https://www.facebook.com/384178995472313/

Neftçala şəhər M.Səfərov adına inteqrasiya təlimli internat tipli gimnaziya, Neftçala (2026)

14/08/2026

Naxçıvanın coğrafi mövqeyi onun enerji təminatına daim xüsusi yanaşmanı zəruri edib.

Naxçıvanın gələcək inkişafında enerji amili xüsusi strateji əhəmiyyət daşıyır. Dövlət başçısı cənab İlham Əliyevin bu günlərdə Naxçıvana səfəri zamanı Azərbaycan Televiziyasına müsahibəsində enerji təhlükəsizliyi məsələsinin xüsusi vurğulanması bunun təsadüfi olmadığını göstərir. Naxçıvanın coğrafi mövqeyi onun enerji təminatına daim xüsusi yanaşmanı zəruri edib. Bu baxımdan regionun dayanıqlı enerji sistemi ilə təmin edilməsi dövlət siyasətinin prioritet istiqamətlərindən biri kimi çıxış edir. Naxçıvanda qazlaşmanın 100 faizə çatdırılması enerji təminatının əsas mərhələlərindən biri olmuşdur. İranla qaz mübadiləsi mexanizminin yaradılması isə Naxçıvanın qaz təminatının davamlılığına mühüm töhfə verib. Hazırda qarşıda duran əsas məqsəd yalnız enerji ehtiyaclarını ödəmək deyil, həm də Naxçıvanı enerji ixrac edən əraziyə çevirməkdir. Bu məqsədlə müxtəlif enerji mənbələrindən istifadə imkanları genişləndirilir. Naxçıvanın Günəş enerjisi potensialı bu strategiyanın əsas istiqamətlərindən biridir. Aparılmış təhlillər regionun Günəş elektrik enerjisi istehsalı üçün əlverişli olduğunu göstərir. Bu səbəbdən yüzlərlə meqavat gücündə yeni Günəş elektrik stansiyalarının yaradılması planlaşdırılır. Təkcə Günəş enerjisi üzrə potensialın ən azı 500 meqavat, perspektivdə isə 1000 meqavat ola biləcəyi bildirilir. Bu göstəricilər Naxçıvanın enerji istehsalında əhəmiyyətli mərkəzə çevrilə biləcəyini göstərir. Bununla yanaşı, su elektrik enerjisi də regionun enerji balansında mühüm yer tutur. Ordubad rayonunun Tivi kəndində 15 meqavatdan artıq gücə malik su elektrik stansiyasının layihəsi bu baxımdan diqqət çəkir. Enerji istehsalının müxtəlif mənbələr üzrə bölüşdürülməsi sistemin dayanıqlığını artırır. Günəş və su enerjisindən istifadə Naxçıvanın yaşıl enerji zonası kimi inkişafını da sürətləndirə bilər. Bərpaolunan enerji mənbələrinin artması isə müasir enerji saxlanc texnologiyalarına ehtiyacı artırır. Bu məqsədlə Naxçıvanda ilkin mərhələdə ən azı 100 meqavatlıq batareya saxlanc qurğusunun yaradılması nəzərdə tutulur. Belə qurğular günəş və su elektrik stansiyalarından əldə edilən enerjinin daha səmərəli idarə olunmasına imkan verəcək. Enerji istehsalının artması təbii olaraq ixrac infrastrukturunun genişləndirilməsini də tələb edir. Hazırda Naxçıvandan Türkiyə və İrana elektrik enerjisi ötürmək imkanları mövcuddur. Gələcəkdə isə bu imkanların Avropa istiqamətində genişləndirilməsi nəzərdə tutulur. Bunun üçün ötürücü xətlərin gücünün artırılması vacib məsələlərdən biridir. Ermənistan ərazisindən keçməklə Naxçıvana elektrik xətlərinin çəkilməsi ideyası da regional enerji əlaqələrinin genişlənməsi baxımından əhəmiyyətlidir. Belə bir enerji dəhlizi Naxçıvanı Azərbaycanın əsas enerji sistemi ilə daha sıx əlaqələndirə bilər. Eyni zamanda, regionun enerji sistemlərinin qarşılıqlı əlaqəsi bütün Cənubi Qafqaz üçün əlavə dayanıqlıq yarada bilər. Qara dəniz enerji kabeli və digər regional enerji layihələri ilə əlaqələndikdə Naxçıvanın enerji potensialı daha geniş coğrafi əhəmiyyət qazana bilər. Beləliklə, Naxçıvanın enerji siyasətində əsas dəyişiklik istehlakçı mövqeyindən istehsalçı və ixracatçı mövqeyinə keçidin hədəflənməsidir.

İldırım Zeynallı;
Neftçala rayonu

09/08/2026

📢Məktəbəhazırlıq qruplarına qəbul prosesi davam edir!

📌 Məktəbəhazırlıq qruplarına qəbul 14 sentyabr saat 18:00-da yekunlaşır. Neftçala şəhəri Mehman Səfərov adına İnteqrasiya təlimli internat tipli gimnaziyaya sənədlərin təqdim olunması 01 - 30 sentyabr 2026-cı il tarixləri arasında aparılacaq.

🎯 Qeydiyyat prosesi “mektebeqebul.edu.az" elektron sistemi üzərindən aparılır.

📣Xatırladaq ki, məktəbəhazırlıq qruplarına yalnız 2021-ci il təvəllüdlü, yəni cari ildə 5 yaşı tamam olan uşaqlar qəbul olunur.

03/08/2026

Ana dilimiz milli kimliyimizdir!

Dilimiz varlığımızın əsas göstəricisi, birliyimizin, tarixi köklərimizin danılmaz qaynağıdır. Ana dilimizin əsrlərlə əsarətdə qalması, bu dildə yazı, dövlət sənədlərinin verilməsinin yasaq edilməsi hər birimizə məlumdur. Lakin dilimizin doğmalığı, ana laylasından ruhumuza, qanımıza hopan həzinliyi, şirinliyi bizi xalq olaraq qadağalar olduqca ona daha da möhkəm bağlamış, min illərin qanlı-qadalı yollarından öyüd-nəsihətləri, hikmətli kəlamları ilə bu günümüzə qədər daşımışdır. Əlbəttə ki, xalqın əsas əlaməti kimi dilimizin qorunması hər bir zamanın düşüncəli, öncül insanlarının əsas xidməti olaraq yaşadılmışdır. Nə qədər qadağalar olsa da, bu dil kimliyimizin əsas göstəricisi olaraq qorunmuş, bizimlə qala bilmişdir. Dil bir xalqın tarixidir, onu öz kökünə bağlayan birlik səsidir. Ana dilimizin qorunmasında əvəzsiz xidmətləri ilə müasir tariximizdə seçilən, sevilən şəxsiyyətlərin önündə Ümummilli lider Heydər Əliyevin nümunə olan fəaliyyəti dayanır. Öz vətənini sevən, tarixinin hər sətrini daim təhlil edərək milli kimliyimiz üğrunda yorulmadan mübarizə aparan bu böyük şəxsiyyət dilimizin qorunması, genişlənməsi üçün bütün mümkün ola biləcək imkanlardan istifadə edərək Azərbaycan dilinin hüquqlarının qorunması, bərpası üçün böyük xidmət göstərmişdir. Xalqının taleyinə yaşadığı ömürdə heç zaman biganə qalmayan, əksinə, düçar olduğu zamanın bütün sınaqlarında yanında olan, xalqını qoruyan, onun haqq səsinə səs verən Ümummilli Lider Heydər Əliyev hələ Azərbaycan Respublikası keçmiş Sovet İttifaqının tərkibində olduğu dönəmlərdə də bu milli məsuliyyəti dərk edərək dilimizin hüquqlar;nı qorumuşdur. Belə ki, onun təşəbbüsü ilə Azərbaycan Respublikasına rəhbərlik etdiyi dönəmdə qəbul edilən Azərbaycan Respublikasının 1978-ci il Konstitusiyasına Azərbaycan diinin hüququ qüvvədə ola biləcəyi maddə salınmışdır. Məhz bütün təzyiqlərə, təsirlərə, sınaqlara rəğmən Ulu Öndər Heydər Əliyev tərəfindən verilmiş tarixi təklif həmin il qəbul edilən Azərbaycan Respublikası Konstitusiyasının 73-cü maddəsində öz əksini taparaq “Azərbaycan Sovet Sosialist Respublikasının dövlət dili Azərbaycan dilidir” ifadəsi ilə hüququ status almışdır. Bəllidir ki, həmin illərdə bu maddənin qəbul edilməsi çox böyük önəm daşıyırdı. Bu işin icrasını reallaşdıran, xalqımızın milli varlığının əsas göstəricisi olan Azərbaycan dilinin dövlət dili statusu ilə yaşatmaq əsl fədakarlıq nümunəsi idi. Bizim öz kökümüzdən qopmayacağımızın qanuni əsası idi. Bu bizim müstəqillik yollarından çəkilməyəcəyimizin düşüncəsi idi. 1995-ci ildə qəbul edilən müstəqil Azərbaycanın Konstitusiyasında da dövlət dilimiz haqqında maddə öz əksini tapdı. 158 maddədən ibarət olan bu konstitusiyanın 21-ci maddəsində dövlət dilimizin Azərbaycan dili olması hüququ qaydada təsdiq olunmuşdur. Ümummilli lider Heydər Əliyevin dövlətçilik tariximizdə, milli ruhun qorunması yollarında xidmətləri hər bir Azərbaycan vətəndaşına nümunə olan xidmətdir. Eləcə də dilimizin qorunması yollarında alimlərin, ziyalıların fəaliyyətinin dəyərləndirilməsi, bu sahədə 2001-ci ildə imzalanmış “Dövlət dilinin tətbiqi işinin təkmilləşdirilməsi haqqında”, “1 Avqust Azərbaycan Əlifbası və Azərbaycan dili gününün” təsis edilməsi haqqında Fərmanların, 2002-ci ildə imzaladığı “Azərbaycan Respublikasının dövlət dili haqqında” Azərbaycan Respublikasının Qanununun qəbul edilməsi ana dilimizin nə qədər böyük sevgi ilə qorunmasının təzahürüdür. Bu gün Müzəffər Ali Baş Komandan cənab İlham Əliyev bizlərə miras qalan bu böyük xəzinəmizin qorunması işini yüksək səviyyədə davam etdirərək bu sahədə böyük işlər görmüşdür. 2004-cü ildə “Azərbaycan Milli Ensiklopediyasının nəşri haqqında” və “Azərbaycan dilində latın qrafikası ilə kütləvi nəşrlərin həyata keçirilməsi haqqında” və digər imzaladığı Sərəncamlar bu işin uğurla davamından xəbər verir. Heç şübhə yoxdur ki, ana dilimizin qorunması xalqımızın varlığı ilə davam edəcəkdir.

Fərhad Baxışov;
Neftçala rayonu

03/08/2026

Humanitar diplomatiya: "Manas" məktəbi, Çingiz Aytmatov irsi və ortaq türk dəyərləri

Dövlət başçısı cənab İlham Əliyevin bu günlərdə Qırğızıstana dövlət səfəri siyasi və iqtisadi nəticələri ilə yanaşı, humanitar əməkdaşlığın inkişafı baxımından da mühüm əhəmiyyət daşıyır. Səfər çərçivəsində humanitar əlaqələrin genişləndirilməsi iki ölkə arasında dostluğun daha da möhkəmlənməsinə xidmət edən əsas istiqamətlərdən biri kimi qiymətləndirildi. Prezident İlham Əliyev Qarabağın bərpasına göstərdiyi dəstəyə görə Qırğızıstana minnətdarlığını ifadə etdi. Ağdam rayonunda "Manas" adını daşıyan məktəbin istifadəyə verilməsi qardaşlığın və həmrəyliyin parlaq nümunəsi kimi dəyərləndirildi. Bu məktəb təkcə təhsil müəssisəsi deyil, həm də Azərbaycan və Qırğızıstan xalqları arasında dostluğun rəmzidir. Qarabağın yenidən qurulması prosesində belə layihələrin həyata keçirilməsi türk dövlətlərinin bir-birinə verdiyi mənəvi dəstəyi nümayiş etdirir. Səfər zamanı Çingiz Aytmatovun xatirəsinə göstərilən ehtiram da xüsusi diqqət çəkdi. Bakıda böyük yazıçının abidəsinin və adını daşıyan parkın yaradılması ortaq mədəni irsə verilən yüksək qiymətin ifadəsidir. Bu addımlar Azərbaycan ilə Qırğızıstan arasında mədəni əlaqələrin daha da möhkəmlənməsinə töhfə verir. Humanitar əməkdaşlıq xalqlar arasında qarşılıqlı etimadın və anlaşmanın formalaşmasında mühüm rol oynayır. Qırğızıstanda Azərbaycanın, Azərbaycanda isə Qırğızıstanın Mədəniyyət Günlərinin keçirilməsi iki xalqın bir-birinin milli-mənəvi dəyərlərini daha yaxından tanımasına şərait yaradır. Ortaq tarix, dil və mədəni köklər bu münasibətlərin daha da inkişaf etməsinə güclü zəmin yaradır. Humanitar diplomatiya siyasi və iqtisadi əməkdaşlığı tamamlayan vacib istiqamət kimi çıxış edir. Məhz bu cür layihələr Azərbaycan ilə Qırğızıstan arasında strateji tərəfdaşlığın sosial və mənəvi əsaslarını daha da möhkəmləndirir. Nəticə etibarilə, Ölkə başçısının dövlət səfəri göstərdi ki, humanitar əməkdaşlıq iki qardaş ölkənin münasibətlərində uzunmüddətli inkişafı təmin edən əsas amillərdən biri olaraq qalır.

Rəna İmanzadə;
Neftçala rayonu

23/07/2026

Avropa İttifaqı ilə genişlənən strateji üfüqlər

Azərbaycan Respublikasının Prezidenti cənab İlham Əliyevin Almaniya Federativ Respublikasına sonuncu səfəri bir çox tarixi məqamlarla yadda qaldı. Səfər çərçivəsində səslənən fikirlər, imzalanan sənədlər ölkəmizin son illər ərzində qazandığl nailiyyətlərin əhəmiyyətini göstrərir. Azərbaycan xalqı və dövləti öz hərbi-siyasi gücü, milli iradəsi ilə torpaqlarının uzunillik işğalına son qoyaraq, ərazi bütövlüyünü və suverenliyini tam bərpa etmişdir. BMT Təhlükəsizlik Şurasının kağız üzərində qalmış dörd məlum qətnaməsini öz gücü ilə icra edən Bakı, zəfərdən dərhal sonra qalib tərəf kimi Ermənistana beynəlxalq hüquqa əsaslanan sülh gündəliyini təklif etmiş və qarşı tərəfdən müsbət cavab almışdır. Bu mürəkkəb və məsuliyyətli danışıqlar prosesində, o cümlədən Almaniyada xarici işlər nazirləri səviyyəsində keçirilən görüşlərə ev sahibliyi edən Berlin hökumətinin neytral, konstruktiv və vasitəçilik səyləri xüsusi vurğulanır. Bununla yanaşı, Azərbaycanın Avropa İttifaqı ilə çoxtərəfli strateji münasibətləri də son dövrlərdə yüksələn xətt üzrə inkişaf edir. Avropa İttifaqı Şurasının Prezidenti Antonio Koşta və Avropa Komissiyasının Prezidenti Ursula fon der Lyayenin Azərbaycana həyata keçirdikləri rəsmi səfərlər ikitərəfli əlaqələrin yüksək siyasi çəkisini və strateji tərəfdaşlıq xarakterini sübut edir. Almaniya Avropa İttifaqının aparıcı dövləti kimi həm İttifaq-Azərbaycan tərəfdaşlığının dərinləşməsində, həm də imzalanmış ikitərəfli sənədlərin icrasında əsas hərəkətverici qüvvələrdən biri olmağa devam edir. Səfərin tarixi yekunu olaraq Azərbaycan Respublikasının Prezidenti cənab İlham Əliyev və Almaniya Federativ Respublikasının Federal Kansleri Fridrix Merts tərəfindən "İkitərəfli tərəfdaşlıq üçün strateji gündəliyə dair Birgə Bəyannamə"nin, eləcə də "Azərbaycan-Almaniya Biznes Şurasının yaradılmasına və fəaliyyətinə dair Birgə Bəyannamə"nin imzalanması iki ölkə arasındakı bu tarixi tərəfdaşlığın hüquqi, institusional və iqtisadi sütunlarını daha da möhkəmləndirmişdir.

Süsən Əliyeva;
Neftçala rayonu

23/07/2026

Dərin tarixi keçmişə malik olan Milli Mətbuatımız

Ölkəmizin milli mətbuatının tarixi 1975-ci ilin 22 iyulunda görkəmli maarifçi, təbiətşünas alim, publisist, mütəfəkkir Həsən bəy Zərdabinin əsasını qoyduğu “Əkinçi” qəzeti ilə başlayır. O zaman Çar Rusiyası qəzetin nəşrinə çox çətinliklə razılıq vermişdir, çünki xalqın savadlanması, müasir dünya mədəniyyətinə yiyələnməsi onlara sərf etmirdi. Bir tərəfdən də ölkəni daim mövhumata sürükləyən yalançı din xadimləri də daim işiqlı ziyalıların yolunda maneə olmuşlar. Lakin bütün çətinliklərə, məhrumiyyətlərə baxmayaraq, böyük ziyalı, xalqını sonsuz bir məhəbbətlə sevən H.Zərdabi qəzetin nəşrinə nail olur. Adının “Əkinçi” olmasına baxmayaraq, qəzetinin proqramı çox zəngin idi. Bu zəngin proqram içərisində xalqı nadanlıqdan, maarifsizlikdən, gerilikdən, savadsızlıqdan çıxarıb, geniş mədəniyyət yoluna aparmaq, təhsil, elm sahəsində ona öz hüququnu başa salmaq, savadlı etmək, məktəb açıb onları oxutmaq məsələsi geniş yer tuturdu. Qəzet yazırdı ki, xalqımızın inkişafına mane olan səbəblərdən biri də mövhumatdır. Mədəniyyət inkişaf edir, yeni ixtiralar, kəşflər edilir, lakin bizim müsəlman aləmi yerində sayır. Dünya bir şeydir ki, həmişə dövran edir və insan bu dövrdə dünyanın gərdişinə görə öz rəftarını da dəyişdirməlidir. Azərbaycan milli mətbuatının zəngin inkişaf yolu ictimai fikir tariximizin mühüm bir hissəsidir. Milli mətbuatımız “Əkinçi” ilə başlanan maarifçilik, yeniləşmə, çağdaş mədəni təfəkkür xəttini davam etdirərək xalqımızın milli özünüdərkində, milli oyanış prosesində müstəsna rol oynayıb. Zərdabi və onunla birlikdə bu qəzetdə əməyi olan maarifpərvər yazarlar xalqı cəhalət və qəflət yuxusundan oyatmağa çalışırdılar. Təbii ki, bütün bunlar dövrün hakim dairələrini rahatsız etməyə bilməzdi. Üstəlik, çarizmin diktəsi ilə özlərini “ziyalı” sayan bəzi üzdəniraqlar da “Əkinçi”nin üzərinə hücuma keçirdilər. Beləliklə, 1877-ci il sentyabrın 29-da “Əkinçi” öz nəşrini dayandırmağa məcbur oldu. Azərbaycan milli mətbuatının təməlini qoyan bu qəzet, ikiillik ömür yaşasa da, xalqın milli və müasir ruhda tərbiyə olunmasında çox böyük rol oynadı. “Əkinçi”dən sonra onun yolunu milli mətbuatın yeni səhifələrini açan “Ziya”, “Kəşkül”, “Kaspi” və digər qəzetlər davam etdirdi.
“Əkinçi” qəzeti ömrünün az olmasına baxmayaraq Azərbaycan mətbuat tarixində böyük rol oynamışdır. Demokratik ideyalarla dolu olan bu qəzet məktəb, maarif, elm və mədəniyyətin inkişafında çox böyük xidmətlər göstərmişdir. “Əkinçi” qəzetinin bu ideyaları Azərbaycan maarifpərvərlərinin demokratik pedaqoji ideyalarının inkişafına müsbət təsir etmişdir.

Cahangir Abdullayev;
Neftçala rayonu

18/07/2026

Bu gün Şəhid Mehman Səfərovun anım günüdür. Allahdan Şəhidimizə rəhmət, anası Gülnaz xanıma isə can sağlığı arzulayırıq. Şəhidimizi qürur və şərəflə anırıq!🇦🇿

16/07/2026

Şuşada tarixi zirvə: Azərbaycan və Slovakiya arasında strateji tərəfdaşlıq yeni inkişaf mərhələsində

İyulun 14-də Azərbaycanın mədəniyyət paytaxtı, Qarabağın tacı olan Şuşa şəhəri növbəti dəfə möhtəşəm və tarixi bir diplomatik hadisəyə ev sahibliyi etdi. Azərbaycan Respublikasının Prezidenti cənab İlham Əliyev ölkəmizdə rəsmi səfərdə olan Slovakiya Respublikasının Prezidenti Peter Pelleqrini ilə görüşərək mətbuata bəyanatla çıxış etdi. Dövlətimizin başçısı Slovakiya ilə ikitərəfli əlaqələrin uğurlu və dinamik inkişafından dərin məmnunluğunu ifadə edərək, siyasi təmasların artıq müntəzəm və sistemli xarakter aldığını xüsusi vurğuladı. Ötən ilin sonunda Slovakiyaya reallaşan səmərəli rəsmi səfərini və orada nümayəndə heyətinə göstərilən yüksək qonaqpərvərliyi səmimiyyətlə xatırladan Ölkə başçısı, bu yüksək səviyyəli münasibətlərə görə həmkarına bir daha təşəkkürünü bildirdi. Şuşada aparılan danışıqlar və qəbul edilən qərarlar iki ölkə arasındakı mövcud potensialın real nəticələrə çevrilməsində mühüm rol oynayır. Bu cür intensiv və fəal əlaqələr hər iki dövlətin tərəfdaşlığı daha da dərinləşdirmək yolundakı qətiyyətli niyyətini əyani şəkildə nümayiş etdirir. Bu gün müzakirə olunan məsələlərin dairəsi kifayət qədər genişdir və bu genişlik nümayəndə heyətlərinin tərkibində də özünü aydın göstərir. Görüşlər təkcə rəsmi bəyanatlarla məhdudlaşmır; o cümlədən müxtəlif sahələr üzrə həm fəal dialoq, həm də konkret layihələrin icrasını nəzərdə tutan genişmiqyaslı praktiki fəaliyyət həyata keçirilir.

Fətalı Hüseynov;
Neftçala rayonu

16/07/2026

Regional əməkdaşlıq və nəqliyyat dəhlizləri: Azərbaycanın Avrasiya nəqliyyat şəbəkəsində artan tranzit əhəmiyyəti

Son onilliklər ərzində Azərbaycan Respublikası özünün unikal coğrafi mövqeyinin yaratdığı imkanlardan səmərəli istifadə edərək bu üstünlükləri geniş regional və beynəlxalq əməkdaşlıq platformasına çevirmək istiqamətində ardıcıl və sistemli siyasət yürütmüşdür. Ölkə başçısı cənab İlham Əliyev IV Şuşa Qlobal Media Forumunda ştirakçıların suallarını cavablandırarkən bəyan etmişdir ki, qonşu dövlətlərlə qarşılıqlı səmərəli əlaqələr və dinc birgəyaşayış prinsipləri qurulmadan heç bir ölkənin qlobal tranzit qovşağına çevrilməsi mümkün deyildir. Əgər qonşularla münasibətlər gərgin və ya qeyri-sağlamdırsa, heç bir beynəlxalq dəhlizin effektiv fəaliyyətindən söhbət gedə bilməz. Azərbaycan bu reallığı nəzərə alaraq ilk növbədə daxili fiziki infrastrukturu ən yüksək standartlara çatdırmış, daha sonra isə həm Şimal-Cənub, həm də Şərq-Gərb istiqamətlərində geniş beynəlxalq koalisiyalar qurmuşdur. Ölkəmizin təşəbbüskarı və əsas maliyyə donorlarından biri olduğu nəhəng regional enerji və nəqliyyat layihələri bu gün Avropanın və tərəfdaş ölkələrin enerji təhlükəsizliyinin təmin olunmasında müstəsna rol oynayır. Hazırda dünyada, xüsusilə Yaxın Şərqdə yaşanan geosiyasi böhranlar və nəqliyyat yollarının təhlükəsizliyi məsələsi Azərbaycanın təqdim etdiyi sabit nəqliyyat dəhlizlərinin cəlbediciliyini dəfələrlə artırır. Uçuşların xəritəsinə, Xəzər dənizi və quru yollarındakı yük daşımalarına nəzər saldıqda, ölkəmizin üzərindən keçən dəhlizin qlobal ticarət üçün nə dərəcədə əhəmiyyətli və əvəzolunmaz olduğu aydın görünür. Azərbaycan öz ərazisindən keçən nəqliyyat və tranzit axınlarının həcminin sürətlə artacağını öncədən proqnozlaşdıraraq müvafiq logistik və sənaye infrastrukturunu tam hazır vəziyyətə gətirmişdir. Möhtərəm Prezident Forumdakı çıxışında ölkəmizin dəniz nəqliyyatı sahəsindəki genişmiqyaslı planlarını açıqlayaraq bildirmişdir ki, hazırda illik 15 milyon ton yükaşırma imkanına malik olan Bakı Beynəlxalq Dəniz Ticarət Limanı Xəzər dənizi hövzəsində ən böyük və modern infrastruktur obyekti hesab olunur. Lakin artan yük axınını vaxtında və keyfiyyətlə qəbul etmək üçün limanın ümumi yükaşırma gücünün 25 milyon tona çatdırılması istiqamətində genişləndirmə işləri uğurla davam etdirilir. Bununla yanaşı, Azərbaycan özünün müasir gəmiqayırma zavodunda daxili imkanlar hesabına eyni anda 10 yeni böyük gəminin inşasını həyata keçirir ki, bu gəmilər gələcəkdə Mərkəzi Asiyadan Avropaya və geriyə doğru daşınan yüklərin fasiləsizliyini təmin edəcəkdir. Mərkəzi Asiya ölkələri və Avropa Komissiyası ilə qurulan sıx və etibarlı münasibətlər bu layihələrin uğurlu icrasının əsas mərkəzində dayanır. Azərbaycanın hər zaman regional əməkdaşlığa, qonşuların maraqlarının qorunmasına və mövcud narahatlıqların aradan qaldırılmasına yönəlmiş sülhsevər xarici siyasəti regionda tamamilə təhlükəsiz və səmərəli əməkdaşlıq mühitinin formalaşmasına imkan vermişdir.

Aytəkin Mahmudova;
Neftçala rayonu

06/07/2026

İqtisadi tərəfdaşlığın zirvəsi: Azərbaycanın Avropa İttifaqının regional ticarətindəki mütləq liderliyi

Azərbaycan ilə Avropa İttifaqı arasındakı münasibətlərin ən möhkəm dayaqlarından birini qarşılıqlı iqtisadi-ticari əlaqələr təşkil edir. Rəsmi rəqəmlər və statistik göstəricilər ölkəmizin regiondakı iqtisadi hegemonluğunu və Avropa üçün əvəzedilməzliyini açıq şəkildə ortaya qoyur. Hazırda Avropa İttifaqı Azərbaycanın əsas ticarət tərəfdaşı statusunu qoruyub saxlayır. Ölkəmizin bütöv xarici ticarət dövriyyəsinin 40 faizdən çoxu məhz Aİ üzvü olan dövlətlərlə aparılır. Bu, Azərbaycan iqtisadiyyatının qlobal bazarlara, xüsusən də yüksək alıcılıq qabiliyyətinə malik Avropa məkanına inteqrasiyasının ən bariz nümunəsidir. Lakin məsələyə regional kontekstdən yanaşdıqda mənzərə daha da heyranedicidir. Cənab Prezident İlham Əliyevin bəyan etdiyi kimi, Azərbaycan bütövlükdə Cənubi Qafqazda Avropa İttifaqı üçün əsas ticarət tərəfdaşıdır və regionda reallaşan ümumi ticarətin təxminən 70 faizi məhz Azərbaycanın payına düşür. Bu nəhəng rəqəm ölkəmizin regional iqtisadiyyatın dörddə üçünə nəzarət etdiyini və Brüsselin Cənubi Qafqaz siyasətinin iqtisadi ağırlıq mərkəzinin Bakı olduğunu göstərir. Bu günlərtdə Avropa Komissiyasının Prezidenti xanım Ursula Fon der Lyayenin ölkəmizə səfəri zamanı aparılan geniş müzakirələr mövcud ticarət əlaqələrinin qeyri-neft sektoruna da transfer edilməsi və qarşılıqlı investisiya qoyuluşlarının stimullaşdırılması üçün yeni imkanlar açır. İqtisadi tərəfdaşlığın bu dərəcədə dərinləşməsi həm də ölkəmizin maliyyə dayanıqlığını artıraraq regional layihələrin icrasında müstəqil qərarlar verməsinə zəmin yaradır.

Nigar Abdullayeva;
Nftçala rayonu

Neftçala şəhər M.Səfərov adına inteqrasiya təlimli internat tipli gimnaziya

14/08/2026

09/08/2026

03/08/2026

03/08/2026

23/07/2026

23/07/2026

18/07/2026

16/07/2026

16/07/2026

06/07/2026

Address

Telephone

Website

Alerts

Contact The School

Shortcuts

Share

Category

Listing takedown request