ADAU-nun nəzdində Gəncə Dövlət Aqrar Kolleci

Gəncə Dövlət Aqrar Kollecinin (GDAK) bir qrup müəllimi tərəfindən kollecin təcrübə sahəsində tədris məqsədilə yetişdirilən buğda və arpa sortlarından sünbül nümunələri toplanaraq, əldə edilmiş nümunələr laboratoriya şəraitində müvafiq metodik tələblərə uyğun olaraq analiz edilmiş, dənlərin morfoloji və təsərrüfat əhəmiyyətli göstəriciləri öyrənilmiş, hər bir sort üzrə 1000 dənin kütləsi müəyyənləşdirilmişdir. Nümunələr standartlara uyğun şəkildə etiketlənmiş, sistemləşdirilmiş və növbəti tədris ili üçün hazırlanaraq saxlanılmışdır.

Gəncə Dövlət Aqrar Kollecinə 2026-2027 tədris ili üçün 12 ixtisas üzrə artırılmış qəbul planına əsasən 11 illik təhsil bazasından qəbul aparılması nəzərdə tutulur.

Gəncə Dövlət Aqrar Kollecində (GDAK) 2025-2026-cı tədris ilinin yaz imtahan sessiyası davam edir.

Yaradılmış İmtahan qərərgahı və Apellyasiya komissiyası üzvləri imtahanların şəffaf və obyektiv keçirilməsinə nəzarəti həyata keçirir.

Bütün tələbələrə uğurlar arzulayırıq!

15 İyun - Milli Qurtuluş Günü münasibətilə Gəncə Dövlət Aqrar Kolleci (GDAK) kollektivi Ümummilli Lider Heydər Əliyevin abidəsini ziyarət edib, gül dəstələri qoyublar.

15 İyun - Azərbaycan xalqının Milli Qurtuluş Günü

Gəncə Dövlət Aqrar Kollecində (GDAK) Milli Qurtuluş Gününə həsr edilmiş tədbir keçirilib.

15 İyun – Azərbaycan xalqının tarixi taleyində dönüş nöqtəsi olan Milli Qurtuluş Günü münasibətilə Gəncə Dövlət Aqrar Kollecində tədbir təşkil edilib.

Tədbirdə əvvəlcə torpaqlarımızın azadlığı və bütövlüyü uğrunda canlarından keçən şəhidlərin və Ulu Öndər Heydər Əliyevin əziz xatirəsi bir dəqiqəlik sükutla yad edilib, sonra Dövlət Himni səsləndirilib.

Tədbiri giriş sözü ilə açan kollecin direktoru Fəqan Ağayev, bu tarixi günün dövlətçiliyimizin qorunmasında və ölkəmizin yüksəlişindəki əvəzsiz rolundan bəhs edib.

Daha sonra kollecin tarix müəllimi Emiliya Vəliyeva qurtuluş tariximizin elmi-siyasi əhəmiyyətini, Azərbaycan dili müəllimi Aygün Danışar bu günün xalqımızın milli mənliyi və dilimizin, mədəniyyətimizin inkişafı üçün yaratdığı imkanlardan, Tahirə Mirzəyeva və Nərmin Verdiyeva Hüseynova tərəfindən Ulu Öndər Heydər Əliyevin fədakarlığı sayəsində Azərbaycanın müstəqilliyinin əbədi və dönməz xarakter aldığını qeyd ediblər.

Tədbirin bədii hissəsində kollecin tələbələri ifasında vətənpərvərlik ruhunda şeir parçaları səsləndirilib, Azərbaycanın qüdrəti və rəşadəti haqqında dahi şəxsiyyətlərin kəlamları böyük qürurla təqdim edilib.

Sonda Ümummilli Lider Heydər Əliyevin 15 İyun Milli Qurtuluş Günü ilə bağlı tarixi fəaliyyətini, xilaskarlıq missiyasını əks etdirən videoçarx nümayiş olunub.

Bu müqəddəs günü bizə bəxş edən müstəqil Azərbaycan dövlətinin qurucusunu dərin ehtiramla anır, xalqımızı Milli Qurtuluş Günü münasibətilə ürəkdən təbrik edirik! 🇦🇿

Məzun 2026!

Gəncə Dövlət Aqrar Kollecində “Məzun günü” münasibətilə təntənəli tədbir təşkil olunub.

Tədbirin rəsmi hissəsi Azərbaycan Respublikasının dövlət bayrağının kollecin tələbələri tərəfindən təqdim olunması ilə başlayıb, şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.

Tədbirdə çıxış edən Azərbaycan Dövlət Aqrar Universitetinin rektoru Zəfər Qurbanov məzunları bu əlamətdar gün münasibətilə təbrik edərək, onlara gələcək fəaliyyətlərində uğurlar arzulayıb.
O, Gəncə Dövlət Aqrar Kollecinin ilk məzun buraxılışının təhsil müəssisəsinin tarixində mühüm və yaddaqalan mərhələ olduğunu qeyd edib.

Gəncə Şəhər İcra Hakimiyyətinin başçısı Niyazi Bayramov öz çıxışında Gəncə Dövlət Aqrar Kollecinin fəaliyyətinin regionda peşə və aqrar təhsilin inkişafına mühüm töhfə verdiyini qeyd edib, məzunların qazandıqları bilik və bacarıqları ölkənin kənd təsərrüfatı sektorunun inkişafına yönəldəcəklərinə əminliyini ifadə edərək, onlara gələcək fəaliyyətlərində uğurlar arzulayıb.

Çıxış edən Türkiyə Respublikasının Gəncə şəhərindəki Baş Konsulu Rəcəb Öztop Azərbaycan və Türkiyə arasında təhsil sahəsində əməkdaşlığın uğurla inkişaf etdiyini vurğulayıb, aqrar təhsilin strateji əhəmiyyətini xüsusi qeyd edib. Baş konsul məzunlara gələcək həyatlarında uğurlar arzulayıb, onların ölkənin inkişafına layiqli töhfələr verəcəklərinə inandığını bildirib.

Kollecin direktoru Fəqan Ağayev öz çıxışında məzunların hər bir təhsil müəssisəsinin ən böyük uğuru olduğunu bildirib. O, müəllimlərin fədakar əməyi və valideynlərin davamlı dəstəyinin bu nailiyyətlərin əsasını təşkil etdiyini qeyd edib. Məzunların yalnız peşə bilikləri deyil, eyni zamanda məsuliyyət, vətənpərvərlik və komanda ruhu kimi mühüm dəyərləri mənimsədiklərini vurğulayıb.

Tədbirin rəsmi hissəsindən sonra tələbələrin hazırladığı bədii proqram nümayiş olunub, müxtəlif musiqi və şeir nömrələri təqdim olunub, yüksək nəticələr göstərmiş tələbələr təltif edilib, qonaqlar kollecin maddi-texniki bazası ilə tanış olub.

Gəncə Dövlət Aqrar Kolleci (GDAK) 2026/2027-ci tədris ilində təkrar (əlavə) orta ixtisas təhsili almaq üçün sənəd qəbulu elan edir.

Təkrar (əlavə) orta ixtisas təhsilə tələbə qəbulu Azərbaycan Respublikası Elm və Təhsil Nazirliyinin https://portal.edu.az/ elektron portalı vasitəsilə həyata keçirilir.

Təkrar (əlavə) orta ixtisas təhsilə qəbul aparılması nəzərdə tutulan ixtisaslar aşağıdakı kimidir:

1.Aqronomluq
2.Baytarlıq
3.Balıq və balıq məhsullarının texnologiyası
4.Bağçılıq və tərəvəzçilik

Əlavə orta ixtisas təhsili ödənişli əsaslarla həyata keçirilir. Əlavə orta ixtisas təhsili tələbənin əvvəlcə aldığı baza təhsil proqramı ilə yeni ixtisasın baza təhsil proqramı arasındakı fərq nəzərə alınmaqla xüsusi hazırlanmış təhsil proqramları əsasında aparılır.

Əlavə orta ixtisas təhsili almaq üçün kollecə sənəd vermiş şəxslərin sənədləri işçi qrup tərəfindən araşdırılaraq, sənədləri uyğun gələn şəxslərlə müsahibə aparılacaq.

Sənədlərin təqdim edilməsi üçün son tarix: 15 Avqust 2026-cı il