Azərbaycan Rəssamlıq Akademiyası

02/09/2026

Əyyub Hüseynov – 110

Bu gün Azərbaycan təsviri sənətinin görkəmli nümayəndəsi, Əməkdar incəsənət xadimi, rəssam və pedaqoq Əyyub Hüseynovun anadan olmasının 110-cu ildönümüdür.

Əyyub Hüseynov 1935-ci ildə Azərbaycan Dövlət Rəssamlıq Texnikumunu, 1941-ci ildə isə Tbilisi Rəssamlıq Akademiyasını bitirib. 1948-ci ildən Əzim Əzimzadə adına Rəssamlıq Texnikumunda pedaqoji fəaliyyət göstərib, 1956–1965-ci illərdə həmin təhsil ocağının direktoru vəzifəsində çalışıb. Uzun illər pedaqoji fəaliyyət göstərərək öz bilik və təcrübəsini gənc rəssam nəslinə ötürüb, bir çox istedadlı sənətkarın yetişməsinə töhfə verib.

“Pambıqçılar”, “Batabat”, “Minanın portreti”, “Yağışdan sonra”, “Xəzər”, “Venesiya”, “Günorta”, “Sahildə”, “Çuxuryurd”, “Buxarest”, “Arpaçay mənzərəsi”, “Meşə. Kənd mənzərəsi” və digər əsərlərində gerçəkliyin özünəməxsus bədii və rəngkarlıq həllini yaradıb. Rəssam təsvir etdiyi obraz və mənzərələr vasitəsilə yalnız gördüklərini əks etdirməyib, həm də tamaşaçıda müəyyən duyğu və təəssürat yaratmağa nail olub.

Müxtəlif janrlarda əsərlər yaradan Əyyub Hüseynov yaradıcılığının sonunadək realizm üslubuna sadiq qalıb. Mənzərə, portret, məişət və tematik janrlarda yaratdığı əsərlərdə həyat gerçəkliklərini özünəməxsus sənət dili ilə ifadə edib.

Əyyub Hüseynovun zəngin yaradıcılıq və pedaqoji irsi Azərbaycan təsviri sənəti tarixində özünəməxsus yer tutur.

Görkəmli sənətkarın əziz xatirəsini ehtiramla yad edirik.

#110

27/08/2026

AzRA-nın bakalavriat səviyyəsinə qəbul olan tələbələrin nəzərinə!

Azərbaycan Rəssamlıq Akademiyasına qəbul olunan abituriyentlər 28 avqust – 8 sentyabr saat 18:00-dək my.gov.az portalı vasitəsilə onlayn qeydiyyatdan keçməli, təsdiq mesajı aldıqdan sonra 10 sentyabr 2026-cı il tarixinədək, iş günləri 09:00–15:00 aralığında aşağıda qeyd olunan sənədləri Akademiyaya təqdim etməlidirlər:

- Şəxsiyyət vəsiqəsinin surəti – 3 ədəd;
- 3x4 sm ölçüdə fotoşəkil – 3 ədəd;
- Attestat və ya subbakalavr diplomu və diploma əlavə (içlik vərəqəsi);
- Hərbi bilet və ya ilkin hərbi qeydiyyata alınma haqqında vəsiqənin surəti;
- Sağlamlıq haqqında tibbi arayış;
- Ödənişli əsaslarla qəbul olunanlar üçün təhsil haqqının 50 faizinin ödənilməsinə dair qəbzin surəti.

Əlavə olaraq, tələbələrdən xahiş olunur ki, şəxsi kabinetlərində əks olunan iş nömrələrini əvvəlcədən öyrənsinlər və Akademiyaya müraciət zamanı həmin nömrəni təqdim etsinlər.

Ünvan: Bakı şəhəri, Heydər Əliyev prospekti 58

Əlaqə nömrəsi: 055 266 22 02

26/08/2026

03/08/2026

Azərbaycan Rəssamlıq Akademiyasının magistratura səviyyəsinə qəbul olunan tələbələrin nəzərinə!

2026/2027-ci tədris ili üzrə magistratura səviyyəsinə qəbul olunan şəxslərin elektron qeydiyyat və sənəd qəbulu prosesi 03 avqust saat 15:00-dan 12 avqust saat 18:00-dək davam edəcək.

Namizədlər əvvəlcə portal.edu.az platformasında qeydiyyatdan keçərək "Ali və orta ixtisas təhsili müəssisələrinə təhsilalan qeydiyyatı" xidmətini seçməli, şəxsi və qəbul məlumatlarını təsdiqləməli, daha sonra tələb olunan sənədləri sistemə yükləməlidirlər.

Azərbaycan Rəssamlıq Akademiyasına təqdim edilməli sənədlər:
• Şəxsiyyət vəsiqəsinin surəti (3 ədəd);
• 3×4 ölçülü rəngli fotoşəkil (3 ədəd);
• Əvvəlki illərin məzunları üçün bakalavr diplomunun əsli (diploma əlavəsi ilə birlikdə);
• Cari ildə məzun olanlar üçün bakalavriat səviyyəsini bitirməsi haqqında arayış (bitirdiyi ali təhsil müəssisəsindən);
• İmtiyazlı şəxslər üçün imtiyazı təsdiq edən müvafiq sənədlər;
• Ödənişli əsaslarla qəbul olunanlar üçün təhsil haqqının ödənilməsini təsdiq edən qəbzin surəti;
• Sağlamlıq haqqında arayış;
• Hərbi bilet və ya ilkin hərbi qeydiyyata alınma haqqında vəsiqənin surəti.

Sənədlərin qəbulu: 09:00–15:00 aralığında aparılacaq
Əlaqə: 055 266 22 02

Qeyd: Ödənişli əsaslarla təhsil alan tələbələr qanunvericiliyə uyğun olaraq Təhsil Tələbə Kredit Fondundan yararlana bilərlər.

30/07/2026

Azərbaycan Rəssamlıq Akademiyasının "Akademik kompozisiya və rəngkarlıq" kafedrasının müəllimi Fəxri Abbasov və "Rəngkarlıq" ixtisasının III kurs tələbələri Şıxova Ülkər və Məmmədli Aydan Camal Qırğızıstan Respublikasının İssık-Kul vilayətində keçirilən beynəlxalq "Şərqin Günəş Palitrası" (Солнечная палитра Востока) yaradıcılıq plenerində ölkəmizi uğurla təmsil ediblər.

Qırğızıstan Respublikasının Mədəniyyət, İnformasiya və Gənclər Siyasəti Nazirliyinin dəstəyi ilə təşkil olunan layihə 2011-ci ildən etibarən hər il keçirilir və MDB ölkələrinin incəsənət yönümlü ali təhsil müəssisələrinin müəllim və tələbələrini bir araya gətirir. Yaradıcılıq düşərgəsinin əsas məqsədi gənc rəssamların peşəkar inkişafına dəstək vermək, beynəlxalq yaradıcılıq əlaqələrini genişləndirmək və iştirakçılar arasında təcrübə mübadiləsini təşviq etməkdir.

Plener müddətində Akademiyanın nümayəndələri müxtəlif ölkələrdən olan gənc rəssamlarla birgə yaradıcılıq prosesində iştirak edib, İssık-Kulun zəngin təbiətindən və Qırğızıstanın milli-mədəni irsindən ilhamlanaraq rəngkarlıq əsərləri yaradıblar. Eyni zamanda, onlar müxtəlif ölkələrin incəsənət məktəbləri ilə tanış olmaq, peşəkar əlaqələr qurmaq və beynəlxalq təcrübə qazanmaq imkanı əldə ediblər.

Azərbaycan Rəssamlıq Akademiyası beynəlxalq əməkdaşlığın genişləndirilməsini və tələbə-müəllim heyətinin beynəlxalq layihələrdə iştirakını daim diqqətdə saxlayır. Beynəlxalq əlaqələr üzrə prorektor, Xalq rəssamı Səlhab Məmmədovun rəhbərliyi ilə bu istiqamətdə həyata keçirilən fəaliyyət nəticəsində Akademiyanın beynəlxalq yaradıcılıq və təhsil əlaqələri ildən-ilə genişlənməkdədir. Bu cür beynəlxalq layihələr müəllim və tələbələrin peşəkar inkişafına, yaradıcı təcrübələrinin zənginləşməsinə, eləcə də Azərbaycan təsviri sənətinin beynəlxalq müstəvidə tanıdılmasına mühüm töhfə verir.

30/07/2026

Magistrant adını qazanan bütün tələbələri təbrik edirik!✨️

Yaradıcılıq davam edir...

29/07/2026

Azərbaycan Respublikasının Əməkdar mədəniyyət işçisi, AzRA-nın uzunillik emalatxana müdiri, tanınmış bədii metal ustası və zərgər-sənətkar Cəmaləddin Bilal oğlu Eyyubovun vəfatı bizi dərindən kədərləndirdi.

Cəmaləddin Eyyubov ömrünü Azərbaycan dekorativ-tətbiqi sənətinin, xüsusilə bədii metal və zərgərlik sənətinin inkişafına həsr etmiş görkəmli sənətkar idi. O, milli bədii metal sənətinin zəngin ənənələrini müasir bədii düşüncə ilə vəhdətdə yaşadan, özünəməxsus yaradıcılıq üslubu formalaşdıran sənət ustalarından biri kimi tanınırdı. Mis və bürüncdən hazırladığı kompozisiyalar, qızıl və gümüşdən yaratdığı zərgərlik nümunələri xalqımızın mənəvi dünyasını, estetik dəyərlərini, milli adət-ənənələrini və həyat fəlsəfəsini yüksək sənətkarlıqla əks etdirirdi.

Sənətkarın geniş və zəngin yaradıcılığı yalnız ölkəmizdə deyil, beynəlxalq aləmdə də böyük maraqla qarşılanmışdır. Onun əsərləri Yaponiya, Misir, Latviya, Macarıstan, Çexoslovakiya, Avstriya, Bolqarıstan, Fransa və s. ölkələrdə keçirilən beynəlxalq sərgilərdə nümayiş etdirilmiş, Azərbaycan dekorativ-tətbiqi sənətini layiqincə təmsil etmişdir. 1973-cü ildə Azərbaycan Dövlət Televiziyası tərəfindən "Zərgər" sənədli filmi, 2016-cı ildə isə Rusiyanın "Mir" telekanalı tərəfindən onun yaradıcılığına həsr olunmuş sənədli film hazırlanmışdır.

Cəmaləddin Eyyubov peşəkar yaradıcılığı ilə yanaşı, gənc nəslin yetişdirilməsinə də mühüm töhfələr vermişdir. Uzun illər ADMİU-da tədris ustası, AzRA-da isə emalatxana müdiri kimi fəaliyyət göstərərək zəngin bilik və təcrübəsini tələbələrlə bölüşmüş, onların peşəkar sənətkar kimi formalaşmasında əvəzsiz rol oynamışdır.

Yüksək peşəkarlığı, sənətə sonsuz sevgisi, təvazökarlığı və səmimi insanlığı ilə seçilən Cəmaləddin müəllim həmkarlarının, tələbələrinin və onu tanıyan hər kəsin dərin hörmət və rəğbətini qazanmışdır. Onun zəngin yaradıcılıq irsi Azərbaycan bədii metal və zərgərlik sənətinin inkişaf tarixində mühüm yer tutur və gələcək nəsillər üçün dəyərli sənət məktəbi olaraq yaşayacaq.

Azərbaycan Rəssamlıq Akademiyasının kollektivi mərhumun ailəsinə, doğmalarına və yaxınlarına dərin hüznlə başsağlığı verir, ona Allahdan rəhmət diləyir.

Ruhu şad, məkanı cənnət olsun.

28/07/2026

"Dekorativ-tətbiqi sənət" (sahələr üzrə) ixtisası üzrə diplom yaradıcılıq işlərinin müdafiəsindən görüntüləri təqdim edirik.

Azərbaycan Rəssamlıq Akademiyasında "Dekorativ-tətbiqi sənət" (sahələr üzrə) ixtisasının IV tədris ili tələbələrinin buraxılış yaradıcılıq işlərinin müdafiəsi keçirilib. Müdafiəyə təqdim olunan yaradıcılıq işləri müxtəlif ixtisaslaşmalar üzrə hazırlanmış layihələrin bədii-estetik xüsusiyyətlərini, texniki icra səviyyəsini və müəlliflərin yaradıcı yanaşmalarını əks etdirib. Tələbələr işlərinin ideya həllini, tətbiq olunan material və texnologiyaları Attestasiya Komissiyası qarşısında təqdim edərək əsaslandırıblar.
Ümumilikdə 41 tələbə diplom yaradıcılıq işini müdafiə edib. Onlardan 38 nəfər A (əla), 3 nəfər isə B (yaxşı) qiymətinə layiq görülüb. Müdafiələr Bədii xalça, Bədii toxuculuq, Bədii metal, Bədii keramika və şüşə ixtisaslaşmaları üzrə təşkil olunub.

Yüksək nəticə göstərən tələbələrdən Məmmədzadə Nərgiz Ramiz qızı (Bədii toxuculuq), Mustafazadə Mustafa Fərid oğlu (Bədii metal) və Ağayeva Ləman İlham qızı (Bədii keramika və şüşə) diplom yaradıcılıq işlərini 100 bal ilə müdafiə edərək fərqləniblər.
Tələbələrimizi diplom işlərini uğurla müdafiə etmələri münasibətilə təbrik edir, onlara gələcək peşə və yaradıcılıq fəaliyyətlərində yeni uğurlar arzulayırıq.

23/07/2026

Azərbaycan Rəssamlıq Akademiyasının tələbələri Böyük Britaniyada beynəlxalq peşəkar inkişaf proqramında iştirak ediblər

Azərbaycan Rəssamlıq Akademiyasının Memarlıq ixtisasının III kurs tələbələri Ağaməmmədova Mədinə və Məmmədova Seyidfatimə Böyük Britaniyanın Azərbaycandakı Səfirliyinin təşəbbüsü ilə həyata keçirilən beynəlxalq layihə çərçivəsində Londonda təşkil olunmuş peşəkar inkişaf proqramında iştirak ediblər.

Su ehtiyatlarının səmərəli idarə olunması, dayanıqlı şəhərsalma və müasir memarlıq yanaşmalarına həsr olunmuş layihənin əsas məqsədi gənc memarların yaradıcılıq potensialının inkişaf etdirilməsi, onların beynəlxalq təcrübə qazanması və dünya memarlıq mühiti ilə yaxından tanış olmaları olub. Layihə Böyük Britaniyanın Memarlar Kral İnstitutu (RIBA) ilə əməkdaşlıq çərçivəsində təşkil edilib və dünyanın aparıcı memarlıq şirkətləri olan Zaha Hadid Architects, Chapman Taylor və Scott Brownrigg tərəfindən dəstəklənib.

Səfər proqramı çərçivəsində iştirakçılar RIBA-nın baş qərargahını, eləcə də Zaha Hadid Architects, Chapman Taylor və Scott Brownrigg şirkətlərinin ofislərini ziyarət edərək bu şirkətlərin fəaliyyət istiqamətləri, beynəlxalq layihələri, dayanıqlı memarlıq prinsipləri, innovativ dizayn həlləri və müasir şəhərsalma yanaşmaları ilə yaxından tanış olublar. Həmçinin tanınmış memarlar və sahə mütəxəssisləri ilə keçirilən görüşlərdə qlobal memarlıq problemləri, dayanıqlı inkişaf məqsədləri və beynəlxalq əməkdaşlıq imkanları ətrafında geniş fikir mübadiləsi aparılıb.

Proqramda tələbələrlə yanaşı, Azərbaycan Rəssamlıq Akademiyasının Memarlıq kafedrasının müdiri, sənətşünaslıq üzrə fəlsəfə doktoru, dosent Məmmədova Gülər, həmçinin Beynəlxalq əlaqələr, sərgilər və əcnəbi tələbələrlə iş şöbəsinin baş mütəxəssisi Hümbətova Səbinə də iştirak ediblər. Nümayəndə heyəti beynəlxalq əməkdaşlığın inkişafı, ali memarlıq təhsilində müasir yanaşmaların tətbiqi və gələcək birgə layihələrin həyata keçirilməsi istiqamətində bir sıra səmərəli görüşlər keçirib.

Böyük Britaniyada təşkil olunan bu peşəkar inkişaf proqramı Azərbaycan Rəssamlıq Akademiyası tələbələrinin nəzəri biliklərinin praktik təcrübə ilə zənginləşdirilməsi, beynəlxalq peşəkar əlaqələrinin genişləndirilməsi və dünya memarlıq təcrübəsini yaxından mənimsəmələri baxımından mühüm əhəmiyyət kəsb edib. Eyni zamanda səfər Akademiyanın beynəlxalq əməkdaşlıq əlaqələrinin daha da möhkəmləndirilməsinə və gələcək ortaq layihələrin həyata keçirilməsi üçün yeni imkanların yaranmasına töhfə verib.

21/07/2026

AzRA SABAH qruplarında təhsil alan tələbələrin diplom yaradıcılıq işlərinin müdafiəsindən görüntüləri təqdim edirik.

SABAH qruplarının "Dizayn" və "Dekorativ-tətbiqi sənət" ixtisasları üzrə IV tədris ili tələbələrinin diplom yaradıcılıq işlərinin müdafiəsi keçirilib. Attestasiya Komissiyasına Xalq rəssamı Arif Əziz sədrlik edib.

SABAH qrupları üzrə təqdim olunan diplom yaradıcılıq işləri müxtəlif ixtisaslaşmalar üzrə hazırlanmış layihələrin məzmun və keyfiyyətini, tələbələrin peşə hazırlığını və yaradıcı yanaşmalarını əks etdirib. Müdafiə zamanı müəlliflər layihələrinin konsepsiyasını, tətbiq etdikləri həlləri və bədii-estetik xüsusiyyətlərini Attestasiya Komissiyası qarşısında təqdim edərək əsaslandırıblar.

Ümumilikdə 24 tələbə diplom yaradıcılıq işini müdafiə edib. "Dizayn" ixtisasında İnteryer üzrə dizayner, Qrafik dizayn və Sənaye dizaynı, "Dekorativ-tətbiqi sənət" ixtisasında isə Bədii xalça, Bədii toxuculuq, Bədii metal, Bədii keramika və şüşə ixtisaslaşmaları üzrə diplom yaradıcılıq işləri təqdim olunub.

Yüksək nəticə göstərən tələbələrdən Ramin Ağayev, Hüseyn İskəndərov, Şirin Eyvazova, Leyla Ağadiyeva, Aydan Vəliyeva, Zəhra Ağayeva, Qubad Bağırzadə və Azər Əlizadə diplom yaradıcılıq işlərini 100 bal ilə müdafiə edərək fərqləniblər.

SABAH qrupları məzunlarımızı diplom yaradıcılıq işlərini uğurla müdafiə etmələri münasibətilə təbrik edir, onlara gələcək peşə və yaradıcılıq fəaliyyətlərində yeni uğurlar arzulayırıq.