211 nömrəli tam orta ümumtəhsil məktəbi

DİQQƏT
Birləşmiş Millətlər Təşkilatının Ümumdünya Şəhərsalma Forumunun 13-cü sessiyasının (WUF13) keçirilməsi ilə əlaqədar olaraq, məktəbimizdə tədris prosesində müvəqqəti dəyişiklik tətbiq olunacaq.
Məktəbimizin Nəsimi rayonu ərazisində yerləşdiyini nəzərə alaraq bildiririk ki, 18–22 may tarixlərində V–XI siniflər üzrə dərslər distant (məsafədən) formada təşkil ediləcəkdir.
Dərslər “Rəqəmsal məktəb” platforması üzərindən keçiriləcək. Müəllimlər dərsləri “Microsoft Teams” vasitəsilə təşkil edəcək, dərs cədvəli və qoşulma məlumatları isə əvvəlcədən şagirdlərlə paylaşılacaqdır.
Valideynlərdən xahiş olunur ki, övladlarının onlayn dərslərə vaxtında qoşulmasına nəzarət etsinlər və texniki imkanların hazır olmasını təmin etsinlər.

WUF13 müddətində Bakı məktəblərində tədris “Rəqəmsal məktəb” üzərindən aparılacaq

Birləşmiş Millətlər Təşkilatının Ümumdünya Şəhərsalma Forumunun 13-cü sessiyasının (WUF13) keçirildiyi dövrdə Bakı şəhərində fəaliyyət göstərən ümumi təhsil müəssisələrinin (Pirallahı, Qaradağ, Suraxanı, Sabunçu və Nizami rayonları istisna olmaqla) V-XI sinifləri üzrə tədris prosesi 18-22 may tarixlərində distant (məsafədən) formada keçiriləcək.

Yasamal, Səbail, Nəsimi, Nərimanov, Binəqədi, Xətai və Xəzər rayonlarındakı ümumi təhsil müəssisələrini əhatə edən distant dərslər “Rəqəmsal məktəb” platforması üzərindən tədris olunacaq.
Müəllimlər şəxsi kabinetlərindəki “Microsoft” alətləri bölməsi vasitəsilə “Teams” platformasına keçid edərək dərs cədvəllərini hazırlaya bilərlər.

Onlayn dərslərə qoşulmaq üçün dərs məlumatları platforma üzərindən şagirdlərlə paylaşılacaq.

https://reqemsal.edu.az/

Təbrik edirik
Məktəbimizin fiziki tərbiyə müəllimi Ella Yusibovanın 60 illik yubileyi münasibətilə məktəbin direktor vəzifəsini icra edən Məhəbbət Hüseynova tərəfindən təbrik edilmişdir.
Təbrik zamanı Ella Yusibovanın uzun illər ərzində göstərdiyi səmərəli pedaqoji fəaliyyəti, şagirdlərlə qurduğu nümunəvi münasibət və məktəb həyatındakı fəallığı xüsusi qeyd olunmuşdur.
Yubilyara gül dəstəsi təqdim edilmiş, məktəb rəhbərliyi tərəfindən fəxri fərmanla mükafatlandırılmışdır. Bu xoş anların xatirəsi olaraq sonda xatirə şəkli çəkdirilmişdir.
Ella Yusibovaya möhkəm can sağlığı, xoşbəxt və mənalı ömür, fəaliyyətində daim uğurlar arzulayırıq.

Ulu Öndər Heydər Əliyevin 103-cü ildönümünə həsr olunmuş abadlıq və yaşıllaşdırma aksiyası
“Mən 1993-cü ildə Bakıya gələrkən bizim əkdiyimiz, becərdiyimiz bəzi ağacların kəsilməsini görərkən elə bildim ki, məni yaralayıblar… İnsan qurmalıdır, yaratmalıdır… hər bir insan ağac əkməlidir, becərməlidir, böyütməlidir. Əgər kimsə sağlam ağacı kəsirsə, o nəinki xalqına, millətinə, ölkəsinə xəyanət edir, o, öz ailəsinə, özü-özünə xəyanət edir.”
— Heydər Əliyev, Ümummilli lider
Ulu Öndər Heydər Əliyevin anadan olmasının 103-cü ildönümü münasibətilə məktəbimizdə silsilə tədbirlər çərçivəsində yaşıllaşdırma və abadlıq aksiyası təşkil olunmuşdur. Məktəbin direktor vəzifəsini icra edən Məhəbbət Hüseynovanın rəhbərliyi ilə şagirdlər məktəbyanı ərazidə geniş abadlıq işləri aparmış, müxtəlif növ gül-çiçək kolları əkərək ərazinin daha da gözəlləşdirilməsinə töhfə vermişlər.
Aksiyanın əsas məqsədi şagirdlərdə təbiətə sevgi hissinin gücləndirilməsi, ekoloji mədəniyyətin formalaşdırılması, yaşıllıqların qorunmasının vacibliyinin aşılanması və Ümummilli Liderin təbiətə qayğı ilə bağlı ideyalarının təbliğidir. Eyni zamanda bu təşəbbüs gənc nəslin vətənə bağlılıq, məsuliyyət və yaradıcı münasibət ruhunda tərbiyə olunmasına xidmət edir.
Şagirdlər böyük həvəslə əkin işlərində iştirak etmiş, əkilən hər bir gül və ağacı gələcəyə qoyulan dəyərli töhfə kimi dəyərləndirmişlər. Onların bu fəallığı həm də kollektiv əmək vərdişlərinin inkişafına və sosial məsuliyyət hissinin möhkəmlənməsinə müsbət təsir göstərmişdir.
Keçirilən abadlıq aksiyası bir daha nümayiş etdirdi ki, Ulu Öndər Heydər Əliyevin irəli sürdüyü dəyərlər bu gün də gənc nəslin düşüncəsində yaşayır və əməli fəaliyyətlərdə öz əksini tapır. Məktəb kollektivi gələcəkdə də bu kimi təşəbbüslərin davamlı olmasını qarşıya məqsəd kimi qoyur.

Ulu Öndər Heydər Əliyevin 103 illiyinə həsr olunmuş elmi-bədii konfrans keçirildi
08. 05.2026-cı il tarixində məktəbdə Ümummilli Lider Heydər Əliyevin anadan olmasının 103-cü ildönümünə həsr olunmuş elmi-bədii konfrans təşkil olundu. “Heydər Əliyevin Azərbaycan ədəbiyyatında və müasir Azərbaycan gənclərinin formalaşmasında rolu” mövzusuna həsr edilən tədbirdə məktəbin direktor vəzifəsini icra edən Məhəbbət Hüseynova, müəllimlər, valideynlər və şagirdlər iştirak etdilər.
Konfrans boyu şagirdlər tərəfindən təqdim olunan məruzələr və bədii çıxışlar Ümummilli Liderin Azərbaycan ədəbiyyatına göstərdiyi diqqət və milli-mənəvi dəyərlərin qorunmasındakı əvəzsiz rolunu əhatəli şəkildə əks etdirdi.
Tədbirin gedişində 10-cu sinif şagirdi Mehdi Xudiyev “Heydər Əliyev və Məhəmməd Füzuli mücadiləsi” mövzusunda məruzə ilə çıxış etdi. Ardınca şagirdlərin ifasında “Sorun kim, bu nə sevdadır?” adlı təsirli bədii kompozisiya nümayiş olundu.
10-cu sinif şagirdi Vaqif Qurbanzadə “Molla Pənah Vaqif yaradıcılığına Heydər Əliyevin gözü ilə baxış” mövzusunda çıxış edərək dahi şairin irsini diqqətə çatdırdı. Tədbirdə Vaqifin şeirlərindən seçmələr səsləndirildi.
Daha sonra 10-cu sinif şagirdi Mehnaz Süleymanova “Hüseyn Cavid yaradıcılığı və Heydər Əliyev” mövzusunda məruzə ilə çıxış etdi. Şairin “İblis” əsərindən İblisin monoloqu Mehdi Xudiyev tərəfindən ustalıqla səsləndirildi. Eyni zamanda, 2-ci sinif şagirdi Türkan Quluzadə və 9-cu sinif şagirdi Tunar Muxtar ovun ifasında “Gülbahar” şeiri təqdim olundu.
8-ci sinif şagirdi Nərgiz Namazova “Bəxtiyar Vahabzadə yaradıcılığı və Heydər Əliyev” mövzusunda çıxış etdi. Ardınca şairin “Vətən marşı” əsəri 8-ci sinif şagirdi Əminə Əlizadənin ifasında səsləndirildi.
Tədbir çərçivəsində məktəbin xor kollektivi Heydər Əliyevə həsr olunmuş nəğmələri böyük ruh yüksəkliyi ilə təqdim etdi. Məktəbin Azərbaycan dili və ədəbiyyat fənn müəllimi Elnarə Zeynalova isə “Müasir Azərbaycan gəncliyinin formalaşmasında Heydər Əliyevin rolu” mövzusunda geniş məruzə ilə çıxış edərək gənclərin milli ruhda yetişməsinin əhəmiyyətini vurğuladı.
Konfransın sonunda şagirdlər “Mən fəxr edirəm ki, azərbaycanlıyam” musiqisinin sədaları altında səhnəyə toplaşaraq tədbirə duyğusal yekun vurdu.
Tədbirdə valideynlər adından çıxış edən yazar və şairə Ramilə Əlizadə Ümummilli Lider Heydər Əliyevin milli dirçəlişdəki rolundan, vətənpərvərlik ideyalarının gənc nəslə aşılanmasındakı əhəmiyyətindən bəhs etdi. O, həmçinin öz müəllifi olduğu bir neçə kitabı məktəbin kitabxanasına hədiyyə edərək bu təşəbbüsü ilə tədbirə xüsusi dəyər qatdı.
Sonda məktəbin direktor vəzifəsini icra edən Məhəbbət Hüseynova çıxış edərək tədbirin yüksək səviyyədə təşkilinə görə müəllim və şagirdlərə təşəkkürünü bildirdi. O, xüsusilə musiqi fənn müəllimi Şəlalə İsmayılovanın, Azərbaycan dili və ədəbiyyat fənn müəllimi Elnarə Zeynalovanın və tədbirdə fəal iştirak edən şagirdlərin əməyini yüksək qiymətləndirərək onları təşəkkürnamələrlə təltif etdi. Direktor çıxışında bu cür tədbirlərin gənclərin milli ruhda formalaşmasında mühüm rol oynadığını vurğuladı və iştirakçılara gələcək fəaliyyətlərində uğurlar arzuladı.

Heydər Əliyev - müstəqil Azərbaycanın qurucusudur
Məktəbin VIII-IX sinif şagirdləri arasında Ümummilli lider Heydər Əliyevin anadan olmasının 103-cü ildönümünə həsr olunmuş inşa yazı müsabiqəsi keçirilmişdir.
“Heydər Əliyev – müstəqil Azərbaycanın qurucusudur” mövzusuna həsr edilən müsabiqənin əsas məqsədi şagirdlərdə vətənpərvərlik hisslərinin gücləndirilməsi, milli dövlətçilik ideyalarına bağlılığın artırılması və ümummilli liderin zəngin siyasi irsinin daha dərindən öyrənilməsinə şərait yaratmaq olmuşdur.
Şagirdlər öz yazılarında Heydər Əliyevin Azərbaycan dövlətinin möhkəmlənməsində, müstəqilliyin qorunub saxlanılmasında və ölkənin inkişaf yolunun müəyyənləşdirilməsində göstərdiyi misilsiz xidmətləri geniş şəkildə əks etdirmişlər.

Heydər Əliyevin xatirəsinə dəyirmi masa təşkil edilmişdir
Heydər Əliyevin anadan olmasının 103-cü ildönümünə həsr olunmuş tədbirlər planına uyğun olaraq məktəbimizdə növbəti maarifləndirici tədbir təşkil edilmişdir.
Tarix fənn müəllimləri Gülgəz Süleymanova və Hafiz Azayevin təşəbbüsü ilə keçirilən dəyirmi masa şagirdlərin böyük marağı ilə qarşılanmışdır. Tədbir zamanı Ulu Öndərin həyat və fəaliyyətinə həsr olunmuş videoçarx izlənilmiş, Hafiz müəllim tərəfindən təqdim olunan maraqlı faktlar və tarixi məlumatlar iştirakçılar tərəfindən diqqətlə dinlənilmişdir.
Daha sonra şagirdlər hazırladıqları təqdimatlarla çıxış etmiş, Heydər Əliyevin siyasi fəaliyyəti, dövlətçilik ideyaları və Azərbaycan tarixindəki müstəsna rolu haqqında topladıqları məlumatları bölüşmüşlər. Onların fəal iştirakı və sərbəst təqdimat bacarıqları tədbirə xüsusi rəng qatmışdır.
Tədbirin əsas məqsədi şagirdlərdə tariximizə və milli dəyərlərimizə marağın artırılması, ümummilli liderin zəngin irsinin daha dərindən öyrənilməsi, eyni zamanda tədqiqat və təqdimetmə bacarıqlarının inkişaf etdirilməsi olmuşdur.
Belə maarifləndirici tədbirlər şagirdlərin vətənpərvərlik ruhunda formalaşmasına, onların milli kimliyə bağlılığının möhkəmləndirilməsinə mühüm töhfə verir.

Nə? Harada? Nə zaman? intellektual oyunu keçirilib
Ulu öndər Heydər Əliyevin anadan olmasının 103-cü ildönümünə həsr olunmuş “Nə? Harada? Nə zaman?” intellektual oyunu məktəbimizdə yüksək səviyyədə təşkil olunaraq böyük maraqla qarşılanmışdır.
Tədbirin əsas məqsədi şagirdlərin intellektual inkişafını dəstəkləmək, onların dünyagörüşünü genişləndirmək, məntiqi təfəkkürünü inkişaf etdirmək və komanda ruhunu gücləndirmək olmuşdur. Yarışda müxtəlif sinifləri təmsil edən komandalar iştirak edərək biliklərini, çevik düşünmə və düzgün qərarvermə bacarıqlarını uğurla nümayiş etdirmişlər.
İntellektual yarış iki yaş kateqoriyası üzrə təşkil edilmişdir. 6–8-ci sinif şagirdləri birinci, 9–10-cu sinif şagirdləri isə ikinci kateqoriya üzrə mübarizə aparmışlar. Yarış boyunca iştirakçılar verilən sualları böyük həvəslə cavablandıraraq maraqlı və gərgin mübarizə şəraitində biliklərini sınamışlar. Nəticədə hər iki kateqoriya üzrə qalib komandalar müəyyən olunmuş, onlar medal və diplomlarla təltif edilmişlər.
Tədbirdə məktəb rəhbərliyi, müəllimlər və şagirdlər iştirak edərək komandaları yaxından dəstəkləmiş, yarış yüksək əhval-ruhiyyə və sağlam rəqabət mühiti ilə yadda qalmışdır.
Sonda çıxış edən məktəbin direktor vəzifəsini icra edən Məhəbbət Hüseynova iştirakçıları təbrik edərək onlara gələcək yarışlarda uğurlar arzulamış, bu cür intellektual tədbirlərin gənclərin hərtərəfli inkişafında mühüm rol oynadığını xüsusi vurğulamışdır.

Heydər Əliyevin anadan olmasının 103-cü ildönümünə həsr olunmuş dəyirmi masa təşkil olunub
Məktəbdə Heydər Əliyevin anadan olmasının 103-cü ildönümünə həsr olunmuş silsilə tədbirlər uğurla davam edir. Bu çərçivədə şagirdlərin maarifləndirilməsi və milli dəyərlərə bağlılığının gücləndirilməsi məqsədilə məktəbin kitabxanasında dəyirmi masa təşkil olunmuşdur.
Tədbirdə çıxış edən məktəbin direktor vəzifəsini icra edən Məhəbbət Hüseynova Ulu Öndərin zəngin və şərəfli həyat yolu, dövlətçilik ideyaları və Azərbaycan xalqı qarşısındakı misilsiz xidmətləri barədə ətraflı məlumat vermişdir. Bildirilmişdir ki, Heydər Əliyevin irsi bu gün də gənc nəslin vətənpərvərlik ruhunda tərbiyəsində mühüm rol oynayır.
Dəyirmi masa zamanı şagirdlər tərəfindən Ulu Öndərə həsr olunmuş şeirlər səsləndirilmiş, onun fəaliyyəti ilə bağlı maraqlı məlumatlar təqdim edilmişdir. Şagirdlərin fəal iştirakı ilə keçən tədbir onların tariximizə və milli-mənəvi dəyərlərimizə marağının artırılmasına xidmət etmişdir. Bu kimi maarifləndirici tədbirlərin keçirilməsi məktəbdə vətənpərvərlik tərbiyəsinin gücləndirilməsi istiqamətində atılan mühüm addımlardan biridir.

Ulu öndər Heydər Əliyevin xatirəsinə həsr olunmuş sərgi
Məktəbdə ulu öndər Heydər Əliyevin anadan olmasının 103-cü ildönümü münasibətilə şagirdlərin əl işlərindən ibarət sərgi təşkil olunmuşdur.
Sərgidə şagirdlər tərəfindən texnologiya dərslərində hazırlanmış müxtəlif maketlər və yaradıcı işlər nümayiş etdirilmişdir. Şagirdlər bu işləri böyük həvəslə və xüsusi maraqla hazırlayaraq həm yaradıcılıq bacarıqlarını, həm də əməksevərliklərini nümayiş etdirmişlər.
Təqdim olunan əl işləri ulu öndərin zəngin irsinə olan hörmət və ehtiramın ifadəsi olmaqla yanaşı, şagirdlərin vətənpərvərlik ruhunda formalaşmasına da töhfə verir.
Belə tədbirlərin keçirilməsi şagirdlərdə milli-mənəvi dəyərlərə bağlılığın gücləndirilməsi və onların hərtərəfli inkişafı baxımından mühüm əhəmiyyət daşıyır.

Yubiley təbriki
Məktəbin ingilis dili fənn müəllimi Sevinc Əliyevanın 50 illik yubileyi münasibətilə məktəbin direktor vəzifəsini icra edən Məhəbbət Hüseynova təbrik edərək ona ən xoş arzularını çatdırmışdır. Sevinc Əliyevanın təhsil sahəsindəki uzunillik səmərəli fəaliyyəti, şagirdlərin inkişafına verdiyi dəyərli töhfələr xüsusi vurğulanmışdır. Bu münasibətlə müəlliməyə gül dəstəsi təqdim olunmuş, həmçinin onun əməyinin yüksək qiymətləndirilməsi olaraq fəxri fərmanla təltif edildiyi bildirilmişdir.