İmişli rayon Hacalmuradlı kənd Q. Tarverdiyev adına tam orta məktəb

15 İyun – Milli Qurtuluş Günüdür

Heydər Əliyev 1987-ci ilin oktyabrında Sovet İttifaqı Kommunist Partiyası Mərkəzi Komitəsi Siyasi Bürosunun və şəxsən Baş katib Mixail Qorbaçovun yeritdiyi siyasi xəttə etiraz olaraq tutduğu vəzifələrdən istefa verib. İstefa verməsindən iki həftə keçməmiş erməni millətçiləri və onların sovet iqtidarında olan himayədarları o vaxtkı Dağlıq Qarabağ Muxtar Vilayətinin Azərbaycanın tərkibindən çıxarıb Ermənistanın tərkibinə verilməsi ilə bağlı məsələ qaldırmış və Azərbaycan xalqının faciələri o gündən başlamışdır. Əgər Heydər Əliyev hakimiyyətdə təmsil olunsaydı, heç vaxt erməni millətçiləri bu çirkin əməllərə əl atmağa cürət etməzdilər.
1991-1993-cü illər ərzində dövlətin müstəqilliyinə və suverenliyinə təhdid yaradan bütün amillər ölkəmizdə yaşanmışdır. 1993-cü ildə respublikada artıq həyatın bütün sahələrini böhran bürümüşdü. Dövlət əmlakının açıq-aşkar mənimsənilməsi halları kütləvi xarakter daşıyırdı. Ölkənin ehtiyat mənzil fondu AXC hakimiyyətinin ilk aylarında satılıb mənimsənilmişdir. Kriminal düşüncəli adamlar dövlət başına vəzifəyə gətirilirdi, ölkədə mənəviyyatsızlıq hökm sürürdü. Hakimiyyət daxilində qruplaşmalar yarandı və birincilik uğrunda biri birinə qarşı mübarizə aparıldı. Prezident ölkədə real vəziyyətdən, cəbhədəki durumdan bixəbər idi. Ali Baş komandan olduğunu unutmuş bu şəxs nazirlərin fəaliyyətinə nəzarət etməyi lazım bilmirdi. Beləliklə, AXC-Müsavat cütlüyünün bir illik hakimiyyəti ölkədə anarxiya, xaos, özbaşınalığın tüğyan etməsi, iqtisadiyyatın çökməsi, əhalinin sosial durumunun son dərəcə ağırlaşması, torpaqların işğalı ilə nəticələndi. Hakimiyyəti zəbt etmiş qüvvələrin xəyanəti nəticəsində 1993-cü ilin aprel ayında Kəlbəcər işğal edildi.
Belə bir vəziyyətdən çıxış yolunu axtaran Azərbaycan xalqı xilasını yalnız Heydər Əliyevin simasında görürdü. Dövlətçilik anlayışından bixəbər olan və hərbi birləşmələri əslində öz məqsədləri üçün istifadə edən ayrı-ayrı şəxslərin hədələrindən qorxub gizlənmiş və bu təhlükəli proseslərin qarşısını ala bilmədiyini dərk edən AXC-Müsavat cütlüyü sonda Heydər Əliyevdən imdad istədi. 1993-cü il iyunun 9-da Ulu Öndər Heydər Əliyev xalqın və respublikanın hakim dairələrinin təkidli dəvətini qəbul edib Bakıya gəldi. Taleyimizin həll olunduğu ağır bir zamanda xalqın təkidli tələbinə səs verərək yenidən hakimiyyətə qayıdan Heydər Əliyev doğma Vətənin xilası naminə misilsiz fədakarlıq nümayiş etdirmiş, ölkəmizi ictimai-siyasi pərakəndəliyin və anarxiyanın məngənəsindən qurtarmış, bütün sahələrdə müşahidə olunan dərin tənəzzülün qarşısını almış, yenidən qurduğu və hər cür qəsdlərdən qoruduğu dövlətin dayanıqlı inkişaf yolunu müəyyən etmişdir. Xilaskarlıq missiyasını öz üzərinə götürən Ulu Öndər Bakıda hakimiyyət davasının getdiyi bir vaxtda həyatını təhlükə altında qoyaraq dərhal Gəncəyə yollandı və orada baş qaldırmış qiyamın qarşısını aldı. Azərbaycan torpaqlarının Ermənistan silahlı qüvvələri tərəfindən işğalının davam etməsi, getdikcə gərginləşən siyasi vəziyyət, əhalinin gündən-günə ağırlaşan sosial durumu ölkəni bu bəlalardan xilas edə biləcək, xalqı öz arxasınca aparmağa qadir liderə ehtiyac olduğunu şərtləndirirdi. Cəmiyyətin bütün təbəqələri əmin idi ki, müstəqilliyini yenicə bərpa etmiş ölkəni düşdüyü ağır və dözülməz vəziyyətdən çıxarmağa qadir yeganə şəxsiyyət məhz Heydər Əliyevdir. Xalqımız Heydər Əliyevin ətrafında sıx birləşməklə öz gələcək taleyini özü həll etmək niyyətində idi.
Prezident İlham Əliyevin Ulu Öndərin siyasi kursunu uğurla davam etdirməsi və zənginləşdirməsi sayəsində Azərbaycan dünyanın dinamik inkişaf edən, modernləşən, beynəlxalq miqyasda nüfuzu gündən-günə artan dövlətinə çevrilib. Ümummilli Liderin layiqli davamçısı olan Prezident İlham Əliyevin rəhbərliyi ilə həyata keçirilən siyasət nəticəsində ölkəmiz yeni nailiyyətlər qazanaraq güclü və nüfuzlu dövlətlər sırasında öz mövqeyini daha da möhkəmləndirib. Heydər Əliyev siyasətinin layiqli davamçısı Prezident İlham Əliyevin rəhbərliyi ilə həyata keçirilən uğurlu, səmərəli daxili və xarici siyasət həm Azərbaycanın yüksəlişi və inkişafında, milli maraqların qorunmasında, həm də ölkəmizin dünya siyasi arenasında layiqli yer tutmasında öz ifadəsini tapır. Prezident İlham Əliyevin həyata keçirdiyi siyasət Azərbaycanın güclü, bütün məsələlərlə bağlı öz prinsipial mövqeyi olan, müstəqil siyasi iradə nümayiş etdirən ölkə kimi tanınmasını şərtləndirib. Prezident, Müzəffər Ali Baş Komandan İlham Əliyev azad edilmiş torpaqlarda infrastruktur layihələrinin təməlini qoyur, Şuşada, Xankəndidə Novruz tonqalı alovlandırır, Böyük Qayıdışın reallaşdırılması istiqamətində təxirəsalınmaz tədbirlər həyata keçirir. Xalqımız əmindir ki, Prezident İlham Əliyevin rəhbərliyi ilə daha uca zirvələr fəth ediləcək, düşmənin yerlə-yeksan etdiyi Qarabağ dünyanın ən gözəl guşələrindən birinə çevriləcək.

Məhəmmədəli Sarıyev -İmişli Rayon İcra Hakimiyyəti başçısı aparatının, İctimai-siyasi və humanitar məsələlər sektorunun baş məsləhətçisi

📚 “Son Zəng” tədbiri keçirildi
Məktəbimizdə 2025–2026-cı tədris ilinin başa çatması münasibətilə “Son Zəng” tədbiri keçirildi.
🇦🇿🇦🇿🇦🇿
Tədbir Azərbaycan Respublikasının Dövlət Himninin səsləndirilməsi və müstəqilliyimiz, suverenliyimiz, ərazi bütövlüyümüz uğrunda canlarından keçmiş qəhrəman şəhidlərimizin əziz xatirəsinin bir dəqiqəlik sükutla yad edilməsi ilə başladı.
Daha sonra məktəbin direktoru Ruslan İbayev çıxış edərək məzunları təbrik etdi, onlara gələcək həyat yollarında uğurlar arzuladı, bilik, vətənpərvərlik və milli-mənəvi dəyərlərə sadiq qalmağın vacibliyini vurğuladı.
Tədbirdə iştirak edən Birinci Qarabağ müharibəsi şəhidi, Hacıalmuradlı kənd sakini Qəni İbayevin qardaşı Əzizulla Surxayev çıxış edərək şagirdlərə gələcək həyatlarında uğurlar arzuladı, Vətənə layiqli vətəndaş olmağın önəmindən danışdı.
Sonra müəllimlər çıxış edərək məzunlara xoş arzularını çatdırdılar, onlara gələcək həyatlarında uğurlar dilədilər.
XI sinif şagirdləri adından çıxış edən məzunlar müəllimlərə, valideynlərə və məktəb kollektivinə göstərilən qayğı və dəstəyə görə təşəkkürlərini bildirdilər.
Tədbir məzunların həyatında unudulmaz anlardan biri olan “Son Zəng”in səsləndirilməsi ilə yekunlaşdı.
🎓 Məzunlarımızı ürəkdən təbrik edir, onlara gələcək həyatlarında uğurlar, yeni nailiyyətlər, sağlamlıq və işıqlı bir gələcək arzulayırıq!
🇦🇿🌹📖

Şagirdlərimiz fəxri fərmanlarla təltif olunublar
Məktəbimizin IX sinif şagirdləri buraxılış imtahanında göstərdikləri yüksək nəticələrə görə, həmçinin IV və VI sinif şagirdləri məktəbdə keçirilən monitorinqlərdə əldə etdikləri uğurlara görə məktəb rəhbərliyi tərəfindən fəxri fərmanlarla təltif olunmuşlar.
Eyni zamanda, 2025–2026-cı tədris ilinin ikinci yarımilini əla qiymətlərlə başa vuran şagirdlər də təhsildə qazandıqları nailiyyətlərə görə mükafatlandırılmışlar.
Şagirdlərimizi əldə etdikləri uğurlar münasibətilə təbrik edir, onlara gələcək təhsil həyatlarında daha böyük nailiyyətlər və uğurlar arzulayırıq! 📚🌟👏

📚 Məktəbimizdə növbəti Pedaqoji şura iclası keçirilmişdir.
İclas zamanı IX və XI sinif şagirdlərinin Dövlət İmtahan Mərkəzi (DİM) tərəfindən keçirilmiş yekun qiymətləndirmənin (attestasiyanın) nəticələri, eləcə də IV və VI sinif şagirdlərinin tədris ili ərzində məktəbdaxili monitorinq nəticələri ətraflı təhlil olunmuş və müzakirə edilmişdir.
Cari məsələlər üzrə mövcud tövsiyə və tapşırıqlar pedaqoji kollektivin diqqətinə çatdırılmış, Daxili Keyfiyyət və Özünüqiymətləndirmə Komissiyasının fəaliyyəti nəzərdən keçirilmişdir.
Həmçinin 2025–2026-cı tədris ilinin "Son zəng" tədbirinin təşkili ilə bağlı məsələlər müzakirə olunmuş, tədbirin yüksək səviyyədə keçirilməsi üçün müvafiq tapşırıqlar verilmişdir.
İclasın sonunda müddətli əmək müqaviləsi ilə çalışan ingilis dili müəllimi Məryəm Quliyeva, fizika müəllimi Cəmilə Məmmədova,informatika müəllimi Osqar Quliyev, coğrafiya müəllimləri Vüsal Mikayılov və Nəzakət Səmədova ilə müqavilə müddətlərinin başa çatması ilə əlaqədar olaraq və digər müddətsiz müqavilə çalışan müəllimlər tarix müəllimi Bəyiş Bəyişov, kimya müəllimi Aysel Qubadlı, ibtidai sinif müəllimi Günay Qurbanova və UBTR-i Pəncalı İbişov məktəb rəhbərliyi tərəfindən fəxri fərmanla təltif edilmiş,pedaqoji kollektivimiz adından səmimi təşəkkür ifadə edilmişdir.
Dəyərli müəllimlərimizə məktəbimizin fəaliyyətinə verdikləri töhfələrə, yüksək peşəkarlıqlarına və əzmkarlıqlarına görə minnətdarlığımızı bildirir, gələcək fəaliyyətlərində uğurlar arzulayırıq.

Bu gün məktəbdə IX sinif şagirdləri ilə Azərbaycan Respublikası Elm və Təhsil Nazirliyinin Kollegiyasının 15 yanvar 2026-cı il tarixli, 3-29/3-2-53F/2026 nömrəli əmrinin 5.19-cu bəndinə uyğun olaraq peşə təhsili ilə bağlı maarifləndirici görüş keçirilmişdir.
Görüş zamanı şagirdlərə peşə təhsilinin əhəmiyyəti, müxtəlif peşə istiqamətləri, əmək bazarında tələbat olan ixtisaslar, peşə təhsili müəssisələrinə qəbul qaydaları və gələcək məşğulluq imkanları barədə ətraflı məlumat verilmişdir. Eyni zamanda, peşə təhsilinin şəxsi inkişaf və uğurlu karyera quruculuğundakı rolu vurğulanmış, şagirdləri maraqlandıran suallar cavablandırılmışdır.
Maarifləndirici söhbətin əsas məqsədi şagirdlərin gələcək peşə seçimi ilə bağlı məlumatlılığını artırmaq və onları öz maraq və bacarıqlarına uyğun istiqamətlər müəyyənləşdirməyə təşviq etmək olmuşdur. 📚🎓

📢Mil-Muğan Regional Təhsil İdarəsinin tabeliyində fəaliyyət göstərən yeni təmayül tədris modelinin tətbiq edildiyi təhsil müəssisələrinə 2026–2027-ci tədris ili üzrə şagird qəbulu elan edilir.

Elm və Təhsil Nazirliyi tərəfindən həyata keçirilən təmayül tədris modelinin tətbiq ediləcəyi ümumi təhsil müəssisələrinə şagird qəbulu başlayır. Layihəyə X və XI sinif şagirdləri müraciət edə bilərlər.

Təmayül tədris modeli tam orta təhsil səviyyəsində məktəbin akademik rolunun gücləndirilməsinə, şagirdlərin ali təhsilə hazırlıq prosesinin isə məktəb daxilində daha səmərəli təşkilinə xidmət edir. Layihə çərçivəsində ali təhsil müəssisələrinə hazırlıq prosesi birbaşa məktəb mühitində həyata keçirilir. Qəbul proqramına uyğun planlaşdırılmış tədris prosesi, intensiv dərslər və məqsədyönlü akademik dəstək şagirdlərin zəruri bilik və bacarıqları məktəb daxilində əldə etməsinə imkan yaradır.

Aşağıdakı ümumi təhsil müəssisələrində X siniflər üzrə şagird qəbulu elan edilir və məktəb adlarının yanında qeydiyyat üçün müvafiq linklər yerləşdirilib:

▶️Beyləqan şəhəri Nizami Ağayev adına 6 nömrəli tam orta ümumtəhsil məktəb
https://docs.google.com/forms/d/e/1FAIpQLScvP5CihaMDTEXWL7wM869vUCA7RNxxBjlsKrJzXyL3aqgWyA/viewform?usp=publish-editor

▶️İmişli şəhəri Eldar İbrahimov adına 4 nömrəli tam orta ümumtəhsil məktəbi
https://forms.gle/uw6E57xmaqnXV5EPA

▶️Sabirabad şəhəri Səməd Vurğun adına 3 nömrəli tam orta ümumtəhsil məktəbi
https://docs.google.com/forms/d/e/1FAIpQLSfwyK3GVPc7C1Y6j27eBYjdkl0Xpf3WKqBjEcCce6sTBxXa6A/viewform?usp=header

▶️Sabirabad şəhəri Mikayıl Müşfiq adına 4 nömrəli tam orta ümumtəhsil məktəb
https://docs.google.com/forms/d/e/1FAIpQLSftg05yX5xr1hvfnvuzC8_d9ztkdADuekpCVtpIhfPItwjpOA/viewform?usp=header

▶️Saatlı şəhəri Səməd Vurğun adına 1 nömrəli tam orta ümumtəhsil məktəb
https://docs.google.com/forms/d/1amdhafyBohodmFf2PiSje8GSYgVRPwyZBNU5pRGXfCY/edit

Bu məktəblər tam orta təhsil səviyyəsində təhsilini davam etdirmək istəyən şagirdlərə müasir tələblərə cavab verən, akademik nailiyyətlərin yüksəldilməsinə və ali təhsil müəssisələrinə hazırlığın gücləndirilməsinə yönəlmiş geniş imkanlar təqdim edir.

▶️Yeni təmayül tədris modelinin əsas üstünlükləri:
🟢Akademik nəticələrin yüksəldilməsinə yönəlmiş tədris mühiti;
🟢Abituriyent hazırlığının sistemli və ödənişsiz təşkili;
🟢Səriştəli müəllim kollektivi;
🟢Aylıq sınaq imtahanlarının təşkili;
🟢Akademik hazırlıqla yanaşı, şagirdlərin yaradıcılıq, liderlik və sosial bacarıqlarının inkişafına imkan yaradan dərnəklər.

▶️Qəbul ümumi orta təhsil səviyyəsi üzrə buraxılış imtahanlarının nəticələri əsasında həyata keçirilir.
🟢Təmayül tədris modeli şagirdlərin yalnız imtahan nəticələrini deyil, onların akademik, sosial və şəxsi inkişafını da dəstəkləyir.

Bu gün məktəbimizdə “İnsan Hüquqları Aylığı” çərçivəsində 9-cu sinif şagirdləri ilə “Korrupsiya ilə mübarizə” mövzusunda" Korrupsiya yox deyək"adlı maarifləndirici söhbət keçirildi.
Tədbirin məqsədi şagirdlərdə korrupsiyanın cəmiyyətə vurduğu zərərlər, şəffaflığın və dürüstlüyün əhəmiyyəti barədə məlumatlılığı artırmaq, onlarda hüquqi düşüncə və vətəndaş məsuliyyəti formalaşdırmaq idi. Söhbət zamanı korrupsiyanın mahiyyəti, onun qarşısının alınması yolları, qanunçuluğun və ədalətin qorunmasında hər bir vətəndaşın rolu barədə ətraflı məlumat verildi.
Şagirdlər mövzu ilə bağlı fikirlərini bölüşərək müzakirələrdə fəal iştirak etdilər və onları maraqlandıran suallara cavab aldılar. Tədbir gənclərin hüquqi maariflənməsinə və korrupsiyaya qarşı barışmaz mövqenin formalaşdırılmasına xidmət etdi.

Azərbaycan Respublikasının İnsan Hüquqları üzrə Müvəkkili (Ombudsman) tərəfindən 18 may – 18 iyun 2026-cı il tarixlərində elan olunmuş “İnsan Hüquqları Aylığı” çərçivəsində məktəbdə UBTR və tarix müəllimi Bəyiş Bəyişovun təşkilatçılığı ilə 9-cu sinif şagirdlərinin iştirakı ilə “Mənim hüquqlarım məni qoruyur” adlı maarifləndirici tədbir keçirilmişdir.
Tədbirin məqsədi insan hüquq və azadlıqlarının təbliği, şagirdlərin öz hüquq və vəzifələri barədə məlumatlılığının artırılması olmuşdur.
Tədbirdə tarix müəllimi Bəyiş Bəyişov çıxış edərək şagirdlərə insan hüquq və azadlıqlarının mahiyyəti, onların qorunmasının əhəmiyyəti və cəmiyyətin inkişafında oynadığı mühüm rol haqqında ətraflı məlumat vermişdir. O, insan hüquqlarına hörmətin hər bir vətəndaşın əsas vəzifələrindən biri olduğunu vurğulayaraq şagirdlərlə maarifləndirici söhbət aparmış, onları hüquq və azadlıqlarını bilməyə və müdafiə etməyə çağırmışdır.
Tədbir şagirdlərin fəal iştirakı və mövzu ətrafında maraqlı müzakirələrlə davam etmişdir.

Bu gün məktəbimizdə 4-cü və 6-cı siniflərdə keçiriləcək monitorinq qiymətləndirməsinə hazırlıq məqsədilə maarifləndirici görüşlər təşkil olunub.
Görüşlər zamanı monitorinq qiymətləndirməsinin çərçivə sənədində yer alan son yeniliklər, qiymətləndirmə standartları və metodiki yanaşmalar ətraflı müzakirə edilib, qarşıda duran vəzifələr müəyyənləşdirilib.
Daha sonra 4-cü və 6-cı sinif şagirdləri ilə görüş keçirilib. Görüşdə şagirdlərə yeni sual formaları, sualların cavablandırılması qaydaları, cavab kartlarının düzgün doldurulması və kodlaşdırılması texnikası əyani şəkildə izah olunub. Şagirdləri maraqlandıran suallar cavablandırılıb, onlara imtahan zamanı diqqətli və inamlı olmaları üçün psixoloji dəstək xarakterli tövsiyələr verilib.
Keçirilən bu görüşlərin əsas məqsədi şagirdlərin monitorinq qiymətləndirməsinin formatına tam adaptasiya olunmasını təmin etmək və onların uğurlu nəticələr əldə etmələrinə dəstək göstərməkdir.