Lənkəran Dövlət Universiteti

Qazaxıstanda təqaüdlə təhsil imkanı

Qazaxıstanın Elm və Ali Təhsil Nazirliyi tərəfindən 2026–2027-ci tədris ili üzrə Azərbaycan Respublikası vətəndaşları üçün təqaüd proqramı elan edilir.

Təqaüd proqramı “Qazaxıstan Respublikasının Elm və Ali Təhsil Nazirliyi ilə Azərbaycan Respublikasının Təhsil Nazirliyi arasında təhsil sahəsində əməkdaşlığa dair 3 aprel 2017-ci il tarixində imzalanmış müqavilə”yə əsasən həyata keçirilir.

Proqram çərçivəsində Azərbaycan vətəndaşlarına Qazaxıstanın ali təhsil müəssisələrində bakalavriat, magistratura və doktorantura səviyyələri üzrə təhsil almaq imkanı yaradılır.

Təqaüd proqramına müraciət üçün son tarix 22 may 2026-cı il müəyyən edilib.

Ətraflı məlumatı elan vasitəsilə əldə edə bilərsiniz:
https://htp.edu.az/uploads/fileuploads/2026/04/eec76e77c4ef49fc99be6142a457f6c4.pdf

LDU-da bərpa olunan enerji və rəqəmsal texnologiyalar mövzusunda vebinar keçirilib
Lənkəran Dövlət Universitetində “Bərpa olunan enerji və rəqəmsal texnologiyalar” mövzusunda elmi-praktik vebinar keçirilib. Vebinarı giriş sözü ilə universitetin Tarix–coğrafiya və incəsənət fakültəsinin dekanı, dosent Afaq Qasımova açaraq müasir dövrdə bərpa olunan enerji mənbələrinin və rəqəmsal texnologiyaların cəmiyyətin davamlı inkişafındakı rolundan danışıb.
Vebinarda Təbiyyat fakültəsinin dekanı dos.Nahid Paşayev, Coğrafiya və onun tədrisi metodikası, Fizika, kimya və biologiya, eləcə də Riyaziyyat və informatika kafedralarının dosentləri Sənan Əzizov, Gülnarə Məmmədova, Qorxmaz Ağayev, Taleh Mənsumov, baş müəllimlər Cavidan Əliyev, Ülkər Fərzəliyeva, Qalib Əmənov, həmçinin müəllimlər, magistrantlar və tələbələr çıxış edərək mövzu ilə bağlı fikirlərini bölüşdürüblər.
Çıxışlarda bərpa olunan enerji mənbələrinin tətbiqi imkanları, enerji səmərəliliyinin artırılması yolları, rəqəmsal texnologiyaların enerji sektorunda istifadəsi, həmçinin bu sahədə innovativ yanaşmalar və müasir elmi-praktik təcrübələr, günəş və külək enerjisinin potensialı, ekoloji dayanıqlılığın təmin olunması və “ağıllı” texnologiyaların tətbiqi məsələləri və s. barədə söz açılıb.
Vebinarda iştirakçıları maraqlandıran suallar cavablandırılıb, bu istiqamətdə gələcək elmi əməkdaşlıq imkanlarının genişləndirilməsinin vacibliyi vurğulanıb.

Tədqiqatçılar üçün laboratoriya avadanlıqlarının vahid rəqəmsal bazası yaradılıb

Elm və Ali Təhsil üzrə Dövlət Agentliyi tərəfindən “Rəqəmsal Repozitariyaların İnkişafına Dəstək” layihəsi çərçivəsində laboratoriya avadanlıqları üzrə mərkəzi rəqəmsal repozitariya istifadəyə verilib.

Platformanın yaradılmasında əsas məqsəd ölkənin elmi və ali təhsil müəssisələrində mövcud olan laboratoriya avadanlıqları haqqında məlumatları vahid rəqəmsal bazada toplamaq və tədqiqatçılar üçün bu avadanlıqlara çıxışı asanlaşdırmaqdır. Bu platforma ölkənin elmi və ali təhsil müəssisələrində mövcud olan laboratoriya avadanlıqlarını vahid bazada birləşdirən ilk açıq çıxışlı rəqəmsal repozitariyadır.

Hazırda repozitariyada 29 müəssisəyə aid 2000-ə yaxın laboratoriya avadanlığı haqqında məlumat yerləşdirilib. Bazada avadanlığın adı, istehsalçı şirkəti və ölkəsi, istehsal ili, yerləşdiyi laboratoriya, şəkli, eləcə də avadanlığa məsul şəxs barədə məlumatlar təqdim olunur.

Layihə laboratoriya avadanlıqlarından daha səmərəli istifadə olunmasına, eyni avadanlığın müxtəlif qurumlar tərəfindən təkrar alınmasının qarşısının alınmasına və büdcə vəsaitlərinə qənaət edilməsinə töhfə verəcək. Eyni zamanda, platforma alim və tədqiqatçıların elmi fəaliyyətini dəstəkləməklə yanaşı, elmi, sənaye və korporativ müəssisələr arasında əməkdaşlıq imkanlarını genişləndirəcək.

Hazırda sistemdə yerləşdirilən məlumatlar davamlı olaraq yenilənir və genişləndirilir. Yaxın mərhələdə platformada elmi və ali təhsil müəssisələrinin elmi nəşrlərinin və tədqiqatçı profillərinin də yerləşdirilməsi nəzərdə tutulur.

İnventarında olan laboratoriya avadanlıqları haqqında məlumatları elmi ictimaiyyətlə bölüşmək istəyən sənaye və korporativ müəssisələr də layihəyə qoşula bilərlər.

Rəqəmsal repozitariyaya aşağıdakı keçid vasitəsilə daxil olmaq mümkündür:
https://dspace.eatda.edu.az/home

Masallı Dövlət Regional Kollecinin müəllim və tələbə heyəti Lənkəran Dövlət Universitetinin (LDU) nəzdində fəaliyyət göstərən Baytarlıq klinikasında olub.
Səfər çərçivəsində qonaqlar klinikanın iş şəraiti, avadanlıqları və s. ilə yaxından tanış olublar.
Kollec müəllimləri və tələbələr klinikada təşkil olunan laboratoriya dərslərində iştirak edərək təcrübi proseslərin tədrisi prosesini canlı izləyiblər.
Tələbələrə heyvanların müayinə və müalicə prosedurlarının, həmçinin laborator analizlərin aparılma üsulları barədə ətraflı məlumat verilib, onları maraqlandıran suallar mütəxəssislər tərəfindən cavablandırılıb.

LDU-da Ümumdünya Şəhərsalma Forumu ilə bağlı vebinar keçirilib
Lənkəran Dövlət Universitetində BMT-nin Ümumdünya Şəhərsalma Forumunun 13-cü sessiyasının (WUF13) 2026-cı ildə Bakı şəhərində keçirilməsi ilə əlaqədar növbəti maarifləndirici tədbir keçirilib. “Azərbaycanın Memarlıq və Şəhərsalma İli: Tarixdən gələcəyə” mövzusunda keçirilən elmi-praktik vebinarı giriş sözü ilə universitetin Tarix–Coğrafiya və İncəsənət fakültəsinin dekanı dos. Afaq Qasımova açaraq Ümumdünya Şəhərsalma Forumunun 13-cü sessiyasının (WUF13) respublikamızda keçirilməsinın əhəmiyyəti haqqında danışıb. Bildirib ki, bu, Azərbaycanın dünyada artan beynəlxalq nüfuzunun göstəricisidir və ölkəmiz üçün əhəmiyyəti böyükdür.
Vebinarda Tarix və onun tədrisi metodikası kafedrasının dosentləri Kamal Mahmudov, Müşfiq Bayramov, Emin Məlikov, Mayis Cəfərov, baş müəllim Vüsal Nəsirli, Muzeyşünaslıq ixtisası üzrə magistrant Günay Rəşidbəyli çıxış edərək Azərbaycanın memarlıq irsinin tarixi inkişaf mərhələləri, müasir şəhərsalma siyasəti və bu sahədə qarşıda duran perspektivlər barədə elmi məruzələrlə çıxış etmişlər. Məruzələrdə qeyd edilib ki, Ümumdünya Şəhərsalma Forumunun (World Urban Forum – WUF) 13-cü sessiyası BMT-nin Məskunlaşma Proqramı (UN-Habitat) tərəfindən təşkil olunan və dayanıqlı urbanizasiya sahəsində dünyanın ən nüfuzlu beynəlxalq tədbirlərindəndir, WUF13 ölkələr, şəhərlər, ekspertlər və beynəlxalq təşkilatlar üçün qlobal urbanizasiya problemlərini və həll yollarını müzakirə etmək üçün əsas platformadır. Ümumdünya Şəhərsalma Forumunun (WUF) Azərbaycanda keçirilməsinin əhəmiyyəti çoxşaxəlidir və ölkənin beynəlxalq mövqeyinə, regional əməkdaşlığa, şəhər inkişafına və iqtisadi imkanlarına ciddi töhfələr verir. Məruzələrdə vurğulanmışdır ki, bu cür elmi tədbirlər Azərbaycanın zəngin memarlıq irsinin öyrənilməsi və gələcək nəsillərə ötürülməsi baxımından mühüm əhəmiyyət kəsb edir.
Tədbirin sonunda iştirakçıları maraqlandıran suallar cavablandırılıb.

İqtisadiyyat Nazirliyi yanında Dövlət Vergi Xidməti Yay Təcrübə Proqramına qəbul elan edir
İqtisadiyyat Nazirliyi yanında Dövlət Vergi Xidməti tələbələrin bilik, bacarıq və şəxsi inkişafına dəstək vermək məqsədilə 2026-cı ilin yayında ali təhsil müəssisələrinin tələbələri üçün yay düşərgəsi və iş yerində təcrübə olmaqla iki hissədən ibarət Yay Təcrübə Proqramı təşkil edir.

Yay düşərgəsi 7 gün müddətində Dövlət Vergi Xidmətinin Şamaxı rayonunda yerləşən Tədris Mərkəzində təşkil ediləcək. İş yerində təcrübə 8 həftə müddətində Dövlət Vergi Xidmətinin Bakıda və regionlarda yerləşən struktur bölmələrində keçiriləcək.

Yay Təcrübə Proqramının müddəti 6 iyul 2026-cı il tarixdən 4 sentyabr 2026-cı il tarixədək davam edəcək.

Təcrübə proqramının üstünlükləri:

Tələbələr üçün nəzəri biliklərini praktikada tətbiq etmək və dövlət vergi orqanlarının işi ilə tanış olmaq imkanı;
İqtisadiyyat və vergi sahəsində praktiki bilik və bacarıqların formalaşdırılması məqsədilə keçiriləcək təlimlərdə iştirak imkanı;
Təcrübə keçən tələbələrə proqramda iştirakla bağlı sertifikatın verilməsi;
Təcrübə proqramını uğurla tamamlayan tələbələrin dövlət vergi orqanlarına daimi işə qəbulu üçün dəyərləndirilməsi.
Proqramda iştirak etmək üçün namizədlərə qoyulan tələblər:

Azərbaycan Respublikasının vətəndaşı olmalı;
Yerli və ya xarici dövlətlərin ali təhsil müəssisələrinin sonuncu kurs bakalavriat pilləsində və ya 1-ci və ya 2-ci kurs magistratura pilləsində iqtisadiyyat, hüquq və ya idarəetmə ixtisas istiqamətləri üzrə təhsil almalı;
Cari tədris ilinin payız semestri üzrə Ümumi Orta Müvəffəqiyyət Göstəricisi 80 baldan (4 ballıq sistem üzərindən 3 baldan) yuxarı olmalıdır.
Proqramda iştirak etmək üçün seçim mərhələləri:

I mərhələ: Sənəd qəbulu üzrə ilkin yoxlamanın aparılması.
II mərhələ: Namizədlərin özünütəqdimat video çıxışlarının qiymətləndirilməsi.
III mərhələ: Namizədlərin qrup tapşırıqları üzrə qiymətləndirilməsi.
Proqramda iştirak etmək üçün sənəd qəbulu [email protected] elektron poçt ünvanı vasitəsilə 10 aprel 2026-cı il saat 09:00-dan 10 may 2026-cı il saat 23:59-dək həyata keçiriləcək.

Müraciətlər göndərilərkən (mövzu hissəsində “Yay Təcrübə Proqramı 2026” qeyd etməklə) şəxsiyyət vəsiqəsi, tələbə bileti və akademik transkript mütləq qaydada fayl şəklində məktuba əlavə olunmalıdır.
Namizədin müraciəti [email protected] elektron poçt ünvanına daxil olduqdan sonra 10 iş günü ərzində yoxlanılacaq və müraciətin nəticəsi barədə onun elektron poçt ünvanına məlumat göndəriləcəkdir. Müəyyən edilən sənədlərdən hər hansı birini təqdim etməyən və ya elanda göstərilən tələblərə uyğun olmayan namizədlərin müraciətləri qəbul edilməyəcək. Müraciətlərin göndərilməsi zamanı hər hansı texniki problem yarandıqda namizədlər 012-403-81-35 nömrəli telefonla Dövlət Vergi Xidmətinə müraciət edə bilərlər.

Müraciətləri qəbul edilmiş namizədlərə ilkin seçim mərhələsində iştirak barədə məlumatlar əvvəlcədən veriləcək.

N.S.İbrahimovun Lənkəran Dövlət Universitetinin rektoru təyin edilməsi haqqında Azərbaycan Respublikası Prezidentinin Sərəncamı
Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, “Təhsil haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2009-cu il 5 sentyabr tarixli 156 nömrəli Fərmanının 2.13-cü bəndinə uyğun olaraq qərara alıram:

Natiq Səhrab oğlu İbrahimov Lənkəran Dövlət Universitetinin rektoru təyin edilsin.

İlham Əliyev

Azərbaycan Respublikasının Prezidenti

Bakı şəhəri, 23 aprel 2026-cı il

📌 Elm və təhsil naziri Emin Əmrullayev Birləşmiş Millətlər Təşkilatının Ümumdünya Şəhərsalma Forumunun On Üçüncü sessiyasının (WUF13) keçirildiyi dövrdə Bakı şəhərində fəaliyyət göstərən təhsil müəssisələrinin fəaliyyətinin tənzimlənməsi məqsədilə əmr imzalayıb.

📝 Əmrə əsasən, WUF13-ün keçiriləcəyi 📆 17-22 may tarixlərində Bakı şəhərində fəaliyyət göstərən təhsil müəssisələrində (məktəbəqədər və internat tipli ümumi təhsil müəssisələri istisna olmaqla) tədris və təlim-tərbiyə prosesinin təşkilində bəzi dəyişikliklər ediləcək.

Belə ki, ümumi təhsil müəssisələrinin məktəbəhazırlıq qrupları və ibtidai sinifləri üzrə mayın 18-dən 22-dək tətil (1-5 may tarixləri əvəzinə) müəyyən ediləcək.

✅ Bundan başqa, Pirallahı, Qaradağ, Suraxanı, Sabunçu və Nizami rayonları istisna olmaqla, Bakı şəhərinin digər rayonlarında fəaliyyət göstərən ümumi təhsil müəssisələrinin V-XI siniflərində dərslər mayın 18-dən 22-dək distant (məsafədən) formada keçiriləcək.

Eyni zamanda Bakı şəhərində yerləşən peşə, orta ixtisas və ali təhsil müəssisələrində də tədrisin mayın 18-dən 22-dək distant (məsafədən) formada təşkili əmrdə qeyd olunur.

WUF13 Azerbaijan

Lənkəran Dövlət Universitetinin (LDU) Baytarlıq fakültəsində Türkiyənin Qafqaz(Qars) Universitetinin professoru Dr. Vedat Baranın “Heyvanlarda Düz bağırsaq (Rektum) prolapsusları“ mövzusunda elmi seminarı keçirilib.
Dr. Vedat Baran rektum prolapsuslarının yaranma səbəbləri, klinik əlamətləri və müasir müalicə üsulları haqqında seminarda ətraflı məlumat verib, baytarlıq praktikasında rast gəlinən real hallardan nümunələr təqdim olunub, onların həlli yolları izah edilib.
Sonda mövzu ətrafında diskussiya keçirilib, tələbələri və müəllimləri maraqlandıran suallar cavalandırılıb.

Lənkəran Dövlət Universitetinin (LDU) Baytarlıq fakültəsində Türkiyənin Qafqaz(Qars) Universitetinin professoru Dr. Yavuz Öztürklərin “Cinsiyyəti müəyyən edilmiş sperma İlə süni mayalanma“ mövzusunda elmi seminarı keçirilib.
Seminarda prof. Yavuz Öztürklər heyvandarlıqda genetik seleksiyanın əhəmiyyəti, cinsiyyətin əvvəlcədən müəyyənləşdirilməsinin iqtisadi və bioloji üstünlükləri, eləcə də süni mayalanma prosesində istifadə olunan innovativ üsullar barədə ətraflı söz açıb, cinsiyyətə görə seçilmiş spermadan istifadənin məhsuldarlığa təsiri, təsərrüfatların idarə olunmasında rolu və beynəlxalq təcrübədə tətbiqi sahələrindən danışıb.
Elmi seminarın sonunda professor-müəllim, tələbə heyətini maraqlandıran suallar cavablandırılıb.

Lənkəran Dövlət Universitetində keçirilən zona fənn olipmiadasının nəticələri ilə burdan tanış ola bilərsiniz.
https://lsu.edu.az/new/NewsLister/view.php?id=782