Azərbaycan Dövlət Neft və Sənaye Universitetinin (ADNSU) Tələbə Həmkarlar İttifaqı Komitəsinin (THİK) Rəyasət Heyəti 17 nəfərdən, o cümlədən, Sədr və müvafiq olaraq 8 fakültə sədrindən ibarətdir. Tələbə Həmkarlar İttifaqı Komitəsi tələbələrin hüquqlarını qoruyan yeganə təşkilatdır. THİK universitetdə tələbələri ictimai işlərə cəlb edərək bu istiqamətdə formalaşması, yataqxana ilə təmin olunması, universitetin daxili nizam-intizam qaydalarına riayət etməsi, tələbələrin asudə vaxtlarının dəyərləndirilməsi, yay düşərgələrinin təşkili, universitetin ictimai həyatı və elmi cəhətdən fərqlənən THİK fəallarının mükafatlandırılması istiqamətində fəaliyyət göstərir.
İdman klubları
ADNSU-nun Tələbə Həmkarlar İttifaqı Komitəsinin nəzdində 12 idman növünü özündə birləşdirən (futbol, voleybol, handbol, basketbol, cüdo, sərbəst güləş, yunan-roma güləşi, masaüstü tennis, şahmat, dama və s.) idman klubu fəaliyyət göstərir. İdman klubunun üzvləri daima öz nailiyyətləri ilə seçiliblər.
“Gənclik“ mahnı və rəqs ansamblı
Bununla yanaşı, Komitənin nəzdində universitetin brendi, 58 illik tarixə malik olan və özfəaliyyət kollektivləri arasında yeganə “Xalq ansamblı” adına layiq görülmüş “Gənclik” mahnı və rəqs ansamblı fəaliyyət göstərir. Ansambl Avropanın bir sıra ölkələrində (Almaniya, Moldova, Ukrayna, Türkiyə), habelə Koreyada keçirilən festivallarda ölkəmizi və universiteti ən yüksək səviyyədə təmsil edib və vətənə yüksək nailiyyətlərlə qayıdıb. Ansambl iştirak etdiyi bütün ölkədaxili festivallarda ya qalib, ya da (ən pis halda) ikinci yerə layiq görülüb. 2016-cı ildə isə “Gənclik” mahnı və rəqs ansamblı professionallar arasında ölkə birincisi adına layiq görülüb.
Özfəaliyyət klubu
Komitənin nəzdində Özfəaliyyət klubu da fəaliyyət göstərir. İfa etmək bacarığı olan, hər hansı bir alətdə ifa edən, bədii qiraətlə məşğul olan tələbələrimizdə bu klubumuzun üzvüdür və hər il universitetimizi layiqincə təmsil edirlər. ADNSU Teatr klubu
Komitənin nəzdində ADNSU Teatr Klubu (ATK) da fəaliyyət göstərir. İstedadlı tələbələr sistematik olaraq qurduqları tamaşaları universitet ictimaiyyətinə təqdim edirlər.
“Maqnat” intellektual klubu
Tələbə Həmkarlar İttifaqı Komitəsinin nəzdində “Maqnat” intellektual klubu və “ADNSU Debat Klubu” da fəaliyyət göstərir ki, bu da tələbələrimizin intellektual baxımdan inkişaf etməsinə öz töhfəsini verir. “Maqnat” intellektual klubu özündə “Kim? Nə Zaman?”, “Brain Ring” və “Xəmsə” turnirlərində iştirak edən komandaları birləşdirir və müntəzəm olaraq universitet daxilində intellektual yarışların təşkil olunmasını təmin edir. ADNSU Debat klubu
“ADNSU Debat Klubu” tələbələrimizə səlis və aydın nitqi formalaşdırmağa və onu əsaslandırmaqlarına köməklik edir, həftəsonları daxili çempionatlar keçirir və eyni zamanda da ölkədaxili turnirlərdə iştirak edərək yüksək nailiyyətlər qazanır.
Şən və hazırcavablar klubu
2016-cı ildən Universitetdə “Şən və hazırcavablar klubu” (KVN) da fəaliyyət göstərir. “AzNeft” komandamız ölkə çempionu adına layiq görülüb.
