21/08/2026
VALİDEYNLƏRİN VƏ ŞAGİRDLƏRİN NƏZƏRİNƏ
Məktəbli geyim forması 2026 /2027 - ci tədris ilində cari ildəki kimi dəyişməz qalır (N-2) Nəzərinizə çatdırırıq ki, Məktəbli geyim formasına riayət artıq qanunla müəyyən edilmiş tələbdir. Azərbaycan Respublikasının “Ümumi təhsil haqqında” Qanununa 7 iyul 2026-cı il tarixində edilmiş dəyişikliklərə əsasən
(https://president.az/az/articles/view/73049) dövlət ümumi təhsil müəssisələrində təhsilalanların müəyyən olunmuş geyim formasına riayət etməsi qanunvericilikdə birbaşa təsbit olunub. Dəyişikliyə əsasən ( qanunun 12.13-1-ci maddəsinə əsasən) “Dövlət ümumi təhsil müəssisəsində təhsilalanlar və təhsilverənlər tərəfindən geyim ilə bağlı tələblərə riayət olunmalıdır.” Eyni zamanda 24.2.2-1-ci maddə valideynlərin də məsuliyyətini müəyyən edir. Belə ki, valideynlər övladlarının məktəbdə geyim forması ilə bağlı tələblərə riayət etməsini təmin etməlidirlər. Bu o deməkdir ki, dövlət ümumi təhsil müəssisələrində müəyyən edilmiş məktəbli geyim forması sadəcə, NK qərarı, məktəbin tövsiyəsi və ya daxili qaydası deyil, qanunvericiliklə müəyyən edilmiş tələbdir. Aşağıdakı posterdə oğlanlar və qızlar üçün yay və qış geyim formalarının təsvirləri müvafiq qaydada müəyyən edilib.
Hörmətli valideynlər, yeni tədris ilinə hazırlıq zamanı övladlarınız üçün məktəbli geyim formasını seçərkən müəyyən edilmiş nümunə və tələblərin nəzərə alınmasını xahiş edirik.
