Şamaxı Dövlət Regional Kolleci

21/08/2026

Strateji Tərəfdaşlıq və Zirvə Müttəfiqliyi: Azərbaycan-Özbəkistan Əlaqələri Yeni Mərhələdə
​Prezident İlham Əliyevin Özbəkistanın Milli İnformasiya Agentliyinə verdiyi müsahibə iki qardaş ölkə arasındakı strateji tərəfdaşlığın və hərtərəfli əməkdaşlığın miqyasını, eləcə də gələcək perspektivlərini geniş şəkildə əhatə edir.
​Ortaq tarixə, mədəniyyətə, dil və mənəvi dəyərlərə, həmçinin xalqlarımızın əsrlərlə davam etdirdiyi dərin qarşılıqlı rəğbətə əsaslanan münasibətlərimiz bu gün ən yüksək pilləyə — müttəfiqlik səviyyəsinə yüksəlmişdir. İki ölkənin dövlət başçılarının qətiyyətli siyasi iradəsi və səmimi dostluq münasibətləri bu bağların möhkəmlənməsində həlledici rol oynayır.
​Əsas istiqamətlər və əldə olunan nailiyyətlər:
​• Siyasi dialoq və liderlərin rolu: Son beş ildə ən yüksək səviyyədə müntəzəm 15 qarşılıqlı səfər və sıx təmaslar həyata keçirilmişdir. 2024-cü ilin avqustunda Azərbaycandan Özbəkistana dövlət səfəri, 2025-ci ilin iyulunda isə Özbəkistan Prezidentinin Azərbaycana dövlət səfəri baş tutmuşdur. İmzalanan “Strateji tərəfdaşlığın dərinləşdirilməsi haqqında Bəyannamə” və “Müttəfiqlik münasibətləri haqqında Müqavilə” iki suveren dövlət arasındakı münasibətləri rəsmi olaraq ən yüksək səviyyəyə qaldırmışdır. 2023-cü ildə təsis edilmiş Ali Dövlətlərarası Şura isə uzunmüddətli əməkdaşlıq prioritetlərini müəyyənləşdirən mühüm institusional mexanizmə çevrilmişdir.
• İqtisadiyyat, ticarət və investisiyalar: İki ölkə arasında iqtisadi-ticari əlaqələr dinamik şəkildə inkişaf edir. 2025-ci ildə ticarət dövriyyəsi əvvəlki illə müqayisədə üç dəfədən çox artaraq 795 milyon dollar təşkil etmişdir. 2026-cı ilin yanvar-may aylarında da bu artım davam edərək ötən ilin müvafiq dövrü ilə müqayisədə 33 faiz artımla 144 milyon dollara çatmışdır. Ümumi kapitalı 500 milyon dollar olan Azərbaycan-Özbəkistan İnvestisiya Şirkəti müxtəlif sektorlardakı perspektivli layihələrin maliyyələşdirilməsinə mühüm töhfə verir. Azərbaycanda Özbəkistan investisiyalı 130-dan çox kommersiya təşkilatı uğurla fəaliyyət göstərir, eyni zamanda Azərbaycanın “PASHA Holding” şirkəti tərəfindən Daşkənddə “The Ritz-Carlton” hotel və yaşayış kompleksi, həmçinin Daşkənd vilayətində “Sea Breeze Uzbekistan” turizm və yaşayış kompleksi kimi irimiqyaslı layihələr həyata keçirilir.
• Tranzit daşımaları və birgə istehsal: 2025-ci ildə tranzit daşımalarının həcmi 6,7 faiz artaraq 1,4 milyon tona çatıb, 2026-cı ilin yanvar-iyun aylərində isə 12,2 faizlik artımla 675 min ton təşkil edib. İşğaldan azad edilmiş Füzuli rayonunda 100 hektarlıq “Dostluq bağı” nar bağının salınması, həmçinin “Chevrolet” (10 720 ədəd) və “Isuzu” (275 ədəd) avtomobillərinin istehsalı sahəsində əməkdaşlıq uğurla davam edir.
• Energetika və yaşıl dəhliz: Energetika sektorunda “Neftegaztexnologiya” və “Turan Energy AFEZCO” birgə müəssisələri fəaliyyət göstərir. 2025-ci ildə Azərbaycan, Qazaxıstan və Özbəkistan tərəfindən Bakıda təsis edilən “Yaşıl Dəhliz Birliyi” MMC Xəzər dənizinin dibi ilə bərpaolunan enerji ixracını əlaqələndirmək məqsədi daşıyır. Eyni zamanda, Çin-Qırğızıstan-Özbəkistan dəmir yolu layihəsinin Orta Dəhliz və TRIPP ilə inteqrasiyası yeni iqtisadi və tranzit imkanları açır.
• Mədəni-humanitar bağlar və təhsil: Özbəkistanın təşəbbüsü ilə Füzuli şəhərində inşa edilən Mirzə Uluqbəy adına orta məktəb, Bakının mərkəzində təməli qoyulmuş 5 hektarlıq “Özbəkistan” parkı və Özbəkistan Milli Pedaqoji Universitetinin dahi Azərbaycan şairi Nizami Gəncəvinin adını daşıması xalqlarımızın qardaşlığının əyani təzahürüdür. Özbəkistandan Azərbaycana gələn turistlərin sayı illik əsasda durmadan artır, həmçinin iki ölkənin bir çox şəhərləri (Bakı-Daşkənd, İsmayıllı-Riştan, Şuşa-Xivə, Lənkəran-Buxara və s.) arasında qardaşlaşmış şəhər münasibətləri qurulmuşdur. QHT-lər üçün elan edilən ilk birgə qrant müsabiqəsi isə humanitar əməkdaşlığı daha da dərinləşdirir.
• Türk dünyası və regional inteqrasiya: Azərbaycan və Özbəkistan Türk Dövlətləri Təşkilatı (TDT) çərçivəsində sıx əməkdaşlıq edərək Türk dünyasının gücünün artmasına xidmət edirlər. Özbəkistanın 2025-ci ildə Türk Mədəniyyəti və İrsi Fondunun tamhüquqlu üzvü qəbul edilməsi ortaq irsin qorunmasında mühüm addım olmuşdur. Eyni zamanda, Azərbaycanın Mərkəzi Asiya Dövlət Başçılarının Məşvərət görüşlərində tamhüquqlu iştirakı ilə ənənəvi “C5” formatı “C6” formatına çevrilmişdir ki, bu da Avrasiya məkanında sabitliyə mühüm töhfə verir.
​Xalqlarımızın qarşılıqlı səyləri və dövlət başçılarının birgə dəstəyi ilə Azərbaycan-Özbəkistan müttəfiqlik münasibətləri bundan sonra da uğurla inkişaf edəcək və xalqlarımızın rifahına xidmət edəcəkdir.
​

19/08/2026

17/08/2026

📢 Orta ixtisas təhsil müəssisələrinə təhsilalanların qeydiyyatı prosesinə başlanılır!

❗Qeydiyyat prosesi my.gov.az platforması üzərindən 19 avqust saat 15:00 - 31 avqust saat 18:00 tarixləri aralığında həyata keçiriləcək.

Müraciət edəcək şəxslərdən aşağıdakı məlumatları nəzərə almaları xahiş olunur:

▶️ Tələbə qəbulu üçün qeydiyyat yalnız my.gov.az platforması vasitəsilə aparılır.
▶️ Şəkilsiz köhnə nəsil şəxsiyyət vəsiqəsi olan şəxslər my.gov.az-da qeydiyyatdan keçmək üçün şəxsiyyət vəsiqəsini yeniləməlidirlər.
▶️ 15 yaşına çatmamış vətəndaşlar my.gov.az-da şəxsi kabinetlərini "SİMA rəqəmsal imza" ilə açmalıdırlar.

14/08/2026

Qəbul olunanlar orta ixtisas təhsili müəssisələri üzrə qeydiyyatlarını yalnız my.gov.az portalı üzərindən həyata keçirirlər. Bunun üçün Elm və Təhsil Nazirliyinin müvafiq xidməti “mygov” platformasında istifadəyə verilib. Qeydiyyat 19 avqust saat 15:00-dan 31 avqust saat 18:00-dək davam edəcək.

Qəbul olunan şəxslər qeydiyyat üçün əvvəlcə mygov ID (vahid giriş sistemi) vasitəsilə my.gov.az portalındakı şəxsi kabinetlərinə daxil olmalıdırlar. Daha sonra portalın “Xidmətlər” bölməsinin “Qurumlar” kateqoriyasından Elm və Təhsil Nazirliyini seçməli və burada təqdim olunan “Ali və orta ixtisas təhsil müəssisələrinə təhsilalanların qeydiyyatı” xidmətinə keçid etməlidirlər.

14/08/2026

Naxçıvanın inkişafında yeni mərhələ
Azərbaycan Respublikasının Prezidenti İlham Əliyevin 11 avqust 2026-cı ildə Naxçıvana səfəri regionun gələcək inkişafı baxımından mühüm əhəmiyyət daşıyır. Prezidentin Naxçıvana 17-ci səfəri zamanı təhlükəsizlik, iqtisadiyyat, enerji, nəqliyyat və sosial inkişafla bağlı mühüm layihələr diqqətə çatdırılıb.
Naxçıvanın müdafiə potensialının gücləndirilməsi əsas prioritetlərdəndir. Bununla yanaşı, Naxçıvan Sənaye Parkının təməlinin qoyulması yeni iş yerlərinin yaradılması və sənayenin inkişafı üçün mühüm addımdır. Parkın tərkibində 300 meqavat gücündə istilik elektrik stansiyasının inşası nəzərdə tutulur.
Enerji sahəsində Naxçıvanın böyük potensialı var. Regionda qazlaşma 100 faizdir, Günəş və su elektrik stansiyalarının yaradılması davam etdirilir. Gələcəkdə Naxçıvanın bərpaolunan enerji istehsalını artıraraq enerji ixrac edən mərkəzlərdən birinə çevrilməsi planlaşdırılır.
Naxçıvanın inkişafında Zəngəzur dəhlizi xüsusi əhəmiyyət daşıyır. Azərbaycanın əsas hissəsini Naxçıvanla birləşdirəcək bu layihə regionun nəqliyyat və iqtisadi imkanlarını genişləndirəcək. Horadiz–Ağbənd avtomobil yolu və dəmir yolu layihələrinin həyata keçirilməsi Naxçıvanın mühüm nəqliyyat qovşağına çevrilməsinə şərait yaradacaq.
Sosial sahədə də mühüm layihələr nəzərdə tutulur. Yeni avtobusların istifadəyə verilməsi, yolların tikintisi və təmiri, uşaq bağçalarının yenilənməsi əhalinin yaşayış şəraitinin yaxşılaşdırılmasına xidmət edir. Kənd təsərrüfatında isə suvarma sistemlərinin yenilənməsi və yeni su mənbələrinin yaradılması planlaşdırılır.
Naxçıvanın tarixi-mədəni irsinin qorunması və turizmin inkişafı da diqqətdə saxlanılır. Möminə xatun məqbərəsinin bərpası, tarixi abidələrin qorunması və yeni mehmanxananın tikintisi bu istiqamətdə görülən işlərdəndir.

01/08/2026

Prezident İlham Əliyevin Qırğızıstana dövlət səfəri: Azərbaycan–Qırğızıstan münasibətlərində yeni mərhələ
31 iyul 2026-cı il tarixində Azərbaycan Respublikasının Prezidenti İlham Əliyevin Qırğızıstana həyata keçirdiyi dövlət səfəri iki ölkə arasında strateji əməkdaşlığın daha da möhkəmləndirilməsi baxımından mühüm əhəmiyyət kəsb edib. Səfər çərçivəsində keçirilən görüşlər və imzalanan sənədlər Azərbaycan–Qırğızıstan münasibətlərinin müttəfiqlik səviyyəsinə yüksəldiyini bir daha nümayiş etdirib.
Prezident İlham Əliyev mətbuata bəyanatında vurğulayıb ki, müttəfiqlik münasibətləri böyük məsuliyyət tələb edir və Azərbaycan bu məsuliyyəti bölüşməyə hazırdır. Dövlət başçısı beynəlxalq platformalarda, iqtisadi-ticari sahədə və təhlükəsizlik məsələlərində qarşılıqlı dəstəyin davam etdiriləcəyini bildirib.
Səfərin iqtisadi nəticələri də diqqətəlayiq olub. Tərəflər Azərbaycan–Qırğız İnvestisiya Fondunun büdcəsinin 200 milyon ABŞ dollarına çatdırılması barədə razılığa gəliblər. Bu qərarın yeni investisiya layihələrinin həyata keçirilməsinə, birgə istehsalın inkişafına və yeni iş yerlərinin yaradılmasına mühüm töhfə verəcəyi qeyd olunub.
Dövlət səfəri çərçivəsində humanitar və mədəni əlaqələrin inkişafına da xüsusi diqqət yetirilib. Ağdam rayonunda "Manas" adını daşıyan məktəbin açılışı, Çingiz Aytmatovun adını daşıyan park və abidə, eləcə də mədəniyyət günlərinin təşkili iki qardaş xalq arasında dostluğun və ortaq dəyərlərin möhkəmləndirilməsinə xidmət edən mühüm addımlar kimi qiymətləndirilib.
Səfər zamanı Prezident İlham Əliyev Qırğız Respublikasının ali dövlət mükafatı – I dərəcəli "Manas" ordeni ilə təltif olunub. Eyni zamanda Qırğızıstan Prezidenti Sadır Japarov Azərbaycanın ali dövlət təltifi olan "Heydər Əliyev" ordeninə layiq görülüb. Bu qarşılıqlı təltif iki ölkə arasında yüksək etimadın və dostluq münasibətlərinin bariz göstəricisi kimi dəyərləndirilir.
Prezident İlham Əliyevin Qırğızıstana dövlət səfəri siyasi, iqtisadi və humanitar sahələrdə əməkdaşlığın genişlənməsinə, eləcə də Azərbaycan ilə Mərkəzi Asiya ölkələri arasında əlaqələrin yeni mərhələyə yüksəlməsinə mühüm töhfə verib.

01/08/2026

Milli Varlığımızın və Mənəvi Zənginliyimizin Zirvəsi: Azərbaycan Dili
​"Müxtəlif dillərə mənsub olan insanlar Azərbaycan dilini sadəcə eşidərək, onun mənasını o qədər bilməyərək, Azərbaycan dilinin nə qədər şeirə bənzədiyini, xoş ahəngli olduğunu dəfələrlə qeyd ediblər. Biz dilimizlə fəxr etməliyik. Dil hər bir millətin milliliyinin əsasıdır. Ona görə də hər bir gənc öz ana dilini, Azərbaycan dilini, müasir Azərbaycan dilini gərək ən incəliklərinə qədər bilsin və bu dildən istifadə etsin. Biz müstəqil Azərbaycanda Azərbaycan dilini dövlət dili etdiyimiz kimi, cəmiyyətimizdə də, xalqımızın içində də Azərbaycan dilini mütləq hakim dil etməliyik." — Ulu Öndər Heydər Əliyev
​Hər bir xalqın tarixi, mədəniyyəti, milli-mənəvi dəyərləri və gələcəyi onun ana dili ilə sıx bağlandığı kimi, Azərbaycan xalqının da varlığını əbədiləşdirən ən güclü sütun məhz ana dilimizdir. Azərbaycan dili sadəcə ünsiyyət vasitəsi deyil, xalqımızın minilliklər boyu süzgəcdən keçirdiyi mənəvi sərvət, milli kimliyimizin və suverenliyimizin əsas simvoludur.
​Ana Dilinin İnkişafında Tarixi Maneələr və Çətinliklər
Ana dilimizin bu günə qədər gəlib çatması heç də hamar yolla olmayıb. 70-ci illərin ortalarından başlayaraq SSRİ-ni təşkil edən respublikaların ictimai-siyasi həyatında dil məsələsi yenidən gündəmə gətirildi. SSRİ Konstitusiyasının qəbulundan sonra milli dillərin sıxışdırılması prosesi daha da gücləndirildi. Belə bir şəraitdə ana dili məsələsinin təbliği ilə məşğul olmaq cəsarət tələb edirdi. 30-cu illərdə dil məsələsini qabardanlar Sibirə sürgün olunurdular. Hətta milli respublikaların rəhbərləri də ana dili məsələsini gündəmə gətirməkdə aciz idilər.
​Ulu Öndər Heydər Əliyevin Qətiyyətli Mövqeyi və Dövlət Dili Uğrunda Mübarizə
Bütün süni məhdudiyyətlərə rəğmən Ulu Öndər Heydər Əliyev ana dili məsələsində öz mövqeyini hər zaman çox qətiyyətlə qorumağa müvəffəq olmuşdur. Dövlət dili uğrunda ardıcıl mübarizə aparan Ümummilli Lider ziyalıları, xalqı ana dilinin dövlət dili kimi yaşamaq hüququ uğrunda mübarizəyə cəlb edərək bütün qüvvələri səfərbər etmişdir.

22/07/2026

AZƏRBAYCAN-ALMANİYA MÜNASİBƏTLƏRİNDƏ YENİ STRATEJİ MƏRHƏLƏ: PREZİDENT İLHAM ƏLİYEVİN ALMANİYAYA RƏSMİ SƏFƏRİ VƏ TARİXİ BƏYANATLARI
​Prezident İlham Əliyevin 21 iyul 2026-cı il tarixində Almaniya Federativ Respublikasına həyata keçirdiyi rəsmi səfər iki ölkə arasındakı münasibətlərdə tamamilə yeni və keyfiyyətcə fərqli bir mərhələnin əsasını qoymuşdur. Səfər çərçivəsində imzalanan strateji sənədlər və dövlət başçısının səsləndirdiyi bəyanatlar Azərbaycanın Avropa İttifaqı ilə əlaqələrinin dərinləşməsində, eləcə də Cənubi Qafqazda sülh və təhlükəsizliyin möhkəmlənməsində mühüm dönüş nöqtəsinə çevrilmişdir.
​STRATEJİ DİALOQ VƏ İMZALANAN MÜHÜM SƏNƏDLƏR
​Səfər zamanı iki ölkə arasında əlaqələri keyfiyyətcə yeni səviyyəyə qaldıracaq mühüm sənədlərə imza atılmışdır. Prezident İlham Əliyev qeyd etmişdir ki, tərəflər artıq uzun müddətdir arzuladıqları strateji dialoqun başlanmasına nail olublar. İqtisadi əlaqələrin şaxələndirilməsi və genişləndirilməsi məqsədilə imzalanmış Birgə Bəyannamənin gələcəkdə çox fəal işləyərək yüksək nəticələr verəcəyinə əminlik ifadə olunub. Dövlət başçısının səfəri çərçivəsində Azərbaycan Respublikasının Prezidenti İlham Əliyev və Almaniya Federativ Respublikasının Federal Kansleri Fridrix Merts tərəfindən "Azərbaycan Respublikası və Almaniya Federativ Respublikası arasında ikitərəfli tərəfdaşlıq üçün strateji gündəliyə dair Birgə Bəyannamə" imzalanmışdır. Eyni zamanda, iki ölkə arasında işgüzar dairələrin əməkdaşlığını gücləndirmək məqsədilə "Azərbaycan-Almaniya Biznes Şurasının yaradılmasına və fəaliyyətinə dair Birgə Bəyannamə" qəbul edilmişdir. Bu sənədlərin qısa müddətdə həyata keçirilməsi üçün bir neçə işçi qrupunun yaradılması nəzərdə tutulmuşdur ki, bu da qəbul edilən qərarların praktiki müstəvidə tezliklə öz əksini tapmasını təmin edəcəkdir.

21/07/2026

Azərbaycan milli mətbuatının inkişaf mərhələləri xalqımızın azadlıq və müstəqillik uğrunda mübarizə tarixinin ayrılmaz tərkib hissəsidir. Ulu Öndər Heydər Əliyevin qeyd etdiyi kimi, azadlıq, demokratiya və müstəqillik uğrunda mücadilə dərsləri məhz milli mətbuatımızın səhifələrindən öyrənilmişdir. Ölkə Prezidenti İlham Əliyev mətbuatın fəaliyyətini yüksək qiymətləndirərək bildirmişdir ki, insanlar bütün məlumatları mətbuatdan aldıqları üçün hər bir ölkədə, o cümlədən Azərbaycanda media qərəzsiz, çevik və operativ olmalı, cəmiyyəti tam şəkildə məlumatla təmin etməlidir.
​Azərbaycan mətbuatının əsası 1875-ci il iyulun 22-də görkəmli ziyalı, təbiətşünas alim və maarifçi-publisist Həsən bəy Zərdabi tərəfindən Azərbaycan dilində nəşr olunmağa başlamış "Əkinçi" qəzeti ilə qoyulmuşdur. Cəmi iki il (1875-ci ilin iyulundan 1877-ci ilin sentyabrınadək) fəaliyyət göstərib 56 sayı işıq üzü görən "Əkinçi" maarifçi ideyaların carçısı olmuş, cəhalətə və xurafata qarşı kəskin məqalələr dərc etmişdir. Qəzet milli özünüdərkin, ictimai, siyasi və bədii fikrin inkişafına mühüm töhfələr vermişdir. Çar Rusiyası tərəfindən nəşri dayandırılsa da, “Əkinçi”nin bəyan etdiyi prinsiplər sonrakı dövrlərdə "Ziya", "Kəşkül", "Şərqi-Rus", "Həyat", "Füyuzat", "Molla Nəsrəddin" və "Açıq söz" kimi onlarla anadilli qəzet və jurnalın yaranmasına yol açmış, eləcə də Həsən bəy Zərdabinin fəal iştirakı ilə nəşr olunan rusdilli "Kaspi" qəzeti bu ənənələri davam etdirmişdir.
​1993-cü ildən etibarən Ümummilli Lider Heydər Əliyevin rəhbərliyi ilə həyata keçirilən köklü islahatlar nəticəsində Azərbaycanda senzura aradan qaldırılmış, söz və məlumat azadlığını məhdudlaşdıran süni maneələr ləğv edilmişdir. Jurnalistlərin dostu olan Ulu Öndər müharibə şəraitində yaşamağımıza baxmayaraq, əvvəlcə hərbi senzuranı, 1998-ci ilin avqustunda isə bütövlükdə KİV üzərində dövlət senzurasını ləğv etmişdir.

16/07/2026

IV Şuşa Qlobal Media Forumu Azərbaycanın dünyadakı nüfuzunun artdığını və ölkəmizin beynəlxalq media və diplomatiya üçün mühüm platformaya çevrildiyini bir daha təsdiqlədi. Prezident İlham Əliyevin Forumdakı çıxışı Azərbaycanın regional və qlobal siyasətinin əsas istiqamətlərini, xarici əlaqələrini, həmçinin işğaldan azad edilmiş torpaqlarımızdakı inkişafı əhatə edən geniş bir yol xəritəsi oldu.
​Şuşa Qlobal Media Forumu artıq beynəlxalq bir platforma statusunu qazanıb və iştirakçıların sayı ildən-ilə artır. Bu ilki Forumda 53 ölkədən 160 qonaq, o cümlədən 30 xəbər agentliyi, 60-dan çox media qurumu və 10 beynəlxalq təşkilat iştirak edib. Ümumilikdə, son dörd il ərzində Forum 81 ölkədən 600-ə yaxın media nümayəndəsini bir araya gətirib. Prezident İlham Əliyev bildirib ki, Şuşada belə bir mötəbər auditoriyanı qəbul etmək böyük şərəfdir və məqsəd Qarabağın öz köklərinə qayıtmasını, real inkişafı və bu torpaqların əsl sahiblərinin qayıdışını dünyaya nümayiş etdirməkdir.
​Azərbaycanın coğrafi mövqeyindən istifadə edərək beynəlxalq daşımalar və enerji mərkəzinə çevrilməsi dövlət siyasətinin prioritetidir. Fiziki infrastruktur artıq qurulub və onun genişləndirilməsi üzərində iş gedir. Məsələn, Bakı Beynəlxalq Dəniz Ticarət Limanının gücü 15 milyon tondan 25 milyon tona çatdırılacaq. Enerji təhlükəsizliyi məsələsində Azərbaycan hazırda 16 ölkəyə boru kəmərləri ilə qaz tədarük edir və bu sahədə dünyada birinci yerlərdən birini tutur. 2022-ci ildən etibarən Avropa İttifaqına qaz tədarükü 65 faiz artıb. Bundan əlavə, 2032-ci ilədək bərpaolunan enerji mənbələri üzrə 8 giqavat generasiya gücünə çatmaq hədəflənib ki, bu da ixrac üçün əlavə qaz həcmlərinin sərbəstləşməsinə imkan verəcək.
​Türkiyə və Azərbaycan münasibətləri dünyada analoqu olmayan dostluq və qardaşlıq nümunəsidir. Şuşa Bəyannaməsi ilə münasibətlər müttəfiqlik səviyyəsinə yüksəlib. Prezident vurğulayıb ki, qonşular Türkiyə və Azərbaycan nümunəsini tətbiq etməli, bir-birini məhv etmək əvəzinə, əməkdaşlıq etməlidirlər.