İsmayıllı şəhər 7 nömrəli tam orta məktəb

26 İyun – Azərbaycan Respublikasının Silahlı Qüvvələri Günü

Azərbaycan Ordusu: Şanlı Tarixdən Böyük Zəfərə Doğru

Azərbaycan dövlətçiliyinin əsas sütunlarından biri güclü və peşəkar ordudur. Bu gün Azərbaycan Silahlı Qüvvələri xalqımızın təhlükəsizliyinin, dövlətimizin müstəqilliyinin və ərazi bütövlüyünün etibarlı təminatçısı kimi çıxış edir. Ordumuzun keçdiyi inkişaf yolu ölkəmizin müstəqillik tarixinin ayrılmaz hissəsidir.

Azərbaycan Ordusunun formalaşması və inkişafında Ümummilli Lider Heydər Əliyevin müstəsna xidmətləri olmuşdur. Onun 1969-cu ildə respublikaya rəhbər seçilməsindən sonra Azərbaycanda milli hərbi kadrların hazırlanmasına xüsusi diqqət yetirildi. 1971-ci ildə Cəmşid Naxçıvanski adına Hərbi Liseyin yaradılması gələcək milli zabit korpusunun formalaşmasında mühüm rol oynadı. Ulu Öndərin uzaqgörən siyasəti nəticəsində yüzlərlə azərbaycanlı gənc SSRİ-nin nüfuzlu hərbi məktəblərində təhsil almaq imkanı qazandı.

Müstəqilliyin ilk illərində ölkədə yaranmış siyasi və hərbi böhran nizami ordu quruculuğuna ciddi maneələr yaradırdı. Lakin xalqın təkidli tələbi ilə hakimiyyətə qayıdan Heydər Əliyev qısa müddətdə vahid komandanlığa tabe olan nizami ordu quruculuğuna başladı. 1994-cü ildə atəşkəsin əldə olunmasından sonra Silahlı Qüvvələrin maddi-texniki bazasının möhkəmləndirilməsi, hərbi intizamın gücləndirilməsi və şəxsi heyətin döyüş hazırlığının artırılması istiqamətində mühüm addımlar atıldı.

1998-ci il mayın 22-də imzalanmış Fərmana əsasən, Azərbaycan Xalq Cümhuriyyəti dövründə Əlahiddə Azərbaycan Korpusunun yaradıldığı gün – 26 iyun tarixi Azərbaycan Respublikasının Silahlı Qüvvələri Günü elan edildi. Həmin vaxtdan etibarən bu tarix ölkəmizdə rəsmi dövlət bayramı kimi qeyd olunur.

Ümummilli Lider tərəfindən əsası qoyulan ordu quruculuğu siyasəti Prezident, Silahlı Qüvvələrin Ali Baş Komandanı İlham Əliyev tərəfindən uğurla davam etdirilmiş və yeni inkişaf mərhələsinə yüksəldilmişdir. Son illərdə Azərbaycan Ordusu müasir silah və texnika ilə təchiz edilmiş, hərbi sənaye kompleksi yaradılmış, beynəlxalq standartlara uyğun peşəkar hərbi kadr hazırlığı sistemi formalaşdırılmışdır.

Azərbaycan Ordusunun gücü 2016-cı ilin Aprel döyüşlərində, 2018-ci ilin Günnüt əməliyyatında özünü bir daha göstərdi. Bu uğurlar xalqımızın qələbə əzmini daha da gücləndirdi və tarixi Zəfərə aparan yolun başlanğıcı oldu.

2020-ci il sentyabrın 27-də başlayan 44 günlük Vətən müharibəsi Azərbaycan tarixinin ən şanlı səhifələrindən birinə çevrildi. Müzəffər Ali Baş Komandan İlham Əliyevin rəhbərliyi altında Azərbaycan Ordusu düşmənə sarsıdıcı zərbələr endirərək torpaqlarımızı işğaldan azad etdi, ölkəmizin ərazi bütövlüyünü bərpa etdi və tarixi ədaləti təmin etdi. 2023-cü ilin sentyabr ayında keçirilən lokal xarakterli antiterror tədbirləri isə Azərbaycanın dövlət suverenliyinin bütün ərazisində tam bərpa olunması ilə nəticələndi.

Bu gün Azərbaycan Ordusu regionun ən güclü silahlı qüvvələrindən biri hesab olunur. Ordumuzun döyüş qabiliyyətinin artırılması, hərbi qulluqçuların sosial müdafiəsinin gücləndirilməsi, komando qüvvələrinin yaradılması, Milli Müdafiə Universitetinin fəaliyyəti və beynəlxalq hərbi əməkdaşlığın genişləndirilməsi dövlət siyasətinin əsas prioritetlərindəndir.

Azərbaycan əsgərinin vətənpərvərliyi, xalqla ordunun sarsılmaz birliyi və dövlət rəhbərliyinin ardıcıl diqqəti nəticəsində Silahlı Qüvvələrimiz ölkəmizin qüdrət rəmzinə çevrilmişdir. Bu gün hər bir azərbaycanlı qalib ordusu ilə qürur duyur və əmindir ki, müstəqil Azərbaycanın təhlükəsizliyi etibarlı əllərdədir.

26 İyun – Silahlı Qüvvələr Günü münasibətilə bütün hərbi qulluqçularımızı, veteranlarımızı və Vətən uğrunda canından keçmiş şəhidlərimizin ailələrini dərin ehtiramla salamlayır, Azərbaycan Ordusuna daim yeni uğurlar arzulayırıq.

Əsmər Fətəliyeva,
İsmayıllı şəhər 7 nömrəli tam orta ümumtəhsil məktəbinin tarix müəllimi

Müəllimlərin Sertifikasiya imtahanlarından məktəbimizin müəllimləri uğurlu nəticələr əldə ediblər.
Fiziki tərbiyə müəllimi Rəvan Qarayev 49 bal, musiqi müəllimi Dilrubə Xəlilova 40 bal toplayıblar.
Bu uğurlu nəticələr münasibətilə müəllimlərimizi təbrik edirik və gələcək fəaliyyətində uğurlar arzulayırıq.

26 iyun - "Silahlı Qüvvələr günü"nə həsr edilmiş şahmat üzrə rayon turnirində yer tutan şagirdlərimizi təbrik edirik.
Məşqçi-müəllim Abdulxalıqov Zauru və onun yer tutan şagirdlərini təbrik edir və gələcək yarışlarda uğurlar arzulayırıq.

Rəsulov Dəniz - 1-ci yer
Məmmədov Yusif - 1-ci yer
Cavadova Xəznur - 1-ci yer
Mayılova Aişəgül - 2-ci yer
Rəsulov Uğur - 3-cü yer.

Azərbaycan–Türkmənistan əlaqələri yeni inkişaf mərhələsində
2026-cı il iyunun 22-də Türkmənistan Prezidenti Sərdar Berdiməhəmmədovun Azərbaycana rəsmi səfəri iki qardaş ölkə arasında münasibətlərin daha da möhkəmləndirilməsi baxımından mühüm əhəmiyyət daşıyır. Səfər çərçivəsində keçirilən görüşlərdə siyasi, iqtisadi, nəqliyyat-logistika, enerji və humanitar sahələrdə əməkdaşlığın genişləndirilməsi məsələləri müzakirə olunmuş, gələcək fəaliyyət istiqamətləri müəyyən edilmişdir.
Prezident İlham Əliyev mətbuata bəyanatında Qarabağın bərpasına göstərilən dəstəyə görə Türkmənistana və Türkmən xalqının Milli Lideri Qurbanqulu Berdiməhəmmədova təşəkkürünü ifadə etmişdir. Dövlət başçısı qeyd etmişdir ki, Qurbanqulu Berdiməhəmmədovun təşəbbüsü ilə Füzuli şəhərində məscid tikintisinə başlanılması Türkmənistanın Azərbaycana olan qardaşlıq münasibətinin və səmimi dəstəyinin bariz nümunəsidir.
Prezident İlham Əliyev həmçinin Türkmənistan Prezidenti Sərdar Berdiməhəmmədovla keçirilən görüşlər zamanı bir sıra məsələlər üzrə geniş fikir mübadiləsinin aparıldığını, konkret tapşırıqların verildiyini və yaxın gələcəkdə yeni birgə layihələrin həyata keçirilməsi üçün mühüm addımların atılacağını vurğulamışdır.
Dövlət başçısı çıxışında Azərbaycan və Türkmənistan arasında münasibətlərin möhkəm tarixi, mədəni və mənəvi təməllər üzərində qurulduğunu qeyd etmişdir. Son illərdə hər iki ölkədə qarşılıqlı mədəniyyət günlərinin keçirilməsi, yaradıcı kollektivlərin çıxışları və Bakı, Aşqabad, Arkadağ və Füzuli şəhərləri arasında qurulan qardaş şəhər əlaqələri xalqlarımızın yaxınlığını və dostluğunu daha da gücləndirir.
Bəyanatda regional əməkdaşlıq məsələlərinə də xüsusi diqqət yetirilmişdir. Prezident İlham Əliyev Azərbaycanın Mərkəzi Asiya Dövlət Başçılarının Məşvərət Şurasına tamhüquqlu üzv qəbul edilməsində Türkmənistanın göstərdiyi dəstəyə görə minnətdarlığını bildirmişdir. O qeyd etmişdir ki, bu addım Azərbaycanın Mərkəzi Asiya ölkələri ilə tarixi, mədəni və iqtisadi əlaqələrinin daha da inkişaf etdirilməsi üçün yeni imkanlar yaradır.
Görüş zamanı nəqliyyat-logistika sahəsində əməkdaşlığın perspektivləri də geniş müzakirə olunmuşdur. Prezident İlham Əliyevin sözlərinə görə, ölkələrimiz arasında formalaşmış etibarlı nəqliyyat marşrutları yalnız region üçün deyil, daha geniş coğrafiya üçün strateji əhəmiyyət daşıyır. Tərəflər yükdaşımalarının artırılması, yeni tranzit imkanlarının yaradılması və nəqliyyat sektorunda fəaliyyətin daha sıx əlaqələndirilməsi barədə razılığa gəlmişlər.
Enerji sahəsində əməkdaşlıq da müzakirə olunan əsas istiqamətlərdən biri olmuşdur. Prezident İlham Əliyev vurğulamışdır ki, zəngin enerji ehtiyatlarına malik olan Azərbaycan və Türkmənistan bu sahədə də səylərini birləşdirərək qarşılıqlı faydalı əməkdaşlığı genişləndirmək niyyətindədirlər.
Dövlət başçısı çıxışında Türkmənistanın son illərdə sosial-iqtisadi inkişaf sahəsində qazandığı uğurları yüksək qiymətləndirmiş, ölkənin müasir şəhərlərinin, infrastrukturunun və turizm potensialının sürətlə inkişaf etdiyini qeyd etmişdir. O, Azərbaycanın hər zaman qardaş Türkmənistanın beynəlxalq uğurlarına sevindiyini və Türkmənistanın neytrallıq siyasətini bundan sonra da dəstəkləyəcəyini bildirmişdir.
Səfər çərçivəsində iki ölkə arasında müxtəlif sahələri əhatə edən bir sıra sənədlər də imzalanmışdır. Bu sənədlər Azərbaycan–Türkmənistan münasibətlərinin daha da inkişaf etdirilməsinə, qarşılıqlı əməkdaşlığın genişləndirilməsinə və regionda sabitlik, tərəqqi və rifahın möhkəmləndirilməsinə xidmət edir.
Beləliklə, Türkmənistan Prezidentinin Azərbaycana səfəri iki qardaş dövlət arasında strateji tərəfdaşlığın yeni mərhələyə qədəm qoyduğunu nümayiş etdirmiş, gələcək əməkdaşlıq üçün mühüm perspektivlər açmışdır.

Əsmər Fətəliyeva,
İsmayıllı şəhər 7 nömrəli tam orta ümumtəhsil məktəbinin tarix müəllimi

20 iyun 2026-cı il tarixində İsmayıllı rayon Mican piri qəbirstanlıq icma ərazisinin mərkəzində İsmayıllı şəhər 7 nömrəli tam orta ümumtəhsil məktəbinin texniki işçilərinin iştirakı ilə iməcilik keçirildi.
Ərazinin öt örtüyü biçildi, quru ağac budaqları kəsildi, zibilləri təmizlənildi.

Dağlıq Şirvan Regional Təhsil İdarəsinin tabeliyində fəaliyyət göstərən ümumi təhsil müəssisələrində 4, 5, 6 və 9-cu sinif şagirdləri üçün “Yay Öyrənmə Dəstəyi” proqramının təşkili ilə əlaqədar olaraq məktəbimizin 9-cu sinif şagirdlərinin iştirakı ilə ilk dərs keçirildi.
Əsas məqsəd şagirdlərin Azərbaycan dili və riyaziyyat fənləri üzrə zəruri bilik və bacarıqlarının möhkəmləndirilməsi, il ərzində yaranmış öyrənmə geriliklərinin azaldılması və yeni tədris ilinə daha hazırlıqlı başlamalarına dəstək göstərilməsidir.
Məşğələlərin 17-30 iyun tarixlərində, iş günləri olmaqla təşkili olunacağı, qoşulmanın könüllü xarakter daşıdığı diqqətə çatdırıldı.

İşğaldan azad olunmuş ərazilərin bərpası.

Azərbaycan Respublikasının 2020-ci ildə Vətən müharibəsi nəticəsində işğaldan azad edilmiş ərazilərinin bərpası müasir dövrdə həyata keçirilən ən genişmiqyaslı post-münaqişə yenidənqurma proseslərindən biri kimi çıxış edir. Bu proses təkcə infrastrukturun yenilənməsi deyil, eyni zamanda regionun sosial-iqtisadi həyatının tamamilə yenidən qurulması, dayanıqlı inkişaf modelinin formalaşdırılması və məcburi köçkünlərin doğma yurdlarına qayıdışının təmin edilməsini əhatə edir. Bu çərçivədə Azərbaycan Respublikası ilə Türkiyə Respublikası arasında formalaşmış sıx strateji əməkdaşlıq xüsusi rol oynayır və bərpa prosesinin sürətlənməsinə, keyfiyyətinə və beynəlxalq səviyyədə dəstəyin genişlənməsinə mühüm töhfə verir. İşğaldan azad olunmuş ərazilərin bərpası Azərbaycan dövlətinin strateji prioritetlərindən biri kimi müəyyən edilmişdir. Bu ərazilərdə genişmiqyaslı mina təmizləmə əməliyyatları aparılır, yol infrastrukturu, enerji təminatı, su və rabitə sistemləri yenidən qurulur, şəhər və kəndlərin “ağıllı şəhər” və “ağıllı kənd” konsepsiyası əsasında planlaşdırılması həyata keçirilir. Füzuli, Zəngilan, Laçın, Şuşa və Cəbrayıl kimi rayonlarda yeni infrastruktur layihələrinin icrası regionun müasir iqtisadi zonaya çevrilməsini hədəfləyir. Bu prosesdə Azərbaycan ilə Türkiyə arasında əməkdaşlıq strateji və praktiki müstəvidə çoxşaxəli xarakter daşıyır. İlk növbədə, Türkiyə şirkətləri bərpa və yenidənqurma layihələrində fəal iştirak edir. Yol tikintisi, körpü və tunel inşası, yaşayış komplekslərinin salınması və mühəndislik xidmətləri sahəsində Türkiyə təcrübəsi və texnologiyası geniş şəkildə tətbiq olunur. Bu əməkdaşlıq yalnız iqtisadi deyil, həm də texniki və institusional bilik mübadiləsi baxımından əhəmiyyətlidir. Xüsusilə nəqliyyat infrastrukturunun bərpası və inkişafı sahəsində iki ölkənin birgə fəaliyyəti diqqət çəkir. Zəngəzur dəhlizi perspektivi, Horadiz–Ağbənd dəmir yolu xətti və avtomobil yollarının yenidən qurulması regionun beynəlxalq nəqliyyat şəbəkəsinə inteqrasiyasını gücləndirir. Bu layihələr Azərbaycanın tranzit imkanlarını artırmaqla yanaşı, Türkiyə ilə birbaşa logistik əlaqələrin daha da möhkəmlənməsinə şərait yaradır. Enerji təminatı sahəsində də əməkdaşlıq mühüm yer tutur. Azad edilmiş ərazilərin elektrik enerjisi ilə təmin olunması, yeni yarımstansiyaların qurulması və “yaşıl enerji zonası” konsepsiyasının həyata keçirilməsi Türkiyənin enerji və mühəndislik sahəsindəki təcrübəsi ilə dəstəklənir. Xüsusilə bərpa olunan enerji mənbələrindən istifadə, günəş və külək elektrik stansiyalarının planlaşdırılması regionun ekoloji cəhətdən dayanıqlı inkişafına xidmət edir. Şəhərsalma və memarlıq sahəsində də Türkiyə-Azərbaycan əməkdaşlığı yüksək səviyyədə həyata keçirilir. Şuşa, Füzuli və Zəngilan şəhərlərinin yenidən qurulmasında müasir urbanistika prinsipləri tətbiq olunur. Bu yanaşma tarixi-mədəni irsin qorunması ilə yanaşı, müasir şəhər infrastrukturunun yaradılmasını təmin edir. Şuşanın mədəni paytaxt statusunun bərpası və burada həyata keçirilən layihələr iki ölkənin ortaq mədəni irsə verdiyi dəyərin göstəricisidir. Humanitar sahədə əməkdaşlıq da bərpa prosesinin mühüm tərkib hissəsidir. Məcburi köçkünlərin mərhələli şəkildə doğma yurdlarına qaytarılması, sosial xidmətlərin təşkili, təhsil və səhiyyə infrastrukturunun qurulması istiqamətində birgə təşəbbüslər həyata keçirilir. Türkiyənin müvafiq qurumları bu sahədə həm texniki dəstək, həm də təcrübə mübadiləsi ilə prosesə töhfə verir. İşğaldan azad olunmuş ərazilərin bərpası eyni zamanda Azərbaycan-Türkiyə strateji müttəfiqliyinin real təzahürü kimi çıxış edir. 2021-ci il Şuşa Bəyannaməsində təsbit edilən qarşılıqlı dəstək və əməkdaşlıq prinsipləri bu regionda həyata keçirilən layihələrdə öz praktiki ifadəsini tapır. Bu əməkdaşlıq yalnız bərpa prosesini sürətləndirmir, həm də regionda uzunmüddətli sülhün və sabitliyin möhkəmlənməsinə xidmət edir. Işğaldan azad olunmuş ərazilərin bərpası Azərbaycan dövlətinin strateji inkişaf konsepsiyasının əsas istiqamətlərindən biri olmaqla yanaşı, Türkiyə ilə sıx əməkdaşlıq şəraitində həyata keçirilən genişmiqyaslı regional transformasiya layihəsidir. Bu proses iqtisadi inkişafı, infrastruktur modernizasiyasını və sosial rifahın yüksəldilməsini təmin etməklə yanaşı, iki ölkə arasında mövcud olan sarsılmaz strateji müttəfiqliyin real və davamlı nəticələrini nümayiş etdirir.

Əsmər Fətəliyeva,
İsmayıllı şəhər 7 nömrəli tam orta ümumtəhsil məktəbinin tarix müəllimi

2025-2026-cı tədris ilinin sonu gəlib çatdı.

Bütün məktəblərimizdə olduğu kimi İsmayıllı şəhər 7 nömrəli tam orta ümumtəhsil məktəbində "Son zəng" tədbiri yüksək səviyyədə təşkil olundu.
Tədbirdə İsmayıllı Bələdiyyəsinin nümayəndəsi Elnur müəllim, Dağlıq Şirvan Regional Təhsil İdarəsinin İsmayıllı rayon Təhsil Sektorunun nümayəndəsi Vüsalə xanım xüsusi qonaq olaraq tədbirdə iştirak edirdilər.
Açılış sözü kimi məktəbin direktoru Etibar Abdulov qonaqları salamladı, bu il məzun olan onbirinciləri, onların müəllimləri və valideynlərini təbrik etdi, gələcək həyatlarında uğurlar arzuladı.
Çıxış edən müəllimlər də şagirdləri təbrik etdilər və müstəqil həyatlarında bol uğurlar arzuladılar.
Tədbir 11-ci sinif, 4-cü sinif və 1-sinif şagirdlərinin təqdimatında müxtəlif musiqi, şeir, rəqs nümunələri göstərildi.
Təşkilatçılıqda zəhməti olan hər bir kəsə təşəkkür edirik və uğurlar arzulayırıq.

Ulu Öndər Heydər Əliyevin Xilaskarlıq Missiyası

Azərbaycan xalqının müasir tarixində Ümummilli Lider Heydər Əliyevin fəaliyyəti xüsusi yer tutur. Onun adı müstəqil Azərbaycan dövlətinin qorunması, möhkəmləndirilməsi və inkişafı ilə sıx bağlıdır. XX əsrin 90-cı illərinin əvvəllərində ölkəmiz ağır siyasi, iqtisadi və hərbi böhranla üzləşdiyi bir dövrdə Heydər Əliyev xalqın təkidli tələbi ilə hakimiyyətə qayıdaraq əsl xilaskarlıq missiyasını yerinə yetirmişdir.

Ulu Öndərin qeyd etdiyi kimi: “Azərbaycan böyük təhlükə qarşısında idi. Çünki Azərbaycanın müstəqil yaşamasının əleyhinə olan həm daxildəki qüvvələr güclü idi, həm də Azərbaycan kimi böyük coğrafi-strateji əhəmiyyətə, zəngin təbii sərvətlərə malik olan ölkənin tam müstəqil olması başqa ölkələrdə bəzi dairələri qane etmirdi”. Bu fikirlər həmin dövrdə ölkənin üzləşdiyi mürəkkəb vəziyyəti aydın şəkildə əks etdirir. Bir tərəfdən Ermənistanın Azərbaycana qarşı təcavüzü nəticəsində torpaqlarımız işğal edilir, digər tərəfdən isə ölkə daxilində siyasi qarşıdurmalar və hakimiyyət uğrunda mübarizə dövlətçiliyin əsaslarını sarsıdırdı.

1992–1993-cü illərdə ölkədə hökm sürən xaos, idarəetmədə yol verilən ciddi səhvlər və dövlətçilik təcrübəsinin çatışmazlığı Azərbaycanı parçalanmaq təhlükəsi ilə üz-üzə qoymuşdu. Silahlı qrupların özbaşınalığı, iqtisadi tənəzzül, sosial problemlər və cəbhədə ardıcıl uğursuzluqlar xalqın hakimiyyətə olan inamını sarsıtmışdı. Nəticədə ölkədə dərin siyasi böhran yaranmışdı.

Belə bir ağır şəraitdə Azərbaycan xalqı çıxış yolunu Heydər Əliyevin rəhbərliyində görürdü. Dövlət idarəçiliyi sahəsində zəngin təcrübəyə malik olan Heydər Əliyev xalqın çağırışına cavab verərək 1993-cü ildə yenidən siyasi hakimiyyətə qayıtdı. Onun hakimiyyətə gəlişi ilə ölkədə sabitliyin təmin olunması və dövlətçiliyin qorunması istiqamətində mühüm addımlar atıldı.

Heydər Əliyevin ilk vəzifələrindən biri vətəndaş qarşıdurmasının qarşısını almaq və ölkədə ictimai-siyasi sabitliyi bərpa etmək oldu. Onun qətiyyətli siyasəti nəticəsində separatçılıq meyilləri zəiflədildi, qanunsuz silahlı dəstələr zərərsizləşdirildi və dövlət hakimiyyəti gücləndirildi. Azərbaycan vətəndaş müharibəsi təhlükəsindən xilas edildi.

Ulu Öndərin rəhbərliyi ilə dövlət quruculuğu prosesi sürətləndirildi, hüquqi-demokratik dövlətin əsasları yaradıldı. 1995-ci ildə müstəqil Azərbaycanın ilk Konstitusiyası qəbul edildi, iqtisadi islahatlara başlanıldı və ölkənin beynəlxalq əlaqələri genişləndirildi. Məhz onun uzaqgörən siyasəti nəticəsində Azərbaycan beynəlxalq aləmdə etibarlı tərəfdaş kimi tanındı.

Heydər Əliyevin xilaskarlıq missiyasının mühüm nəticələrindən biri də ölkənin iqtisadi inkişaf strategiyasının müəyyənləşdirilməsi oldu. “Əsrin müqaviləsi”nin imzalanması Azərbaycanın iqtisadi müstəqilliyini gücləndirdi, xarici investisiyaların ölkəyə cəlb edilməsinə şərait yaratdı və gələcək inkişafın möhkəm təməlini formalaşdırdı.

Bu gün Azərbaycan güclü dövlət, regionun aparıcı ölkələrindən biri kimi inkişaf edir. Əldə olunan bütün uğurların əsasında Heydər Əliyevin müəyyən etdiyi dövlətçilik kursu dayanır. Onun ideyaları və siyasi irsi Prezident İlham Əliyev tərəfindən uğurla davam etdirilir.

Nəticə etibarilə, Ulu Öndər Heydər Əliyevin xilaskarlıq missiyası Azərbaycanın müstəqilliyinin qorunmasında, dövlətçiliyin möhkəmləndirilməsində və xalqın gələcəyə inamının bərpa olunmasında əvəzsiz rol oynamışdır. O, ölkəni ən ağır sınaqlardan çıxararaq inkişaf və tərəqqi yoluna yönəltmiş, adını Azərbaycan tarixində xilaskar lider kimi əbədi həkk etdirmişdir.

Əsmər Fətəliyeva,
İsmayıllı şəhər 7 nömrəli tam orta ümumtəhsil məktəbinin tarix müəllimi