Bərdə rayon Divanlı kənd Uşaq Musiqi Məktəbi

07/08/2026

Mərkəzləşdirilmiş buraxılış imtahanının nəticələri elan olunub

Azərbaycan Respublikası Mədəniyyət Nazirliyinin tabeliyində fəaliyyət göstərən incəsənət məktəb və mərkəzlərinin məzunları üçün keçirilmiş mərkəzləşdirilmiş buraxılış imtahanının nəticələri açıqlanıb.

Ölkə üzrə imtahana 9 minə yaxın şagird cəlb olunub. İmtahanda iştirak edən şagirdlərin 83 faizə yaxını uğurlu nəticə göstərərək incəsənət təhsilini müvəffəqiyyətlə başa vurub.

Bu il buraxılış tələblərini yerinə yetirə bilməyən şagirdlərin təhsillərini uğurla tamamlamaq imkanı saxlanılıb. Onlar növbəti 5 il ərzində keçiriləcək buraxılış imtahanlarında yenidən iştirak edə bilərlər.

İmtahan nəticəsi ilə razı olmayan şagirdlərin valideynləri nəticələrin elan olunduğu tarixdən etibarən 3 iş günü ərzində “MyCulture” vahid şəxsi kabinetinin “e-Müraciətlər” bölməsində “Mərkəzləşdirilmiş buraxılış imtahanlarının nəticələrindən apellyasiya müraciəti” xidmətinə keçid etməklə apellyasiya müraciəti edə bilərlər.

Üzrlü səbəbdən buraxılış imtahanında iştirak etməyən şagirdlər üçün isə sentyabr ayı ərzində əlavə imtahan təşkil olunacaq.

Şagirdlər nəticələri ilə exam.culture.az portalı vasitəsilə tanış ola bilərlər.

03/08/2026

01/08/2026

Azərbaycan Respublikası ilə Qırğız Respublikası arasında ikitərəfli münasibətlər
Prezident İlham Əliyevin 31 iyul 2026-cı il tarixində Qırğızıstan Respublikasına dövlət səfəri Azərbaycan-Qırğızıstan münasibətlərinin inkişafında yeni və mühüm mərhələ kimi qiymətləndirilir. Səfər çərçivəsində keçirilən yüksək səviyyəli görüşlər, imzalanan sənədlər, qəbul edilən qərarlar və dövlət başçısının mətbuata verdiyi bəyanat iki qardaş ölkə arasında strateji əməkdaşlığın daha da dərinləşdiyini nümayiş etdirdi. Səfər zamanı əldə olunan razılaşmalar siyasi dialoqdan iqtisadi əməkdaşlığa, investisiya layihələrindən humanitar əlaqələrə qədər geniş sahələri əhatə edərək gələcək tərəfdaşlığın əsas istiqamətlərini müəyyənləşdirdi.
Prezident İlham Əliyev mətbuata bəyanatında Azərbaycan ilə Qırğızıstan arasında münasibətlərin artıq ən yüksək səviyyəyə – müttəfiqlik səviyyəsinə yüksəldiyini xüsusi vurğuladı. Dövlət başçısı qeyd etdi ki, müttəfiqlik münasibətləri təkcə siyasi iradənin ifadəsi deyil, eyni zamanda böyük məsuliyyət deməkdir və Azərbaycan bu məsuliyyəti tam şəkildə bölüşməyə hazırdır.
Bu yanaşma iki ölkənin gələcəkdə beynəlxalq təşkilatlar çərçivəsində qarşılıqlı dəstəyini, təhlükəsizlik məsələlərində əməkdaşlığını, iqtisadi-ticari əlaqələrin genişləndirilməsini və regional sabitliyin möhkəmləndirilməsinə yönəlmiş birgə fəaliyyətini daha da gücləndirəcək. Dövlət başçısı vurğuladı ki, səfər zamanı imzalanan geniş sənədlər paketi münasibətlərin müxtəlif istiqamətlər üzrə sistemli inkişafına xidmət edəcək və əldə olunan bütün razılaşmaların uğurla həyata keçiriləcəyinə əminlik ifadə olundu.
Səfərin mühüm nəticələrindən biri Azərbaycan-Qırğız İnvestisiya Fondunun maliyyə imkanlarının əhəmiyyətli dərəcədə artırılması barədə qəbul edilən qərar oldu. Fondun nizamnamə kapitalının iki dəfə artırılaraq 200 milyon dollara çatdırılması iqtisadi əməkdaşlığın keyfiyyətcə yeni mərhələyə keçdiyini göstərir.
Bu qərar Qırğızıstanda birgə investisiya layihələrinin həyata keçirilməsinə, yeni istehsal müəssisələrinin yaradılmasına, məşğulluğun artırılmasına və iki ölkənin iqtisadi potensialının daha səmərəli istifadə olunmasına geniş imkanlar açır. Prezident İlham Əliyev bildirdi ki, Fondun fəaliyyəti artıq konkret layihələrlə zənginləşir və gələcəkdə onun maliyyə imkanlarının daha da artırılması istisna edilmir.
Səfər çərçivəsində İssık-Kul gölünün sahilində Azərbaycan dövlətinin maliyyə dəstəyi ilə inşa edilmiş beşulduzlu "Baku Resort & SPA" mehmanxanasının açılışı da iqtisadi əməkdaşlığın uğurlu nümunəsi kimi qiymətləndirildi. "Bakı" adını daşıyan bu layihə təkcə turizm sektoruna töhfə vermir, həm də Azərbaycan ilə Qırğızıstan arasında dostluğun və qarşılıqlı etimadın rəmzinə çevrilir.
Prezident İlham Əliyev çıxışında Qırğızıstanın Azərbaycanın işğaldan azad edilmiş ərazilərində həyata keçirilən bərpa və quruculuq işlərinə verdiyi töhfəni yüksək qiymətləndirdi. Ağdam rayonunda "Manas" adını daşıyan məktəbin tikintisi və istifadəyə verilməsi qardaş ölkənin Qarabağın dirçəldilməsinə verdiyi dəstəyin parlaq nümunəsidir.
Bu layihə yalnız təhsil infrastrukturu deyil, eyni zamanda Azərbaycan və Qırğızıstan xalqları arasında dostluğun, ortaq tarixə və mədəni dəyərlərə bağlılığın simvolu kimi xüsusi əhəmiyyət daşıyır. Prezident İlham Əliyev Qırğız xalqının Qarabağın yenidən qurulmasına verdiyi töhfəyə görə minnətdarlığını bir daha ifadə etdi.
Dövlət başçısı vurğuladı ki, Azərbaycan ilə Qırğızıstanı yalnız siyasi və iqtisadi maraqlar deyil, həm də ortaq tarix, mədəniyyət və mənəvi dəyərlər birləşdirir. Son illərdə həyata keçirilən humanitar layihələr bu münasibətləri daha da möhkəmləndirib.
Bakıda görkəmli qırğız yazıçısı Çingiz Aytmatovun abidəsinin və onun adını daşıyan parkın açılması, Bişkekdə Qırğızıstan-Azərbaycan Dostluq Parkının yaradılması, hər iki ölkədə keçirilən Mədəniyyət Günləri xalqlar arasında qarşılıqlı hörmət və etimadın möhkəmlənməsinə xidmət edir.
Prezident İlham Əliyev qeyd etdi ki, bu cür təşəbbüslər ortaq köklərə malik xalqların yaxınlaşmasına, mədəni dialoqun genişlənməsinə və gələcək nəsillərin dostluq ruhunda yetişməsinə mühüm töhfə verir.
Səfər zamanı diqqət çəkən məqamlardan biri də Azərbaycanın Mərkəzi Asiya ölkələri ilə əməkdaşlığının daha da genişlənməsi oldu. Prezident İlham Əliyev Mərkəzi Asiya dövlət başçılarına Azərbaycanın Mərkəzi Asiya Məşvərət Görüşlərinə tamhüquqlu üzv kimi qəbul edilməsinə göstərilən dəstəyə görə təşəkkürünü bildirdi.
Bu qərar Azərbaycanın türk dünyası ilə inteqrasiyasının, regional əməkdaşlığın və siyasi dialoqun inkişafına verilən önəmin göstəricisi olmaqla yanaşı, ölkəmizin Mərkəzi Asiyada artan nüfuzunu da təsdiqləyir.
Dövlət səfəri çərçivəsində Azərbaycan-Qırğızıstan münasibətlərinin yüksək səviyyəsinin daha bir göstəricisi olaraq qarşılıqlı ali dövlət mükafatları təqdim edildi.
Prezident İlham Əliyev Qırğız Respublikasının ən yüksək dövlət mükafatı olan I dərəcəli "Manas" ordeni ilə təltif edildi. Eyni zamanda Qırğızıstan Prezidenti Sadır Japarov Azərbaycanın ali dövlət təltifi – "Heydər Əliyev" ordeni ilə təltif olundu.
Bu qarşılıqlı mükafatlandırma iki ölkə arasında formalaşmış etibarlı tərəfdaşlığın, dostluğun və strateji əməkdaşlığın yüksək qiymətləndirilməsinin ifadəsi kimi böyük siyasi və mənəvi əhəmiyyət daşıyır.
Səfərin mühüm siyasi nəticələrindən biri də Azərbaycan ilə Mərkəzi Asiya ölkələri arasında əməkdaşlığın inkişafına yönəlmiş Çolpon-Ata Bəyannaməsinin qəbul olunmasıdır. Bu sənəd qarşılıqlı fəaliyyətin genişləndirilməsi, iqtisadi, nəqliyyat, enerji, humanitar və digər sahələrdə əməkdaşlığın dərinləşdirilməsi baxımından mühüm yol xəritəsi hesab olunur.
Bəyannamə Azərbaycanın Mərkəzi Asiya regionu ilə münasibətlərinin daha sistemli və institusional əsasda inkişaf etdirilməsinə yeni imkanlar yaradır.
Prezident İlham Əliyevin Qırğızıstana dövlət səfəri göstərdi ki, Azərbaycan ilə Qırğızıstan arasında münasibətlər artıq keyfiyyətcə yeni mərhələyə qədəm qoyub. Müttəfiqlik münasibətlərinin rəsmiləşdirilməsi, geniş sənədlər paketinin imzalanması, investisiya əməkdaşlığının genişləndirilməsi, Qarabağın bərpasına göstərilən dəstək, humanitar layihələrin həyata keçirilməsi və Azərbaycanın Mərkəzi Asiya ilə əlaqələrinin daha da möhkəmləndirilməsi bu səfərin əsas nəticələri kimi tarixə düşdü.
Bütün bunlar onu göstərir ki, ortaq tarixə, dilə, mədəniyyətə və qardaşlıq dəyərlərinə söykənən Azərbaycan-Qırğızıstan münasibətləri bundan sonra da qarşılıqlı etimad, strateji tərəfdaşlıq və ortaq maraqlar əsasında inkişaf edərək həm iki ölkənin milli maraqlarına, həm də türk dünyasında birliyin və əməkdaşlığın möhkəmlənməsinə mühüm töhfə verəcək.

01/08/2026

Azərbaycan dilinin dövlət dili olması müstəqil dövlətçiliyin başlıca əlamətlərindən biridir

“Müxtəlif dillərə mənsub olan insanlar Azərbaycan dilini sadəcə eşidərək, onun mənasını o qədər bilməyərək, Azərbaycan dilinin nə qədər şeirə bənzədiyini, xoş ahəngli olduğunu dəfələrlə qeyd ediblər. Biz dilimizlə fəxr etməliyik. Dil hər bir millətin milliliyinin əsasıdır. Ona görə də hər bir gənc öz ana dilini, Azərbaycan dilini, müasir Azərbaycan dilini gərək ən incəliklərinə qədər bilsin və bu dildən istifadə etsin. Biz müstəqil Azərbaycanda Azərbaycan dilini dövlət dili etdiyimiz kimi, cəmiyyətimizdə də, xalqımızın içində də Azərbaycan dilini mütləq hakim dil etməliyik.”
Ulu Öndər Heydər Əliyev

“Azərbaycan dilinin saflığının qorunması hər bir Azərbaycan vətəndaşının işi olmalıdır. Yəni, dövlət, alimlər, dilçilər, yazıçılar, şairlər, jurnalistlər, siyasətlə məşğul olanlar bu məsələyə çox böyük diqqət verməlidirlər. Yenə də deyirəm, 10 il bundan əvvəl mən bu məsələni qaldırmışdım. Çünki bu, məni narahat edirdi. On il ərzində lazımi tədbirlər görüldü ki, biz dilimizi kənar kəlmələrdən qoruya bilək. Amma yenə də oradan-buradan eşidirəm, - həm televiziyalarda, həm yazılı mediada, həm bəzi insanların çıxışlarında, - buna heç bir gərək yoxdur. Yəni, biz xalq kimi, millət kimi öz dilimizi qorumasaq, onda yavaş-yavaş bizim milli kimliyimiz də sarsıla bilər. Əminəm ki, mənim sözlərim hər kəsə çatacaq və özüm də daim bu məsələ ilə bağlı məşğul olacağam, izləyəcəyəm, lazımi tədbirlər görəcəyəm. Azərbaycan alimlərindən də bax, bu məsələyə də öz münasibətini və dəstəyini göstərmək çağırışını edirəm”.

Azərbaycan Respublikasının Prezidenti
İlham Əliyevin Azərbaycan Milli Elmlər
Akademiyasının 80 illik yubileyi tədbirində
çıxışından

Azərbaycan dili xalqımızın milli kimliyini, tarixi yaddaşını, zəngin mədəni irsini və dövlətçilik ənənələrini yaşadan ən müqəddəs mənəvi sərvətlərimizdən biridir. Minilliklər boyu formalaşan ana dilimiz xalqımızın düşüncə tərzini, milli-mənəvi dəyərlərini, ədəbiyyatını, incəsənətini və mədəniyyətini nəsildən-nəslə ötürərək bu günümüzə qədər yaşatmışdır. Məhz buna görə də Azərbaycan dilinin qorunması və inkişaf etdirilməsi müstəqil dövlət siyasətinin əsas istiqamətlərindən biri kimi daim xüsusi diqqət mərkəzində saxlanılır.
XX əsrin ikinci yarısında, xüsusilə sovet hakimiyyəti dövründə milli dillərin sıxışdırılması meyillərinin gücləndiyi bir şəraitdə Azərbaycan dilinin hüquqlarının müdafiəsi böyük siyasi iradə və cəsarət tələb edirdi. Həmin dövrdə ana dilinin dövlət dili kimi qorunması uğrunda qətiyyətli mövqe nümayiş etdirən Ümummilli Lider Heydər Əliyev Azərbaycan xalqının milli-mənəvi dəyərlərinin qorunmasında müstəsna xidmətlər göstərmişdir.
1978-ci ildə Azərbaycan SSR Konstitusiyasının qəbul edilməsi zamanı Ümummilli Liderin prinsipial mövqeyi nəticəsində "Azərbaycan Sovet Sosialist Respublikasının dövlət dili Azərbaycan dilidir" müddəasının Konstitusiyada təsbit olunması milli dövlətçilik tariximizin ən mühüm hadisələrindən biri kimi qiymətləndirilir. Bu tarixi qərar milli kimliyimizin, dilimizin və mənəvi dəyərlərimizin gələcək inkişafı üçün möhkəm hüquqi zəmin yaratdı.
Azərbaycan dövlət müstəqilliyini bərpa etdikdən sonra ana dilimizin hüquqi statusu daha da möhkəmləndirildi. 1995-ci ildə ümumxalq səsverməsi yolu ilə qəbul edilən Azərbaycan Respublikasının Konstitusiyasında dövlət dilinin Azərbaycan dili olması təsbit edildi. Bunun davamı olaraq 2002-ci ildə qəbul edilən "Azərbaycan Respublikasında dövlət dili haqqında" Qanun Azərbaycan dilinin tətbiqi, qorunması və inkişaf etdirilməsi istiqamətində dövlət siyasətinin əsas hüquqi sənədlərindən birinə çevrildi.
Ümummilli Lider Heydər Əliyevin rəhbərliyi ilə dövlət dilinin inkişafı sahəsində həyata keçirilən ardıcıl islahatlar Azərbaycan dilinin nüfuzunun daha da yüksəlməsinə xidmət etmişdir. 18 iyun 2001-ci il tarixli "Dövlət dilinin tətbiqi işinin təkmilləşdirilməsi haqqında" Fərman dövlət dilinin tətbiqi sahəsində yeni mərhələnin başlanğıcı olmuş bu sənəd əsasında Azərbaycan Prezidenti yanında Dövlət Dil Komissiyası yaradılmışdır. Elə həmin ilin 9 avqust tarixli Fərmanı ilə hər il 1 Avqust – Azərbaycan əlifbası və Azərbaycan dili günü kimi təsis edilmiş, ana dilimizin təbliği və qorunması istiqamətində dövlət siyasətinə yeni məzmun verilmişdir.
Bu gün Ümummilli Lider Heydər Əliyevin müəyyən etdiyi milli dil siyasəti Azərbaycan Respublikasının Prezidenti cənab İlham Əliyev tərəfindən uğurla və ardıcıl şəkildə davam etdirilir. Prezident İlham Əliyevin rəhbərliyi ilə Azərbaycan dilinin inkişafı, onun elektron məkanda tətbiqinin genişləndirilməsi, latın qrafikalı nəşrlərin artırılması, klassik və dünya ədəbiyyatı nümunələrinin Azərbaycan dilində nəşri, dilimizin saflığının qorunması və müasir dövrün çağırışlarına uyğun inkişaf etdirilməsi istiqamətində mühüm dövlət proqramları, fərman və sərəncamlar qəbul edilmişdir.
2013-cü ildə təsdiq edilən "Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı" ana dilimizin müasir inkişaf strategiyasını müəyyənləşdirən mühüm sənədlərdən biridir. Bununla yanaşı, 2018-ci ildə imzalanmış fərmanlarla Azərbaycan dilinin saflığının qorunması, dövlət dilindən istifadənin daha da təkmilləşdirilməsi və elektron informasiya məkanında tətbiqinin genişləndirilməsi istiqamətində kompleks tədbirlər həyata keçirilmişdir. 2025-ci ildə qəbul edilən yeni fərman isə dövlət dilinin normalarına əməl olunmasına nəzarət və Azərbaycan dilinin inkişafı sahəsində institusional mexanizmlərin daha da təkmilləşdirilməsinə xidmət edir.
Prezident İlham Əliyevin vurğuladığı kimi, "Azərbaycan dili o qədər zəngindir ki, heç bir xarici kəlməyə ehtiyac yoxdur. Biz Azərbaycan dilinin saflığını təmin etməliyik." Bu fikir hər bir vətəndaş üçün mühüm çağırış olmaqla yanaşı, ana dilimizin qorunmasının milli məsuliyyət məsələsi olduğunu bir daha nümayiş etdirir.
Ümummilli Lider Heydər Əliyevin "Xalqı xalq edən, milləti millət edən onun ana dilidir" kəlamı isə Azərbaycan dilinin xalqımızın milli varlığında tutduğu müstəsna yeri ən dolğun şəkildə ifadə edir. Dil yalnız ünsiyyət vasitəsi deyil, həm də tariximizin, mədəniyyətimizin, milli yaddaşımızın və dövlətçilik ənənələrimizin daşıyıcısıdır.
Bu gün dünyanın müxtəlif ölkələrində yaşayan 50 milyondan artıq soydaşımızı birləşdirən Azərbaycan dili milli həmrəyliyimizin və mənəvi birliyimizin əsas sütunlarından biridir. Dilimizin zənginliyini qorumaq, onu düzgün işlətmək, saflığını gələcək nəsillərə ötürmək hər bir Azərbaycan vətəndaşının müqəddəs borcudur.
1 Avqust – Azərbaycan Əlifbası və Azərbaycan Dili Günü münasibətilə hər bir soydaşımızı ürəkdən təbrik edir, ana dilimizin əbədi yaşamasını, daha da zənginləşməsini və dünya miqyasında nüfuzunun artmasını arzulayırıq. Azərbaycan dili milli kimliyimizin, müstəqilliyimizin və dövlətçiliyimizin ən mühüm rəmzlərindən biri olaraq daim yaşayacaq və inkişaf edəcəkdir.

29/07/2026

2026/2027-ci tədris ili üzrə qəbul müsabiqəsinin ixtisas və məktəb seçimi nəticələri elan olunub!
Azərbaycan Respublikası Mədəniyyət Nazirliyinin tabeliyində fəaliyyət göstərən incəsənət məktəb və mərkəzlərinə I sinif üzrə şagird qəbulu müsabiqəsinin ixtisas və məktəb seçimi mərhələsinin nəticələri açıqlanıb.
Namizədlər nəticələri qeydiyyatdan keçdikləri “MyCulture” vahid şəxsi kabineti və exam.culture.az portalı vasitəsilə əldə edə bilərlər.
Qəbul olunan namizədlər tələb olunan sənədləri 15 avqust 2026-cı il saat 18:00-dək “MyCulture” şəxsi kabinetində müvafiq bölməyə yükləməklə qəbullarını təsdiqləməlidirlər.
Yeni tədris ilində bütün şagird və müəllimlərimizə uğurlar arzulayırıq!

23/07/2026

Almaniya hökumətinin rolunu biz yüksək qiymətləndiririk

Azərbaycan Respublikasının Prezidenti İlham Əliyevin 2026-cı il iyulun 21-də Almaniya Federativ Respublikasına etdiyi rəsmi səfər Azərbaycan–Almaniya münasibətlərinin inkişafında mühüm siyasi hadisə kimi qiymətləndirilir. Səfər çərçivəsində Prezident İlham Əliyev Almaniya Prezidenti Frank-Valter Ştaynmayer və Federal Kansler Fridrix Merts ilə görüşlər keçirmiş, ikitərəfli əməkdaşlığın müxtəlif istiqamətləri üzrə geniş fikir mübadiləsi aparmışdır. Səfərin ən mühüm nəticələrindən biri Azərbaycan Respublikası ilə Almaniya Federativ Respublikası arasında ikitərəfli tərəfdaşlığın strateji gündəliyi haqqında Birgə Bəyannamənin imzalanması olmuşdur. Bu sənəd iki ölkə arasında münasibətlərin keyfiyyətcə yeni mərhələyə yüksəldiyini nümayiş etdirmişdir.
Prezident İlham Əliyev Almaniya Kansleri Fridrix Merts ilə birgə mətbuata bəyanatında Azərbaycan ilə Almaniya arasında siyasi dialoqun yüksələn xətt üzrə inkişaf etdiyini vurğulamış, qarşılıqlı etimada əsaslanan münasibətlərin daha da möhkəmləndiyini qeyd etmişdir. Dövlət başçısı bildirmişdir ki, Almaniya Avropanın aparıcı iqtisadi və siyasi güclərindən biri olmaqla yanaşı, Azərbaycanın Avropa İttifaqındakı mühüm tərəfdaşlarından biridir. Bu baxımdan, münasibətlərin strateji məzmun qazanması həm regional, həm də qlobal əməkdaşlıq baxımından mühüm əhəmiyyət daşıyır.
Prezident İlham Əliyev çıxışında iqtisadi əməkdaşlığın genişləndirilməsinin prioritet istiqamətlərdən biri olduğunu bildirmişdir. O qeyd etmişdir ki, Almaniya şirkətlərinin Azərbaycanın sənaye, yaşıl enerji, nəqliyyat, rəqəmsal texnologiyalar, infrastruktur və digər sahələrdə həyata keçirilən layihələrdə iştirak imkanları genişdir. Dövlət başçısı Azərbaycanın əlverişli investisiya mühiti yaratdığını, iqtisadiyyatın şaxələndirilməsi istiqamətində mühüm islahatların həyata keçirildiyini və xarici investorlar üçün etibarlı tərəfdaş olduğunu vurğulamışdır.
Bəyanatda enerji əməkdaşlığı xüsusi yer tutmuşdur. Prezident İlham Əliyev Azərbaycanın Avropanın enerji təhlükəsizliyinin təmin edilməsində mühüm rol oynadığını qeyd etmiş, ölkəmizin uzun illərdir etibarlı enerji tərəfdaşı kimi fəaliyyət göstərdiyini diqqətə çatdırmışdır. Azərbaycanın təbii qaz ixracı ilə yanaşı, bərpa olunan enerji sahəsində də böyük potensiala malik olduğu, Xəzər dənizinin külək enerjisi ehtiyatlarından istifadə edilməsinin və yaşıl enerjinin Avropaya ixracının perspektivləri barədə fikir mübadiləsi aparıldığı bildirilmişdir. Bu istiqamətdə Almaniyanın texnoloji imkanları ilə Azərbaycanın təbii resurs potensialının birləşdirilməsinin qarşılıqlı fayda verəcəyi vurğulanmışdır.
Prezident İlham Əliyev çıxışında nəqliyyat və logistika sahəsində əməkdaşlığın da geniş perspektivlərə malik olduğunu bildirmişdir. O qeyd etmişdir ki, Azərbaycanın son illərdə həyata keçirdiyi iri infrastruktur layihələri nəticəsində ölkə Şərq ilə Qərb arasında mühüm tranzit mərkəzinə çevrilmişdir. Orta Dəhlizin inkişafı, beynəlxalq yükdaşımaların artırılması və Avropa ilə Asiya arasında etibarlı nəqliyyat marşrutlarının formalaşdırılması baxımından Almaniya ilə əməkdaşlıq yeni imkanlar açır.
Dövlət başçısı humanitar və mədəni əlaqələrin də ikitərəfli münasibətlərin vacib istiqamətlərindən biri olduğunu qeyd etmişdir. Təhsil, elm, innovasiya və mədəniyyət sahələrində əməkdaşlığın genişləndirilməsi, universitetlər arasında əlaqələrin inkişaf etdirilməsi, tələbə və alim mübadiləsinin artırılması barədə fikir mübadiləsi aparıldığı bildirilmişdir. Prezident İlham Əliyev xalqlar arasında qarşılıqlı etimadın möhkəmləndirilməsində humanitar əməkdaşlığın mühüm rol oynadığını vurğulamışdır.
Regional təhlükəsizlik məsələləri də danışıqların əsas mövzularından olmuşdur. Prezident İlham Əliyev Cənubi Qafqazda davamlı sülhün təmin olunmasının Azərbaycanın əsas prioriteti olduğunu bəyan etmişdir. Dövlət başçısı bildirmişdir ki, Azərbaycan bölgədə sabitliyin və əməkdaşlığın möhkəmlənməsinə yönəlmiş siyasət həyata keçirir və sülh gündəliyinə sadiqdir. Bu baxımdan beynəlxalq tərəfdaşlarla aparılan dialoq regional təhlükəsizliyin möhkəmləndirilməsinə mühüm töhfə verir.
Mətbuat konfransı zamanı Almaniya və Rusiya nümayəndələrinin əvvəllər Bakıda keçirilmiş qeyri-rəsmi görüşləri ilə bağlı sual da səsləndirilmişdir. Prezident İlham Əliyev Azərbaycanın bu görüşlər barədə əvvəlcədən rəsmi məlumatlandırılmadığını bildirmiş, belə görüşlərdən sonradan media vasitəsilə xəbər tutduqlarını qeyd etmişdir. Bununla yanaşı, dövlət başçısı vurğulamışdır ki, əgər bu cür təmaslar Rusiya–Ukrayna müharibəsinin başa çatmasına və sülhün əldə olunmasına xidmət edərsə, Azərbaycan bunu müsbət qiymətləndirər.
Səfərin mühüm nəticələrindən biri Azərbaycan Respublikası ilə Almaniya Federativ Respublikası arasında "İkitərəfli Tərəfdaşlığın Strateji Gündəliyi haqqında Birgə Bəyannamə"nin imzalanması olmuşdur. Bu sənəd siyasi dialoq, iqtisadi əməkdaşlıq, enerji təhlükəsizliyi, yaşıl enerji, nəqliyyat, rəqəmsal inkişaf, elm, təhsil və digər istiqamətlər üzrə əməkdaşlığın genişləndirilməsini nəzərdə tutur. Birgə Bəyannamə Azərbaycan–Almaniya münasibətlərinin uzunmüddətli inkişafına xidmət edən mühüm siyasi sənəd kimi qiymətləndirilir.
Prezident İlham Əliyevin Almaniyaya rəsmi səfəri Azərbaycan Respublikasının balanslaşdırılmış və praqmatik xarici siyasət kursunun növbəti uğurlu təzahürü olmuşdur. Səfər nəticəsində əldə olunan razılaşmalar, imzalanan strateji sənəd və verilən bəyanatlar Azərbaycan ilə Almaniya arasında siyasi dialoqun, iqtisadi əməkdaşlığın və qarşılıqlı etimada əsaslanan tərəfdaşlığın daha da möhkəmlənəcəyini göstərir. Bu səfər eyni zamanda Azərbaycanın Avropa ilə əlaqələrinin inkişafına, enerji və nəqliyyat sahələrində əməkdaşlığın genişlənməsinə, eləcə də regional sabitlik və təhlükəsizlik naminə həyata keçirilən diplomatik təşəbbüslərin gücləndirilməsinə mühüm töhfə kimi qiymətləndirilir.

22/07/2026

Azərbaycan Respublikasının Nazirlər Kabineti

22/07/2026

22 iyul Azərbaycanda Milli Mətbuat Günüdür

15/07/2026

Prezident İlham Əliyevin IV Şuşa Qlobal Media Forumunda çıxışı: Azərbaycanın qlobal gündəliyə baxışı və müasir media çağırışları

IV Şuşa Qlobal Media Forumu müasir dövrdə beynəlxalq media nümayəndələrini, ekspertləri, analitikləri və müxtəlif ölkələrin informasiya siyasəti sahəsində fəaliyyət göstərən şəxsləri bir araya gətirən mühüm beynəlxalq platformalardan biri kimi növbəti dəfə Azərbaycanda keçirildi. "Rəqəmsal keçidlər: Süni intellekt dövründə informasiya və medianın dayanıqlılığının gücləndirilməsi" mövzusuna həsr olunan Forum, qlobal informasiya mühitində baş verən sürətli dəyişikliklərin, yeni texnologiyaların və geosiyasi proseslərin mediaya təsirinin müzakirəsi baxımından xüsusi əhəmiyyət kəsb etdi.
Azərbaycan Respublikasının Prezidenti İlham Əliyev Forumun iştirakçıları qarşısında çıxış edərək, həmçinin beynəlxalq media nümayəndələrinin çoxsaylı suallarını cavablandıraraq Azərbaycanın xarici siyasəti, regional proseslər, sülh gündəliyi, enerji təhlükəsizliyi, beynəlxalq əməkdaşlıq, postmünaqişə dövrünün reallıqları, rəqəmsal transformasiya və qlobal informasiya mühitində baş verən dəyişikliklərlə bağlı ölkəmizin mövqeyini geniş şəkildə diqqətə çatdırdı.
Prezident İlham Əliyev çıxışında Şuşanın artıq təkcə Azərbaycanın mədəniyyət paytaxtı deyil, həm də beynəlxalq dialoq və fikir mübadiləsinin aparıldığı nüfuzlu mərkəzlərdən birinə çevrildiyini vurğuladı. Dövlətimizin başçısı qeyd etdi ki, işğaldan azad edilmiş ərazilərdə həyata keçirilən genişmiqyaslı bərpa-quruculuq işləri nəticəsində Şuşada beynəlxalq tədbirlərin təşkili üçün bütün zəruri infrastruktur yaradılıb.
Forumun məhz Şuşada keçirilməsi Azərbaycanın suverenliyinin, ərazi bütövlüyünün və bölgədə formalaşan yeni inkişaf mərhələsinin beynəlxalq ictimaiyyətə nümayiş etdirilməsi baxımından xüsusi əhəmiyyət daşıyır.
Prezident İlham Əliyev çıxışında informasiya məkanında etibarlılığın qorunmasının müasir dövrün əsas çağırışlarından biri olduğunu bildirdi. O qeyd etdi ki, rəqəmsal texnologiyaların sürətli inkişafı ilə yanaşı, saxta xəbərlərin, manipulyativ məlumatların və dezinformasiyanın yayılması da qlobal problemə çevrilib.
Dövlətimizin başçısı vurğuladı ki, peşəkar jurnalistika cəmiyyətlərin düzgün məlumatlandırılmasında mühüm rol oynayır. Obyektivlik, qərəzsizlik, faktlara əsaslanan informasiya və beynəlxalq jurnalist etikası müasir medianın əsas prinsipləri olmalıdır.
Prezident həmçinin süni intellekt texnologiyalarının media sahəsinə təsirindən bəhs edərək bildirdi ki, bu texnologiyalar informasiyanın hazırlanması və yayılmasında yeni imkanlar yaratsa da, eyni zamanda saxta məzmunların hazırlanması riskini də artırır. Buna görə media savadlılığının gücləndirilməsi və etibarlı informasiya mənbələrinin rolunun artırılması mühüm əhəmiyyət daşıyır.
Çıxış zamanı Prezident İlham Əliyev Azərbaycanın müstəqil, milli maraqlara əsaslanan və çoxşaxəli xarici siyasət kursu həyata keçirdiyini diqqətə çatdırdı. O qeyd etdi ki, Azərbaycan bütün ölkələrlə qarşılıqlı hörmət, beynəlxalq hüquq və daxili işlərə qarışmamaq prinsipləri əsasında əməkdaşlıq münasibətlərinin inkişafında maraqlıdır.
Dövlətimizin başçısı vurğuladı ki, Azərbaycan beynəlxalq təşkilatlarda fəal iştirak edir, çoxtərəfli əməkdaşlığa töhfə verir və müxtəlif regionlar arasında etibarlı tərəfdaş kimi tanınır.
Forumda geniş yer verilən mövzulardan biri Ermənistan ilə Azərbaycan arasında münasibətlərin normallaşdırılması prosesi oldu. Prezident İlham Əliyev bildirdi ki, Azərbaycan postmünaqişə dövründə sülh sazişinin imzalanmasının tərəfdarıdır və regionda uzunmüddətli sabitliyin təmin edilməsini vacib hesab edir.
Dövlətimizin başçısı vurğuladı ki, davamlı sülh yalnız dövlətlərin bir-birinin suverenliyini, ərazi bütövlüyünü və beynəlxalq səviyyədə tanınmış sərhədlərini qarşılıqlı şəkildə tanıması əsasında mümkündür. O qeyd etdi ki, regionda kommunikasiyaların açılması, iqtisadi əməkdaşlığın genişləndirilməsi və etimad mühitinin formalaşdırılması bütün Cənubi Qafqaz üçün yeni inkişaf imkanları yarada bilər.
Prezident İlham Əliyev çıxışında azad edilmiş ərazilərdə həyata keçirilən genişmiqyaslı yenidənqurma proqramları barədə ətraflı məlumat verdi. Bildirildi ki, qısa müddət ərzində yüzlərlə kilometr avtomobil yolu çəkilib, hava limanları istifadəyə verilib, elektrik enerjisi, su, rabitə və digər infrastruktur layihələri həyata keçirilib.
"Ağıllı şəhər" və "Ağıllı kənd" layihələrinin uğurla icra olunduğunu qeyd edən dövlətimizin başçısı vurğuladı ki, keçmiş məcburi köçkünlərin doğma torpaqlarına təhlükəsiz və ləyaqətli qayıdışı dövlət siyasətinin əsas istiqamətlərindən biridir.
Prezident İlham Əliyev Azərbaycanın enerji təhlükəsizliyinə verdiyi töhfələrdən danışaraq qeyd etdi ki, ölkəmiz uzun illərdir etibarlı enerji tərəfdaşı kimi beynəlxalq nüfuz qazanıb. Xəzər hövzəsinin enerji resurslarının dünya bazarlarına təhlükəsiz şəkildə çatdırılması istiqamətində həyata keçirilən layihələr regional və qlobal enerji təhlükəsizliyində mühüm rol oynayır.
Bununla yanaşı, dövlətimizin başçısı yaşıl enerji layihələrinin həyata keçirilməsinə xüsusi diqqət yetirildiyini, külək və günəş enerjisi potensialından səmərəli istifadə istiqamətində beynəlxalq tərəfdaşlarla əməkdaşlığın genişləndirildiyini qeyd etdi.
Prezident İlham Əliyev Azərbaycanın Avropa ilə Asiyanı birləşdirən əsas nəqliyyat qovşaqlarından birinə çevrildiyini bildirdi. Orta Dəhlizin əhəmiyyətinin artdığını qeyd edən dövlətimizin başçısı vurğuladı ki, ölkəmiz tranzit imkanlarının genişləndirilməsi üçün iri infrastruktur layihələrini uğurla həyata keçirir.
Bu siyasət Azərbaycanın iqtisadi potensialının daha da güclənməsinə, regional əməkdaşlığın inkişafına və beynəlxalq yükdaşımaların artmasına mühüm töhfə verir.
Prezident İlham Əliyev çıxışında Azərbaycanın COP29-a ev sahibliyinin ölkəyə göstərilən beynəlxalq etimadın göstəricisi olduğunu vurğuladı. Dövlətimizin başçısı bildirdi ki, iqlim dəyişiklikləri ilə mübarizə bütün dövlətlərin ortaq məsuliyyətidir və Azərbaycan bu istiqamətdə üzərinə düşən öhdəlikləri yerinə yetirməyə davam edir.
Yaşıl enerji, ətraf mühitin qorunması və karbon emissiyalarının azaldılması istiqamətində həyata keçirilən layihələrin Azərbaycanın uzunmüddətli inkişaf strategiyasının mühüm tərkib hissəsi olduğu diqqətə çatdırıldı.
Forumun əsas mövzularından biri olan süni intellekt texnologiyalarına toxunan Prezident İlham Əliyev bildirdi ki, yeni texnologiyalar media sektorunun inkişafına ciddi töhfələr verir. Bununla yanaşı, süni intellektdən etik qaydalara uyğun istifadə olunması, dezinformasiyanın qarşısının alınması və informasiya təhlükəsizliyinin qorunması beynəlxalq əməkdaşlıq tələb edən məsələlərdəndir.
Prezident İlham Əliyevin IV Şuşa Qlobal Media Forumundakı çıxışı Azərbaycanın beynəlxalq münasibətlər sistemində artan rolunu, müstəqil xarici siyasət kursunu, regional sülh və əməkdaşlıq təşəbbüslərinə sadiqliyini, enerji təhlükəsizliyinə verdiyi töhfəni və qlobal informasiya məkanında etibarlı medianın əhəmiyyətinə dair baxışlarını əhatə edən geniş siyasi çıxış kimi qiymətləndirilir.
Dövlətimizin başçısının Forum çərçivəsində səsləndirdiyi fikirlər göstərdi ki, Azərbaycan beynəlxalq hüququn norma və prinsiplərinə əsaslanan əməkdaşlıq siyasətini davam etdirir, Cənubi Qafqazda davamlı sülhün və iqtisadi inteqrasiyanın təmin olunmasını dəstəkləyir, eyni zamanda rəqəmsal transformasiya, informasiya təhlükəsizliyi və süni intellekt dövründə medianın dayanıqlılığının gücləndirilməsi istiqamətində beynəlxalq dialoqun inkişafına mühüm töhfə verməyə hazırdır.
IV Şuşa Qlobal Media Forumu bir daha təsdiq etdi ki, Şuşa artıq təkcə tarixi və mədəni irsin simvolu deyil, həm də qlobal fikir mübadiləsinin, media əməkdaşlığının və beynəlxalq dialoqun mühüm mərkəzlərindən birinə çevrilmişdir.

10/07/2026

Sual: 8 iyul 2026-cı il tarixində elan edilmiş incəsənət məktəb və mərkəzləri üçün müəllimlərin işə qəbul müsabiqəsində attestasiyada uğur qazanmayan müəllimlər iştirak edə bilərlərmi?

Cavab: Bəli. Attestasiyada tələb olunan səs çoxluğunu toplaya bilməyən şəxslər də müəllimlərin işə qəbulu müsabiqəsində iştirak edə bilərlər. Qeyd edək ki, həmin şəxslər üçün əlavə imtahanın keçirilməsi nəzərdə tutulmur.