Fakültə 1920-1930-cu illərdə «Neft sənaye» fakültəsi adı altında fəaliyyətə başlamışdır. 1930-1936-cı illərdə «Neft-mədən (Dağ-mədən)», 1936-1940-cı illərdə «Dağ-neft və neft texnologiyası», 1940-1979-cu illərdə «Neft-Mədən», 1979 ildən hal-hazırki zamana qədər isə «Qaz-neft-mədən» fakültəsi adları altında fəaliyyət göstərmiş və fəaliyyət göstərməkdə davam edir. Fakültənin yaranmasında görkəmli al
im və pedaqoqlar olan akademik L.S.Leybenzon, N.S.Uspenskiy, A.R.Serebrovskiy, Q.R.Derinq, professor B.S.Dombrovskiy, professor R.İ.Şişşenko, akademiklər: A.X.Mirzəcanzadə, S.M.Quliyev, M.P.Quluzadə və başqaları fəal iştirak etmişlər. Yarandığı ildən bu günə qədər fakültənin dekanı vəzifəsini ardıcıl olaraq müxtəlif dövrlərdə B.S.Dombrovskiy, L.S.Leybenzon, M.V.Abromoviç, A.İ.Beskin, Q.A.İbatulov, T.Z.İzmaylov, K.B.Şahbazbəyov, A.Q.Məmmədov, Z.M.Əhmədov, İ.X.Məmmədov, A.M.Əzizov, T.Ə.Səmədov, Q.Q.İsmayılov icra etmişlər. Hal-hazırda fakültənin dekanı vəzifəsini dosent V.T.Mustafayev icra edir. Yarandığı gündən indiyədək fakültədə 14 mindən çox ali təhsilli neft və qaz üzrə mütəxəssis kadrlar hazırlanmışdır. O cümlədən 2955 nəfərə yaxın bakalavr, 375 nəfər magistr.
1997-ci ildən fakültədə bakalavr və magistr proqramları üzrə mütəxəssis hazırlığına başlanmışdır. Bakalavr təhsil pilləsində aşağıdakı istiqamətlər və ixtisaslar üzrə mütəxəssis hazırlığı aparılır.
- «Neft-qaz və dağ-mədən istehsalatının fiziki prosesləri» («Neft-qaz və dağ-mədən istehsalatının fiziki prosesləri» ixtisası);
- «Faydalı qazıntı yataqlarının işlənməsi» («Açıq dağ-mədən işləri», «Neft-qaz yataqlarının işlənməsi və istismarı», «Qaz və neft kəmər və anbarlarının layihələndirilməsi, tikintisi və istismarı», «Neft və qaz quyularının qazılması» və «Dəniz neft-qaz qurğuları» ixtisasları)
Magistr təhsil pilləsi üzrə aşağıdakı istiqamətlər və ixtisaslaşmalar üzrə mütəxəssis hazırlığı aparılır.
- Neft-qaz və dağ-mədən istehsalatının fiziki prosesləri («Neft-qaz və dağ mədən istehsalının fiziki prosesləri» ixtisaslaşması);
- Faydalı qazıntı yataqlarının işlənməsi («Açıq dağ-mədən işləri», «Neft-qaz yataqalırının işlənməsi və istismarı», «Qaz və neft kəmərləri və anbarlarının layihələndirilməsi», «Qaz və neft kəmərlərinin və anbarlarının tikilməsi» «Quruda neft və qaz quyularının qazılması», «Dənizdə neft və qaz quyularının qazılması» və «Dəniz neft-qaz qurğuları» ixtisaslaşmaları).
2009-cu ildən fakültədə Avropa Kredit Transfer sisteminə uyğun olaraq, aşağıdakı ixtisaslar üzrə mütəxəssis hazırlığına başlanmışdır:
- Dağ-mədən mühəndisliyi;
- Neft-qaz mühəndisliyi;
- Neft-qaz qurğuları mühəndisliyi. ADNA-nın rəhbərliyinin göstərdiyi qayğı sayəsində fakültənin bütün ixtisas kafedraları İnternet Şəbəkəsinə qoşulmuşdur ki, bu da öz növbəsində tələbələrin müasir tələblərə uyğun kurs və buraxılış işlərinin yerinə yetirilməsində yaxşı nəticələr göstərmişdir.
2011-ci ildən etibarən isə aşağıdakı 2 ixtisas üzrə mütəxəssis hazırlığına başlanmışdır:
- Neft-qaz mühəndisliyi; (İstiqamət: «Neft-qaz yataqlarının işlənməsi və istismarı» «Neft və qaz quyularının qazılması» «Neft-qaz sənayesində əməyin mühafizəsi və təhlükəsizlik texnikasıı» )
- Neft-qaz qurğuları mühəndisliyi. (İstiqamət: «Dəniz neft-qaz qurğuları» «Neftin-qazın nəqli və saxlanılması» )
Hal-hazırda bakalavr təhsil pilləsində əyani şöbədə 933 nəfər, qiyabi şöbədə isə 172 nəfər tələbə, magistratura pilləsində isə 59 nəfər tələbə təhsil alır. Fakültənin bakalavr təhsil pilləsinin məzunlarının 12 nəfəri Norveç Krallığında, Almaniya Respublikasında, Türkiyə Respublikasında, İngiltərə Krallığında və ABŞ-da təhsillərini magistratura pilləsində davam etdirirlər. Fakültə məzunilarına Azərbaycan Respublikasında fəaliyyət göstərən xarici Neft şirkətləri (BP-Azərbaycan, Stat Oyl, Şlümberje, KSA-DEUTAC, AMEC, Xəzər-Qazma İşlər İdarəsi, Halliberton) maraq göstərərək, onların xarici dil öyrənməsində yardımçı olaraq, gələcəkdə onları öz şirkətlərində işlə təmin edirlər. Fakültədə təhsil alan ən bacarıqlı tələbələr, təhsil aldıqları ixtisas kafedralarında apardıqları elmi araşdırmaların nəticələrini ADNA-da ənənəvi aparılan tələbələrin elmi texniki konfranslarında məruzə edirlər. Fakültənin struktur tərkibinə aşağıdakı kafedralar aiddir.
- Faydalı qazıntı yataqlaının işlənməsi (Kafedra müdirinin vəzifəsini dosent Mustafayev V.T. icra edir)
- Neft və qaz quyularının qazılması (kafedra müdiri – professor Məmmədtağızadə Ə.M.)
- Neft yataqlarının işlənməsi və istismarı ( kafedra müdiri – professor Salavatov T.Ş.)
- Qaz və qaz kondensat yataqlarının işlənməsi və istismarı (kafedra müdiri professor Səmədov T.Ə.)
- Neftin, qazın nəqli və saxlanması (kafedra müdiri – millət vəkili professor Mirələmov H.F.)
- Hidravlika (kafedra müdiri – professor Əhmədov Z.M.)
- Əməyin mühayizəsi (kafedra müdiri – dosent Rəsulov S.R.)
- Rus dili ( kafedra müdiri – dosent Qasımova E.Ə.) Fakültənin tərkibində 16 tədris laboratoriyası, 5 kompüter sinfi, 5 problem laboratoriyaları («Neftçıxarmanın texnika və texnologiyası», «Dəniz neft yataqlarının işlənməsi », «Maili və horizontal quyuların qazılmasının texnika və texnologiyası», «Lay və karbohidrogen sistemlərinin qazotermodinamiki təhlili», «Neft hidravlikası») fəaliyyət göstərirlər. Fakültədə çox dərin maili horizontal quyuların qazılma texnologiyasının, neft və qaz yataqlarının işlənməsinin optimallaşdırılmasının, layların qaz-neft veriminin artırılması üsullarının, qaz-neft kəmərlərinin və anbarlarının layihələndirilməsinin tikintisinin və istismarının, mədən daxili avadanlıqlarının optimal yerləşdirilməsinin, quyu məhsulunun itkisiz yığılması və istehlakçılara çatdırılmasının problemlərinin həllinə və faydalı qazıntı yataqlarının işlənməsində dağ-mədən proseslərinin tədqiqi və təkmilləşdirilməsi sahəsinə yönəldilmiş elmi-tədqiqat işləri aparılır. Fakültədə 1 nəfər Azərbaycan Respublikasının Parlamentinin Millət vəkili, 17 elmlər doktoru, professorlar, 75 elmlər namizədi, dosentlər fəaliyyət göstərirlər. Fakültə tədris və elmi-tədqiqat işləri sahəsində Almaniya, ABŞ, Bolqarıstan, Vyetnam, İngiltərə, Macarıstan, Polşa, Rumınya, Suriya, Misir Ərəb Respublikası, Türkiyə, Fransa və MDB ölkələrini elm və təhsil müəssisələri ilə əlaqə saxlayır. Fakültədə aşağıdakı ixtisaslar üzrə Elmlər Doktoru və Elmlər Namizədi Alimlik dərəcəsini almaq üçün D.02.141 nömrəli Dissertasiya Şurası fəaliyyət göstərir.
- «Quyuların qazılması texnologiyası»-texnika elmləri
- «Neft və qaz yataqlarının işlənməsi və istismarı» - texnika elmləri
- «Neft və qaz kəmərlərinin, bazalarının və ambarlarının tikilməsi və istismarı» - texnika elmləri
- «Maşınlar, aqreqatlar və proseslər» - texnika elmləri.
