İsmayıllı rayonu Basqal qəsəbə R.Novruzov adına tam orta ümumtəhsil məktəbi

22/08/2026

Prezident İlham Əliyevin müsahibəsində Azərbaycan–Özbəkistan münasibətləri

Azərbaycan Respublikasının Prezidenti İlham Əliyevin Özbəkistanın Milli İnformasiya Agentliyinə (UzA) verdiyi müsahibə Azərbaycan–Özbəkistan münasibətlərinin hazırkı yüksək səviyyəsini və gələcək inkişaf perspektivlərini aydın şəkildə nümayiş etdirir. Dövlət başçısı iki ölkə arasındakı əlaqələrin ortaq tarix, mədəniyyət, dil, mənəvi dəyərlər, dostluq və qardaşlıq üzərində qurulduğunu vurğulayıb.

Prezident İlham Əliyev bildirib ki, son illərdə Azərbaycan ilə Özbəkistan arasında dövlətlərarası münasibətlər sürətlə inkişaf edərək ən yüksək mərhələyə – müttəfiqlik səviyyəsinə yüksəlib. Ölkə rəhbərləri İlham Əliyev və Şavkat Mirziyoyev arasındakı səmimi dostluq, qarşılıqlı hörmət və etimad bu münasibətlərin daha da möhkəmlənməsində mühüm rol oynayır. Son beş ildə yüksək səviyyədə 15 qarşılıqlı səfərin həyata keçirilməsi siyasi dialoqun intensivliyinin göstəricisidir.

Müsahibədə iqtisadi-ticari əməkdaşlığın inkişafına da xüsusi diqqət yetirilib. Prezidentin qeyd etdiyi kimi, 2025-ci ildə iki ölkə arasında ticarət dövriyyəsi üç dəfədən çox artaraq 795 milyon dollara çatıb. Nəqliyyat, sənaye, kənd təsərrüfatı, investisiya və birgə istehsal sahələrində həyata keçirilən layihələr əməkdaşlığın geniş imkanlara malik olduğunu göstərir.

Azərbaycan–Özbəkistan əlaqələrinin mühüm istiqamətlərindən biri də mədəni-humanitar əməkdaşlıqdır. Təhsil, media, QHT-lər və turizm sahələrində əlaqələr genişlənir. Füzuli şəhərində Özbəkistanın təşəbbüsü ilə inşa edilən Mirzə Uluqbəy adına məktəb iki qardaş xalqın dostluğunun və həmrəyliyinin parlaq nümunəsidir. Şəhərlər arasında qurulan qardaşlaşma əlaqələri də xalqlarımızı bir-birinə daha da yaxınlaşdırır.

Prezident İlham Əliyev həmçinin Azərbaycan və Özbəkistanın Türk Dövlətləri Təşkilatı və digər beynəlxalq platformalarda bir-birini dəstəklədiyini vurğulayıb. Bu əməkdaşlıq yalnız iki ölkənin deyil, bütövlükdə Türk dünyasının birliyinə, regionda sülhün, sabitliyin və inkişafın möhkəmlənməsinə xidmət edir.

Beləliklə, Prezident İlham Əliyevin müsahibəsi göstərir ki, Azərbaycan–Özbəkistan münasibətləri sadəcə dostluq və qardaşlıq münasibətləri deyil, həm də qarşılıqlı etimada, ortaq maraqlara və strateji əməkdaşlığa əsaslanan möhkəm müttəfiqlik münasibətləridir. Bu əlaqələrin gələcəkdə daha da genişlənəcəyi və hər iki xalqın rifahına mühüm töhfələr verəcəyi şübhəsizdir.

19/08/2026

📢 XI sinif şagirdlərinin nəzərinə
-----
2026–2027-ci tədris ilindən "Yeni təmayül tədris modeli" tətbiq ediləcək İnternat tipli Şamaxı Avropa liseyi və İsmayıllı şəhər E.Məmmədov adına 3 nömrəli məktəb-liseyinə XI siniflər üzrə qeydiyyat davam edir!

🎯 Niyə məhz "Tam orta məktəb" layihəsi?

✅ Məqsədyönlü təhsil
Şagirdlər seçdikləri ixtisas qrupuna uyğun fənlər üzrə təhsil alaraq qəbul imtahanlarına daha sistemli və səmərəli hazırlaşırlar.

✅ Peşəkar müəllim heyəti
Dərslər rayonun yüksək akademik nəticələr göstərən, təcrübəli və müsahibə yolu ilə seçilmiş müəllimləri tərəfindən tədris olunur.

✅ Uğurlu təhsil mühiti
Eyni hədəfə sahib, ali təhsil almağı qarşısına məqsəd qoymuş şagirdlərlə birlikdə təhsil almaq motivasiyanı və nailiyyətləri artırır.

✅ Daimi monitorinq və sınaqlar
Şagirdlərin bilik və bacarıqları müntəzəm sınaq imtahanları və monitorinqlər vasitəsilə qiymətləndirilir, inkişaf istiqamətləri müəyyən edilir.

✅ Ali təhsilə aparan etibarlı yol
Layihənin əsas məqsədi şagirdlərin qəbul imtahanlarında yüksək nəticə əldə etməsinə və gələcək peşə seçimində uğur qazanmasına dəstək olmaqdır.

📝 Qeydiyyat üçün linkə keçid edin: 👇

🔹 İnternat tipli Şamaxı Avropa liseyi üzrə qeydiyyat:
Link: https://forms.gle/Wnn9G9QaezXELr6PA

🔹 İsmayıllı şəhər E.Məmmədov adına 3 nömrəli məktəb-lisey üzrə qeydiyyat:
Link: https://forms.gle/8TtVzvjF2CRm5rUb9

17/08/2026

📢 Şagirdlərin elektron yerdəyişməsi prosesinə başlanılır

🗓️ 20 avqust saat 15:00-dan etibarən 2026–2027-ci tədris ili üzrə şagirdlərin elektron yerdəyişməsi prosesi aktivləşdiriləcək. Proses 2–9-cu və 11-ci sinif şagirdlərini əhatə edəcək.

💻 Şagirdlərin elektron yerdəyişməsi sy.edu.az portalı vasitəsilə həyata keçirilir.

📌 Nəzərinizə çatdırırıq ki, internetə çıxış imkanı olmayan vətəndaşlar yerdəyişmə prosesi ilə bağlı aidiyyəti üzrə Agentliyin və təhsili yerli idarəetmə bölmələrinin çağrı mərkəzlərinə, Agentliyin Vətəndaşlara Xidmət Mərkəzinə, eləcə də ASAN xidmət mərkəzlərinə müraciət edə bilərlər.

15/08/2026

Prezident İlham Əliyevin Naxçıvan səfəri

Azərbaycan Respublikasının Prezidenti İlham Əliyev 11 avqust 2026-cı il tarixində Naxçıvan Muxtar Respublikasına səfər edib. Səfər çərçivəsində Naxçıvanın sosial-iqtisadi inkişafı, şəhər infrastrukturunun yenilənməsi, sosial layihələrin həyata keçirilməsi, tarixi-mədəni irsin qorunması və hərbi potensialın gücləndirilməsi istiqamətində mühüm tədbirlər həyata keçirilib.

Dövlətimizin başçısı Naxçıvan şəhərinin 2044-cü ilədək inkişafına dair Baş Planla tanış olub, “Naxçıvan” Mehmanxana Kompleksinin və sosial evlər kompleksinin təməlqoyma mərasimlərində iştirak edib. Həmçinin şəhərin nəqliyyat və dəmir yolu infrastrukturunda aparılan işlərlə tanış olub və elektrik mühərrikli yeni avtobuslara baxış keçirib.

Səfər zamanı DOST Agentliyinin Naxçıvan Regional DOST Mərkəzinin açılışında iştirak edilməsi sosial xidmətlərin daha əlçatan və müasir formada təşkilinə verilən önəmin göstəricisidir. Eyni zamanda Naxçıvanın zəngin tarixi-mədəni irsinin qorunması diqqət mərkəzində olub. Prezident İlham Əliyev Möminə xatun türbəsində aparılan bərpa işləri ilə tanış olub və “Əcəmi seyrangahı” istirahət kompleksində memar Əcəmi Naxçıvaninin abidəsinin açılışında iştirak edib.

Səfərin mühüm istiqamətlərindən biri də Naxçıvanın müdafiə potensialı ilə bağlı olub. Prezident Əlahiddə Ümumqoşun Orduda yeni yaradılan komando hərbi hissələrinə Döyüş bayraqlarının verilməsi mərasimində iştirak edib.

Səfər Naxçıvanın hərtərəfli inkişafına, müasir şəhər mühitinin formalaşdırılmasına, sosial rifahın yüksəldilməsinə və tarixi-mədəni irsin qorunmasına dövlət qayğısının bariz nümunəsi kimi qiymətləndirilir. Naxçıvanın sosial-iqtisadi inkişafının sürətləndirilməsi ilə bağlı Prezidentin 12 avqust 2026-cı il tarixli sərəncamı da səfərin mühüm nəticələrindən biridir.

Bu səfər bir daha göstərir ki, Naxçıvanın inkişafı, onun Azərbaycanın digər bölgələri ilə əlaqələrinin möhkəmləndirilməsi və qədim diyarın potensialından səmərəli istifadə edilməsi dövlət siyasətinin mühüm istiqamətlərindəndir.

11/08/2026

11/08/2026

📢 Ümumi təhsil müəssisələrinin məzunlarına elektron attestatlar təqdim olunur

🎓 2025–2026-cı tədris ilindən etibarən ümumi təhsil müəssisələrinin məzunlarına təhsil haqqında dövlət sənədləri ilk dəfə elektron formatda təqdim olunur. Belə ki, 2026-cı il məzunları attestatlarını artıq myGov platformasından əldə edə bilərlər.

📊 Yeni tətbiq çərçivəsində təxminən 300 min məzunun attestatı elektron sənəd formasında hazırlanıb. Təhsil müəssisələrinin rəhbərləri tərəfindən elektron imza ilə təsdiqlənmiş attestatlar artıq myGov platformasında əlçatandır.

💻 Məzunlar elektron attestatlarını myGov (web) → “Təhsil məlumatlarım” → “Elektron təhsil sənədlərim” bölməsindən əldə edə bilərlər. Valideynlər isə övladlarına aid təhsil sənədlərinə “Övladlarımın təhsil sənədləri və məlumatları” bölməsi vasitəsilə baxa bilərlər.

🔎 Elektron attestatın üzərindəki QR kodu oxutmaqla və ya edu.gov.az saytının “Sənəd yoxlama” bölməsində sənədin nömrəsi və doğum tarixini daxil etməklə attestatın həqiqiliyini yoxlamaq mümkündür.

📌 Qeyd edək ki, elektron attestatların yaxın günlərdə myGov mobil tətbiqində də əlçatan olması təmin ediləcək.

🎯 Elektron attestatların tətbiqi məzunlara təhsil sənədlərini daha rahat, operativ və əlçatan şəkildə əldə etmək imkanı yaradır.

11/08/2026

Ümumi təhsil müəssisələrində vakant olan vəzifələr üzrə işə qəbul üçün müsabiqə elan edilir
-----
Dağlıq Şirvan Regional Təhsil İdarəsinin tabeliyində fəaliyyət göstərən ümumi təhsil müəssisələrində hazırda vakant olan kitabxanaçı, kitabxana müdiri, psixoloq, uşaq birliyi təşkilatının rəhbəri, təsərrüfat işləri üzrə direktor müavini, təsərrüfat müdiri və gənclərin çağırışaqədərki hazırlığı rəhbəri vəzifələri üzrə işə qəbul üzrə müsabiqə elan edilir.

Müsabiqə iki mərhələdən - sənəd qəbulu və test imtahanından ibarət olmaqla həyata keçiriləcəkdir.

Azərbaycan Respublikası Nazirlər Kabinetinin 1994-cü il 15 yanvar tarixli 10 saylı qərarı ilə təsdiq edilmiş “Şəhid adının əbədiləşdirilməsi və şəhid ailələrinə edilən güzəştlərin tətbiqi qaydaları”na uyğun olaraq, həmin Qaydada nəzərdə tutulmuş şəhid ailəsi üzvlərinin inzibati-təsərrüfat və tədris-köməkçi vəzifələrə işə qəbulu vəzifə üzrə uyğunluqları yoxlanılmaqla müsabiqədənkənar qaydada həyata keçiriləcəkdir.

Müsabiqənin test imtahanı mərhələsində qanunvericilik, informasiya-kommunikasiya texnologiyaları və tutulacaq vəzifənin tələbləri üzrə biliklərinin yoxlanılması məqsədilə 60 sual təqdim ediləcək. Test imtahanında hər bir suala düzgün cavab 1 (bir) balla qiymətləndiriləcək və səhv cavablar düzgün cavablara təsir göstərməyəcək. Test imtahanında 30 bal və daha yüksək nəticə göstərən namizədlər uğur qazanmış hesab ediləcək.

Test imtahanının nəticələri imtahanın keçirildiyi tarixdən etibarən 10 (on) iş günündən gec olmayaraq elan ediləcək. Müsabiqə nəticələrindən narazı qalan namizədlər nəticələr elan edildikdən sonra 3 (üç) iş günü müddətində apellyasiyaya müraciət edə bilərlər.

İmtahandan uğurla keçmiş namizədlər topladıqları bala əsasən mövcud vakant vəzifələrə yerləşdirilir. Daha yüksək nəticə göstərmiş namizədlər vakant vəzifələri ilk növbədə seçmək hüququna malikdirlər. Vakant vəzifələrin seçimi namizədlərin nəticələrinə uyğun olaraq balların azalan sırası ilə həyata keçiriləcəkdir.
Bir vakant yerə iki və daha artıq sayda eyni bal toplamış namizəd olduqda aşağıdakı ardıcıllıqla namizədlərə üstünlük verilir:
- müharibə iştirakçıları və onların ailə üzvləri
- təhsil səviyyəsi daha yüksək olan şəxslər
- iş stajı daha çox olan şəxslər
- müəssisəyə daha yaxın ərazidə yaşayan şəxslər

Gənclərin çağırışaqədərki hazırlığı rəhbəri vəzifəsi üzrə namizədlərə VTİSK-də nəzərdə tutulan ixtisas tələbləri və dərəcələri üzrə müəyyənləşdirilmiş ardıcıllıqla üstünlük verilir.

Müsabiqədən uğurla keçmiş, lakin vakant vəzifəyə yerləşdirilməmiş namizədlər cari tədris ilinin sonunadək ehtiyat kadr kimi saxlanılır.
Ehtiyat kadrlar siyahısına daxil edilmiş namizədlərin vakant vəzifələrə yerləşdirilməsi vakant yer yarandıqca onların bal ardıcıllığı nəzərə alınmaqla həyata keçiriləcəkdir.

Vakant vəzifəyə yerləşdirilməsi nəzərdə tutulan namizəd tərəfindən ona təklif edilən vəzifədən imtina edildiyi təqdirdə, o, ehtiyat kadrlar siyahısından çıxarılır.

Qeyd: Laborant və katibə-makinaçı vəzifələri üzrə yaxın müddətdə işə qəbul həyata keçirildiyindən və həmin vəzifələr üzrə ehtiyat kadrlar mövcud olduğundan, hazırda qeyd olunan vəzifələr üzrə işə qəbul aparılmır.

Müsabiqədə iştirak etmək istəyən namizədlər 11-16 avqust 2026-cı il tarixlərində qeyd olunan linkə keçid edərək qeydiyyatdan keçə bilərlər.
Qeydiyyat üçün link:
https://docs.google.com/forms/d/e/1FAIpQLSefnDuzVQVkoNRsE7gjgHQUnqffzDh7vzCUIoe0Mum-npycJw/viewform?usp=publish-editor

Vəzifələr üzrə ixtisas tələbləri və müsabiqə proqramı ilə aşağıdakı linkə daxil olaraq tanış ola bilərsiniz:

https://drive.google.com/drive/folders/1ziFCVnfw_BIJ0yNmigJHgUQmpe2w1pcM

10/08/2026

📢 Müəllimlərin işə qəbulu üzrə müsabiqənin ümumi vakansiya seçimi mərhələsinə başlanılır

🗓️ 12 avqust saat 15:00-dan etibarən müəllimlərin işə qəbulu üzrə müsabiqənin müddətsiz müqavilə ilə ümumi vakansiya seçimi mərhələsinə başlanılır.

📌 Namizədlər elektron ərizə formalarında ən çoxu 8 vakant yer seçmək hüququna malikdirlər. Seçilmiş vakant vəzifələrə yerləşdirilmə namizədin göstərdiyi ardıcıllıq nəzərə alınmaqla həyata keçirilir.

❗️Nəzərinizə çatdırırıq ki, namizəd seçdiyi vakant yerə yerləşdirildikdən sonra həmin yerdən imtina etdiyi halda, müsabiqənin növbəti vakansiya seçimi mərhələlərində iştirakı təmin olunmayacaq.

📌 Qeyd edək ki, ümumi vakansiya seçimi prosesi 15 avqust saat 15:00-dək davam edəcək.

✅ Bununla yanaşı bildiririk ki, 8 avqust tarixindən etibarən həyata keçirilən müəllimlərin işə qəbulu üzrə müsabiqənin faktiki yaşayış rayonuna uyğun olaraq həvəsləndirmə tədbirlərinin tətbiq olunduğu ümumi təhsil müəssisələri üzrə vakansiya seçimi mərhələsi 10 avqust saat 11:00-da başa çatıb.

🤝 Vakansiya seçimi mərhələsində iştirak edəcək bütün namizədlərə uğurlar arzulayırıq!

09/08/2026