Olympus Hazırlıq Kursu

Göydən düşən işığın, istiliyin bəşər oğlunun doğuluşunun əzəlində, mayasında mövcud olduğunun sübutu insanın təbiətə tapınmasıdır. Əbəs deyil ki, İşığın mənbəyinə-Günəşə, Aya, Ulduzlara tapınan insan həmişə ümidini göylərə bağlamış, təsəllini göylərdə aramış və əllərini göyə qaldırıb göy üzündən pənah diləmişdir. Bəşər göyə məxsus işığı odun kəşfi ilə əbədiləşdirildi və tonqalla rəmziləşdirdi. İnsanların ocaq başına toplaşması əbədi işıqdan varlığına nur çəkməsinin Yerdəki nişanəsidir. Ocağın Vətənləşməsi, Dədə-baba yurdunu-lap başlanğıcı ehtiva etməsi, əski Türk təqviminin ilk ayının "Ocaq" adlandırılması da məhz bu inancla bağlıdır.

İşıq, istilik Xeyrin, Qaranlıq, soyuq isə Şərin əlaməti sayılır. Xeyrin zamanı Yazın gəlişi ilə başlayır. Novruz-Yaranış, Oyanış, Yenilənmə, Yaranmışın xislətindəki Xeyrə meylin, Şükran duyğusunun təntənəsidir!

"Novruz Bayramı"nız mübarək!

Dövlət İmtahan Mərkəzi tərəfindən ali və orta ixtisas təhsili müəssisələrinə qəbul olmaq istəyən, lakin martın 17-dək elektron ərizəsini təsdiq etməyən abituriyentlərə qeydiyyatdan keçmək üçün əlavə imkan yaradılacaq.

XI sinfi bu il bitirən bütün abituriyentlər üçün elektron ərizə qəbulu proqramı aprel-may aylarında aktiv olunacaq.

Bundan əlavə, keçən il buraxılış imtahanı (qəbul imtahanının birinci mərhələsi) vermiş abituriyentlər üçün də elektron ərizə qəbulu proqramı yenidən aktiv olunacaq. Həmin abituriyentlər I, II, III və IV qruplardan hər hansı birini seçdikləri halda imtahanın birinci mərhələsinin nəticəsi kimi keçən il topladıqları bal nəzərə alınacaq. Keçən il buraxılış (qəbul imtahanının birinci mərhələsi) imtahanından topladıqları balı müvafiq müsabiqə şərtini ödəyənlər V qrupu və ya kollecləri də seçib həmin nəticə ilə müsabiqədə iştirak edə biləcəklər.

Keçən il buraxılış imtahanı (qəbul imtahanının birinci mərhələsi) vermiş və çağırış yaşı tamam olan oğlan abituriyentlərin çağırışdan möhlət hüququnun olması və ya çağırışdan azad edilməsi barədə məlumatı Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) elektron-məlumat bazasında əks olunduğu halda onlar da qeydiyyatdan keçə biləcəklər.

Ərizə qəbulu proqramının aktiv olunma tarixləri barədə əlavə rəsmi məlumat veriləcək.

Hörmətli izləyicilərimiz!

"Novruz Bayramı" münasibətilə Kursumuzda 21, 22, 23 Mart tarixləri qeyri-iş günləridir. 24 Mart 2022-ci il iş günüdür.

Hər kəsə xoş istirahət və tükənməz iş əzmi arzu edirik!

Ali və orta ixtisas təhsili müəssisələrinə tələbə qəbulu ilə bağlı ərizələrin qəbulu 2022-ci il martın 4-də başlayıb və bu gün saat 23:59-da başa çatır.

Ərizəsini Sənəd Qəbulu Komissiyasında təsdiq etdirməli olan abituriyentlər tələb olunan sənədləri şəxsən təqdim etməklə saat 17:00-dək elektron ərizələrini müvafiq SQK-larda təsdiq etdirə bilərlər.

✅ 16.04.2022
Sabunçu, Sumqayıt (I hissə), Gəncə (Kəpəz), Qax, Balakən, Lənkəran, Ağdam, Tərtər, İsmayıllı, İmişli, Qusar, Biləsuvar, Gürcü bölməsində təhsil alanlar.

✅ 17.04.2022
Binəqədi, Səbail, Abşeron (I hissə), Gəncə (Nizami), Oğuz, Zaqatala, Astara, Ağcəbədi, Şamaxı, Saatlı, Şabran, Siyəzən, Xızı.

✅ 23.04.2022
Qaradağ, Yasamal, Sumqayıt (II hissə), Goranboy, Naftalan, Tovuz, Cəlilabad (I hissə), Beyləqan, Ağdaş, Ağsu, Şirvan, Xaçmaz (I hissə), Qobustan, Hacıqabul.

✅ 24.04.2022
Xəzər, Xətai, Abşeron (II hissə), Mingəçevir, Şəmkir, Masallı (I hissə), Füzuli, Ucar, Zərdab, Neftçala, Quba (I hissə)

✅ 30.04.2022
Nəsimi, Nərimanov, Naxçıvan MR, Göygöl, Daşkəsən, Qazax, Gədəbəy, Cəlilabad (II hissə), Lerik, Şəki, Bərdə, Göyçay, Sabirabad, Xaçmaz (II hissə).

✅ 01.05.2022
Suraxanı, Nizami, Pirallahı, Samux, Ağstafa, Masallı (II hissə), Yardımlı, Qəbələ, Yevlax, Kürdəmir, Salyan, Quba (II hissə), *Bakı xüsusi məktəblər, Çilov, ingilis və fransız bölmələrində təhsil alanlar.

📍Qeyd 1: Məcburi köçkün rayonlarından olan şagirdlər buraxılış imtahanını orta ümumtəhsil müəssisəsinin yerləşdiyi şəhərdə (rayonda) yuxarıdakı qrafikə uyğun verəcəklər.

📍Qeyd 2: Sumqayıt, Abşeron, Cəlilabad, Xaçmaz, Masallı, Quba rayonlarında yerləşən məktəblərin şagirdlərinin imtahanı iki imtahan gününə bölünüb. Cədvəldə bu hal müvafiq olaraq, "hissə"lərlə adlandırılıb. Həmin gün hansı məktəblərin şagirdlərinin imtahan verməsi haqqında məlumat imtahandan 10 gün əvvəl DİM-in saytında yerləşdirilən qrafikə əlavə ediləcək.

📍Qeyd 3: Bakı şəhərində yerləşən xüsusi məktəblərin – internat məktəbləri, tədrisi ingilis və fransız dilində olan məktəblər, Çilov adasında yerləşən məktəb, cəzaçəkmə müəssisələrində olan məktəblərin şagirdləri üçün imtahan mayın 1-də, keçiriləcək. Gürcü bölməsi üzrə məzun olanlar isə imtahanı aprelin 16-da verəcəklər.

Səfərbərlik və Hərbi Xidmətə Çağırış üzrə Dövlət Xidməti tərəfindən “2022/2023-cü tədris ili üzrə Azərbaycan Respublikasının ali təhsil müəssisələrinin bakalavriat səviyyəsinə qəbul üzrə müsabiqədə iştirak etmək üçün müraciət edən Azərbaycan Respublikasının kişi cinsli vətəndaşlarının hərbi vəzifə ilə bağlı öhdəlikləri barədə məlumatların verilməsi Qaydası”nda müəyyən dəyişiklik edilib.

Dəyişikliyin əsas mahiyyəti ondan ibarətdir ki, yeni qaydalara görə artıq 18 yaşı 30 aprel 2022-ci il tarixdən sonra tamam olacaq əvvəlki ilin oğlan abituriyentləri ali təhsil müəssisələrinə tələbə qəbulu üzrə müsabiqədə iştirak etmək üçün “Abituriyentin elektron ərizəsi”ni təsdiq edə bilərlər.

Ərizə qəbulu ilə bağlı qaydalar ümumi olaraq aşağıdakı kimidir:

1987-2004-cü il təvəllüdlü (01.05.2004-cü il tarixədək anadan olmuş) kişi cinsli abituriyentlərin elektron ərizələrinin təsdiqi üçün onların ya müddətli həqiqi hərbi xidmət keçməsi, ya çağırışdan möhlət hüququnun olması və ya çağırışdan azad edilməsi barədə məlumat Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) elektron-məlumat bazasında əks olunmalıdır.

Azərbaycan Respublikasının ümumi təhsil müəssisələrini cari ildə bitirən abituriyentlərin, yuxarıda qeyd olunduğu kimi 30 aprel 2004-cü il tarixdən sonra doğulmuş əvvəlki ilin məzunu olan abituriyentlərin və 35 yaşı tamam olmuş abituriyentlərin elektron ərizələri SHXÇDX-in elektron-məlumat bazasına sorğu verilmədən təsdiq edilir.

Hərbi qeydiyyatın aparılması Azərbaycan Respublikasının SHXÇDX tərəfindən təsdiq edilən qaydalarla tənzimlənir.

❓ SUAL: III qrupda TC altqrupunu seçən abituriyentlər coğrafiya fənni üzrə imtahandan çox aşağı nəticə əldə edərlərsə, həmin altqrupa daxil olan “Beynəlxalq münasibətlər” və “Regionşünaslıq” ixtisaslarını seçə bilərlər?

✅ CAVAB: Bəli, TC altqrupunu seçən və ümumi müsabiqə şərtini ödəyən abituriyentlər coğrafiya fənni üzrə imtahandan topladıqları baldan asılı olmayaraq, qeyd olunan ixtisasları seçə biləcəklər. Ümumiyyətlə, ali təhsil müəssisələrinə qəbul imtahanlarında ayrı-ayrı fənlər üzrə bal məhdudiyyəti tətbiq olunmur.

Ali təhsil müəssisələrinə və 11 illik bazada kolleclərə tələbə qəbulu ilə bağlı həm cari, həm də əvvəlki illərin məzunları üçün ərizələrin qəbulu martın 4-dən 17-dək internet vasitəsilə aparılır.

Abituriyent (şəxsi kabineti olmayan) ilk olaraq internet saytımıza daxil olub “Şəxsi kabinet” yaradır. Bundan sonra saytımızın baş səhifəsində yerləşdirilmiş “Abituriyentin elektron ərizəsi” banerinə daxil olur və “Abituriyent üçün giriş” bölməsində “Şəxsi kabinet”in istifadəçi adı və parolunu müvafiq sahələrə qeyd edib “Daxil ol” düyməsini basır. Ekranda abituriyentə aid məlumatlar “Şəxsi məlumatlar”, “Əlaqə məlumatları”, “Təhsil məlumatları” və “Elektron ərizə” bölmələri altında göstərilir. “Şəxsi məlumatlar”, “Əlaqə məlumatları” bölmələrində abituriyentin şəxsi kabinetindəki məlumatlar əks olunur. Ərizənin hər bir bölməsindəki məlumatların tam olub-olmaması, bölmə başlığındakı qeyd işarəsinin yaşıl və ya qırmızı olması ilə seçilir. Abituriyent məlumatları təsdiq olunmayan bölmələri doldurmalı və yadda saxlamalı, məlumatların doğruluğuna əmin olduqdan sonra “Təsdiq et” düyməsini basmaqla onları təsdiq etməlidir.

Diqqət tələb edən əsas bölmələrdən biri test imtahanı haqqında məlumatlar bölməsidir. Bu bölmədə abituriyent üç istiqamətdən birini və ya bir neçəsini seçə bilər:
1. Ali təhsil müəssisəsinin I, II, III və IV ixtisas qrupu üzrə test imtahanında iştirak etmək istəyirəm;
2. Ali təhsil müəssisəsinin V ixtisas qrupu üzrə müsabiqədə (test imtahanında) iştirak etmək istəyirəm;
3. Tam orta təhsil bazasında orta ixtisas təhsili müəssisələri üzrə müsabiqədə (test imtahanında) iştirak etmək istəyirəm.

Abituriyent öz seçimlərini etdikdən sonra “Yadda saxla” düyməsini basır. Daha sonra isə “Elektron ərizəni təsdiq et” düyməsini basmaqla ərizə təsdiq edilməlidir. Ərizəni təsdiq etməzdən əvvəl bir daha seçimlərə nəzər salmağı və onların doğruluğuna əmin olduqdan sonra ərizəni təsdiq etməyi tövsiyə edirik.

Ərizənin təsdiqi DİM-in məlumat bazasında abituriyent barədə olan məlumatların yetərli olub-olmamasından asılı olaraq iki üsulla həyata keçirilir (ərizənin hansı üsulla təsdiq ediləcəyi barədə məlumat proqram tərəfindən “Abituriyentin elektron ərizəsi” forması təsdiq edilənədək ərizəyə hər dəfə daxil olarkən ekranda göstərilir). Ərizəsini SQK-da təsdiq etdirməli olan abituriyentlər martın 17-dək tələb olunan sənədləri (sənədlərin siyahısı ərizə qəbulu səhifəsinə yerləşdirilmiş qəbul elanında var) şəxsən təqdim etməklə elektron ərizələrini aşağıdakı ünvanlarda yaradılmış SQK-larda təsdiq etdirə bilərlər.

1. DİM-in Bakı şəhərində yerləşən inzibati binaları:
- Bakı ş., Nəsimi r., Abdulvahab Salamzadə küç., 28
- Bakı ş., Nərimanov r., Koroğlu Rəhimov küç., 108A

2. DİM-in Naxçıvan, Gəncə , Lənkəran, Xaçmaz, Şəki, Şirvan, Göyçay, Bərdə və Şəmkir regional bölmələri.

Elektron ərizəni təsdiq etdikdən sonra hər hansı bir səhv olduğunu aşkar edən abituriyentlər ərizəni özləri bir dəfə ləğv edib yenidən doldurub təsdiq edə bilərlər. Bunun üçün “Abituriyentin elektron ərizəsi” banerində “Elektron ərizənin ləğvi” hissəsinə daxil olmaq lazımdır.

Elektron ərizəni təsdiq etmək üçün ödəniş etməli olan abituriyentlər vəsaiti “Şəxsi kabineti”in hesabına əlavə etməlidirlər. Bunun üçün epayment.dim.gov.az saytında göstərilən ödəniş üsullarından istifadə etmək lazımdır. Abituriyent “Şəxsi kabinet”in hesabına vəsait qoymazdan əvvəl elektron ərizədə onun təsdiq edilməsi üçün hansı məbləğdə vəsaitin tələb olunmasını müəyyən etməli, yalnız bundan sonra tələb olunan məbləği “Şəxsi kabinet”in hesabına əlavə etməlidir. Tələb olunan məbləğ barədə məlumat sistem tərəfindən abituriyentə təqdim olunur.

Elektron ərizənin doldurulmasında çətinlik çəkən abituriyentlər DİM-in regional bölmələrində, Qərbi Kaspi, Azərbaycan, Bakı Biznes, Odlar Yurdu Universitetlərində abituriyentlərə kömək etmək məqsədilə yaradılmış və ödənişsiz əsaslarla fəaliyyət göstərən “Abituriyent Məsləhət Mərkəzləri”nə müraciət edə bilərlər.

Dünyanın paytaxtı qadın qəlbidir,
Günəştək nur səpir eşqi cahana ... .