Bakı şəhəri 316 nömrəli tam orta ümumtəhsil məktəbi

İnsan Hüquqları Aylığı çərçivəsində maarifləndirici görüş keçirildi.

Məktəbimizdə İnsan Hüquqları Aylığı ilə əlaqədar şagirdlərin hüquq və azadlıqları, insan ləyaqətinə hörmət, bərabərlik, tolerantlıq və qarşılıqlı anlaşma mövzularında maarifləndirici görüş keçirilib.
Məqsəd şagirdlərdə insan hüquqları haqqında məlumatlılığı artırmaq, onların hüquq və vəzifələri barədə biliklərini genişləndirmək, cəmiyyətdə hüquqi mədəniyyətin formalaşmasına töhfə vermək olub.
Çıxışlarda vurğulanıb ki, hər bir insanın hüquqlarına hörmət göstərilməsi demokratik və sağlam cəmiyyətin əsas prinsiplərindən biridir. Şagirdlər mövzu ətrafında fikir mübadiləsi aparıb, onları maraqlandıran suallar cavablandırılıb.
İnsan hüquqlarının qorunması və təbliği hər birimizin ümumi məsuliyyətidir!

"Son zəng” tədbiri keçirildi

Bütün ümumtəhsil müəssisələrində olduğu kimi 316 nömrəli tam orta ümumtəhsil məktəbində də 2025/2026-cı tədris ili üzrə məzunlar üçün ənənəvi “Son zəng” tədbiri keçirildi.

Tədbirdə Suraxanı RİH-in nümayəndəsi Ləman Hacıyeva,məktəb rəhbərliyi, müəllim kollektivi və valideynlər iştirak etdilər.

Məktəbin həyətində təşkil olunan tədbir saat 10:00-da Azərbaycan Respublikasının Dövlət Himninin səsləndirilməsi ilə başlayıb. Sonra Ulu Öndər Heydər Əliyevin və Vətən uğrunda canından keçmiş şəhidlərimizin əziz xatirəsi bir dəqiqəlik sükutla yad edildi.
Tədbirdə məzunlar tərəfindən hazırlanmış musiqili kompozisiyalar təqdim olundu.

Çıxış edənlər məktəb həyatının ən yaddaqalan günlərindən biri olan bu əlamətdar gündə 11 illik təhsil yolunu uğurla başa vuran məzunlarımızı təbrik etmiş, yeni bir həyat mərhələsinin başlanğıcının uğurlu olmağını arzu etdilər.

Məktəbin direktoru Yasin Quliyev məzunları təbrik edərək, uzun bir zaman müddətində qazandıqları bilik, bacarıq və təcrübənin onları gələcəyin məsuliyyətli, vətənpərvər və savadlı vətəndaşlar etməyi arzu etdi.
Bildirdi ki,bu gün çalınan son zəng təkcə məktəb illərinin başa çatmasını deyil, həm də böyük arzulara, yeni hədəflərə və müstəqil həyata doğru atılan ilk addımları simvolizə edir.
Məzunlarımız müəllimlərinin zəhmətini, valideynlərinin qayğısını və məktəb illərinin unudulmaz xatirələrini özləri ilə gələcəyə aparırlar.

Çıxış edən Suraxanı RİH nümayəndəsi L.Hacıyeva məzunları təbrik etdi,onlara gələcək həyatlarında uğurlar arzu etdi.

Buraxılış imtahanlarında yüksək nəticə göstərən məzunlar məktəb rəhbərliyi tərəfindən təltif olundular.

Əziz məzunlar! Sizləri bu əlamətdar gün münasibətilə ürəkdən təbrik edir, qarşıdakı həyat yolunda uğurlar arzulayırıq. Yolunuz daim işıqlı, məqsədləriniz yüksək, iradəniz möhkəm olsun. Qazandığınız bilik və dəyərlər sizi hər zaman uğura aparsın, ölkəmizin inkişafına layiqli töhfələr verəsiniz.

Ulu Öndərin ən böyük arzusu və ata vəsiyyətinin icrası: Azad edilmiş Qarabağda dalğalanan Üçrəngli Bayrağımız

Azərbaycanın müasir tarixinə nəzər saldıqda, xalqımızın qəlbində daim bir ağrı və eyni zamanda sarsılmaz bir inamın yaşadığını görürük: Qarabağın işğaldan azad edilməsi arzusu. Bu, sadəcə bir torpaq uğrunda mübarizə deyil, Azərbaycanın bütövlüyü, milli ləyaqəti və tarixi ədalətin bərpası idi.

Ulu Öndər Heydər Əliyev bütün şüurlu həyatını Azərbaycanın müstəqilliyinə və ərazi bütövlüyünün qorunmasına həsr etmişdi. Onun dövlət rəhbərliyi dövründə ən böyük arzusu və vəsiyyəti məhz Qarabağın, o cümlədən mədəniyyət beşiyimiz olan Şuşanın azadlığını görmək idi.

Ulu Öndər Heydər Əliyev 1993-cü ildə hakimiyyətə qayıtdıqdan sonra, ilk növbədə, xaosun qarşısını aldı, dövlətçiliyi xilas etdi və nizami ordu quruculuğuna başladı. O, yaxşı bilirdi ki, Qarabağın azadlığı üçün güclü iqtisadiyyat, beynəlxalq arenada etibarlı tərəfdaşlıq və ən əsası, qüdrətli bir ordu lazımdır. Heydər Əliyev məcburi köçkünlərlə hər görüşündə onlara təsəlli verərək deyirdi: "Gedəcəyik, inanın ki, gedəcəyik Şuşaya!". Bu sözlər sadəcə təsəlli deyildi, bu, bir millətin qələbəyə olan inamının, strateji hədəfinin və tarixi vəzifəsinin proqramı idi. Ulu Öndər öz çıxışlarında Qarabağın Azərbaycanın ayrılmaz hissəsi olduğunu dünyaya bəyan edir və diplomatik müstəvidə torpaqlarımızın azadlığı üçün zəmin hazırlayırdı.

Heydər Əliyevin əsasını qoyduğu siyasi kursun layiqli davamçısı, Prezident İlham Əliyev atası tərəfindən müəyyən edilmiş bu ali missiyanı şərəflə yerinə yetirdi. 44 günlük Vətən müharibəsi Azərbaycanın hərbi, iqtisadi və siyasi gücünün nümayişi oldu. Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu 30 illik işğala son qoydu. 2020-ci il noyabrın 8-də Şuşanın azad edilməsi tariximizin ən parlaq səhifəsi kimi qızıl hərflərlə yazıldı.Prezident İlham Əliyevin Şuşada, azad edilmiş torpaqlarımızda verdiyi müjdə – "Mən xoşbəxt insanam ki, ata vəsiyyətini yerinə yetirdim. Şuşanı azad etdik! Bu gün şəhidlərimizin, Ulu Öndərin ruhu şaddır!" sözləri bütün Azərbaycan xalqının qəlbini fərəhlə doldurdu. Bu Zəfər, Ulu Öndərin illərlə formalaşdırdığı dövlətçilik konsepsiyasının və xalq-iqtidar birliyinin ən böyük təntənəsi idi.

Bu gün Qarabağda və Şərqi Zəngəzurda üçrəngli bayrağımız əzəmətlə dalğalanır. Azad olunmuş torpaqlarımızda aparılan nəhəng infrastruktur layihələri, "Böyük Qayıdış" proqramı çərçivəsində inşa edilən müasir qəsəbələr, beynəlxalq hava limanları Azərbaycanın gücünü dünyaya göstərir. Şuşada, Xankəndidə Novruz tonqalının qalanması, mədəniyyət tədbirlərinin keçirilməsi Qarabağın artıq tamamilə öz doğma sahibinə qayıtdığının göstəricisidir. Üçrəngli bayrağımız bu gün təkcə qələbənin rəmzi deyil, həm də azad edilmiş torpaqlarımızın abadlaşmasının, orada həyatın yenidən canlanmasının və dövlətimizin suverenliyinin təntənəsidir.

Ulu Öndər Heydər Əliyevin ən böyük arzusu olan Qarabağın azadlığı, bu gün onun siyasi varisi İlham Əliyev tərəfindən reallaşdırılaraq Azərbaycan tarixinin ən şanlı dövrünə çevrilmişdir. Azad edilmiş Qarabağda dalğalanan üçrəngli bayrağımız, xalqımızın birliyinin, dövlətimizin qüdrətinin və Ulu Öndərin bizə miras qoyduğu müstəqil, güclü Azərbaycanın rəmzidir. Biz bu Zəfərlə həm də öz ləyaqətimizi bərpa etdik və sübut etdik ki, nə qədər çətin olsa da, tarixi vəsiyyətlər icra olunur, arzular isə gerçəyə çevrilir. Qarabağ Azərbaycandır!

Yasin Quliyev
Suraxanı rayonu 316 nömrəli tam orta ümumtəhsil məktəbinin direktoru

Cənub Qaz Dəhlizi Azərbaycanın Beynəlxalq Əhəmiyyətini Artırır

Prezident İlham Əliyevin Bakı Enerji Həftəsindəki çıxışında xüsusi yer tutan məsələlərdən biri Cənub Qaz Dəhlizinin uğurları və Azərbaycanın Avropanın enerji təhlükəsizliyində oynadığı rol oldu. Dövlət başçısı vurğuladı ki, uzun illər ərzində həyata keçirilən məqsədyönlü siyasət nəticəsində Azərbaycan qazı bu gün geniş coğrafiyaya çatdırılır və çoxsaylı ölkələrin enerji təhlükəsizliyinə mühüm töhfə verir.

Prezident qeyd etdi ki, enerji layihələrinin həyata keçirilməsi böyük maliyyə resursları, siyasi iradə və beynəlxalq əməkdaşlıq tələb edirdi. Azərbaycan bütün bu çətinliklərin öhdəsindən gəlməyi bacardı və nəticədə regionun ən mühüm enerji layihələrindən birini reallaşdırdı. Dövlət başçısının sözlərinə görə, Bakı-Tbilisi-Ceyhan, Bakı-Supsa, Cənubi Qafqaz Boru Kəməri, TANAP və TAP kimi layihələr təkcə iqtisadi deyil, həm də geosiyasi baxımdan böyük əhəmiyyət daşıyır. Bu layihələr Xəzər hövzəsinin enerji resurslarını beynəlxalq bazarlara çıxarmaqla yanaşı, ölkələr arasında əməkdaşlığın möhkəmlənməsinə də xidmət edir.

Prezident İlham Əliyev vurğuladı ki, bu gün Azərbaycan qazını alan ölkələrin sayı 16-ya çatıb və onların 10-u Avropa İttifaqının üzvüdür. Bu fakt Azərbaycanın Avropanın enerji təhlükəsizliyində nə qədər mühüm rol oynadığını açıq şəkildə göstərir. Dövlət başçısı qeyd etdi ki, enerji bazarında etibarlılıq ən vacib amillərdən biridir və Azərbaycan bütün öhdəliklərini vaxtında yerinə yetirən etibarlı tərəfdaş kimi tanınır. Çıxış zamanı bildirildi ki, qaz təchizatının coğrafiyası gələcəkdə daha da genişlənəcək. Yeni yataqların işlənməsi, mövcud layihələrin genişləndirilməsi və əlavə investisiyaların cəlb edilməsi bu prosesə mühüm töhfə verəcək. Prezident xüsusilə “Azəri-Çıraq-Günəşli” dərin qaz layihəsinin və digər perspektivli yataqların əhəmiyyətini vurğuladı. Bu layihələr Azərbaycanın enerji potensialını daha da artıracaq və beynəlxalq bazarlarda mövqelərini gücləndirəcək.

Dövlət başçısı qeyd etdi ki, enerji təhlükəsizliyi yalnız istehsalçıların deyil, istehlakçı ölkələrin də maraqlarına cavab verir. Bu baxımdan Cənub Qaz Dəhlizi qarşılıqlı faydalı əməkdaşlıq nümunəsi hesab oluna bilər. Layihə iştirakçısı olan bütün ölkələr və şirkətlər əldə olunan nəticələrdən faydalanırlar. Prezident İlham Əliyevin sözlərinə görə, Azərbaycanın həyata keçirdiyi enerji siyasəti regional sabitliyə və iqtisadi inkişafa da töhfə verir. Bu gün ölkə yalnız enerji ixracatçısı deyil, həm də mühüm tranzit və logistika mərkəzi kimi çıxış edir. Enerji layihələri ətrafında formalaşan əməkdaşlıq platformaları yeni iqtisadi imkanlar yaradır və müxtəlif ölkələr arasında münasibətləri daha da möhkəmləndirir.

Bakı Enerji Həftəsində səsləndirilən fikirlər bir daha göstərdi ki, Cənub Qaz Dəhlizi təkcə boru kəmərləri sistemi deyil, həm də uzunmüddətli tərəfdaşlıq və qarşılıqlı etimad üzərində qurulan strateji layihədir. Bu layihənin uğuru Azərbaycanın beynəlxalq nüfuzunu artırmaqla yanaşı, ölkənin enerji siyasətinin düzgün seçildiyini də təsdiqləyir.
Yasin Quliyev
Suraxanı rayonu, 316 nömrəli tam orta məktəb

1 İyun – Uşaqların Beynəlxalq Müdafiəsi Günü münasibətilə bütün uşaqları təbrik edirik! 👧🏻🧒🏻🎈

Azərbaycanın dövlətçilik tarixinin mühüm səhifələrindən biri olan 28 May – Müstəqillik Günü xalqımızın milli birliyinin və suverenliyinin rəmzidir.

Müstəqilliyimiz daim möhkəm, dövlətimiz güclü olsun!

Müstəqillik Gününüz mübarək!

"28 May- Müstəqillik Günü"nə həsr olunmuş "Şərqdə doğan günəş" adlı tədbir keçirildi.

Bakı şəhəri 316 nömrəli tam orta ümumtəhsil məktəbində "28 May – Müstəqillik Günü"nə həsr olunmuş “Şərqdə doğan günəş” adlı tədbir keçirildi.

Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Ümummilli Lider Heydər Əliyevin və Vətən uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.

Azərbaycan Respublikasının dövlət müstəqilliyinin bərpası uğrunda aparılan mübarizənin, milli dövlətçilik ənənələrinin və vətənpərvərlik ruhunun şagirdlər arasında təbliği məqsədilə keçirilən tədbirdə şagirdlərin təqdim etdikləri vətənpərvərlik mövzusunda şeirlər, musiqili kompozisiya və səhnəcik böyük maraqla qarşılanıb.

Çıxış edən məktəbin tarix müəllimi İlhamə Şirinova Azərbaycan Xalq Cümhuriyyətinin yaranma tarixi, dövlətçilik ənənələri, xalqımızın azadlıq uğrunda mübarizəsi və müstəqilliyimizin əhəmiyyəti barədə geniş məlumat verdi.

Məktəbin direktoru Yasin Quliyev çıxışında qeyd etdi ki, müstəqillik xalqımızın ən böyük tarixi nailiyyətidir və bu dəyərin qorunaraq gələcək nəsillərə ötürülməsi hər birimizin əsas vəzifəsidir.Bildirdi ki,milli-mənəvi dəyərlərə bağlı, dövlətçilik ənənlərinə sadiq ruhda və vətənə bağlı gənclərin formalaşdırılması məktəbin əsas prioritetlərindən biridir.Müstəqil Azərbaycanın inkişaf yolunda gənclərin üzərinə böyük məsuliyyət düşdüyünü qeyd edib.

YAP Suraxanı rayon təşkilatının sədr müavini Salman Əbdülov çıxışında Azərbaycanın müstəqillik yolunun şərəfli və çətin mərhələlərdən keçdiyini vurğulayaraq, bugünkü güclü və qalib Azərbaycanın qurulmasında xalqımızın birliyinin mühüm rol oynadığını qeyd edib.

Sonda tədbirlərdə fəal iştirak edən şagirdlərə "Təşəkkürnamə" təqdim olundu

🗓️ 26 may saat 18:00-dan etibarən 2025-2026-cı tədris ilinin ikinci yarımili üzrə şagirdlərin elektron yerdəyişməsi prosesi müvəqqəti dayandırılacaq.

📄 Bildiririk ki, 5 iyun 2026-cı il saat 15:00-a qədər təsdiqlənmiş sorğular üzrə tələb olunan müvafiq sənədlər ümumi təhsil müəssisələrinə təqdim edilməlidir. Göstərilən tarixədək tamamlanmayan sorğular və növbələr sistem tərəfindən avtomatik olaraq ləğv ediləcək.

🔗 Qeyd edək ki, şagirdlərin elektron yerdəyişməsi prosesi sy.edu.az elektron sistemi vasitəsilə həyata keçirilir.