UNEC Library Information Center

Hörmətli müəllimlər, əziz tələbələr!

UNEC 24/7 kitabxanası Qurban bayramı və 28 may - Müstəqillik günü münasibəti ilə 27-28 may tarixlərində fəaliyyət göstərməyəcəkdir.
Kitabxana 29 may saat 08:00-dan etibarən yenidən hər zamankı qaydada, 24 saat fasiləsiz fəaliyyətini davam etdirəcək.

“Həftənin kitabı” layihəsi bu buraxılışında “ŞUŞA – Zirvədən Uca. SHUSHA – A Sacred City” kitabını təqdim edir.

https://news.unec.edu.az/rubrika/153-heftenin-kitabi/15131-heftenin-kitabi-shusha-zirveden-uca-shusha-a-sacred-city

UNEC KİM 24/7 Kitabxanasının “KİTABIM” layihə-podkastının növbəti qonağı Azərbaycan Respublikasının Təhsil İnstitutu (ARTİ) Elmi-Pedaqoji Tədqiqatlar Mərkəzinin direktoru, filologiya elmləri doktoru, dosent Aynur Paşayeva olub.

Layihənin bu buraxılışı dilçi alim Aynur Paşayevanın “XV əsr Azərbaycan ədəbi dili” adlı yeni çapdan çıxmış monoqrafiyasına həsr edilib. Müəllif bu fundamental əsərində geniş şəkildə tədqiqatları Qaraqoyunlu və Ağqoyunlu dövlətlərinin mövcud olduğu dövrdə Azərbaycan dilinin dövlət dili səviyyəsinə yüksəlməsi, Təbriz şivəsinin ədəbi dilin formalaşmasındakı rolu və dövrün görkəmli şairlərinin yaradıcılığındakı dil xüsusiyyətləri barədə danışıb.

Podkastda Prezident İlham Əliyevin dilçilik sahəsində prioritetlərin yenidən nəzərdən keçirilməsi, ana dilinin funksional imkanlarının genişləndirilməsi və elmi potensialın milli inkişaf strategiyası ilə uzlaşdırılması ilə bağlı fikirləri əsasında görülən işlərdən bəhs olunub. Həmçinin, alim gənclərin doğma dilimizin qorunub-saxlanılmasındakı rolu diqqətə çatdırılıb.

Sonda Aynur Paşayeva həmmüəllifi olduğu 3 cildlik “Türkmənşəli arxaizmlər lüğəti” (XIII-XVIII əsrlər Azərbaycan yazılı abidələri əsasında) nəşrlərini də kitabxanaya hədiyyə edib.

https://news.unec.edu.az/xeber/100-elm/15080-ki-tabim-podkasti-tegdim-edir-xv-esr-azerbaycan-edebi-dili

UNEC-də Qanun Nəşriyyatı tərəfindən tələbə və əməkdaşlar üçün kitab sərgi-yarmarkası və səyyar kitab satışı təşkil edilib.

3 saylı tədris binasında keçirilən kitab sərgi-yarmarkası ilə yanaşı, 2 saylı tədris binasında “Təkərli kitab dükanı” adlı səyyar kitab satışı da oxucuların ixtiyarına verilib.

Təşkilatçıların məqsədi tələbələr arasında kitab oxumağa marağın artırılması, mütaliə mədəniyyətinin təşviqi və oxuculara daha əlçatan qiymətlərlə keyfiyyətli nəşrlərin təqdim edilməsidir.

Yarmarkada Azərbaycan, ingilis və rus dillərində müxtəlif janrlarda kitablar satışa çıxarılıb. Oxucular tarix, iqtisadiyyat, fəlsəfə və psixologiya sahələri ilə yanaşı, şəxsi inkişaf, bədii ədəbiyyat, detektiv və fantastika janrlarında nəşrlər üzrə geniş seçim imkanı əldə ediblər.

Sərgi-yarmarka tələbələr və universitet əməkdaşları tərəfindən maraqla qarşılanıb.

https://news.unec.edu.az/xeber/125-universitet/15089-unec-de-kitab-sergi-yarmarkasi-teshkil-edilib

“Həftənin kitabı” layihəsi bu buraxılışında “Multimedia texnologiyaları. Mühazirə materialları və testlər” kitabını təqdim edir.

Kitabın müəllifləri UNEC-in “Rəqəmsal texnologiyalar və tətbiqi informatika” kafedrasının akademik heyəti dosentlər Təranə Əliyeva, Mətləb Əlizadə və baş müəllim Reyhan Əzizovadır.

Dərs vəsaitində multimedia texnologiyaları, qrafik redaktorlar, müxtəlif formatlar və laboratoriya işləri təqdim edilib. Həmçinin, kitab müasir multimedia texnologiyalarından istifadənin mahiyyəti, xüsusiyyətləri, mühüm sayılan məqsədəuyğun istiqamətləri və metodları haqqında nəzəri və praktiki biliklərin sistemləşdirilməsindən bəhs edir.

“Multimedia texnologiyaları. Mühazirə materialları və testlər” kitabı 2023-cü ildə “İqtisad Universiteti” nəşriyyatında çapdan çıxıb. Kitab 484 səhifədir. Oxucu-istifadəçilər dərs vəsaiti ilə UNEC KİM-in 24/7 və bütün kitabxanalarında yaxından tanış ola bilərlər.

https://news.unec.edu.az/rubrika/153-heftenin-kitabi/14998-heftenin-kitabi-multimedia-texnologiyalari-muhazire-materiallari-ve-testler

“Qanun Nəşriyyatı”nın təşkilatçılığı ilə kitabsevərlər üçün kitab satış yarmarkası 📖

🗓 Tarix: 4–8 May
📍 Məkanlar:
• UNEC 2 saylı tədris binası
• UNEC 3 saylı tədris binası

🚐 Təkərli kitab dükanı ilə müxtəlif janrlarda kitablar bir arada!
📖 Oxumağı sevən hər kəs üçün maraqlı seçimlər.

✨ Səni də gözləyirik!

UNEC Kitabxana-İnformasiya Mərkəzi dünyanın nüfuzlu təşkilatlarından biri olan IFLA – Beynəlxalq Kitabxana Assosiasiyaları və İnstitutları Federasiyasına üzv qəbul olunub.

IFLA-nın son hesabatına əsasən, təşkilat dünyanın 151 ölkəsindən 1598 üzvü birləşdirərək qlobal kitabxana icmasının ən böyük və nüfuzlu platformalarından biri kimi fəaliyyət göstərir. Bu üzvlük UNEC Kitabxana-İnformasiya Mərkəzi üçün beynəlxalq kitabxana və informasiya mütəxəssisləri icmasının bir hissəsinə çevrilmək, qlobal səviyyədə təcrübə mübadiləsi aparmaq və peşəkar inkişaf imkanlarını genişləndirmək baxımından mühüm addım hesab olunur.

Beynəlxalq təşkilata üzvlük kitabxanaya bir sıra üstünlüklər qazandırır. Belə ki, UNEC kitabxanası artıq kitabxana və informasiya xidmətlərinin qlobal səsinin bir hissəsi olmaqla yanaşı, qəbul edilən qərarlarda səsvermə hüququ əldə edir. Eyni zamanda beynəlxalq şəbəkə ilə əlaqələr qurmaq, qabaqcıl təcrübələri paylaşmaq, müxtəlif seminar, görüş və təlimlərdə iştirak etməklə peşəkar biliklərini inkişaf etdirmək imkanı qazanır.

Üzvlük çərçivəsində kitabxana sahəsində yeniliklər və mühüm xəbərlər haqqında mütəmadi məlumat əldə etmək, IFLA World Library and Information Congress 2026 üçün qeydiyyat ödənişlərində 25% endirimdən yararlanmaq, həmçinin IFLA nəşrlərinə xüsusi güzəştlər əldə etmək də mümkün olacaq.

Bununla yanaşı, UNEC Kitabxana-İnformasiya Mərkəzi IFLA-nın Avropa Regional Bölməsinə qoşulmaq imkanı əldə edib ki, bu da region üzrə əməkdaşlıq əlaqələrinin daha da genişlənməsinə töhfə verəcək.

Qeyd edək ki, kitabxana artıq rəsmi IFLA üzv nişanından istifadə etmək hüququna da malikdir.

https://news.unec.edu.az/xeber/100-elm/14976-unec-in-kitabxana-i-nformasiya-merkezi-ifla-nin-uzvu-oldu

Aprel ayında yubileyi qeyd olunan hər iki əməkdaşımızı - 2 saylı kitabxananın kitabxanaçısı Yeganə Zeynalovanı və Əsaslı kitabxananın kitabxanaçısı Fəridə Nəbiyevanı Kitabxana-İnformasiya Mərkəzinin kollektivi adından təbrik edirik! 💕

UNEC-də elmi tədqiqatlara dəstək mövzusunda seminar keçirilib
https://news.unec.edu.az/xeber/100-elm/14878-unec-de-elmi-tedgigatlara-destek-movzusunda-seminar-kechirilib

UNEC-in “Biznesin idarə edilməsi” kafedrasında “Elmi tədqiqatların dəstəklənməsində kitabxana-informasiya resursları və beynəlxalq məlumat bazalarının rolu” mövzusunda seminar keçirilib.

Seminar UNEC Kitabxana-İnformasiya Mərkəzinin Əsaslı kitabxanasının müdiri, “İqtisadçı Tələbələrin Elmi Fəaliyyətinə Yardım” İctimai Birliyinin sədri və kafedranın müəllimi Yusif Musayev tərəfindən keçirilib. Həmçinin seminarda kafedranın müdiri, dosent Sevər Məmmədova və müəllimləri də iştirak ediblər.

Tədbirdə elektron kitabxana xidmətləri, UNEC-in abunə olduğu beynəlxalq məlumat bazalarına çıxış imkanları – Scopus, Web of Science, EBSCOhost, InCites Benchmarking & Analytics, Research Assistant süni intellekt aləti, PQDT, ProQuest Ebook Central, ProQuest Central, SciVal (Elsevier), Business Expert Press (BEP) Digital Library və IEEE Computer Society Digital Library – və bu resurslardan effektiv istifadə yolları təqdim olunub.

İştirakçılara müasir tədqiqat alətləri ilə bağlı praktik tövsiyələr verilib, onları maraqlandıran suallar cavablandırılıb.