Mübariz Nəcəfov adına 86 nömrəli tam orta ümumtəhsil məktəbi

Odlar yurduna bahar gəlir
Mübariz Nəcəfov adına 86 nömrəli tam orta ümumtəhsil məktəbində “Dəyərlərimizi qoruyaq!” layihəsi çərçivəsində ibtidai sinif müəllimi Səbinə Əlibəyova və tarix müəllimi Samirə Əhmədovanın təşkilatçılığı ilə “Odlar yurduna bahar gəlir” adlı tədbir təşkil olunub. Tədbirin keçirilməsində əsas məqsəd şagirdlərdə milli-mənəvi dəyərlərə hörmət hissini daha da artırmaq və onları bu dəyərlərin qoruyub saxlaması istiqamətində fəal mövqe tutmalarına şərait yaratmaq olub.
Şagirdlər tərəfindən hazırlanmış təqdimatlar, şeirlər və səhnəciklər vasitəsilə Azərbaycan xalqının zəngin mədəni irsi və mənəvi dəyərləri nümayiş etdirilib.
Məktəbin direktoru Günel Səmədova milli kimliyin qorunması, adət-ənənələrin gələcək nəsillərə ötürülməsi və milli dəyərlərin cəmiyyət həyatındakı rolunu çıxışı zamanı vurğulayaraq tədbir iştirakçılarını ilaxır çərşənbə və qarşıdan gələn Novruz bayramı münasibətilə təbrik edib.

Dəyərlərimizi qoruyaq!” layihəsi çərçivəsində əl işləri sərgisi
Mübariz Nəcəfov adına 86 nömrəli tam orta ümumtəhsil məktəbində “Dəyərlərimizi qoruyaq!” layihəsi çərçivəsində uşaqlarla məktəbdənkənar və sinifdənxaric tərbiyə işləri üzrə təşkilatçı Leyla Binnətovanın rəhbərliyi ilə şagirdlərin hazırladıqları əl işlərindən ibarət sərgi təşkil olunub. Sərgidə Azərbaycan xalqının zəngin mədəni irsi, Novruz adətləri, milli geyim elementləri, xalq sənətkarlığını və qədim adət-ənənələri əks etdirən müxtəlif yaradıcılıq nümunələri nümayiş etdirilib.
Belə tədbirlərin keçirilməsi gənc nəslin milli-mənəvi dəyərlər ruhunda tərbiyə olunmasına, onların yaradıcılıq qabiliyyətlərinin inkişafına və xalqımızın mədəni irsinin təbliğinə mühüm töhfə verir.

Mart- şahmat ayı
Təhsil müəssisələrində şagirdlərin fiziki fəallığının artırılması, sağlam həyat tərzinin təşviqi və idman mühitinin gücləndirilməsi məqsədilə “Ayın idman növü” adlı layihəyə əsasən Mübariz Nəcəfov adına 86 nömrəli tam orta ümumtəhsil məktəbində “Mart- şahmat ayı” çərçivəsində müxtəlif yarışlar keçirilib. Yarışların keçirilməsində əsas məqsəd şagirdlər arasında intelektual idman növü olan şahmat oyununu təbliğ etmək, güclü şahmatçıları aşkar etmək, eyni zamanda onların asudə vaxtlarını mənalı və səmərəli təşkil etməkdən ibarət olub.
Məktəbin fiziki tərbiyə müəllimi Şərafəddin Rəhimov və uşaq birliyi təşkilatının rəhbəri Şərqiyyə Əliyevanın təşkilatçılığı ilə IV sinif şagirdlər arasında keçirilən yarışlar zamanı dostluq, ədalətli oyun və qarşılıqlı hörmət prinsiplərinə xüsusi diqqət yetirilib. Yarışın nəticələrinə əsasən 4D sinif şagirdi Niyazi Əmirov I, 4E sinif şagirdi Ümüd Rəhimov II, 4B sinif şagirdi Rəsul Allahverdiyev III yerə layiq görülərək məktəb rəhbərliyi tərəfindən diplomla təltif olunublar.

Novruz bayramına həsr olunmuş “açıq dərs”lər keçirilib
“Şəhərsalma və Memarlıq İli” çərçivəsində “Dəyərlərimizi qoruyaq!” layihəsinə əsasən Mübariz Nəcəfov adına 86 nömrəli tam orta ümumtəhsil məktəbində şagirdlərə milli-mənəvi irsi təbliğ etmək, milli kimlik və mədəni dəyərlərə hörmət hissini formalaşdırmaq məqsədilə silsilə “açıq dərs”lər təşkil olunub. Keçirilən dərslərdə müəllimlər tərəfindən Azərbaycan xalqının zəngin tarixi, adət-ənənələri, milli-mənəvi dəyərləri və onların qorunmasının əhəmiyyəti haqqında ətraflı məlumat verilib.
İnteraktiv metodlarla təşkil edilən dərslər zamanı şagirdlər milli dəyərlərimizi əks etdirən müxtəlif təqdimatlar hazırlayıb, rəqslər nümayiş etdiriblər.

Şagirdlərimizin beynəlxalq uğurları davam edir

Mübariz Nəcəfov adına 86 nömrəli tam orta ümumtəhsil məktəbinin 10F şagirdi Nərgiz Vəliyeva beynəlxalq səviyyəli layihə və təlimlərdə fəal iştirakı ilə növbəti uğurunu əldə edib. O, University of Glasgow tərəfindən təqdim olunan “Future World Architect” proqramı çərçivəsində sertifikatla təltif olunub. Qeyd edək ki, bu sertifikat şagirdin daha ədalətli, mehriban və gözəl gələcək dünya haqqında ideyalar irəli sürməsi və həmin fikirlərini cəsarətlə təqdim etməsi baxımından xüsusi əhəmiyyət daşıyır. Proqram çərçivəsində iştirakçılar yaradıcı düşüncə, problemlərin həlli və qlobal baxış kimi mühüm bacarıqlar üzrə özlərini inkişaf etdirmək imkanı əldə edib.
Eyni zamanda, Nərgiz Vəliyeva sülh və dəyərlərin təbliği istiqamətində keçirilən fəaliyyətlərdə də fəallıq göstərərək “Peace Advocate” sertifikatına layiq görülüb. Bu sertifikat onun insanlara qarşı diqqət, qayğı və anlayış nümayiş etdirməsi, münaqişələrin sülh yolu ilə həllinə töhfə verməsi kimi keyfiyyətlərini əks etdirir.
Şagirdimizin əldə etdiyi bu nailiyyətlər onun yüksək intellektual potensialının, yaradıcılıq qabiliyyətinin və sosial məsuliyyət hissinin göstəricisidir. Bu cür uğurlar eyni zamanda təhsil müəssisəsində aparılan məqsədyönlü təlim-tərbiyə işinin nəticəsi kimi dəyərləndirilir.
Şagirdimizi məktəb kollektivi adından təbrik edir, gələcək fəaliyyətində uğurlar arzu edirik!

Beynəlxalq səviyyəli uğur: şagirdimiz mükafatlandırılıb

Müxtəlif ölkələrdən olan istedadlı uşaqları bir araya gətirərək onların yaradıcılıq qabiliyyətlərinin üzə çıxarılmasına və inkişafına şərait yaratmaq məqsədilə Qazaxıstanda “İncəsənət Planeti” adlı rəsm müsabiqəsi keçirilib. Mübariz Nəcəfov adına 86 nömrəli tam orta ümumtəhsil məktəbinin 9B sinif şagirdi Sara Sadıqzadə müsabiqədə uğurla iştirak edərək münsiflər heyəti tərəfindən III dərəcəli laureat adına layiq görülüb. Şagirdimizi məktəb kollektivi adından təbrik edir, gələcək fəaliyyətlərində uğurlar arzu edirik!

Məktəbin ibtidai sinif müəllimləri Oksana İskəndərova, Vəfa Kamallı, Viktoriya Səmədova və Pərvanə Həsənovanın rəhbərliyi ilə şagirdlərə xalqımızın qədim mətbəx ənənələrini aşılamaq, milli bayramlarımızla bağlı kulinariya nümunələrini tanıtmaq və onların yaradıcılıq bacarıqlarını inkişaf etdirmək məqsədilə “Mətbəx mədəniyyətimiz” adlı kulinariya tədbirində iştirakı təşkil olunub. 1D, 2E, 3D və 3F sinif şagirdləri tərəfindən Novruz bayramına xas olan müxtəlif milli şirniyyatlar hazırlanıb. Şagirdlər paxlava, şəkərbura, qoğal kimi ənənəvi şirniyyat nümunələrini təqdim etmiş, eyni zamanda bayram atributlarından biri olan yumurtaları boyamışlar.
Tədbir zamanı şagirdlər milli mətbəximizin tarixi, Novruz bayramı ilə bağlı kulinariya ənənələri və xalqımızın süfrə mədəniyyəti haqqında maarifləndirici məlumatlar əldə ediblər.

Şagirdlərimizin uğurları davam edir
10 mart 2026-cı il tarixində "Şəhərsalma və Memarlıq ili"nə həsr olunmuş Nə? Harada? Nə zaman? intellektual bilik yarışı keçirilib. Yarışın keçirilməsində məqsəd uşaqların dünyagörüşünü genişləndirmək, məntiqi düşünmə bacarıqlarını inkişaf etdirmək və onların bilik səviyyəsini yoxlamaq olub.
Mübariz Nəcəfov adına 86 nömrəli tam orta ümumtəhsil məktəbinin 8C sinif şagirdləri Ümid Əliyev və Fatimə Hüseynova qalib gələrək I yerə layiq görülüblər. Şagirdlərimiz diplom və medallarla təltif olunublar. Məktəb kollektivi adından onları təbrik edir, gələcək fəaliyyətlərində uğurlar arzu edirik.

Məkktəbimizin uğurları davam edir.
Gənclərin Respublika Bədii Yaradıcılıq Evinin təşkilatçılığı və Məktəbəqədər və Ümumi Təhsil üzrə Dövlət Agentliyinin dəstəyi ilə Bakı şəhəri üzrə ümumtəhsil məktəblərinin şagirdləri və uşaq-gənclər inkişaf mərkəzlərinin dərnək üzvləri arasında keçirilən “Bahar nəğmələri” ifa müsabiqəsinin mükafatlandırma mərhələsi baş tutub. Müsabiqənin keçirilməsində əsas məqsəd Novruz bayramının milli-mənəvi dəyərlərini gənc nəslə aşılamaq, onların yaradıcılıq potensialını üzə çıxarmaq və incəsənətə marağı artırmaq olub.
İştirakçılar təsnif və xalq mahnıları, Azərbaycan bəstəkarlarının estrada mahnıları, kollektiv ifa (duet, trio, kvartet, kvintet) və xalq çalğı alətlərində ifa nominasiyaları üzrə öz bacarıqlarını nümayiş etdiriblər. Final mərhələsində 300-dən çox şagirdin iştirak etdiyi müsabiqədə Mübariz Nəcəfov adına 86 nömrəli tam orta ümumtəhsil məktəbinin 11D sinif şagirdi Aysu İsmayılova estrada mahnıları nominasiyası üzrə (15-19 yaş qrupu) peşəkar münsiflər heyəti tərəfindən I yerə layiq görülərək diplom və hədiyyələrlə mükafatlandırılıb.
Şagirdimizi məktəb kollektivi adından təbrik edir, gələcək fəaliyyətlərində, o cümlədən buraxılış imtahanında uğurlar arzu edirik!

Məktəb rəhbərliyi tərəfindən buraxılış vərəqələri təqdim edilib
Mübariz Nəcəfov adına 86 nömrəli tam orta ümumtəhsil məktəbində XI sinif şagirdlərinin tam (11 illik) orta təhsil səviyyəsi üzrə keçiriləcək buraxılış imtahanına hazırlıq prosesinin mühüm mərhələlərindən biri olan buraxılış vərəqələrinin təqdim edilməsi həyata keçirilib. Bu münasibətlə məktəbdə təşkil olunmuş görüşdə məktəbin direktoru Günel Səmədova, təlim-tərbiyə işləri üzrə direktor müavini Ülkər İsmayılova və sinif rəhbərləri iştirak ediblər.
Tədbir zamanı Günel Səmədova tərəfindən şagirdlərə qarşıdan gələn buraxılış imtahanının onların təhsil həyatında mühüm mərhələ olduğu vurğulanıb, imtahan prosesində diqqətli, məsuliyyətli və inamlı olmalarının vacibliyi qeyd edilib. Həmçinin şagirdlərə imtahan qaydaları, imtahan günü riayət olunmalı olan tələblər və buraxılış vərəqələrinin əhəmiyyəti barədə sinif rəhbərləri tərəfindən ətraflı məlumat verilib.
Sonda məktəb rəhbərliyi şagirdlərə qarşıdakı imtahanlarda uğurlar arzulayıb, onların bilik və bacarıqlarını layiqincə nümayiş etdirərək yüksək nəticələr əldə edəcəklərinə inamını ifadə edib və xatirə şəkli çəkdirilib.

Dəyərlərimiz bədii ədəbiyyatda.
Mübariz Nəcəfov adına 86 nömrəli tam orta ümumtəhsil məktəbinin Azərbaycan dili və ədəbiyyat müəllimi Yeganə Qarayevanın təşəbbüsü ilə “Dəyərlərimiz bədii ədəbiyyatda” adlı oxu dəqiqələri təşkil olunub. Dərs Azərbaycan uşaq ədəbiyyatının görkəmli nümayəndəsi, maarifçi yazıçı və pedaqoq Süleyman Sani Axundovun “Qorxulu nağıllar” silsiləsinə daxil olan “Əhməd və Məleykə” əsərinin mütaliəsi və müzakirəsinə həsr edilib.
Oxu dəqiqələri zamanı 6A sinif şagirdləri əvvəlcədən mütaliə etdikləri əsər haqqında fikirlərini bölüşərək süjet xətti, obrazların xarakter xüsusiyyətləri və əsərin ideya-məzmun xüsusiyyətləri barədə müzakirələr aparıblar. Bildirilib ki, müəllif bu əsərdə uşaqların mənəvi dünyasının formalaşmasına təsir göstərən mühüm dəyərləri - xeyirxahlıq, mərhəmət, ədalət və humanizm kimi milli-mənəvi dəyərləri bədii obrazlar vasitəsilə əks etdirilib.
Sonda qeyd olunub ki, belə oxu və müzakirə tədbirlərinin keçirilməsi şagirdlərin bədii ədəbiyyata marağının artırılması, mütaliə vərdişlərinin formalaşdırılması və milli-mənəvi dəyərlərin dərindən mənimsənilməsi baxımından mühüm əhəmiyyət kəsb edir.

Psixoloq saatı:“İmtahan həyəcanının korreksiyası”
Mübariz Nəcəfov adına 86 nömrəli tam orta ümumtəhsil məktəbində psixoloq Şəfəq Soltanovanın rəhbərliyi, XI sinif şagirdlərinin iştirakı ilə “İmtahan həyəcanının korreksiyası” mövzusunda maarifləndirici görüş keçirilib. Görüşün keçirilməsində əsas məqsəd tam (11 illik) orta təhsil səviyyəsi üzrə buraxılış imtahanı ərəfəsində şagirdlərdə yaranan stres və həyəcanın azaldılması, onların özünəinamının gücləndirilməsi olub.
Tədbir zamanı Şəfəq Soltanova imtahan stresinin yaranma səbəbləri, onun psixoloji və fizioloji təsirləri barədə ətraflı məlumat verib, streslə mübarizə üsulları - düzgün vaxt bölgüsü, planlı təkrar, nəfəs məşqləri, müsbət düşüncə formalaşdırılması və emosional tarazlığın qorunması kimi metodlar haqqında tövsiyələr səsləndirib. Şagirdlərlə açıq dialoq qurularaq onların sualları cavablandırılıb, fərdi narahatlıqlar dinlənilib.
Görüşün davamında interaktiv oyun zamanı şagirdlər şarların içərisində yerləşdirilmiş sualları seçərək cavablandırmış, həmin suallar üzrə fikir mübadiləsi aparmışlar.