5 №- li BPM–i Xəzər rayonu Buzovna qəsəbəsi, H.Eyvazov küçəsi 28-də yerləşir. Məktəb 1969–cu ildən 55№-li Texniki Peşə Məktəbi adı altında uyğunlaşdırılmış köhnə binada fəaliyyətə başlayıb, Buzovna qəsəbəsi Albalılıq dayanacağında yerləşən Müdafiə Nazirliyinin Bakı Aqreqat İstehalat Birliyi “İqlim” Zavoduna Tornaçı, Frezerçi, Elektrik qaz qaynaqçısı, Mexaniki yığma çilingəri, Avtomobil təmiri çilingəri, Əməliyyatçı- mühasib, Buzovna qəsəbəsində yerləşən 2 №–li Bakı Tikiş Fabrikinə “Tikişçi və tikiş avadanlığı operatoru" peşələri üzrə ixtisaslı fəhlə kadrları hazırlamışdır. 1972–ci ildən şagirdlərə peşə ilə yanaşı orta təhsil də verilmişdir. Azərbaycan Respublikası Nazirlər Kabinetinin 23 avqust 1996–cı il tarixli 116 saylı qərarı ilə 55№-li TPM–nin adı dəyişilərək 5№-li Bakı Peşə Məktəbi adlandırıldı.
2011–ci il ildə H.Əliyev Fondunun Prezidenti Mehriban xanım Əliyevanın göstərişi ilə məktəbin köhnə binası sökülüb, yerində müasir tipli, yeni məktəb binası tikilib və 2012-ci ildə istifadəyə verilmişdir. Köhnə ixtisaslar ləğv edilmiş və yeni məktəbin profilinə uyğun ixtisaslar açılmışdır.
İxtisaslar üzrə kadrlar hazırlamaq üçün məktəb yüksək səviyyədə texniki və əyani vəsaitlərlə təchiz olunmuşdur. Belə ki, 60 kv.m sahədə 30 nəfər tamaşaçı tutumlu,
3 kamera ilə təchiz olunmuş çəkiliş studiyası, rejissor otağı (bütün avadanlıqları ilə birlikdə), səsyazma studiyası, montaj otağı, dekorator emalatxanası, tikiş və biçim emalatxanası, 60 kv.m sahədə 8 stullu qrim otağı istifadədədir.Məktəb həmçinin akt zalı, idman zalı,kitabxana,bufet ilə təchiz olunub. Azərbaycan Respublikasının Nazirlər Kabinetinin 2016 - cı il 11 oktyabr tarixli 405 nömrəli Qərarına əsasən 5 nömrəli Bakı Peşə Məktəbi, 13 nömrəli Bakı Peşə Məktəbi və 15 nömrəli Bakı Peşə Liseyi birləşdirilərək bu lisey və məktəblərin bazasında Mədəniyyət və Sənətkarlıq üzrə Bakı Dövlət Peşə Təhsil Mərkəzinin yaradılması nəzərdə tutulmuşdur. Azərbaycan Respublikası Təhsil nazirinin 03 noyabr 2016-cı il tarixli 710 nömrəli əmrinin icrası məqsədilə "Azərbaycan Respublikasının Təhsil Nazirliyi yanında Peşə Təhsili üzrə Dövlət Agentliyinin Əsasnaməsi"nin 5.4.8 - ci bəndini rəhbər tutaraq hal-hazırda mərkəzin direktor vəzifəsini Pərviz Asif oğlu Həmzəyev icra edir.
