AzTU Telebe Hemkarlar İttifaqi Komitesi

Selçuk Bayraktara Azərbaycan Texniki Universitetinin fəxri doktroru adı verilib

Mayın 25-də “Baykar” şirkətinin texnoloji lideri, “Teknoloji Takımı Vakfı”nın (T3 Vakfı) Qəyyumlar Şurasının sədri, “Qarabağ”ordenli Selçuk Bayraktara Azərbaycan Texniki Universitetinin (AzTU) fəxri doktoru adının verilməsi mərasimi keçirilib. Tədbirdə Türkiyənin Azərbaycandakı səfiri Cahid Bağçı, hər iki ölkənin müxtəlif nazirliklərinin rəhbər şəxsləri, universitetin professor-müəllim heyəti və tələbələr iştirak edib.

Tədbirdə çıxış edən təhsil nazirinin müavini Firudin Qurbanov Selçuk Bayraktarı AzTU-da görməkdən məmnunluğunu ifadə edib. Bildirib ki, şəxsin inkişafı onun mükəmməl elmə və təhsilə yiyələnməsi ilə birbaşa bağlıdır. Bu mənada Bayraktarı bütün dünyaya tanıdan onun mükəmməl elmə, təhsilə yiyələnməsi olub. Azərbaycanda müdafiə sənayesinin inkişafına göstərilən diqqətdən danışan nazir müavini qeyd edib ki, bu istiqamətdə yüksəkixtisaslı kadr hazırlığının aparılması da mühüm şərtlərdəndir. O qeyd edib ki, hazırda AzTU regionda müdafiə sənayesi üzrə kadr hazırlayan yeganə universitetdir. Firudin Qurbanov son illər AzTU-nun Türkiyənin aparıcı universitetləri, tədqiqat və innovasiya mərkəzləri ilə yüksək səviyyədə əməkdaşlıq əlaqələrini inkişaf etdirdiyini də diqqətə çatdırıb.

Sonra AzTU-nun fəxri qonağı Selçuk Bayraktar tələbələrlə görüşüb. Müdafiə sənayesinin inkişafının ölkə üçün əhmiyyətini vurğulayan Bayraktar müəllifi olduğu müasir texnologiyalar, eyni zamanda hazırda Türkiyənin ilk uçan avtomobili olan “CEZERİ”, Türkiyənin ilk pilotsuz döyüş təyyarəsi olacaq Bayraktar Kızılelma (MİUS) layihələri və üzərində çalışdığı yeni tədqiqat işləri barədə tələbələrə məlumat verib.

Daha sonra Selçuk Bayraktara Azərbaycan Texniki Universitetin fəxri doktoru adının verilməsi mərasimi keçirilib. Fəxri doktor diplomunu qonağa AzTU-nun rektoru, professor Vilayət Vəliyev təqdim edib.

Təhsil Nazirliyi və Azərbaycan Təhsil İşçiləri Azad Həmkarlar İttifaqı Respublika Komitəsinin birgə təşkilatçılığı ilə ulu öndər Heydər Əliyevin anadan olmasının 99-cu ildönümünə həsr edilən bədii yaradıcılıq müsabiqə-festivalının seçim turu keçirilib.

Seçim turunda bir sıra ali təhsil müəsisələrinin, o cümlədən Azərbaycan Texniki Universiteti Tələbə Həmkarlar İttifaqı Komitəsinin (AzTU THİK) bədii özfəaliyyət dərnəyinin tələbələri də çıxış edib.

Bədii qiraət, musiqi və rəqs bacarıqlarını nümayiş etdirən tələbələrin çıxışları münsiflər heyətinin marağına səbəb olub.

Münsiflər heyətinin rəyinə əsasən AzTU-nun bir qrup tələbəsi final konsertinə vəsiqə qazanıb.

Qeyd edək ki, festivalın yekun konserti may ayında keçiriləcək.

31 Mart - Azərbaycanlıların Soyqırımı Günüdür.
Bu soyqırımı XX yüzillikdə dünya tarixinin ən qanlı səhifələrindən biridir.

AzTU kollektivi Quba Soyqırımı Memorial Kompleksini ziyarət edib

31 Mart – Azərbaycanlıların Soyqırımı Günü ilə əlaqədar Azərbaycan Texniki Universitetinin (AzTU) rəhbərliyi, müəllim və tələbə heyəti Quba Soyqırımı Memorial Kompleksini ziyarət edib.

Quba Soyqırımı Memorial Kompleksini ziyarət zamanı AzTU kollektivinə ermənilərin törətdikləri soyqırımı barədə ətraflı məlumat verilib.

Bildirilib ki, Quba Soyqırımı Memorial Kompleksi Heydər Əliyev Fondunun dəstəyi ilə yaradılıb. Kompleksdə XX əsrin əvvəllərində Quba şəhərinin müxtəlif ərazilərinin görüntüləri, o zaman burada aparılan tikinti-quruculuq işləri, əhalinin həyat tərzi haqqında fotolar vardır. Buradakı xüsusi bölmədə Azərbaycan Xalq Cümhuriyyətinin yaranma tarixi, bununla bağlı maraqlı fotolar yer alıb. Kompleksdə quraşdırılmış sensor ekranlı monitordakı xüsusi xəritədə ermənilərin ötən əsrdə xalqımıza qarşı respublikamızın müxtəlif bölgələrində həyata keçirdikləri soyqırımları barədə bir neçə dildə məlumat əldə etmək mümkündür. Burada ümummilli lider Heydər Əliyevin azərbaycanlılara qarşı həyata keçirilən soyqırımı siyasətinin ifşa olunaraq dünya ictimaiyyətinə çatdırılması istiqamətində gördüyü işlər, bunun üçün imzaladığı sərəncamların nümayiş etdirildiyi guşə də yaradılıb. Həmçinin Quba, Cavad, Göyçay, Şamaxı və Bakı qəzaları barədə məlumatların və bu qəzalarda ermənilərin törətdikləri vəhşiliklər haqqında dolğun məlumatlar vardır.

Quba soyqırımı məzarlığı 2007-ci il aprelin 1-də ərazidə torpaq işləri görülərkən aşkar edilib. Tədqiqat nəticəsində məzarlığın 1918-ci ildə ermənilərin yerli dinc əhaliyə qarşı törətdiyi soyqırımı ilə bağlı olduğu müəyyən edilib.

Hörmətli müəllimlər, əməkdaşlar və əziz tələbələr!
Azərbaycan Texniki Universiteti Tələbə Həmkarlar İttifaqı Komitəsi sizi "31 Dekabr Dünya Azərbaycanlılarının Həmrəylik Günü və Yeni il" münasibəti ilə təbrik edir, sizə şəxsi həyatınız da və işləriniz də uğurlar arzulayır.
Bayramınız mübarək!🇦🇿🎄

Hörmətli müəllimlər, əməkdaşlar!
Əziz tələbələr!

Sizi 31 Dekabr - Dünya Azərbaycanlılarının Həmrəyliyi Günü və Yeni il bayramı münasibətilə ürəkdən təbrik edir, ən xoş arzularımı çatdırıram!
Ulu öndər Heydər Əliyev tərəfindən təsis olunan və azərbaycançılıq məfkurəsinin təcəssümü olan Dünya Azərbaycanlılarının Həmrəyliyi Günündə dünyanın müxtəlif guşələrində yaşayan soydaşlarımız Vətənə bağlılığın, milli birliyin, həmrəyliyin qürurunu yaşayırlar.
Qürurverici haldır ki, hər birimiz üçün əziz və əlamətdar olan bu bayramı Prezident, Müzəffər Ali Baş Komandan İlham Əliyevin yenilməz qətiyyəti, rəşadətli ordumuzun şücaəti və xalqımızın birliyi sayəsində qalib ölkə kimi qeyd edirik.

Əziz AzTU ailəsi!​
Başa çatmaqda olan ilin yekunlarına nəzər salsaq, əminliklə deyə bilərik ki, 2021-ci il universitetimiz üçün nailiyyətlərlə zəngin il oldu. Biz artıq mərhələ-mərhələ ənənəvi təhsilə qayıdırıq. Yola saldığımız il ərzində universitetimiz bir sıra istiqamətlər üzrə yüksək nəticələr göstərdi.Tədrisin keyfiyyətinin yüksəldilməsi, müasir laboratoriyaların istifadəyə verilməsi, maddi-texniki bazanın yenilənməsi, beynəlxalq əlaqələrin inkişafı və bu qəbildən olan digər işlərin həyata keçirilməsi komanda işinin düzgün qurulması sayəsində mümkün oldu.

2021-ci ildə qazandığımız uğur və nailiyyətlərin əldə olunmasında göstərdikləri peşəkarlığa görə doğma AzTU ailəsinə - professor-müəllim heyətinə, bütün əməkdaşlarımıza və ən əsası tələbələrimizə təşəkkür edirəm!

Bildiyimiz kimi, mühəndislik elmləri və ağıllı texnologiyaların tətbiqi sahəsində regionda lider universitet olmağı hədəf seçən AzTU-nun 2021-2030-cu illər üçün inkişaf strategiyası qəbul olunub. Hədəfimizə çatmaq üçün qarşıdan gələn 2022-ci ildə də universitetimiz üçün daha gözəl və faydalı işlər görəcəyimizə əminəm!

Sizi bir daha 31 Dekabr - Dünya Azərbaycanlılarının Həmrəyliyi Günü və Yeni il münasibətilə təbrik edir, sizə möhkəm cansağlığı, xoşbəxtlik, firavanlıq diləyirəm! Azərbaycan elminin inkişafı, universitetimizin tərəqqisi naminə fəaliyyətinizdə hər birinizə yeni-yeni uğurlar arzulayıram!

#2022

Prezident İlham Əliyev tələbələrin təqaüdlərinin artırılması ilə bağlı Sərəncam imzalayıb

Sərəncama əsasən,

✅Doktorantura pilləsi üzrə:

elmlər doktoru hazırlığı üzrə doktorantlara verilən təqaüdün məbləği 300 manatdan 360 manatadək, fəlsəfə doktoru hazırlığı üzrə doktorantlara verilən təqaüdün məbləği 180 manatdan 216 manatadək artırılıb.

✅Ali təhsil müəssisələrində və Azərbaycan Milli Elmlər Akademiyasında:

adlı təqaüd alan tələbələrə verilən təqaüdün məbləği 170 manatdan 204 manatadək artırılıb.

✅Magistratura səviyyəsi üzrə:

akademik göstəriciləri 91-100 bal olan tələbələrə verilən təqaüdün məbləği 145 manatdan 174 manatadək,

akademik göstəriciləri 71-100 bal olan tələbələrə verilən təqaüdün məbləği 120 manatdan 144 manatadək,

akademik göstəriciləri 51-100 bal olan tələbələrə verilən təqaüdün məbləği 80 manatdan 96 manatdək artırılıb.

✅Bakalavriat səviyyəsi üzrə:

akademik göstəriciləri 91-100 bal olan tələbələrə verilən təqaüdün məbləği 130 manatdan 156 manatdək,

akademik göstəriciləri 71-100 bal olan tələbələrə verilən təqaüdün məbləği 110 manatdan 132 manatadək,

akademik göstəriciləri 51-100 bal olan tələbələrə verilən təqaüdün məbləği 75 manatdan 90 manatadək artırılıb.

Ulu Öndər Heydər Əliyev: "Mənim üçün öz həyatımdan, öz canımdan artıq Azərbaycanın müstəqilliyini qorumaq, onu saxlamaq, onu əbədi etməkdir."