02/09/2026
🇦🇿 Şəhid Elşən Müslümovun cənnətdəki 6-cı doğum günüdür
Bu gün — 2 sentyabr, ADMİU nəzdində Humanitar Kollecin şəhid məzunu Elşən Habil oğlu Müslümovun doğum günüdür.
Bu münasibətlə ADMİU nəzdində Humanitar Kollecin müəllim və tələbə heyəti, PHŞ-ın Həmkarlar İttifaqı Komitəsinin dəstəyi ilə şəhidin məzarını ziyarət edib.
Ziyarət zamanı şəhidin məzarı üzərinə tər qərənfillər və qızılgüllər qoyulub, ruhuna dualar oxunub.
Elşən Habil oğlu Müslümov 2 sentyabr 1995-ci ildə Bakı şəhərində anadan olub.
2011-ci ildə Bakı şəhəri Yasamal rayonundakı 286 nömrəli tam orta məktəbi bitirərək həmin il Bakı Humanitar Kollecinə qəbul olunub. Elşən Müslümov kollecin “Turizm və otellərin idarə olunması” ixtisasının ilk məzunlarından olub.
2014-cü ildə həqiqi hərbi xidmətə yollanan Elşən Müslümov xidmət zamanı fərqlənərək çavuş rütbəsi alıb, fəxri fərman və təşəkkürnamələrlə təltif edilib.
II Qarabağ müharibəsi başlayan zaman könüllü olaraq cəbhəyə yollanan Elşən Müslümov gizir rütbəsi ilə döyüşlərə qatılıb. O, Suqovuşan uğrunda gedən döyüşlərdə qəhrəmancasına şəhid olub. Elşəndən Vətənə əmanət bir qız övladı qalıb.
Azərbaycanın ərazi bütövlüyünün bərpası uğrunda göstərdiyi igidliyə görə Elşən Müslümov ölümündən sonra “Vətən uğrunda”, “Suqovuşanın azad olunmasına görə” və “Cəsur döyüşçü” medalları ilə təltif edilib.
🕊️ 8 iyul 2021-ci ildə Abşeron rayonu Hökməli qəsəbəsində şəhid çavuş Elşən Müslümovun xatirə lövhəsi və barelyefi açılıb.
Bundan əlavə, onun doğulub boya-başa çatdığı Ağsu rayonunun 4 nömrəli tam orta məktəbində bir sinif otağına Elşən Müslümovun adı verilib.
Şəhid Elşən Müslümov II Fəxri xiyabanda dəfn olunub.
📌 Qeyd: Şəhidin məzar daşında şəhadət tarixi 9 oktyabr 2020-ci il kimi göstərilsə də, ailəsi hər il 19 oktyabr tarixində onun şəhadət gününü qeyd edir.
Elşən Müslümovun əziz xatirəsi daim yaşayacaq.
🕊️ Ruhu şad olsun! Allah bütün şəhidlərimizə rəhmət eləsin!
