ADU - Filologiya fakültəsi

08.01.2026-cı il tarixində ADU - nun Filologiya fakültəsi üzrə "Keyfiyyətin təminatı və fəaliyyət planının icrasına nəzarət" iclası keçirilmişdir. İclasda ixtisaslar üzrə təhsil proqramları və ingilis dilinin tədrisi üçün yeni dərsliklərin istifadə olunması müzakirə olunmuşdur.

Azərbaycan Dillər Universitetinin Filologiya fakültəsinin IV kurs tələbələri üçün TKT - Teaching Knowledge Test Module 3 üzrə təlim təşkil olunmuşdur. Bu təlimi könüllü əsaslarla həftədə iki dəfə, biri əyani, digəri isə onlayn formada təşkil olunmuş təlim fəaliyyətinə verdiyi töhfəyə görə təlimçi Aytac Musabəyli universitet tərəfindən təşəkkürnamə ilə təltif edilmişdir. Həmçinin, qeyd olunan təlimdə fəal iştirak edən 14 tələbə iştirakçı sertifikatları ilə mükafatlandırılmışdır.

14.11.2025 tarixində Azərbaycan Dillər Universitetinin məzunu, TESOL və TKT Band 4 sertifikatlı Aytac Musabəyli filologiya fakültəsinin dil də ədəbiyyat müəllimliyi üzrə təhsil alan lV kurs tələbələri üçün TKT Module 3 üzrə peşəkar təlimə start verib.
Təlimin məqsədi gələcək ingilis dili müəllimlərini dərs prosesinin idarə edilməsi və effektiv pedaqoji strategiyalarla tanış etməkdir.
Proqram çərçivəsində tələbələr real dərs şəraitinə əsaslanan tapşırıqlar və interaktiv fəaliyyətlərlə biliklərini möhkəmləndirirlər.

Konstitusiya və Suverenlik ili çərçivəsində 3 oktyabr tarixində Yeni Azərbaycan Partiyasının Nəsimi rayon təşkilatında keçirilən esse müsabiqəsində Azərbaycan Dillər Universitetinin Filologiya fakültəsinin İngilis dili və ədəbiyyatı müəllimliyi üzrə təhsil alan IV kurs B22-442B qrupunun tələbəsi Kərimova Şirinnaz birinci yerə layiq görülüb.

ADU-da fakültələrarası keçirilmiş tyutor xidməti ilə bağlı tələbə sorğusunun nəticələrinə əsasən, Filologiya fakültəsinin III kurs tyutoru Fəridə Cəfərova “İlin ən yaxşı tyutoru” adına layiq görülüb!

Peşəkar fəaliyyəti, tələbələrlə səmərəli ünsiyyəti və məsuliyyətli yanaşması ilə seçilən Fəridə xanımı bu münasibətlə səmimi qəlbdən təbrik edir, gələcək fəaliyyətində uğurlar arzulayırıq!

Bu nailiyyət həm fakültəmiz, həm də tələbələrimiz üçün böyük qürur mənbəyidir.

26 sentyabr 2025-ci il tarixində Filologiya fakültəsinin bir qrup tələbəsi, Türkiyənin Yeşilçam kinomatoqrafiyasının görkəmli simalarından olan Hülya Koçyiğit və televiziya dünyasının məşhur aktyorları Berk Oktay, Anıl Altan və Duygu Mercan ilə görüşdə iştirak edib.

Türkiyənin İstanbul şəhərində keçirilən beynəlxalq proqram çərçivəsində Filologiya fakültəsinin 2 tələbəsi Ehtibarova Gülbikə və Aysu İsmayıl global layihələrdə fəal iştirak etmişlər:
Ehtibarova Gülbikə
“Məktəbəqədər uşaqlara Amerika mədəniyyəti və ingilis dilinin öyrədilməsi” layihəsi
“Bayrampaşa Gənclik Mərkəzində beynəlxalq layihə yazmaq təcrübəsinin əldə edilməsi” (1 ay müddətində)
Aysu İsmayıl :
"Məktəbəqədər uşaqlara ispan dili və mədəniyyətinin öyrədilməsi"
“Bayrampaşa Gənclik Mərkəzində beynəlxalq layihə yazmaq təcrübəsinin əldə edilməsi” (1 ay müddətində)

Bu iştirak tələbələrimiz üçün mühüm beynəlxalq təcrübə olmaqla yanaşı, onların şəxsi və peşəkar inkişafında da böyük rol oynamışdır.

Mayın 29-da Azərbaycan Dillər Universitetinin Filologiya fakültəsinin dekanı dos.Aynur Budaqovanın təşəbbüsü ilə “Təhsil siyasəti və qlobal gündəm” mövzusunda interaktiv mühazirə təşkil olunub. Mühazirə Azərbaycan Dillər Universitetinin məzunu, hazırda Dövlət Proqramı çərçivəsində Glasgow Universitetində doktorantura təhsili alan Minarə Fərzəliyevanın təqdimatında keçirilib.
Mühazirədə tələbələr və bir sıra əməkdaşlar iştirak ediblər. Təhsil, siyasət və iqtisadiyyat sahələrini inteqrasiya edən interdisiplinar mühazirədə doktorant Minarə Fərzəliyeva tərəfindən qloballaşmanın mahiyyəti və ətrafındakı mübahisələr, təhsilin qlobal idarə edilməsi, beynəlxalq təşkilatların milli təhsil siyasətlərinə təsiri, “yumşaq idarəetmə” və “sərt faktlar” paradoksu, təhsilə investisiya qoyulmasının vacibliyi, bilik iqtisadiyyatı və s. mövzular geniş şəkildə təqdim edilib.
Mühazirənin sonunda tələbələrin elmi araşdırmalara marağını stimullaşdırmaq məqsədilə interaktiv müzakirə və sual-cavab sessiyası keçirilib.

01 may 2025-ci il tarixində ADU-nun Alman dilinin fonetikası və qrammatikası kafedrası “Ümummilli liderimiz Heydər Əliyevin anadan olmasının 102-ci il dönümü münasibəti ilə" inşa müsabiqəsi keçirtmişdir:
Yer tutan tələbələr:
I yer – Məmmədova Çinarə Əli qızı(qr. B23-245, Filologiya)
II yer – Məlikova Aysel Fuad qızı (qr. B24-149 , Filologiya)
III yer – Hüseynzadə Əsmər Xanbaba qızı (qr. B24-149 , Filologiya)

05.03.2025 ci il tarixində Filologiya fakültəsinin dekanı vəzifəsini icra edən dos. Aytən Allahverdiyeva və dekan müavini Hüriyyə Nəzərova 153 a,b qrupunda "Dünya ədəbiyyatı", 152-ci qrupda "Öyrənilən əsas dil 2" fənni, 336-cı qrupda "Ölkə ədəbiyyatı" fənni üzrə keçirilən dərsləri izləmişlər.

Noyabrın 5-də, ADU-nun Filologiya fakültəsi və onun nəzdində İngilis dilinin üslubiyyatı kafedrasının təşkilatçılığı ilə “Zəfər günü-Qürur günü!” adlı tədbir keçirildi. Tədbiri giriş sözü ilə İngilis dilinin üslubiyyatı kafedrasının müdiri dosent Aytən Hacıyeva açaraq qonaqlarla birgə 44 günlük müharibədə şəhadətə ucalmış əsgər və zabitlərimizin xatirəsini yad etdilər. Daha sonra, kafedranın baş müəllimi Alışova Ramilə və müəllim Afaq Eminli "Şəhadətin ünvanı" və “Qarabağa "Böyük Qayıdış" planı” mövzularında çıxış etdilər. Filologiya fakültəsinin tələbələri Zeynəb Hüseynova, Lalə Məmmədova və Pərihan Quluzadə 44 günlük müharibədən, hərb və diplomatiya meydanında gedən mübarizədən, böyük Zəfər yürüşündən danışdılar və sonda “Azərbaycan bayrağı “ şeirinin möhtəşəm ifası səsləndirildi.

Azərbaycan Dillər Universiteti
Fransız dilinin fonetikası və qrammatikası kafedrası
Zəfər gününə həsr olunmuş “Qalibiyyətin təntənəsi” adlı tədbir
“Tədbirlər Planı”na uyğun olaraq noyabrın 7-də Fransız dilinin fonetikası və qrammatikası kafedrasının müəllimi Mənsurə İsmayılovanın təşəbbüsü ilə Zəfər gününə həsr olunmuş “Qalibiyyətin təntənəsi” adlı tədbir keçirilmişdir. Tədbir Filologiya fakültəsinin 337-ci qrup tələbələri ilə birlikdə təşkil olunmuşdur. Tədbirdə Fransız dilinin fonetikası və qrammatikası kafedrasının əməkdaşları fil.f.d., professor Ülfət İbrahim, fil.f.d., dosent Teybə Cəlilova və digər kafedra əməkdaşları iştirak etdilər.
Filologiya fakültəsinin 337-ci qrup tələbələri: Həsənova Səmra “Aprel döyüşləri. Zəfərin başlanğıcı”, Qafarova İlahə “Şuşa haqqında ümumi məlumat”, Bəbirova Zeynəb “Laçın, Kəlbəcər haqqında (fransız dilində)”, Quliyeva Nəzrin “Ağdam şəhərinin işğaldan azad olunması”, Babaşzadə Sara “Xankəndi haqqında (fransız dilində)”, Quliyeva Aytac və Cavadova Fidan “Dəmir yumruq”, Sadıqov Nihad və Hüseynov Nihat “Müharibə zamanı Azərbaycana dəstək olan dövlətlər”, Səfiyeva Mehriban “Şuşa bəyannaməsi”, Abdullayeva Məlahət və Həmidova Nərmin “Hərbi qənimətlər”, Baxışlı Aysu “Şəhidlər 44 günlük müharibə”, Hüseynzadə Röya “8 noyabr Zəfər günü”, Əliyeva Fatimə “Qarabağın təbiəti” mövzularda maraqlı məlumatlarla, slaydlarla çıxış etmişlər, mahnı və şeirlər səsləndirmişlər.
Kafedranın müəllimi Mənsurə İsmayılova çıxış edərək ilk öncə tədbirdə iştirak edən hər kəsə öz təşəkkürünü bildirdi. Daha sonra qeyd etdi ki, bu gün Azərbaycan Qarabağa qovuşdu, tarixi zəfərə imza atdı, şəhidlərimizin, Xocalı qurbanlarının, Gəncə, Bərdə, digər şəhər və rayonlarımızda soyqırımları zamanı həlak olan günahsız insanların qisasını döyüş meydanında alındı, işğalçı Ermənistana layiq olduğu yeri göstərdi. Bu qələbəni, zəfəri bizlərə yaşadan isə Ulu Öndər Heydər Əliyev siyasi kursunun layiqli davamçısı, ölkə Prezidentimiz, Ali Baş Komandanımız İlham Əliyevin qətiyyəti, siyasi iradəsi, Güclü Ordumuz, rəşadətli əsgər və zabitlərimizdir.
Noyabrın 8-i xalqımızın tarixinə şanlı, qızıl hərflərlə yazıldı. 30 ildən sonra Prezidentimiz, Ali Baş Komandan İlham Əliyevin rəhbərliyi ilə sübuta yetirdik ki, bir qarış torpağımızı belə heç kəsə verən deyilik. Qarabağ Azərbaycandır! 44 günlük qəhrəmanlıq savaşımız tarix boyu şanlı qürur mənbəyimiz olaraq qalacaq!
Sonda tədbir iştirakçıları videoçarx izlədilər.