Bakı Ali Neft Məktəbi

Bakı Ali Neft Məktəbinin "HAL9000.dev" komandası Bolqarıstanda keçirilən "Ruse AI Hack 26" müsabiqəsində 3-cü yeri qazanıb.

BANM tələbələrindən ibarət komanda mübadilə proqramı çərçivəsində Bolqarıstanda təhsil aldıqları müddətdə beynəlxalq hakaton müsabiqəsində iştirak edərək Azərbaycanı və BANM-i uğurla təmsil edib.

Komanda tərəfindən təqdim olunan layihə Ruse şəhərinə gələn beynəlxalq tələbələr, turistlər və xaricilər üçün gündəlik həyatı asanlaşdıran “all-in-one” mobil platformadır. Platforma istifadəçilərə sənədlərin anlaşılması, şəhər nəqliyyatından istifadə, tədbirlərin kəşfi, yeni insanlarla ünsiyyət qurulması, maraqlı məkanların tapılması və gündəlik problemlərin operativ həlli kimi imkanlar təqdim edir.

Layihənin əsas məqsədi müxtəlif dillərdə danışan insanların yeni mühitə daha sürətli uyğunlaşmasını təmin etməkdir. Bu məqsədlə platformaya çoxdilli süni intellekt əsaslı köməkçi inteqrasiya olunub və istifadəçilərə real həyat situasiyalarında effektiv dəstək göstərilməsi nəzərdə tutulub.

"Ruse AI Hack ’26" müsabiqəsində ümumilikdə 70 iştirakçı və 20 layihə yer alıb.

Komandanın üzvləri:

Şamil Mantaşlı
Elnur Qədirli
Rəşad Mütəllibov
Hüseyn Məmmədli

Qürur duyuruq!

Bakı Ali Neft Məktəbinin rektoru Elmar Qasımov buraxılış imtahanlarında maksimal (300 bal) nəticə göstərən Rafiq Vəlizadə və onun valideyni ilə görüşüb.

Rektor şagirdi təbrik edərək qəbul imtahanlarında uğurlar arzulayıb, növbəti tədris ilində onu Bakı Ali Neft Məktəbinin tələbələri sırasında görməkdən məmnun olacağını bildirib.

Bakı Ali Neft Məktəbinin ( ) rektoru Elmar Qasımov nüfuzlu universitetlərə qəbul olmuş sonuncu kurs tələbələri – Maya Kərimova, Həmid Həşimzadə, Əflan Bədəlov, Röya Qasımova, Gülcan Məmmədova, Elşən Salahov və onların valideynləri ilə çay süfrəsində görüşüb.

Rektor tələbələri və onların valideynlərini təbrik edərək, növbəti təhsil mərhələsində uğurlar arzulayıb.

Tələbələrlə fəxr etdiyini vurğulayan Elmar Qasımov, onların tələbə ikən əldə etdikləri uğurları qeyd edərək ölkəmizi və BANM-i təhsil alacaqları universitetlərdə yüksək səviyyədə təmsil edəcəklərinə əminliyini ifadə edib.

Sabah Bakı Ali Neft Məktəbində Azərbaycan xalqının Ümummilli Lideri Heydər Əliyevin anadan olmasının 103-cü ildönümünə həsr olunmuş “Süni zəkanın transformativ təsiri: biznes, idarəetmə və təhsildə yeni paradiqma” adlı IV BANM Biznes forumu keçiriləcək.

“PAŞA Holding” və SOCAR İspaniyanın nüfuzlu IE Universiteti ilə strateji tərəfdaşlıq çərçivəsində Azərbaycan Respublikası Elm və Təhsil Nazirliyi və Azərbaycan Respublikası İqtisadiyyat Nazirliyinin dəstəyi ilə Bakıda Liderlik və İnnovasiya üzrə IE Mərkəzinin yaradılması məqsədilə Anlaşma Memorandumu imzalayıblar.

Bakı Ali Neft Məktəbinin rektoru Elmar Qasımov Almaniyanın Bremen Konstruktor Universitetində mübadilədə iştirak edəcək Kompüter mühəndisliyi ixtisasının tələbələri Vüqar Əhədli və Anara Yusifzadə ilə görüşüb.

Onları təbrik edərək uğurlar arzulayan rektor bu təcrübənin tələbələrin bilik və bacarıqlarının inkişafına mühüm töhfə verəcəyinə, BANM-i layiqincə təmsil edəcəklərinə əminliyini ifadə edib.

Bakı Ali Neft Məktəbinin rektoru Elmar Qasımov Özbəkistanın Daşkənd Kimya Texnologiyası İnstitutu və Buxara Dövlət Texniki Universiteti ilə həyata keçirilən ikili diplom proqramı çərçivəsində təhsillərini başa vuran 16 özbək tələbə ilə görüşüb.

Onlara uğurlar arzulayan rektor Bakı Ali Neft Məktəbində qazandıqları bilikləri çalışdıqları müəssisələrdə yüksək səviyyədə tətbiq edəcəklərinə əminliyini bildirib.

Tələbələr BANM-dəki təhsil, sosial mühit və yaradılan imkanlardan razı qaldıqlarını qeyd ediblər.

Bakı Ali Neft Məktəbinin rektoru Elmar Qasımov tələbələrlə görüş keçirib.

Hər ixtisas və kurs üzrə ayrı-ayrılıqda təşkil edilən görüşdə tələbələrin təklif və müraciətlərini dinləyib, suallarını cavablandırıb, onlarla müzakirələr aparıb.

Bakı Ali Neft Məktəbi ilə “Bahar Energy Operating Company Limited” şirkətinin Azərbaycandakı Nümayəndəliyi arasında əməkdaşlığa dair Anlaşma Memorandumu imzalanıb.

Memorandumu BANM-in rektoru Elmar Qasımov və “Bahar Energy Operating Company Limited” şirkətinin Azərbaycandakı Nümayəndəliyinin rəhbəri Anar Əliyev imzalayıb.

Memorandum BANM tələbələrinin şirkətdə istehsalat təcrübəsində iştirakı, BANM-ın tələbələrinin və məzunlarının işlə təmin edilməsi üçün fürsətlərin yaradılması və digər əməkdaşlıq məsələlərini əhatə edir.

İmzalanma mərasimində BANM-in rektoru Elmar Qasımov bu müqavilənin əhəmiyyətini vurğulayaraq geniş əməkdaşlıq imkanları yaradacağını bildirib.

Anar Əliyev BANM tələbə və məzunlarının yüksək biliyə malik mütəxəssis olduqlarını, onların bir neçəsinin artıq şirkətdə uğurla fəaliyyət göstərdiyini vurğulayıb.

Bakı Ali Neft Məktəbinin rektoru Elmar Qasımov Qazaxıstanın S.Utebayev adına Atırau Neft və Qaz Universitetinin professor-müəllim, tələbələrdən ibarət nümayəndə heyəti ilə görüşüb.

Rektor Elmar Qasımov BANM-in fəaliyyəti, beynəlxalq əlaqələri və müasir tədris yanaşmaları barədə qonaqlara ətraflı məlumat verib.

Artıq 10 ilə yaxındır ki, BANM və Qazaxıstan universitetləri arasında əməkdaşlıq əlaqələrinin qurulduğunu diqqətə çatdıran rektor bildirib ki, bu günə qədər ümumilikdə 22 qazaxıstanlı tələbə BANM-də mübadilə proqramlarında iştirak edib və onlardan 5-i Atırau Neft və Qaz Universitetinin tələbələri olub. Bundan başqa, 2024-cü ildə BANM-in kampusunda Azərbaycan-Qazaxıstan Elm və Təhsil Mərkəzi yaradılıb.

Nümayəndə heyətinin rəhbəri, dosent Janar Şayaxmetova təmsil etdiyi ali təhsil ocağının BANM ilə əməkdaşlığı daha da genişləndirməkdə maraqlı olduğunu bildirib.

Bakı Ali Neft Məktəbində keçirilən “Neft-qaz mühəndisliyinin enerji sistemlərinə inteqrasiyası” mövzusunda Tələbə və Gənc Tədqiqatçıların VII Beynəlxalq Elmi Konfransında iştirak edən nümayəndə heyəti konfransı yüksək qiymətləndirib.

Bakı Ali Neft Məktəbində (BANM) Ümummilli lider Heydər Əliyevin anadan olmasının 103-cü ildönümünə həsr olunmuş “Ağıllı sistemlər və kibertəhlükəsizlik” mövzusunda Tələbə və Gənc Tədqiqatçıların VII Beynəlxalq Elmi Konfransı keçirilib.

Konfransın açılışında BANM-in rektoru Elmar Qasımov bildirib ki, bu gün hər bir sahədə ağıllı sistemlərin tətbiqi, kibertəhlükəsizliyin təmin olunması vacib məqama çevrilib və konfrans bu istiqamətdə uğurlu ideyalara, perspektivli layihələrə zəmin yaradır.

Bakı Ali Neft Məktəbinin son bir ay ərzində artıq 3-cü beynəlxalq konfransa ev sahibliyi etdiyini vurğulayan rektor qeyd edib ki, BANM-də tələbə və gənc tədqiqatçılar üçün əlverişli elmi mühit formalaşıb.

Bakı Ali Neft Məktəbinin İnformasiya texnologiyaları kafedrasının müdiri Nailə Allahverdiyeva bildirib ki, konfransa daxil olan 279 müraciətdən akademik tələblərə cavab verən 182 tezis qəbul edilib. ABŞ, Böyük Britaniya, Almaniya, Niderland, Avstriya, Türkiyə, Malta, Özbəkistan universitetlərindən isə 28 müraciət qəbul edilib. Tələbə və gənc elmi tədqiqatçıların konfransa təqdim edilən bütün tezisləri DOI identifikasiya nömrəsi ilə dərc olunacaq.

Sumqayıt Dövlət Universitetinin rektoru vəzifəsini icra edən Əminağa Sadıqov rəqəmsallaşmanın sürətlə inkişaf etdiyi və ixtisaslı kadrlara tələbatın artdığı bir dövrdə ali məktəblərin üzərinə böyük vəzifə düşdüyünü deyib və bu baxımdan BANM-də keçirilən elmi konfransı yüksək qiymətləndirib.

“Huawei Azerbaijan” şirkətinin baş direktoru Yang Tianxiao, Azərbaycan Dövlət Neft və Sənaye Universitetinin Elm və innovasiya məsələləri üzrə prorektoru Elviz İsmayılov, "Kapital Bank"ın Kibermüdafiə şöbəsinin rəhbəri, eyni zamanda Bakı Ali Neft Məktəbinin məzunu Sənan Səfərəliyev də çıxış edərək gənc tədqiqatçılara uğurlar arzulayıblar.

Daha sonra BANM-in İnformasiya təhlükəsizliyi ixtisasının 3-cü kurs tələbəsi Fatimə Əliyeva elmi işinin təqdimatını edib.

Konfrans “Ağıllı sistemlər və tətbiqlər”, “Kibertəhlükəsizlik və təhlükəsiz hesablama sistemləri” üzrə bölmələrlə işini davam etdirib.