Balakən rayonu Qullar 3 saylı kənd ümumi orta məktəb

19.03.2026
--------------------
Fərdi təhsil alan şagirdimizin ailəsinə Novruz bayramı münasibətilə ziyarət təşkil olundu. 🌿✨
Müəllimlərimizin təşəbbüsü ilə şagirdimiz üçün xüsusi bayram xonçası hazırlandı, sevinc və diqqət onunla bölüşüldü. Eyni zamanda, ETİHİ tərəfindən göndərilən Novruz hədiyyəsi də təqdim edilərək bayram əhval-ruhiyyəsi daha da yüksəldildi. 🎁🌸
Bu cür ziyarətlər şagirdlərimizə qayğı və diqqətin daim onların yanında olduğunu hiss etdirir, sevincimizi birlikdə paylaşmağın dəyərini artırır.
Novruz bayramınız mübarək! 🌼

19.03.2026
-------------------
Məktəbin musiqi müəllimi 7-ci sinif şagirdləri ilə Fikrət Əmirovun zəngin həyat və yaradıcılığına həsr olunmuş maarifləndirici tədbir keçirmişdir. Tədbirdə şagirdlər dahi bəstəkarın Azərbaycan musiqi mədəniyyətindəki rolu, yaratdığı əsərlər və musiqi irsi haqqında məlumatlar təqdim etmiş, maraqlı çıxışlarla yadda qalmışlar.
Tədbirin ən yaddaqalan hissələrindən biri "Mənim yarım Sevdadır"mahnısının şagirdlər tərəfindən böyük həvəslə və ustalıqla ifa olunması olmuşdur. Bu cür tədbirlər şagirdlərdə milli musiqiyə marağın artırılmasına, estetik zövqün formalaşmasına və mədəni irsimizin daha dərindən öyrənilməsinə xidmət edir.

🇦🇿 Vətən sevgisi hər ürəkdə yaşamalıdır 🇦🇿

Məktəbimizin 2-ci sinif şagirdləri ilə vətənpərvərlik mövzusunda maarifləndirici söhbət keçirilmişdir. Tədbir zamanı şagirdlərə Vətənə sevgi, dövlət rəmzlərimizə hörmət və milli-mənəvi dəyərlərimizin qorunmasının əhəmiyyəti haqqında məlumat verilmişdir. Şagirdlər Azərbaycanın bayrağı, dili və qəhrəmanları haqqında fikirlərini bölüşmüş, Vətənə aid şeirlər səsləndirmişlər.

Bu cür fəaliyyətlərin keçirilməsində əsas məqsəd uşaqlarda erkən yaşlardan Vətənə bağlılıq hissini gücləndirmək, Azərbaycan dövlətçiliyinə, milli dəyərlərimizə hörmət ruhunu aşılamaq və gələcəkdə vətənini sevən, məsuliyyətli vətəndaşların formalaşmasına töhfə verməkdir. 🇦🇿✨

“Oxu dəqiqələri” – 9-cu siniflərdə

Məktəbimizdə “Oxu dəqiqələri” layihəsi çərçivəsində 9-cu sinif şagirdləri ilə görkəmli yazıçı Çingiz Aytmatovun “Ağ gəmi” əsərinin müzakirəsi keçirilmişdir.

Şagirdlər əsərin ideya məzmunu, obrazları və verdiyi mənəvi mesajlar haqqında fikirlərini bölüşmüş, xüsusilə uşağın saf dünyası, ümid və reallıq arasındakı ziddiyyətlər üzərində dayanmışlar. Müzakirələr zamanı şagirdlərin analitik düşünmə və sərbəst fikir ifadə etmə bacarıqları inkişaf etdirilmişdir.

Bu cür fəaliyyətlər şagirdlərdə mütaliə vərdişlərinin formalaşdırılması, bədii düşüncənin inkişafı və mənəvi dəyərlərin aşılanması baxımından böyük əhəmiyyət kəsb edir.

📚✨ Oxu dəqiqələri ✨📚
Məktəbimizdə IV sinif şagirdlərinin oxu bacarıqlarını inkişaf etdirmək və söz ehtiyatlarını zənginləşdirmək məqsədilə ibtidai sinif müəllimi Telliyeva Dilbər tərəfindən “Oxu dəqiqələri” təşkil olundu.
Şagirdlər O.Henrinin "Hinduların başçısı" əsərini səssiz və diqqətlə dinləyərək bilik dünyasına səyahət etdilər. Oxu prosesi zamanı onların fəallığı və kitaba olan marağı xüsusi sevinc doğurdu.
Mütaliə – düşünən, araşdıran nəslin formalaşmasının əsas şərtidir. 📖

17.03.2026
-------------------
🌿 Novruz – Yenilənmənin və Ümidin Bayramı 🌿

Novruz bayramı xalqımızın ən qədim və ən sevilən bayramlarından biridir. Bu bayram təbiətin oyanışını, yeni ilin başlanğıcını, həyatın yenilənməsini simvolizə edir.

Novruz süfrəsinin bəzəyi olan səməni bolluğun, şamlar işığın, boyanmış yumurtalar isə həyatın rəngarəngliyinin rəmzidir. İnsanlar bu bayramda küsülüləri barışdırır, bir-birinə xoş arzularını çatdırır, qəlblərində sevgi və ümid yaradırlar.

Tonqal qalayıb üzərindən tullanmaqla insanlar bütün ağırlıqları geridə qoyduqlarına inanır, yeni ilə təmiz niyyətlə qədəm qoyurlar.

🌸 Novruz – birlikdir, mehribanlıqdır, paylaşmaqdır.
🌸 Novruz – keçmişi geridə qoyub, gələcəyə ümidlə baxmaqdır.

✨ Bayramınız mübarək! Qoy bu Novruz hər evə sevinc, hər qəlbə rahatlıq və hər ailəyə bolluq gətirsin! ✨

17.03.2026
-------------‐-----
🌿 Məktəbimizdə Novruz Ab-havası 🌿

Novruz bayramı münasibətilə məktəbimizdə xüsusi tədbir təşkil olunmuşdur. Şagirdlərimiz milli adət-ənənələrimizi əks etdirən səhnəciklər nümayiş etdirmiş, şeirlər səsləndirmiş və maraqlı çıxışlarla bayram ab-havasını daha da canlandırmışlar.
Tədbirdə Novruzun rəmzləri – səməni, şamlar, boyanmış yumurtalar nümayiş olunmuş, qədim adətlərimiz şagirdlərə əyani şəkildə çatdırılmışdır. Tonqal ətrafında toplaşan uşaqlar bayram sevincini birlikdə bölüşmüş, milli dəyərlərimizə olan bağlılıqlarını bir daha göstərmişlər.
Bu cür tədbirlərin keçirilməsində əsas məqsəd şagirdlərdə milli-mənəvi dəyərlərə hörmət hissini gücləndirmək, adət-ənənələrimizi gələcək nəsillərə aşılamaqdır.
🌸 Novruz – birlik, sevinc və yenilənmə deməkdir.
✨ Bayramınız mübarək! ✨