Azərbaycan Dövlət İqtisad Universitetinin nəzdində Sosial-İqtisadi Kollec

14/06/2026

Azərbaycan Dövlət İqtisad Universitetinin nəzdində Sosial-İqtisadi Kollecdə 15 İyun – Milli Qurtuluş Gününə həsr olunmuş tədbir keçirilmişdir.
Tədbir Azərbaycan Respublikasının Dövlət Himninin səsləndirilməsi ilə başlamışdır.
Tədbirin davamında tələbələr tərəfindən Milli Qurtuluş Gününə həsr olunmuş şeirlər səsləndirilmiş, bu əlamətdar günün tarixi əhəmiyyəti barədə geniş məlumat verilmişdir.
Sonra ümummilli lider Heydər Əliyevin həyat və fəaliyyətini, eləcə də Azərbaycan dövlətçiliyinin möhkəmləndirilməsi istiqamətində gördüyü mühüm işləri əks etdirən videoçarx nümayiş olunmuşdur.
Daha sonra kollecin istehsalat təcrübə rəhbəri Natiq Musayev çıxış edərək 15 İyun – Milli Qurtuluş Gününün Azərbaycan tarixində mühüm dönüş nöqtəsi olduğunu qeyd etmişdir. Bildirilmişdir ki, 1993-cü ilin iyun hadisələri zamanı ölkədə yaranmış mürəkkəb ictimai-siyasi vəziyyət ümummilli lider Heydər Əliyevin hakimiyyətə qayıdışı ilə aradan qaldırılmış, dövlət müstəqilliyi qorunmuş və sabitliyin təmin olunmasına nail olunmuşdur. Vurğulanmışdır ki, Milli Qurtuluş Günü Azərbaycanın inkişaf və tərəqqi yolunun başlanğıcı kimi tariximizdə xüsusi əhəmiyyət kəsb etmişdir.
Tədbirin sonunda kollecin direktoru, professor Mübariz Hacıbəyov çıxış edərək Milli Qurtuluş Gününün Azərbaycan dövlətçiliyinin möhkəmlənməsində və müasir müstəqil dövlətin formalaşmasında müstəsna rol oynadığını vurğulamış və qeyd etmişdir ki, ümummilli lider Heydər Əliyevin müəyyənləşdirdiyi siyasi kurs ölkəmizin hərtərəfli inkişafına, beynəlxalq nüfuzunun artmasına və milli maraqların qorunmasına möhkəm zəmin yaratmışdır. O, bu siyasi xəttin bu gün də Azərbaycan Respublikasının Prezidenti cənab İlham Əliyev tərəfindən uğurla davam etdirildiyini diqqətə çatdırmışdır. Mübariz Hacıbəyov həmçinin gənclərin milli-mənəvi dəyərlərə bağlı, vətənpərvər və yüksək biliklərə malik vətəndaşlar kimi yetişdirilməsinin vacibliyini qeyd etmiş, bu istiqamətdə təhsil müəssisələrinin üzərinə düşən məsuliyyətdən bəhs etmişdir.
Sonda tədbir iştirakçıları ilə xatirə şəkli çəkdirilmişdir.

08/06/2026

05/06/2026

Azərbaycan Dövlət İqtisad Universitetinin nəzdində Sosial-İqtisadi Kollecdə 18 may–18 iyun tarixlərini əhatə edən “İnsan Hüquqları Aylığı” çərçivəsində maarifləndirici tədbir keçirilmişdir. Tələbələrinin iştirakı ilə baş tutan tədbirdə “Kargüzarlıq və sosial iş” FBK-nın müəllimi Səyyad Əhmədov insan hüquq və azadlıqlarının əhəmiyyəti, onların qorunması və Azərbaycanda bu sahədə görülən işlər barədə geniş məlumat vermişdir.
Sosial və humanitar məsələlər üzrə direktor müavini Bəşir Əliyev isə insan hüquqlarının cəmiyyətin inkişafındakı rolu və gənclərin hüquqi maarifləndirilməsinin əhəmiyyətini vurğulamışdır.
Tədbir tələbələrin suallarının cavablandırılması və mövzu ətrafında fikir mübadiləsi ilə başa çatmışdır.

29/05/2026

Azərbaycan Dövlət İqtisad Universitetinin nəzdində Sosial-İqtisadi Kollecdə 28 May – Müstəqillik Gününə həsr olunmuş tədbir keçirilmişdir.
Tədbirdə Azərbaycan Xalq Cümhuriyyətinin yaranmasının xalqımızın dövlətçilik tarixində mühüm mərhələ olduğu vurğulanmış, 1918-ci il mayın 28-də əsası qoyulan bu dövlətin müsəlman Şərqində ilk parlamentli respublika kimi tarixə düşdüyü qeyd edilmişdir. Bildirilmişdir ki, qısa müddət fəaliyyət göstərməsinə baxmayaraq, Azərbaycan Xalq Cümhuriyyəti milli dövlət quruculuğu, hüquqi islahatlar, təhsil, ordu quruculuğu və demokratik idarəetmə sahələrində mühüm addımlar atmışdır.
Qeyd olunmuşdur ki, Azərbaycan Xalq Cümhuriyyəti dövründə qadınlara seçmək və seçilmək hüququnun verilməsi həmin dövr üçün mühüm demokratik nailiyyətlərdən biri olmuşdur. Azərbaycan qadınlara seçki hüququ tanıyan ilk ölkələr sırasında yer almış, bu hüquq bir sıra Avropa dövlətlərindən daha əvvəl təmin edilmişdir. Həmçinin söz və mətbuat azadlığına xüsusi önəm verilməsi, çoxpartiyalı siyasi mühitin formalaşdırılması ölkədə demokratik dəyərlərin və hüquqi dövlətçilik ənənələrinin inkişafının göstəricisi kimi dəyərləndirilmişdir.
Tədbirdə vurğulanmışdır ki, Azərbaycan Xalq Cümhuriyyətinin zəngin dövlətçilik irsi müstəqil Azərbaycanın siyasi və ideoloji inkişafında mühüm tarixi əsaslardan birini təşkil etmişdir. Qeyd edilmişdir ki, Ümummilli Lider Heydər Əliyev müasir Azərbaycan dövlətçiliyinin ideoloji əsaslarını formalaşdıraraq milli maraqlara söykənən güclü dövlətçilik konsepsiyası yaratmış, müstəqilliyin qorunmasını və möhkəmləndirilməsini dövlət siyasətinin əsas prioritetlərindən birinə çevirmişdir. Bildirilmişdir ki, bu gün Prezident İlham Əliyevin rəhbərliyi ilə Azərbaycan məhz həmin dövlətçilik ideologiyasına uyğun olaraq inkişaf edir, ölkənin suverenliyi daha da möhkəmlənir, beynəlxalq nüfuzu artır və davamlı inkişaf təmin olunur.
Xüsusi olaraq qeyd edilmişdir ki, bu gün Azərbaycan xalqının öz dövlətinə, gələcəyinə və milli dəyərlərinə olan sarsılmaz inamı ölkəmizin inkişafının əsas dayaqlarından biridir. Bildirilmişdir ki, xalq-dövlət birliyi, milli həmrəylik və vətəndaşların müstəqillik ideyalarına sədaqəti Azərbaycanın dövlət müstəqilliyinin qorunması və daha da möhkəmləndirilməsi baxımından mühüm əhəmiyyət daşıyır.
Tələbələr tərəfindən səsləndirilən vətənpərvərlik mövzusunda şeirlər, təqdim edilən musiqi və rəqs nömrələri tədbirə xüsusi rəng qatmışdır.
Sonda qeyd edilmişdir ki, 28 May – Müstəqillik Günü xalqımızın azadlıq ideyalarını, milli birliyini və müstəqil dövlətçilik ənənələrini özündə yaşadan ən əlamətdar tarixlərdən biridir.

22/05/2026

Tütün istifadəsinin zərərləri barədə maarifləndirmənin artırılması və sağlam həyat tərzinin təşviqi məqsədilə hər il mayın 31-i “Ümumdünya Tütünlə Mübarizə Günü” kimi qeyd olunur.
Gənclərin zərərli vərdişlərdən uzaq tutulması və düzgün həyat tərzi vərdişlərinin formalaşdırılması məqsədilə Azərbaycan Dövlət İqtisad Universitetinin nəzdində Sosial-İqtisadi Kollec tərəfindən 21 may 2026-cı il tarixində onlayn seminar keçirilmişdir. Seminarda kollecin əməkdaşları, tələbələr və Azərbaycan Dövlət İqtisad Universitetinin nəzdində Qida Sənayesi Kollecinin psixoloqu Bəsti Hacıyeva iştirak etmişlər. Tədbiri giriş sözü ilə açan kollecin psixoloqu Xalidə Kərimova tütün istifadəsinin insan sağlamlığı üçün təhlükəli olduğunu qeyd etmiş, gənclərin zərərli vərdişlərdən uzaq tutulmasının vacibliyini vurğulamışdır.
Çıxışlarda tütün istifadəsinin insan sağlamlığına və psixoloji vəziyyətinə mənfi təsirindən danışılmış, tütünsüz həyatın üstünlükləri diqqətə çatdırılmışdır.
Seminar interaktiv formada keçmiş, tələbələrlə fikir mübadiləsi aparılmışdır. Sonda tələbələr “Tütünsüz sağlam həyat” mövzusunda şüarlar seçmişlər.

22/05/2026

20/05/2026

19 may tarixində Azərbaycan Dövlət İqtisad Universitetinin nəzdində Sosial-İqtisadi Kollec və Sabunçu Gənclər Evinin birgə təşkilatçılığı ilə “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2025-2030-cu illər üçün Dövlət Proqramı” çərçivəsində tədbir keçirilmişdir. Keçirilən görüşdə kollecin tələbələri və Gənclər Evinin könüllüləri iştirak etmişlər. Tədbirin əsas məqsədi gəncləri narkomaniya və digər zərərli vərdişlərin mənfi təsirləri barədə məlumatlandırmaq, onları sağlam həyat tərzinə təşviq etmək olmuşdur.
Tədbirdə çıxış edən kollecin sosial və humanitar məsələlər üzrə direktor müavini Bəşir Əliyev və Sabunçu Gənclər Evinin direktoru Kamil Yaqubov narkotik vasitələrin insan sağlamlığına, ailə dəyərlərinə və ümumilikdə cəmiyyətə vurduğu ağır zərərlərdən bəhs etmişlər. Onlar sağlam həyat tərzinin təbliğinin vacibliyini vurğulamış, narkomaniyanın yalnız bir şəxsin deyil, bütövlükdə cəmiyyətin təhlükəsizliyinə və inkişafına mənfi təsir göstərən ciddi sosial problem olduğunu qeyd etmişlər.
Tədbir interaktiv müzakirələrlə davam etmiş, iştirakçıları maraqlandıran suallar cavablandırılmışdır.

18/05/2026

Azərbaycan Dövlət İqtisad Universitetinin nəzdində Sosial-İqtisadi Kollec, Inclusive Organization Company və Ümidlə Gəl Xeyriyyə Layihəsinin birgə təşkilatçılığı ilə “Əngəlsiz Sabahlar” adlı seminar keçirilmişdir. Seminarın əsas məqsədi cəmiyyətdə inklüziv təhsilin və inklüziv sosial işin əhəmiyyəti barədə maarifləndirmə aparmaq, xüsusi qayğıya ehtiyacı olan şəxslərin sosial həyata fəal inteqrasiyasını təşviq etmək, eyni zamanda gənclərin bu sahədə məlumatlılığını və sosial məsuliyyət hissini artırmaq olmuşdur.
Tədbirdə iştirak edən Azərbaycan Dövlət İqtisad Universitetinin nəzdində Sosial-İqtisadi Kollecin direktoru, professor Mübariz Hacıbəyov, “Ümidlə Gəl” Xeyriyyə Layihəsinin rəhbəri Hacı Quliyev, “Inclusive Organization Company”nin təsisçisi və rəhbəri İbrahim Məmmədov, pedaqoq və beynəlxalq təlimçi Ülviyyə Hüseynli, həmçinin “Tərəqqi” Sosial-İqtisadi Araşdırmalar İctimai Birliyinin sədr müavini Fərid Mustafayev inklüziv təhsilin cəmiyyət üçün rolu, inklüziv sosial işin mahiyyəti və əhəmiyyəti, xüsusi qayğıya ehtiyacı olan şəxslərin təhsil, məşğulluq və sosial mühitə inteqrasiyası, gənclərin sosial məsuliyyəti, eləcə də bu istiqamətdə həyata keçirilən layihələrin rolu ətrafında fikir mübadiləsi aparmış, tələbə və müəllimlərin suallarını cavablandırmışlar. Mütəxəssislər öz təcrübələrini iştirakçılarla bölüşərək, inklüziv cəmiyyətin formalaşmasında maarifləndirmənin, sosial həmrəyliyin, əlçatan imkanların yaradılmasının və institusional əməkdaşlığın vacibliyini xüsusi vurğulamışlar.
Tədbirin sonunda gələcəkdə inklüziv təhsil və inklüziv sosial iş istiqamətində birgə layihələrin həyata keçirilməsinin əhəmiyyəti qeyd edilmişdir.

15/05/2026

Azərbaycan Dövlət İqtisad Universitetinin nəzdində Sosial-İqtisadi Kollecdə “Next Station: Banking Street” adlı seminar keçirilmişdir.
Seminarda ABB-nin Filiallarla iş və satışa dəstək departamentinin “Xidmət və keyfiyyət” şöbəsinin baş mütəxəssisi Adəm Zeynalov, Biznes kreditlərinin təhlili departamentinin aparıcı mütəxəssisi Aydın Əliyev, həmçinin Unibank-ın Filialların idarəedilməsi və satış departamentinin “Filialların idarəedilməsi və keyfiyyətə nəzarət” şöbəsinin baş mütəxəssisi Rəşid Həsənzadə çıxış etmişlər.
Qonaqlar bank sektorunda mövcud karyera imkanları, peşəkar inkişaf istiqamətləri, müasir bankçılıq sahəsində tələb olunan bilik və bacarıqlar, eləcə də iş mühitində uğur qazanmağın əsas prinsipləri barədə tələbələrə ətraflı məlumat vermiş, şəxsi peşəkar təcrübələrini bölüşmüşlər.
Seminar çərçivəsində tələbələri maraqlandıran suallar cavablandırılmış, bank sektorunda karyera qurmaq istəyən gənclərə praktiki tövsiyələr təqdim olunmuşdur. Bu cür maarifləndirici görüşlərin tələbələrin gələcək peşə seçimlərinə və əmək bazarına daha hazırlıqlı inteqrasiyasına mühüm töhfə verdiyi vurğulanmışdır.