Lerik rayonu Piran kənd tam orta ümumtəhsil məktəbi

Lerik rayon Piran kənd tam orta ümumtəhsil məktəbində “Son zəng” tədbiri keçirildi.

Tədbir Azərbaycan Respublikasının Dövlət Himninin səsləndirilməsi ilə başladı. Daha sonra şəhidlərimizin əziz xatirəsi bir dəqiqəlik sükutla yad edildi.

Məktəbin direktoru Elvin Səmədov çıxış edərək məzunları təbrik etdi, onlara gələcək həyat yollarında uğurlar arzuladı. Çıxışdan sonra tədris ili ərzində nümunəvi davranışları, akademik göstəriciləri və fəallıqları ilə seçilən şagirdlərimizə, eləcə də tədris ili boyunca səmərəli fəaliyyət göstərən müəllimlərimizə təşəkkürnamələr təqdim olundu.

Daha sonra məzunlarımızın sinif rəhbəri Əbdüləzim Talıbi çıxış edərək şagirdlərinə xoş arzularını çatdırdı. Tədbirdə iştirak edən müəllimlərimizdən Mətləb müəllim və Ramin müəllim övladları məzun olan valideynlər kimi çıxış edərək öz ürək sözlərini, arzu və tövsiyələrini bölüşdülər. Digər məzun valideynləri də çıxış edərək övladlarının bu əlamətdar günündə sevinc və qürur hisslərini ifadə etdilər.

Məzunlar çıxışlarında müəllimlərinin onlara verdiyi bilikdən, göstərdikləri diqqət və zəhmətdən danışaraq təşəkkürlərini ifadə etdilər.

Lerik rayon Piran kənd tam orta ümumtəhsil məktəbində 15 İyun – Milli Qurtuluş Günü münasibətilə tədbir keçirildi.

Tədbirdə məktəbin direktoru Elvin Səmədov çıxış edərək Milli Qurtuluş Gününün Azərbaycan tarixindəki mühüm əhəmiyyətindən, xalqımızın birlik və həmrəyliyindən danışdı. O, bu əlamətdar günün gənc nəslin vətənpərvərlik ruhunda tərbiyəsində xüsusi rol oynadığını qeyd etdi.

Daha sonra tədbirdə iştirak edənlərlə mövzu ətrafında fikir mübadiləsi aparıldı, diskussiya keçirildi və günün tarixi əhəmiyyəti ilə bağlı maraqlı müzakirələr edildi.

Lerik rayon Piran kənd tam orta ümumtəhsil məktəbinin 4-cü sinif rəhbəri Hadiyeva Aynur müəllimin təşkilatçılığı ilə şagirdlər üçün maraqlı və yaddaqalan tədbir keçirildi. Tədbir zamanı şagirdlərin fəallığı, əzmi və uğurları diqqətə çatdırıldı.

Sonda Hadiyeva Aynur müəllim tərəfindən şagirdlərə təşəkkürnamələr təqdim olunaraq onların nailiyyətləri qiymətləndirildi. Bu cür tədbirlər şagirdlərdə motivasiyanın artırılmasına və onların daha da həvəsləndirilməsinə xidmət edir.📚📖

Lerik rayon Piran kənd tam orta ümumtəhsil məktəbinin 8-ci sinif şagirdləri sinif rəhbərləri Hümmətov Mətləb müəllimin təşkilatçılığı ilə Lənkəran Tarix Diyarşünaslıq Muzeyini ziyarət ediblər.

Ekskursiya zamanı şagirdlər qədim tariximizi, milli-mədəni irsimizi əks etdirən eksponatlarla yaxından tanış olub, maraqlı və faydalı məlumatlar əldə ediblər. Bu cür maarifləndirici səfərlər şagirdlərin dünyagörüşünün formalaşmasına, tariximizə və mədəniyyətimizə marağının artırılmasına mühüm töhfə verir.

İyunun 4-də Fövqəladə Hallar Nazirliyinin təşkilatçılığı ilə keçirilən “Gənc xilasedici və yanğınsöndürən” XIII Ümumrespublika yarışlarının zona birinciliyində Lerik rayon Piran kənd tam orta ümumtəhsil məktəbinin komandası uğurla iştirak edərək III yerə layiq görülmüşdür.

Məktəbin fiziki tərbiyə müəllimi Allahverdi Şəfiyevin rəhbərliyi ilə yarışa qatılan komandamız “Kombinə edilmiş yanğın estafeti” və “Maneələr zolağı” mərhələlərində yüksək hazırlıq, bacarıq və əzmkarlıq nümayiş etdirmişdir.

Komandamızı təbrik edir, onlara daha böyük uğurlar arzulayırıq.

Məktəbəqədər və Ümumi Təhsil üzrə Dövlət Agentliyi və Təhsil İnstitutu tərəfindən keçiriləcək monitorinqlə əlaqədar olaraq Lerik rayon Piran kənd tam orta ümumtəhsil məktəbində IV və VI sinif şagirdlərinə buraxılış vərəqələri məktəbin direktoru Elvin Səmədov tərəfindən təqdim olundu.

Şagirdlərimizə qarşıdakı monitorinqdə uğurlar arzulayır, bilik və bacarıqlarını ən yaxşı şəkildə nümayiş etdirəcəklərinə inanırıq.

Lerik rayon Piran kənd tam orta ümumtəhsil məktəbində IV və VI sinif şagirdləri ilə monitorinq öncəsi cavab kartlarının düzgün doldurulması qaydaları barədə təlimatlandırıcı görüş keçirildi. Görüş zamanı şagirdlərə cavab kartlarının doldurulma qaydaları ətraflı izah olundu, diqqət edilməli məqamlar barədə məlumat verildi və onları maraqlandıran suallar cavablandırıldı. Təlimatın keçirilməsində əsas məqsəd monitorinq zamanı şagirdlərin cavab kartlarını düzgün və səhvsiz doldurmalarını təmin etmək idi.

1 İyun – Uşaqların Beynəlxalq Müdafiəsi Günü münasibətilə Lerik rayon Piran kənd tam orta ümumtəhsil məktəbində tədbir keçirilmişdir.

Tədbirdə məktəbin direktoru Elvin Səmədov çıxış edərək şagirdləri bu əlamətdar gün münasibətilə təbrik etmiş, onlara sağlam, xoşbəxt və uğurlu gələcək arzulamışdır. Daha sonra uşaqların hüquq və mənafelərinin qorunmasına həsr olunmuş videoçarx nümayiş etdirilmişdir.

Tədbirin davamında şagirdlərlə qarşılıqlı müzakirələr aparılmış, onların fikir və düşüncələri dinlənilmişdir. Səmimi və maarifləndirici şəraitdə keçən tədbir uşaqlarda öz hüquqları barədə məlumatlılığın artırılmasına və onların cəmiyyətin dəyərli üzvləri kimi formalaşmasına töhfə vermişdir. Uşaqlar bayram əhvali-ruhiyyəsi ilə tədbirdən xoş təəssüratlarla ayrılmışlar.

Lerik rayon Piran kənd tam orta ümumtəhsil məktəbində korrupsiyaya qarşı mübarizə və hüquqi maarifləndirmə məqsədilə məktəb kollektivi ilə görüş keçirilmişdir. Görüşdə korrupsiyanın cəmiyyətə və təhsil sahəsinə mənfi təsirlərindən danışılmış, şəffaflığın, dürüstlüyün və qanunlara hörmətin vacibliyi vurğulanmışdır. Həmçinin təhsil işçilərinin bu sahədə üzərinə düşən vəzifə və məsuliyyətləri barədə ətraflı məlumat verilmişdir.