Lənkəran şəhəri R.Məmmədov adına 5 nömrəli tam orta məktəb

Lənkəran şəhər Rasim Məmmədov adına 5 nömrəli tam orta məktəbin direktor vəzifəsinə yeni təyinat olub.

Azərbaycan Respublikası Elm və Təhsil Naziri cənab Emin Əmrullayevin müvafiq əmr ilə Kazımov Mayis Bəfa oğlu 03 oktyabr 2023-cü il tarixində Lənkəran şəhər 5 nömrəli tam orta məktəbinə direktor vəzifəsinə təyin olunub.

Mayis müəllim 1973-ci il iyul ayının 18-də Lənkəran şəhərində anadan olmuşdur. O, 1980-ci ildə Lənkəran şəhər Rasim Məmmədov adına 5 № li tam orta məktəbin 1-ci sinifinə qəbul olmuş, 1990-ci ildə həmin məktəbi əla qiymətlərlə bitirmişdir. Bakı Dövlət Universitetinin fizika fakültəsini bitirmişdir. İlk pedaqoji fəaliyyətinə Lənkəran şəhər Azad Babayev adına 8 nömrəli tam orta məktəbində ixtisası üzrə fizika fənnini tədris etməklə başlamışdır. Lənkəran şəhər Təhsil Şurasınin 10 sentyabr 2004-cü il tarixli müafiq əmri ilə irəli çəkilərək Lənkəran rayonu Q.Zeynalov adına Darquba kənd tam orta məktəbinə direktor vəzifəsinə təyin olunmuş, 20 ilə yaxın həmin vəzifədə qüsursuz fəaliyyət göstərmişdir.

Məktəb kollektivi adından Mayıs müəllimi təbrik edir, pedaqoji və rəhbərlik fəaliyyətində yeni-yeni uğurlar arzu edirik!

Bu gün ölkəmizdə ilk dəfədir ki, 4 oktyabr Cəbrayıl Şəhəri Günü qeyd olunur. 2023-cü il 3 iyulda prezident İlham Əliyevin imzaladığı sərəncamına əsasən həmin gün “ Cəbrayıl Şəhəri Günü “ kimi təsis edildi. Bu əlamətdar günün təsis edilməsi isə Cəbrayılın 27 illik erməni işğalından azad edilməsi ilə bağlıdır.
44 günlük Vətən müharibəsinin elə ilk günü Cəbrayıl rayonunun Böyük Mərcanlı və Nüzgar kəndləri işğaldan azad olundu. 4 oktyabr tarixində isə Cəbrayıl şəhəri və rayonun 9 kəndi – Karxulu, Şükürbəyli, Çərəkən, Daşkəsən, Horovlu, Mahmudlu, Cəfərabad, Yuxarı Maralyan və Decal kəndləri işğaldan azad edildi.
18 oktyabr tarixində Cəbrayıl rayonu ərazisində yerləşən qədim Xudafərin körpüsü işğaldan azad edildi. Məhz Müstəqilliyimizin Bərpası Günü Müzəffər Ali Baş Komandan İlham Əliyevin bu körpüdə Azərbaycan bayrağını ucaltması böyük tarixi və siyasi əhəmiyyət kəsb edirdi. Bu həm də işğaldan azad edilmiş Cəbrayıl şəhərinə Prezident İlham Əliyevin ilk səfəri idi.
Bu gün işğaldan azad olunmuş digər rayonlar kimi Cəbrayılda da bərpa quruculuq işləri davam etdirilir.

2023 - cü il 2 oktyabr tarixində Bakıda Azərbaycanın Kosmik Agentliyinin və Beynəlxalq Astronavtika Federasiyasının tərəfdaşlığı ilə 74-cü Bakı Beynəlxaq Astronavtika Konqresinin açılışı oldu.
Beynəlxalq Astronavtika Federasiyası II Dünya müharibəsindən sonra " Soyuq müharibə " dövründə kosmos sahəsində elm adamlarının arasında dialoqun yaradılması məqsədilə 1951-ci ildə yaradılıb.Azərbaycan 2003-cü ildən Federasiyanın üzvüdür.
50 ildən sonra belə bir nüfuzlu beynəlxalq tədbirin yenidən Bakıda keçirilməsi və burada Azərbaycan Respublikasının prezidenti İlham Əliyevin çıxışı ölkəmiz üçün böyük əhəmiyyət kəsb edirdi. Prezident İlham Əliyev qeyd etdi ki, bu Konqres Azərbaycanda kosmik sənayenin aparıcı texnologiyalarının inkişafına və onun müasirləşdirilməsinə töhfə verəcəkdir. İlham Əliyev öz çıxışında vurğuladı ki, Azərbaycan on ildən artıq müddət əvvəl beynəlxalq kosmik ailənin üzvü olub. Bu gün ikisi telekommunikasiya, biri isə Yer səthinin müşahidəsi peykinə malik olaraq kosmik sənayenin inkişafı davam etdirilir. Üç peyk azərbaycanlı mütəxəssislər tərəfindən idarə olunur və onlar təkcə Azərbaycana deyil 45-dən artıq ölkəyə xidmət göstərirlər. Həmçinin prezident İlham Əliyev qeyd edib ki, müstəqillik dövründə Azərbaycan beynəlxalq ictimaiyyətin fəal üzvünə çevrilib. Beynəlxalq ictimaiyyətin fəal üzvü kimi Azərbaycan çoxsaylı siyasi, iqtisadi və regional inkişaf layihələrində iştirak edir.
Prezident İlham Əliyev öz çıxışında 44 günlük müharibəsində qələbə haqqında danışaraq Qafqazda sülh üçün vaxtın yetişdiyini bir daha elan etdi. Bu baxımdan İlham Əliyevin Konqresdə " gündəliyimizin Qafqazda, regionda sülhün olmasıdır " mesajını verməsi böyük önəm kəsb edir. Daha sonra prezident qeyd edirdi ki, müstəqil ölkə kimi Azərbaycan çox gəncdir, cəmi 32 yaşı var. Bəli, bu gün bu gənc dövlət " cəngəllik qanunları " ilə deyil, məhz beynəlxalq hüquq normalı əsasında öz müstəqilliyini və təhlükəsizliyini qoruyub saxlamağı bacarır.

27 il erməni işğalı altında qalmış Zəngilanın 3 il sonra beynəlxalq tədbirə ev sahibliyi etməsi bu günlərdə Azərbaycan tarixində ən qürurverici və şanlı səhifələrdən birinə çevrildi. Bu baxımdan 2023-cü il 29 sentyabrda BMT-nin Məskunlaşma Proqramının ( UN – Habitat ) və Azərbaycan Respublikasının Dövlət Şəhərsalma və Arxitektura Komitəsinin əməkdaşlığı ilə Zəngilanda 2-ci Milli Şəhərsalma Forumunun açılışı və Forumda prezident İlham Əliyevin çıxışı bütün dünyaya səs saldı. Prezident qürurla qeyd etdi ki, Zəngilanda müasir texnologiyalar, “ağıllı şəhər “ və “ ağıllı kənd “lər inşa olunur. Burada ən müasir şəhərsalma nümunələri istifadə edilir. Zəngilanın Ağalı kəndi, azad olunmuş ərazilərin ilk bölgəsidir ki, artıq burada keçmiş məcburi köçkünlər evlərinə qayıdır. Prezident Zəngilanda Beynəlxalq Hava Limanının və Horadiz-Zəngilan dəmir yolunun inşası haqqında söhbət açdı. Horadiz-Zəngilan dəmir yolu Azərbaycanın əsas ərazisini Naxçıvan Muxtar Respublikası ilə birləşdirəcək layihədir. Oradan isə həmin dəmir yolu İran və Türkiyəyə keçəcək və nəhayət Avropaya çatacaq.
Böyük Qayıdış Proqramı və onun icrası artıq imkan vermişdir ki, keçmiş məcburi köçkünlər Laçın və Füzuli şəhərlərinə, Ağalı, Talış və Zabux kəndlərinə qayıtsınlar. Prezident çıxışında bir daha qeyd etdi ki, BMT Təhlükəsizlik Şurasının işğal olunmuş torpaqların qeyd şərtsiz və tam azad olunmasını tələb edən 4 qətnaməsini yerinə yetirmək üçün 44 günlük vətən müharibəsi qaçılmaz oldu.
2020-ci il noyabrın 8-də Şuşa ordumuz tərəfindən azad olundu. Bundan iki gün sonra Ermənistan kapitulyasiya aktına imza atdı və Azərbaycan 30 illik işğala son qoydu.
Prezident çıxışında bildirirdi ki, aprelin 23-də biz Ermənistanla sərhəddə sərhəd-keçid məntəqəsini yaratdıq və ərazi bütövlüyümüzü tam təmin etdik. Prezident İlham Əliyev çıxışında bir daha qeyd edirdi ki, 20 sentyabrda keçirilən 24 saatlıq antiterror tədbirlərindən danışıb, bildirdi ki, bu gün Azərbaycan artıq suveren hüquqlarını tam bərpa etmişdir.
Bəli, bu gün Qarabağdan getmək istəyən ermənilər üçün Qarabağın qapıları, qalmaq istəyənlər üçün isə sülh şəraitində yaşayıb, Azərbaycan vətəndaşı kimi bütün vətəndaş hüquqlarından istifadə etmək üçün fürsət pəncərəsi açıqdır.

Tarixi şəxsiyyətlər yaradır. Şəxsiyyətləri isə zaman yetişdirir. Zamanın yetişdirdiyi dahi şəxsiyyətlərdən biri də Ümummilli lider Heydər Əliyevdir.
1993-cü il 3 oktyabr tarixi müstəqil dövlətçiliyimizin xilasının başlanğıc günüdür. Həmin gün xalqımız özünün gələcək taleyini, müqəddaratını həll edən seçim etdi. Ulu öndər Heydər Əliyevin prezident seçilməsi ilə Azərbaycan tarixinin yeni mərhələsi başladı. Yenidən respublika rəhbərliyinə qayıdan Heydər Əliyev ilk növbədə ölkəni vətəndaş müharibəsi təhlükəsindən xilas edib, ictimai-siyasi sabitliyi bərpa etdi. Heydər Əliyev azərbaycançılıq ideologiyasını dövlət ideologiyasına çevirərək, xalqımızın birliyini qoruyub saxlamaqla müstəqilliyimizi möhkəmləndirdi.
1994-cü il 20 sentyabrda Azərbaycan Respublikası Dövlət Neft Şirkəti ilə dünyanın ən qabaqcıl 8 ölkəsinin 13 neft şirkəti arasında bağlanmış “ Əsrin müqaviləsi “ müstəqilliyimizin təminatçısı oldu. 1995-ci il noyabrın 12-də Müstəqil Azərbaycan dövlətinin əsas Qanunu – ilk milli Konstitusiyamız qəbul edildi. 1998-ci ildə Konstitusiya Məhkəməsinin yaranması, mətbuatda senzuranın, ölkədə ölüm hökmünün ləğvi, 1999-cu ilin dekabrında keçirilən ilk bələdiyyə seçkiləri, 2001-ci ildə Ombudsman təsisatının yaranması və onlarla digər bu kimi islahat və demokratik təşəbbüslər bilavasitə Heydər Əliyevin gərgin əməyinin nəticəsidir.
Ulu öndər Heydər Əliyev tərəfindən əsası qoyulan xarici siyasət kursunun mühüm prioritetlərindən biri Ermənistan-Azərbaycan münaqişəsinin beynəlxalq hüquq normaları əsasında-yəni ölkəmizin ərazi bütövlüyü çərçivəsində həll edilməsi təşkil edib. Bu gün Azərbaycan Respublikasının Prezidenti, Müzəffər Ali Baş Komandan İlham Əliyev məhz Heydər Əliyev siyasi kursunu layiqincə davam etdirərək Azərbaycanın ərazi bütövlüyünün, suverenliyinin və konstitusiya quruluşunun tam bərpa və təmin edilməsinə nail olub.

Prezident İlham Əliyevin Naxçıvana səfəri.

2023-cü il 25 sentyabrda 2 qardaş dövlətin başçıları: Azərbaycan Respublikasının Prezidenti İlham Əliyevin Türkiyə Respublikasının Prezidenti Rəcəb Tayyib Ərdoğanla görüşü ölkələrimizin iqtisadi əməkdaşlıq tarixində və regionda sülhün, əmin-amanlığın qorunması sahəsində çox mühüm bir hadisə idi. Görüşdə ölkə prezidenti bildirdi ki, Sovet hakimiyyəti tərəfindən Qərbi Zəngəzur Azərbaycandan ayrılmış və Ermənistana verilmiş, bununla da Azərbaycanın əsas hissəsi ilə Naxçıvan arasında coğrafi bağlantı kəsilmişdir. Dünyaya verilən bu mesaj Ermənistanın işğalçı siyasətini ifşa etmək baxımından böyük bir əhəmiyyət kəsb edir. Belə ki, Ermənistanın Azərbaycandan gedən elektrik və qaz xətlərini kəsdiyindən Naxçıvan uzun müddət mühasirədə qalmışdır.
Iğdır-Naxçıvan qaz kəməri Naxçıvanın qazla təminatının bir mənbədən- yalnız İrandan asılılığını aradan qaldırır, Naxçıvanın qaz təchizatının şaxələndirilməsinə imkan verir. Strateji əhəmiyyət kəsb edən layihələr- TANAP layihəsi, Iğdır-Naxçıvan qaz xətti və Qars-Naxçıvan dəmir yolunun inşasına dair Niyyət Protokolu böyük tarixi hadisələrdir. Çünki bu layihələr Orta Dəhlizin bir qolu kimi həm Azərbaycana, həm Türkiyəyə, həm də digər ölkələrə xidmət edəcəkdir.
Naxçıvanı "yaşıl enerji" zonasına çevirəcək "Anlaşma Memorendumu" da bu bölgənin enerji təhlükəsizliyini təmin edəcəkdir. Qars-Naxçıvan dəmiryolu çərçivəsində 2 ölkə arasında yeni nəqliyyat əlaqəsinin təmin edilməsi də böyük hadisədir. Türkiyə Prezidenti Rəcəb Tayyib Ərdoğan öz çıxışında " Bir millət iki dövlət " şüarını, Şuşa bəyannaməsini xatırlatması və Azərbaycanın haqlı mövqeyində onu dəstəkləməsi dünyaya verilən ciddi mesaj idi.
Beləliklə, Naxçıvanda 2 qardaş dövlətin başçıları tərəfindən verilən bəyanatlar, imzalanan sənədlər iqtisadi əməkdaşlığın inkişafına, regionda sülhə, ən əsası isə Heydər Əliyev ilinə böyük töhfə hesab oluna bilər.