S.S. Axundov adına 172 nömrəli tam orta məktəb

Bu gün məktəbimizdə hüquq-mühafizə orqanlarının nümayəndələrinin iştirakı ilə valideynlərlə maarifləndirici görüş keçirilmişdir. Görüşün əsas məqsədi şagirdlərin təhlükəsizliyinin təmin olunması, onların hüquq və vəzifələri barədə valideynlərin məlumatlandırılması, eləcə də məktəb-valideyn əməkdaşlığının daha da gücləndirilməsi olmuşdur.
Tədbirdə 30-cu polis şöbəsinin rəis müavini, polis polkovnik-leytenantı Cəmil Məmmədov, 30-cu polis bölməsinin sahə inspektoru Xəqani Mikayılov, yetkinlik yaşına çatmayanlarla iş üzrə inspektor, polis leytenantı Sezər Kərimli, məktəb rəhbərliyi və çoxsaylı valideynlər iştirak etmişlər.
Çıxış edən hüquq-mühafizə orqanlarının nümayəndələri valideynlərə yeniyetmələrin davranış qaydaları, hüquqi məsuliyyətləri, zərərli vərdişlərdən qorunma yolları, kibertəhlükəsizlik və sosial şəbəkələrdən düzgün istifadə mövzularında ətraflı məlumat vermişlər. Xüsusilə vurğulanmışdır ki, valideyn nəzarəti və məktəblə sıx əməkdaşlıq şagirdlərin sağlam, təhlükəsiz və məsuliyyətli mühitdə formalaşmasında mühüm rol oynayır.
Eyni zamanda valideynlərə tövsiyə olunmuşdur ki, şagirdlərin məktəbə əlavə və təhlükəli əşyalar gətirməsinə yol verilməsin, onların dərsdənkənar vaxtının düzgün təşkili diqqətdə saxlanılsın və övladları ilə daim ünsiyyətdə olsunlar. Şagirdlərin təhlükəsizliyinin təmin olunması üçün məktəb ətrafında nəzarətin gücləndirilməsi, şübhəli hallarla qarşılaşdıqda aidiyyəti qurumlara məlumat verilməsi də diqqətə çatdırılmışdır.
Görüş interaktiv formada keçirilmiş, valideynləri maraqlandıran suallar cavablandırılmış, qarşılıqlı fikir mübadiləsi aparılmışdır.

Məktəbimizdə texnologiya müəllimləri Ağabəyova Ləman və Abdullayeva Ayselin təşkilatçılığı ilə şagirdlərin əl işlərindən ibarət "Bizim yaradıcı dünyamız" adlı sərgi təşkil olunmuşdur. Sərginin əsas məqsədi şagirdlərin yaradıcılıq qabiliyyətlərini üzə çıxarmaq, onların əl bacarıqlarını inkişaf etdirmək və əməyə olan marağını artırmaq olmuşdur.
Sərgidə şagirdlərin hazırladıqları bir-birindən maraqlı və rəngarəng əl işləri nümayiş etdirilmişdir. Hər bir işdə şagirdlərin fantaziyası, zövqü və zəhməti aydın şəkildə hiss olunmuşdur. Hazırlanan bu nümunələr məktəbin dəhlizində şagirdlərin iştirakı ilə təqdim olunmuş və daimi olaraq nümayiş etdirilməyə başlanmışdır. Bu isə sərgini məktəb mühitinin ayrılmaz bir hissəsinə çevirmişdir.
Digər şagirdlər sərgiyə böyük maraqla yanaşaraq təqdim olunan işləri diqqətlə izləyir, bu da onların yaradıcılığa olan həvəsini daha da artırır. Belə tədbirlər şagirdlərin potensialının üzə çıxarılmasına, onların asudə vaxtının səmərəli təşkilinə və yaradıcılığa təşviq olunmasına mühüm töhfə verir.

Məktəbimizdə 8-ci siniflər arasında riyaziyyat fənni üzrə bilik yarışması keçirilmişdir. Yarışın əsas məqsədi şagirdlərin riyazi biliklərini möhkəmləndirmək, məntiqi düşünmə və sürətli həll bacarıqlarını inkişaf etdirmək olmuşdur.
Maraqlı və rəqabətli keçən yarışın nəticəsində 8B sinfi daha yüksək nəticə göstərərək I yerə layiq görülmüşdür. Şagirdlər həm fərdi bacarıqları, həm də komanda şəklində işləmə qabiliyyəti ilə fərqlənmişlər.
Yarış riyaziyyat müəllimləri Ünsiyyə Həsənzadə, Elmira Kərimova və Sevinc Ağasıyevanın təşkilatçılığı ilə həyata keçirilmişdir.

Ölkə üzrə bütün ümumi təhsil müəssisələrində şagirdlərin Azərbaycan və dünya miqyasında tanınmış şəxsiyyətləri daha yaxından tanıması, onların zəngin həyat və yaradıcılıq yolunu öyrənməsi məqsədilə Məktəbəqədər və Ümumi Təhsil üzrə Dövlət Agentliyi tərəfindən həyata keçirilən "Tanınmış şəxsiyyətlər təqvimi" layihəsi uğurla davam etdirilir. Bu təşəbbüs çərçivəsində müxtəlif sahələri əhatə edən görkəmli şəxsiyyətlər şagirdlərə təqdim olunur, onların dünyagörüşünün genişlənməsinə şərait yaradılır.
Layihəyə uyğun olaraq məktəbimizdə də mütəmadi şəkildə maarifləndirici və yaradıcı tədbirlər təşkil olunur. Növbəti tədbir dünya şöhrətli holland rəssamı Vincent van Gogh-un həyat və yaradıcılığına həsr edilmişdir.
Təsviri incəsənət müəllimi Təranə Pənahova tərəfindən keçirilən maarifləndirici dərsdə 8c sinif şagirdləri sənətkarın həyat yolu, sənət üslubu və məşhur əsərləri haqqında geniş məlumat əldə etdilər. Dərs zamanı şagirdlər müxtəlif rəsmlər çəkmiş, öz yaradıcılıq qabiliyyətlərini nümayiş etdirmişlər.

23 aprel – Kitab və Müəllif Hüquqları Günü münasibətilə məktəb kitabxanasının təşəbbüsü ilə mütaliəyə xüsusi maraq göstərən şagirdlər və siniflər mükafatlandırılmışdır. Tədbir çərçivəsində "Ən yaxşı oxucu şagird" və "Ən yaxşı oxucu sinif" nominasiyaları üzrə qaliblərə məktəbin direktoru Vəfa Bağırova tərəfindən sertifikatlar təqdim olunmuşdur.
Bu təşəbbüs şagirdlərdə kitab oxuma vərdişlərinin inkişaf etdirilməsi, mütaliəyə marağın artırılması, kitab sevgisinin aşılanması və müəllif əməyinə hörmət hissinin formalaşdırılması baxımından mühüm əhəmiyyət kəsb edir.
Təltif olunan şagird və sinfi təbrik edir, onlara gələcək fəaliyyətlərində daha böyük uğurlar arzulayırıq.

6 nömrəli Uşaq Gənclər İnkişaf Mərkəzinin təşkilatçılığı ilə "Şəhərsalma və memarlıq ili" çərçivəsində Bakı şəhərində fəaliyyət göstərən məktəbdənkənar təhsil müəssisələrinin dərnək üzvləri arasında keçirilən "Memarlıq İrsimiz Gənclərin Baxışında" adlı yaradıcılıq müsabiqəsində məktəbimizin şagirdi Qasımov Həsən II yeri qazandığı üçün diplomla təltif olunmuşdur.
Şagirdimizi ürəkdən təbrik edir, ona gələcək təhsil həyatında yeni uğurlar arzulayırıq!

"Şəhərsalma və memarlıq ili" çərçivəsində keçirilən "Azərbaycan memarlığında Heydər Əliyev irsi" adlı esse müsabiqəsində məktəbimizin şagirdləri fəal iştirak edərək uğurlu nəticələr əldə etmişlər.
Qasımlı Həsən müsabiqədə fərqlənərək sertifikatla təltif olunmuş, Nuray Masılı isə uğurlu çıxışı ilə II yerə layiq görülərək diplomla mükafatlandırılmışdır.
Şagirdlərimizi təbrik edir, onlara gələcək təhsil həyatlarında daha böyük uğurlar arzulayırıq!

AFFA və Məktəbəqədər və Ümumi Təhsil üzrə Dövlət Agentliyinin birgə əməkdaşlığı ilə təşkil olunan “Məktəblilər Kuboku” çərçivəsində 172 nömrəli tam orta ümumtəhsil məktəbinin V sinif şagirdlərindən ibarət komandası qələbə qazanaraq Bakı məktəbləri arasında I yerə layiq görülmüşdür.
Yarışın final mərhələsi gərgin və maraqlı mübarizə şəraitində keçmişdir. Komandamız Nərimanov rayonunu təmsil edən Tərəqqi liseyi ilə qarşılaşaraq maraqlı oyun nümayiş etdirmişdir. Qarşılaşmanın əsas vaxtında qalibi müəyyənləşdirmək üçün oyunun taleyi 6 metrlik cərimə zərbələri ilə həll olunmuşdur. Şagirdlərimiz böyük iradə və dəqiqlik göstərərək penaltiləri uğurla yerinə yetirmiş və 5:4 hesabı ilə qələbə qazanaraq çempion adını əldə etmişlər. Oyun zamanı komandamızın üzvləri yüksək intizam, komanda ruhu və bir-birinə dəstək nümayiş etdirmiş, məşqçiləri Ramal Nağıyevin tapşırıqlarını diqqətlə dinləyərək məsuliyyətlə çıxış etmişlər. Bu uğur şagirdlərimizin idmana olan marağının, fiziki hazırlığının və qalibiyyət əzminin bariz nümunəsidir. Komandamızı təbrik edir, gələcək yarışlarda daha böyük nailiyyətlər arzulayırıq.