Hatəm İskəndərov adına 206 nömrəli tam orta məktəb

XIII Ümumdünya Şəhərsalma Forumu (WUF13) ilə əlaqədar ölkə üzrə tətbiq olunan distant təhsil çərçivəsində məktəbimizdə onlayn dərslərin 4-cü günü uğurla həyata keçirildi. Tədris prosesi müəyyən edilmiş dərs cədvəlinə uyğun şəkildə təşkil olundu, müəllimlər tərəfindən mövzular şagirdlərə onlayn platformalar vasitəsilə izah edildi. Şagirdlərin dərslərdə fəal iştirakı və davamiyyəti təmin edildi.

XIII Ümumdünya Şəhərsalma Forumu (WUF13) ilə əlaqədar tətbiq olunan distant təhsil çərçivəsində məktəbimizdə distant dərslərin 3-cü günü tədris prosesi uğurla təşkil olundu. Dərslər təsdiq olunmuş cədvəl əsasında onlayn platformalar üzərindən keçirildi, şagirdlərin dərslərdə fəal iştirakı və davamiyyəti nəzarətdə saxlanıldı. Müəllimlər tərəfindən mövzular şagirdlərə izah edildi, tapşırıqlar təqdim olundu və interaktiv fəaliyyətlər həyata keçirildi. Tədris prosesinin fasiləsiz və səmərəli təşkili daim diqqətdə saxlanılır.

Distant təhsilin 2-ci günü məktəbdə tədris prosesinin təşkili və keçirilməsi uğurla davam etdirilmişdir. Dərs məşğələlərinin keyfiyyətli təşkili, şagirdlərin dərslərdə fəal iştirakı, müəllimlərin dərsə hazırlıq səviyyəsi, eləcə də texniki vasitələrdən düzgün istifadə vəziyyəti məktəb direktorunun əmri ilə yaradılmış işçi qrupu tərəfindən nəzarətdə saxlanılmışdır.
İşçi qrupu tərəfindən onlayn dərslərin gedişi mütəmadi izlənilmiş, müəllim və şagirdlərin iştirak vəziyyəti yoxlanılmış, dərslərin tədris proqramına uyğun təşkili və metodiki tələblərə cavab verməsi diqqətdə saxlanılmışdır. Aparılan monitorinqlər zamanı dərslərin təşkilində ciddi problem müşahidə olunmamış, müəllimlərin məsuliyyətlə fəaliyyət göstərdiyi və şagirdlərin dərs prosesinə aktiv qoşulduğu müəyyən edilmişdir.
İşçi qrupu tərəfindən müşahidə olunan məsələlər barədə müvafiq qeydlər aparılmış, zərurət yarandıqda müəllimlərə metodiki tövsiyələr verilmişdir. Distant təhsilin növbəti günlərdə də yüksək səviyyədə davam etdirilməsi məqsədilə nəzarət tədbirlərinin davam etdirilməsi qərara alınmışdır.

“7-dən 17-yə vətənpərvərlik” layihəsi çərçivəsində Azərbaycan dili və ədəbiyyatı müəllimi Əliyeva Samirənin təşkilatçılığı ilə 9 “A” sinif şagirdləri ilə birlikdə “Ulduz Paintball Klubu”na ekskursiya təşkil olundu. Şagirdlər komanda ruhu, çeviklik və həmrəylik nümayiş etdirərək maraqlı və əyləncəli vaxt keçirdilər.

World Urban Forum 13 çərçivəsində 17–22 may 2026-cı il tarixlərində Bakı şəhərində keçirilən XIII Ümumdünya Şəhərsalma Forumu ilə əlaqədar məktəbimizdə növbədənkənar pedaqoji şuranın iclası təşkil olundu. İclas zamanı forum günlərində təhlükəsizlik tədbirləri, tədris prosesinin təşkili, distant dərslərin keçirilməsi və qarşıda duran vəzifələr müzakirə edildi.

XIII Ümumdünya Şəhərsalma Forumu (WUF13) 17–22 may 2026-cı il tarixlərində Azərbaycanın paytaxtı Bakı şəhərində keçirilir. Birləşmiş Millətlər Təşkilatının Məskunlaşma Proqramı (UN-Habitat) tərəfindən təşkil edilən bu nüfuzlu qlobal tədbir şəhərsalma və dayanıqlı urbanizasiya məsələlərinə həsr olunub.
Forum günlərində nəqliyyat sıxlığının qarşısını almaq məqsədilə Bakı şəhərində fəaliyyət göstərən təhsil müəssisələrində distant (onlayn) təhsil tətbiq olunur. Bununla əlaqədar məktəbimizdə distant dərslərə start verildi. Şagirdlərin dərs prosesində fəal iştirakı təmin olunaraq tədrisin fasiləsiz davam etdirilməsi istiqamətində müvafiq tədbirlər görülür.

“Təhlükəsizlik tədbirləri” çərçivəsində məktəbdə şagirdlərin çantalarına baxış keçirildi. Baxış zamanı təhlükəsizlik qaydalarına əməl olunması, məktəb mühitində nizam-intizamın qorunması və şagirdlərin təhlükəsizliyinin təmin olunması diqqət mərkəzində saxlanıldı.

Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə keçirilən kiçik qrant müsabiqəsinin qalibi olan Demokratiyanın və Milli Dəyərlərin Təbliği İctimai Birliyi tərəfindən həyata keçirilən “Evimiz – Dəyərlərimiz” layihəsinin ilk tədbiri 15 aprel 2026-cı il tarixində 206 nömrəli tam orta ümumtəhsil məktəbində uğurla təşkil olunmuşdur.
Tədbirin əsas məqsədi şagirdlərə və iştirakçılara milli-mənəvi dəyərlərimizin, ailə institutunun, vətənpərvərlik ruhunun və cəmiyyətimizin təməl prinsiplərinin əhəmiyyətini aşılamaq, bu dəyərlərin qorunaraq gələcək nəsillərə ötürülməsinin vacibliyini diqqətə çatdırmaq olmuşdur.
Tədbiri giriş sözü ilə məktəbin direktoru Cavid Cəfərzadə açıq elan etmişdir. O, çıxışında ailənin cəmiyyətin əsas sütunu olduğunu, milli-mənəvi dəyərlərin formalaşmasında ailə mühitinin müstəsna rol oynadığını vurğulamışdır. Direktor qeyd etmişdir ki, gənc nəslin sağlam düşüncəli, vətəninə və xalqına bağlı şəxsiyyət kimi yetişməsində ailə tərbiyəsi və milli dəyərlərə sədaqət mühüm əhəmiyyət kəsb edir.
Daha sonra Demokratiyanın və Milli Dəyərlərin Təbliği İctimai Birliyinin sədri Əli Cəfərov çıxış edərək “Evimiz – Dəyərlərimiz” layihəsinin məqsəd və vəzifələri barədə ətraflı məlumat vermişdir. O bildirmişdir ki, layihə çərçivəsində müxtəlif təhsil müəssisələrində görüşlərin, maarifləndirici söhbətlərin və müzakirələrin təşkili nəzərdə tutulur. Layihənin əsas ideyası ailə dəyərlərinin, milli adət-ənənələrimizin, mənəvi irsimizin və ictimai həmrəyliyin təbliği və təşviqidir.
Çıxışlarda vurğulanmışdır ki, qloballaşan dünyada milli kimliyin, ailə bağlarının və mənəvi dəyərlərin qorunması hər bir vətəndaşın mühüm vəzifəsidir. Bu baxımdan belə layihələrin keçirilməsi gənclərin maarifləndirilməsi, onların milli ruhda formalaşdırılması və sağlam sosial dəyərlərə bağlı yetişməsi baxımından xüsusi əhəmiyyət daşıyır.
Tədbir iştirakçılar tərəfindən böyük maraqla qarşılanmış, layihənin mövzusu ətrafında faydalı fikir mübadiləsi aparılmışdır. Şagirdlər ailə, milli-mənəvi dəyərlər və cəmiyyət qarşısında məsuliyyət mövzularında onları maraqlandıran suallar vermiş, ətraflı cavablar almışlar.

Məktəbin psixoloqu Səfiyyə Niyazova tərəfindən müəllimlərlə “Müəllimlərin şagirdlərin yaş xüsusiyyətlərini və şəxsi keyfiyyətlərini nəzərə almaqla onları fərdi yanaşma prinsipinə istiqamətləndirmə” mövzusunda maarifləndirmə işi həyata keçirildi. Görüş zamanı şagirdlərlə düzgün ünsiyyətin qurulması, onların psixoloji xüsusiyyətlərinin nəzərə alınması və təlim prosesində fərdi yanaşmanın əhəmiyyəti barədə müəllimlərlə fikir mübadiləsi aparıldı.

“7-dən 17-yə vətənpərvərlik” layihəsi çərçivəsində 10 B sinif rəhbəri Əliyeva Samirənin təşkilatçılığı ilə şagirdlər “Zəfər Muzeyi”nə ekskursiya getdilər. Ekskursiya zamanı şagirdlər Vətən müharibəsində qazanılmış şanlı Zəfər tariximizlə yaxından tanış oldular, qəhrəman oğullarımızın şücaəti haqqında ətraflı məlumat əldə etdilər.

Ulu öndər Heydər Əliyevin anadan olmasının 103 illiyinə həsr olunmuş tədbirlər planına əsasən 1 “B” sinif rəhbəri İsmiyeva Xatirənin təşkilatçılığı ilə “Dahi şəxsiyyət, böyük lider” adlı təşkilat saatı keçirildi. Təşkilat saatında şagirdlər ulu öndərin həyat və fəaliyyətindən, Azərbaycan dövləti qarşısındakı misilsiz xidmətlərindən bəhs etdilər, onun zəngin irsi haqqında məlumatlarla tanış oldular.