyd olunub ki, cəmi 23 ay fəaliyyət göstərməsinə baxmayaraq, Cümhuriyyət dövlət quruculuğu, milli kimliyin formalaşdırılması və demokratik dəyərlərin təşəkkülü istiqamətində mühüm addımlar ataraq tariximizdə silinməz iz qoyub.

Tədbirin bədii hissəsi iştirakçılara xoş ovqat bəxş edib. “Şəms” instrumental ansamblının ifaları, solist Kərim Rəhmanovun çıxışı, eləcə də müğənnilər Tünzalə Məmmədova, Zaur Yusifli, Kamil Ağazadə və Xəyal Cəbrayıllının təqdim etdikləri musiqi nömrələri tamaşaçılar tərəfindən maraqla qarşılanıb. Həmçinin “Veteranlar” xalq xorunun və bədii qiraət dərnəyinin üzvlərinin çıxışları tədbirə xüsusi rəng qatıb.

“QANAD” sosial layihəsi çərçivəsində şagirdlərin peşə təhsilinə istiqamətləndirilməsi, eləcə də qəbul prosesi barədə məlumatlılıq səviyyəsinin artırılması məqsədilə Xidmət Sahələri üzrə Sumqayıt Dövlət Peşə Təhsil Mərkəzi növbəti maarifləndirici görüşdə iştirak edib.

Görüş 10 nömrəli Sanatoriya tipli internat məktəbinin şagirdlərinin iştirakı ilə keçirilib. Tədbirin əsas məqsədi şagirdlərə peşə təhsilinin üstünlükləri, əmək bazarında tələb olunan ixtisaslar, gələcək karyera imkanları və təhsil istiqamətləri barədə ətraflı məlumat verməkdən ibarət olub.

Görüş zamanı iştirakçılara mərkəzin fəaliyyəti, tədris imkanları, ixtisas seçimləri və tələbələr üçün yaradılmış şərait barədə geniş məlumat təqdim edilib. Eyni zamanda, mərkəzin fəaliyyətini və tədris prosesini əks etdirən videoçarx nümayiş olunub. Videoçarx şagirdlər tərəfindən maraqla qarşılanıb və onların peşə təhsilinə dair təsəvvürlərinin formalaşmasına töhfə verib.

Tədbir çərçivəsində şagirdlərlə interaktiv müzakirələr aparılıb, onları maraqlandıran suallar cavablandırılıb, qəbul qaydaları, təhsil müddəti və gələcək məşğulluq imkanları barədə ətraflı izahat verilib.

📌 Xidmət Sahələri üzrə Sumqayıt Dövlət Peşə Təhsil Mərkəzinin “Aşpaz” ixtisası üzrə təhsil alan I kurs tələbələri istehsalat təlimi dərsinin tədrisini “La Chateau” restoranının mətbəxində həyata keçiriblər.

“Şəhərsalma və Memarlıq İli” çərçivəsində Xidmət Sahələri üzrə Sumqayıt Dövlət Peşə Təhsil Mərkəzinin tələbələri “Gələcəyə Körpü Qururuq” adlı tədbirdə iştirak ediblər.

Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Ümummilli Lider Heydər Əliyevin və Azərbaycanın ərazi bütövlüyü və suverenliyi uğrunda canlarından keçmiş şəhidlərin əziz xatirəsi bir dəqiqəlik sükutla yad olunub.

Tədbirdə YAP Sumqayıt şəhər təşkilatının sədr müavini Cavid Məmiyev, Milli Məclisin deputatı, YAP İdarə Heyətinin üzvü Elnarə Akimova, “Modern İnkişaf və Ailə” İctimai Birliyinin sədri, YAP Veteranlar Şurasının üzvü Zərifə Quliyeva və YAP Gənclər Birliyinin sədr müavini Sevinc Qasımova çıxış edərək mövzu ilə bağlı fikirlərini bölüşüblər.

Panel müzakirəsi zamanı tələbələrin şəhərsalma, memarlıq, ailə dəyərləri, sağlam mühit və gənclər siyasəti ilə bağlı fikir və təkliflərini səsləndirmələri üçün şərait yaradılıb. İştirakçıların sualları cavablandırılıb, mövzu ətrafında geniş fikir mübadiləsi aparılıb.

📌Xidmət Sahələri üzrə Sumqayıt Dövlət Peşə Təhsil Mərkəzinin “Dərzi” ixtisası üzrə təhsil alan tələbələrinin istehsalat təcrübəsi dərsləri Təhsil Proqramlarına (Kurikulum) əsasən “Sumqayıt Tekstil” MMC-də həyata keçirilir.

Prezident İlham Əliyevin Azərbaycan Respublikasında 2026-cı ilin “Şəhərsalma və Memarlıq İli” elan edilməsi haqqında imzaladığı Sərəncama uyğun olaraq Xidmət Sahələri üzrə Sumqayıt Dövlət Peşə Təhsil Mərkəzinin tələbələri “Azərbaycanın memarlıq xəzinəsi” adlı sərgi-tədbirdə iştirak ediblər.

Mədəni İrsin Qorunması, İnkişafı və Bərpası üzrə Dövlət Xidmətinin Şabran Regional İdarəsi və Sumqayıt şəhəri Corat qəsəbə bələdiyyəsinin birgə təşkilatçılığı ilə keçirilən tədbir Sumqayıt şəhərinin yeni aşkar olunmuş abidələr siyahısına daxil edilmiş, XVI əsrə aid olduğu ehtimal edilən Hacı Məcid hamamında təşkil olunub.

Tələbələr tədbir çərçivəsində sərgi ilə tanış olub, həmçinin Hacı Məcid hamamı ərazisində təşkil olunan ekskursiyada iştirak ediblər.

Azərbaycan mədəni irsi, milli memarlıq ənənələri və Hacı Məcid hamamının tarixi barədə tələbələrə ətraflı məlumat təqdim olunub.

📌 Xidmət Sahələri üzrə Sumqayıt Dövlət Peşə Təhsil Mərkəzinin tələbələri Azərbaycan Yazıçılar Birliyinin katibi, Xalq yazıçısı Çingiz Abdullayev ilə keçirilən görüşdə iştirak ediblər.

Görüşün əsas məqsədi tələbələrin ədəbi dünyagörüşünün genişləndirilməsi, müasir Azərbaycan ədəbiyyatına marağın artırılması və tanınmış qələm sahibi ilə birbaşa ünsiyyət imkanlarının yaradılması olub.

Tədbir zamanı Çingiz Abdullayev öz zəngin həyat yolu, yaradıcılıq fəaliyyəti, yazıçılıq təcrübəsi və əsərlərinin yaranma prosesi haqqında ətraflı məlumat verib, uğura aparan yolun əsas prinsiplərini tələbələrlə bölüşüb. O, gənclərə mütaliənin əhəmiyyətini xüsusi vurğulayaraq, onların daim öz üzərində çalışmasının vacibliyini qeyd edib.

Görüş interaktiv formatda təşkil olunub, tələbələr yazıçıya ünvanladıqları suallar vasitəsilə onun yaradıcılığı və şəxsi təcrübəsi barədə daha dolğun məlumat əldə ediblər.

📌Xidmət Sahələri üzrə Sumqayıt Dövlət Peşə Təhsil Mərkəzində riyaziyyat fənni üzrə “Konusun həcmi” mövzusunda açıq dərs təşkil olunub.

Açıq dərs mərkəzin riyaziyyat müəllimi Kəmalə Quliyeva tərəfindən müasir təlim metodlarına əsaslanaraq hazırlanıb. Dərs prosesində mövzuya dair nəzəri biliklər şagirdlərə aydın və sistemli şəkildə izah edilib, eyni zamanda müxtəlif praktiki tapşırıqlar və interaktiv üsullar vasitəsilə onların mövzunu mənimsəmə səviyyəsi artırılıb.

Dərsin sonunda pedaqoji heyətin iştirakı ilə dəyirmi masa ətrafında müzakirə təşkil olunub. Müzakirələr zamanı açıq dərsin məqsəd və vəzifələrinə uyğun olaraq əldə olunan nəticələr təhlil edilib, istifadə olunan metod və vasitələrin effektivliyi ətraflı şəkildə qiymətləndirilib.

Aparılan təhlillər əsasında açıq dərs ümumilikdə qənaətbəxş hesab olunub, eyni zamanda dərs prosesində müşahidə olunan bəzi nöqsanlar və gələcəkdə təkmilləşdirilməsi zəruri hesab edilən məqamlar qeyd edilib.