Azerbaijan State Academy of Physical Education and Sport

İdman idarəçiliyi üzrə təhsil və tədqiqat məsləhətçisi, idman elmləri və bədən tərbiyəsi üzrə fəlsəfə doktoru Maykl Anaqnostou Azərbaycan İdman Akademiyasında tədrisi ingilis dilində aparılan “İdman menecmenti” ixtisaslaşmasının I tədris ili magistrantlarına “İdman marketinqi” fənnini tədris edir.

Tədris zamanı xarici ekspert magistrantlara idman marketinqinin əsas prinsipləri, tarixi inkişaf mərhələləri və müasir yanaşmalar barədə ətraflı məlumat verib. Fan davranışları, istehlakçı motivasiyası, bazar seqmentasiyası, texnologiyanın marketinqə təsiri, brend dəyərinin formalaşdırılması, stadion və infrastruktur marketinqi kimi mövzular əhatə olunub.

Dərslər yalnız nəzəri biliklərlə məhdudlaşmayıb. Belə ki, magistrantlar Manchester City, EFL, Robinhood Marathon və digər real hadisələr əsasında hazırlanmış case study-lər üzərində işləyərək analiz və qərarvermə bacarıqlarını inkişaf etdiriblər. Eyni zamanda sosial məsuliyyət, davamlılıq və fanlarla effektiv kommunikasiya kimi aktual mövzular ətrafında müzakirələr aparılıb.

Azərbaycan İdman Akademiyasında (ASA) 17-18 may tarixlərində Avstriyanın “ComplexCore+” təşkilatının icraçı direktoru və Akademiyanın “Bədən tərbiyəsi və idmanda reabilitasiya” proqramı üzrə məsul şəxsi Roman Yahoda tərəfindən üçsəviyyəli “ComplexCore+” təlimi keçirilib.

Üçsəviyyəli təlim proqramının məqsədi iştirakçıların bədən gövdəsi, yuxarı və aşağı ətraflar üçün uyğun fiziki hərəkətləri seçməklə bərpa terapiyasını və məşq prosesini planlaşdırmaq bacarıqlarını inkişaf etdirməkdir.

19-23 may tarixlərində Roman Yahoda tərəfindən ASA-da silsilə seminarlar təşkil edilib. Seminarlar “Fizioterapiya” ixtisası üzrə təhsil alan tələbələr üçün nəzərdə tutulub və “Fizioterapiya”, “Əzələ funksiyasının müayinəsi”, “Reabilitasiya. Giriş”, “Onurğa reabilitasiyası”, “Çanaq reabilitasiyası”, “Çiyin reabilitasiyası”, “İdman müalicəsi (idman masajı, manual terapiya)”, “Reabilitasiyanın mərhələləri” mövzularını əhatə edib.

Mayın 23-də isə “ComplexCore+” təşkilatının icraçı direktorunun Azərbaycan Futbol Federasiyaları Assosiasiyasının məşqçi, fizioterapevt və həkimləri, eləcə də ASA tələbələri üçün “Futbolda reabilitasiya” mövzusunda seminarı baş tutub.

Azərbaycan İdman Akademiyası “ComplexCore+” ilə bu əməkdaşlığı daha yüksək səviyyəyə çatdırmağa çalışır və beynəlxalq təcrübənin tətbiqi ilə ölkədə reabilitasiya sahəsinin inkişaf istiqamətini və gələcək perspektivlərini aydın şəkildə nümayiş etdirmək niyyətindədir.

Azərbaycan İdman Akademiyasının (ASA) rektoru Fuad Hacıyev 2024/2025-ci il mövsümündə Azərbaycan Tələbə Liqasının çempionu olmuş tələbə-idmançılarla görüşüb.

Görüşdə ASA-nın Keyfiyyət təminatı və ömürboyu təhsil üzrə prorektoru Rafail Novruzov, elmi katib, professor Bəxtiyar Rüstəmov, Komanda idman növləri kafedrasının müdiri İlqar Əliyev, məşqçi heyəti və komandanın üzvləri iştirak ediblər.

Rektor Fuad Hacıyev tələbələri qazandıqları uğur münasibətilə təbrik edib, onlara gələcək fəaliyyətlərində yeni nailiyyətlər arzulayıb.

Sonda xatirə fotosu çəkilib.

Azərbaycan İdman Akademiyası, Azərbaycan Cüdo Federasiyası (ACF) və Böyük Britaniyanın Hertfordşir Universiteti arasında imzalanmış üçtərəfli Anlaşma Memorandumu çərçivəsində Akademiyada cüdo məşqçiliyi ixtisası üzrə təhsil alan I və II kurs tələbələri üçün nəzəri və praktiki dərslər keçirilib.

Tədris prosesi ACF-in Təlim-Məşq Mərkəzində müəyyən olunmuş cədvələ uyğun şəkildə baş tutub. Hertfordşir Universitetinin professoru Mayk Kallenin rəhbərlik etdiyi layihəyə həm xarici, həm də yerli mütəxəssislər cəlb olunub.

Tələbələr dərslər zamanı beynəlxalq məşqçilik standartlarına uyğun təhsil proqramı əsasında nəzəri biliklər əldə edib və praktiki bacarıqlarını təkmilləşdirib.

Mayın 21-də Slovakiya Turizm və İdman Nazirliyinin nümayəndə heyəti baş katib xanım İvana Sufliarska Libiakovanın rəhbərliyi ilə Azərbaycan İdman Akademiyasının (ASA) qonağı olub.

Akademiyaya səfərin əsas məqsədi ASA-nın tədris proqramları və infrastrukturu ilə yaxından tanış olmaqdır. Qonaqları salamlayan ASA-nın Tədris işləri üzrə prorektoru Ülkər Babayeva Akademiyanın ikili diplom proqramları da daxil olmaqla bütün ixtisaslar haqqında geniş məlumat verib.

Görüşdə Slovakiya ilə Azərbaycan arasında idman təhsili və elmi sahədə mümkün əməkdaşlıq istiqamətləri müzakirə edilib.

Daha sonra qonaqlar ASA-nın MediaLab və İdman Tibbi Tədqiqatları Laboratoriyasında yaradılan şəraitlə tanış olublar.