Şahdağ kənd M.Əsgərov adına tam orta ümumtəhsil məktəbi

14/08/2026

Prezident İlham Əliyevin Naxçıvana səfəri

Prezident İlham Əliyevin 2026-cı il avqustun 11-də Naxçıvan Muxtar Respublikasına həyata keçirdiyi səfər, dövlət başçısının bu diyara etdiyi 17-ci səfər olsa da, əhəmiyyəti baxımından adi bir işgüzar gediş-gəlişdən qat-qat artıq məzmun daşıyır. Səfər zamanı Azərbaycan Televiziyasına verdiyi müsahibədə Prezident təkcə görülən işlərin siyahısını təqdim etməmiş, həm də Naxçıvanın timsalında Azərbaycanın strateji baxışını - təhlükəsizlikdən enerjiyə, nəqliyyatdan mədəni irsə qədər - bütöv bir mənzərə şəklində ortaya qoymuşdur. Dövlət başçısının vurğuladığı kimi, hər səfərin özünəməxsus mənası və konkret nəticələri olub, bu dəfə də istisna deyil.

Prezident İlham Əliyev çıxışında ilk növbədə Naxçıvanın müdafiə potensialının gücləndirilməsini prioritet məsələ kimi diqqətə çatdırmışdır. Bayrağın təqdim olunması mərasimi bu istiqamətdə görülən işlərin bariz nümunəsi olmuşdur - həm ən müasir hərbi texnika ilə təchizat, həm də yeni komanda qüvvələrinin yaradılması Azərbaycan Silahlı Qüvvələrinin son dövrdəki inkişaf tendensiyasını əks etdirir. Dövlət başçısının xatırlatdığı kimi, Naxçıvanda onun Sərəncamı ilə yaradılmış Əlahiddə Ordu Azərbaycan Silahlı Qüvvələrinin ayrılmaz tərkib hissəsi olmaqla yanaşı, muxtar respublikanın özünəməxsus coğrafi vəziyyəti - Azərbaycanın əsas hissəsi ilə birbaşa sərhədinin olmaması - bu bölgənin təhlükəsizliyinə xüsusi diqqət tələb etdiyini bir daha ortaya qoyur. Prezident bunu ilk və başlıca şərt adlandıraraq, Azərbaycan Silahlı Qüvvələrinin bu gün regionda söz sahibi olduğunu, Naxçıvandakı hərbi potensialın isə gündən-günə gücləndirildiyini bildirmişdir.
Səfər çərçivəsində baş tutan ən önəmli hadisələrdən biri Naxçıvan Sənaye Parkının təməlinin qoyulması olmuşdur. Bu park ərazi göstəricisinə görə Sumqayıt Sənaye Parkından sonra ölkədə ikinci yerdədir və Prezidentin təşəbbüsü ilə yaradılan digər sənaye parkları sırasına qoşulur.

07/08/2026

04/08/2026

Prezident İlham Əliyevin Qırğızıstana Dövlət Səfəri

31 iyul 2026-cı ildə Prezident İlham Əliyevin Qırğızıstana dövlət səfəri çərçivəsində iki ölkə arasında dövlətlərarası münasibətlər ən yüksək – müttəfiqlik səviyyəsinə qaldırılmışdır. Bəyanatda vurğulandığı kimi, tərəflər beynəlxalq platformalarda, iqtisadi-ticari sahədə və təhlükəsizliyin möhkəmləndirilməsində qarşılıqlı dəstəyi davam etdirməyi öhdələrinə götürmüşlər. Səfər çərçivəsində imzalanan sənədlər paketinin genişliyi əməkdaşlığın çoxşaxəli xarakterini təsdiqləyir.

Azərbaycan-Qırğız İnvestisiya Fondunun büdcəsi iki dəfə artırılaraq 200 milyon dollara çatdırılmışdır. Bu addım Fondun mövcud layihələri – birgə istehsal və yeni iş yerlərinin yaradılması – əsasında iqtisadi potensialın gələcəkdə daha da genişləndirilməsinə şərait yaradır. Səfər zamanı İssık-Kul gölünün sahilində Azərbaycan dövlətinin vəsaiti hesabına inşa edilmiş “Bakı” beşulduzlu hotelinin açılışı da baş tutmuşdur.

Ağdam rayonunda “Manas” dastanının adını daşıyan məktəbin açılışı Qırğız xalqının 30 il işğal altında qalmış Qarabağın bərpasına verdiyi töhfə kimi qiymətləndirilmişdir. Bununla yanaşı, Bakıda Çingiz Aytmatovun abidəsi və adını daşıyan parkın açılışı da iki xalq arasındakı tarixi-mədəni yaxınlığın rəmzi ifadəsi olmuşdur.

Bişkekdə fəaliyyət göstərən Qırğızıstan-Azərbaycan dostluq parkı və hər iki ölkədə qarşılıqlı təşkil olunan Mədəniyyət Günləri xalqlar arasındakı ortaq kökləri nümayiş etdirir. Prezident İlham Əliyev, həmçinin, Azərbaycanın Mərkəzi Asiya Məşvərət Görüşlərinə tamhüquqlu üzv qəbul olunmasına görə minnətdarlığını bildirmişdir.

Prezident İlham Əliyev Qırğız Respublikasının ali mükafatı – 1-ci dərəcəli “Manas” ordeni, Prezident Sadır Japarov isə Azərbaycanın “Heydər Əliyev” ordeni ilə təltif edilmişdir. Səfər çərçivəsində qəbul olunan Çolpon-Ata Bəyannaməsi Azərbaycan-Mərkəzi Asiya əməkdaşlığında yeni mərhələnin başlanğıcı kimi qiymətləndirilir.

31/07/2026

𝐀𝐳ə𝐫𝐛𝐚𝐲𝐜𝐚𝐧 𝐝𝐢𝐥𝐢 𝐬𝐢𝐲𝐚𝐬ə𝐭𝐢: 𝐃𝐨̈𝐯𝐥ə𝐭 𝐝𝐢𝐥𝐢𝐧𝐢𝐧 𝐡𝐮̈𝐪𝐮𝐪𝐢 𝐬𝐭𝐚𝐭𝐮𝐬𝐮𝐧𝐮𝐧 𝐟𝐨𝐫𝐦𝐚𝐥𝐚𝐬̧𝐦𝐚𝐬ı 𝐯ə 𝐦𝐮̈𝐚𝐬𝐢𝐫 𝐢𝐧𝐤𝐢𝐬̧𝐚𝐟 𝐦ə𝐫𝐡ə𝐥ə𝐬𝐢

“Fəxr edə bilərik ki, bizim zəngin, böyük söz ehtiyatına malik olan Azərbaycan dilimiz var.” -Ulu Öndər Heydər Əliyev

Hər bir xalqın varlığını, mənəvi sərvətini və tarixi yaddaşını yaşadan ən başlıca vasitə onun ana dilidir. Azərbaycan xalqı üçün doğma dil sadəcə ünsiyyət vasitəsi deyil, həm də milli kimliyin, dövlətçilik ənənəsinin və mədəni varlığın əsas rəmzidir. Bu səbəbdən hər il avqustun 1-i ölkəmizdə Azərbaycan əlifbası və Azərbaycan dili günü kimi geniş və təntənəli şəkildə qeyd olunur. Bu gün təkcə rəsmi təqvim tarixi deyil, həm də xalqın öz dilinə, öz kökünə bağlılığının növbəti təsdiqidir.

Ümummilli Lider Heydər Əliyevin dəfələrlə vurğuladığı kimi, dil hər bir millətin milliliyinin əsasıdır və müstəqil dövlətçiliyin ayrılmaz atributudur. Bu fikir təsadüfi deyil Azərbaycan dilinin dövlət dili statusu qazanması, qorunması və inkişaf etdirilməsi tarixi, ölkəmizin müstəqillik və özünüdərk yolunun ayrılmaz hissəsi kimi dəyərləndirilməlidir.

XX əsrin 70-ci illərinin ortalarından etibarən SSRİ-ni təşkil edən respublikaların ictimai-siyasi həyatında dil məsələsi yenidən gündəmə gəlmiş, lakin SSRİ Konstitusiyasının qəbulundan sonra milli dillərin sıxışdırılması prosesi daha da güclənmişdir. Belə bir mühitdə ana dili məsələsinin təbliği ilə məşğul olmaq böyük cəsarət tələb edirdi. Hələ 1930-cu illərdə bu mövzunu qabardanlar Sibirə sürgün edilir, milli respublikaların rəhbərləri belə ana dili məsələsini açıq şəkildə gündəmə gətirməkdə çətinlik çəkirdilər. Belə ağır ideoloji təzyiq şəraitində Azərbaycan dilinin taleyi ilə bağlı hər hansı addım ciddi siyasi risk demək idi.

Belə bir mürəkkəb tarixi şəraitdə Ulu Öndər Heydər Əliyev ana dilinin taleyi ilə bağlı öz mövqeyini həmişə qətiyyətlə müdafiə etmişdir.

23/07/2026

Azərbaycan-Almaniya münasibətləri: Strateji tərəfdaşlığın yeni mərhələsi

2026-cı il iyulun 21-də Prezident İlham Əliyevin Almaniya Federativ Respublikasına rəsmi səfəri baş tutub. Səfər çərçivəsində Federal Kansler Fridrix Merts ilə keçirilən görüşdən sonra dövlət başçısı mətbuata bəyanatla çıxış edib. Bəyanatda iki ölkə arasında strateji tərəfdaşlığın yeni müstəvisi, iqtisadi və enerji əməkdaşlığının perspektivləri, nəqliyyat-tranzit imkanları, habelə regionda sülh prosesi ilə bağlı mühüm məqamlar öz əksini tapıb.

Səfər çərçivəsində Azərbaycan Respublikası ilə Almaniya Federativ Respublikası arasında ikitərəfli tərəfdaşlıq üçün strateji gündəliyə dair Birgə Bəyannamə imzalanıb. Prezident İlham Əliyev bildirib ki, bu sənəd tərəflər arasında strateji dialoqun başlanmasına imkan yaradır və əlaqələri yeni səviyyəyə qaldıracaq. Paralel olaraq, Azərbaycan-Almaniya Biznes Şurasının yaradılması və fəaliyyəti barədə də Birgə Bəyannamə imzalanıb ki, bu da iqtisadi əlaqələrin institusional bazasını gücləndirəcək.

Azərbaycanda hazırda 200-dən artıq Alman şirkəti uğurla fəaliyyət göstərir və Prezident bildirib ki, imzalanan sənədlərdən sonra bu rəqəmin daha da artacağına əmindir. Qarşılıqlı sərmayə qoyuluşu istiqamətində konkret təkliflər müzakirə olunub. Xüsusi vurğulanan məqamlardan biri enerji sahəsidir: bu ildən Azərbaycan öz təbii qazını Almaniyaya ixrac etməyə başlayıb və artıq Avropa İttifaqına üzv 10 ölkəyə qaz göndərilir. Bununla yanaşı, Azərbaycan neftini də Almaniyaya ixrac edir və gələcəkdə yaşıl enerji resurslarının Avropa bazarına çıxarılması nəzərdə tutulur ki, bu da enerji təhlükəsizliyi baxımından mühüm töhfə hesab olunur.

Bağlantı və tranzit istiqamətində Azərbaycan-Almaniya əməkdaşlığının əhəmiyyəti xüsusi qeyd olunub. Azərbaycan nəqliyyat infrastrukturunu davamlı təkmilləşdirir və keçən il Orta Asiya məşvərət formatına tamhüquqlu üzv olmaqla, ölkə Orta Asiya ilə Avropa arasında bir növ körpü roluna sahib olub.

22/07/2026

MİLLİ MƏTBUATIMIZIN İNKİŞAF YOLU: ƏKİNÇİ”DƏN MÜASİR DÖVRƏ QƏDƏR
"Milli mətbuatımızın inkişaf mərhələləri Azərbaycan xalqının azadlıq, müstəqillik uğrunda mübarizə tarixinin tərkib hissəsidir."
Ulu Öndər Heydər Əliyev
Hər il iyulun 22-də Azərbaycanda Milli Mətbuat Günü qeyd olunur. Bu tarix təsadüfi seçilməyib - məhz 1875-ci il iyulun 22-də görkəmli ziyalı, təbiətşünas alim və maarifçi-publisist Həsən bəy Zərdabinin naşirliyi ilə Azərbaycan dilində ilk qəzet - “Əkinçi” işıq üzü görmüşdür. Bu hadisə təkcə mətbuat tarixi üçün deyil, bütövlükdə xalqımızın ictimai-siyasi və mədəni həyatı üçün dönüş nöqtəsi olmuşdur. Ulu Öndər Heydər Əliyevin vurğuladığı kimi, milli mətbuatımızın inkişaf mərhələləri xalqımızın azadlıq və müstəqillik uğrunda apardığı mübarizə tarixinin ayrılmaz hissəsidir. Məhz “Əkinçi”dən başlayaraq cəmiyyətimiz azadlıq, demokratiya və müstəqillik dərslərini milli mətbuatın səhifələrindən öyrənmişdir.
“Əkinçi” qəzeti cəmi iki il - 1875-ci il iyulun 22-dən 1877-ci ilin sentyabrınadək fəaliyyət göstərmiş, bu müddət ərzində 56 sayı nəşr olunmuşdur. Ömrü qısa olsa da, təsiri uzunmüddətli olmuşdur. Qəzet maarifçilik missiyasını əsas hədəf seçmiş, cəhalətə və xurafata qarşı kəskin məqalələr dərc etmiş, qısa müddətdə həm ziyalılar, həm də sadə insanlar arasında böyük rəğbət qazanmışdır. Çar Rusiyası isə qəzetin cəmiyyətin maarifləndirilməsi və siyasi proseslərə bələdliyi artırmaqdakı rolundan çəkinərək onun nəşrinə son qoymuşdur. Bununla belə, “Əkinçi”nin açdığı yol bağlanmamışdır: onun ardınca “Ziya”, “Kəşkül”, “Şərqi-Rus”, “Həyat”, “Füyuzat”, “Molla Nəsrəddin”, “Tərəqqi”, “Açıq söz” və digər onlarla qəzet və jurnal meydana çıxmış, anadilli mətbuatın sonrakı tarixini yaratmışdır. Zərdabinin kürəkəni Əlimərdan bəy Topçubaşovun redaktorluğu ilə nəşr olunan rusdilli “Kaspi” qəzeti də məfkurə baxımından eyni ideyaların daşıyıcısı olmuşdur

24/06/2026

Azərbaycan-Türkmənistan münasibətlərinin yeni mərhələsi
Azərbaycan Respublikası ilə Türkmənistan arasında münasibətlər ortaq tarixi köklərə, dil, din və mədəni yaxınlığa əsaslanır. Son illərdə iki ölkə arasında siyasi dialoqun intensivləşməsi, iqtisadi və humanitar sahələrdə əməkdaşlığın genişlənməsi əlaqələrin strateji xarakter almasına şərait yaratmışdır.
2026-cı il iyunun 22-də Türkmənistan Prezidenti Sərdar Berdiməhəmmədovun Azərbaycana dövlət səfəri zamanı keçirilən görüşlər və imzalanan sənədlər ikitərəfli münasibətlərin inkişafında mühüm mərhələ olmuşdur. Azərbaycan Prezidenti İlham Əliyevin mətbuata bəyanatında vurğulandığı kimi, tərəflər siyasi, iqtisadi, nəqliyyat-logistika, enerji və humanitar sahələr üzrə əməkdaşlığın genişləndirilməsi barədə razılığa gəlmişlər.
Səfər zamanı Qarabağın bərpası istiqamətində Türkmənistanın dəstəyi xüsusi qeyd edilmişdir. Füzuli şəhərində Türkmənistanın təşəbbüsü ilə məscid tikintisinin başlanması qardaş ölkənin Azərbaycana göstərdiyi mənəvi və siyasi dəstəyin nümunəsi kimi qiymətləndirilmişdir. Bu addım iki xalq arasında dostluq və həmrəyliyin daha da möhkəmləndirilməsinə xidmət edir.
Mədəni-humanitar əlaqələr də münasibətlərin mühüm istiqamətlərindən biridir. Qarşılıqlı Mədəniyyət Günlərinin keçirilməsi, yaradıcı kollektivlərin mübadiləsi, Bakı və Aşqabad, eləcə də Füzuli və Arkadağ şəhərləri arasında qardaşlaşma əlaqələri xalqlar arasında dostluğun inkişafına töhfə verir.
Azərbaycanın Mərkəzi Asiya Dövlət Başçılarının Məşvərət Şurasına tamhüquqlu üzv qəbul olunmasında Türkmənistanın göstərdiyi dəstək regional əməkdaşlığın inkişafı baxımından xüsusi əhəmiyyət kəsb edir. Bu proses Azərbaycanın Mərkəzi Asiya ölkələri ilə siyasi, iqtisadi və nəqliyyat əlaqələrinin genişlənməsinə yeni imkanlar açır.
Nəqliyyat-logistika sahəsində əməkdaşlıq da prioritet istiqamətlərdən biri kimi çıxış edir.

13/06/2026

Məktəbimizdə Son zəng tədbiri.

06/06/2026

⚡ Məktəblərdə şagird davranışlarının tənzimlənməsi və təhlükəsiz təhsil mühitinin formalaşdırılması məqsədilə davranış qaydaları tətbiq olunur.
​Bu qaydalarda müxtəlif səviyyələr üzrə pozuntular müəyyənləşdirilsə də, bəzi hərəkətlər ən ağır - 5-ci səviyyəli qayda pozuntusu hesab edilir.
​Azərbaycan dövlətçiliyinə, milli dəyərlərə və dövlət rəmzlərinə hörmətsizlik etmək, qəsdən ciddi fiziki zərərə səbəb olan zorakılıq və cinsi zorakılıq halları 5-ci səviyyəli pozuntu sayılır.
​Eyni zamanda, təhlükəsizlik qaydalarını ciddi xəsarət və ya ölümə səbəb ola biləcək şəkildə pozmaq, ekskursiyalar zamanı nəqliyyatın təhlükəsizliyini riskə atan davranışlar nümayiş etdirmək də ən ağır qayda pozuntuları sırasındadır.
​Başqalarının əşyalarına və ya məktəb əmlakına qəsdən ziyan vurmaq, qanunsuz dərman vasitələrini və qadağan olunmuş əşyaları məktəbə gətirmək, istifadə etmək və ya satmaq da ciddi intizam pozuntusu hesab edilir.
​Bundan başqa, məxfilik hüquqlarının ciddi şəkildə pozulması, məktəbin, eləcə də şagird və müəllimlərin nüfuzuna ağır zərbə vuran hərəkətlər, məktəbə silah və ya təhlükə ssenarisi yaradan digər qadağan olunmuş əşyaların gətirilməsi də 5-ci səviyyəyə aid edilir.
​Qaydalarda akademik nəticələrin saxtalaşdırılması, bu məqsədlə məktəb əməkdaşlarına pul, hədiyyə, xidmət və ya digər maddi nemətlərin təklif olunması da ən ağır pozuntular sırasında göstərilib.
​Həmçinin qeyri-etik və ağır təhqiramiz məzmunlu materialların kağız və ya elektron formada əldə edilməsi və yayılması da 5-ci səviyyəli davranış pozuntusu hesab olunur.