AzMIU ST və MKS fakultəsi

Qazaxıstanlı professor tələbələrə master-klass keçmişdir

Azərbaycan Memarlıq və İnşaat Universitetinin "Meliorasiya və su təsərrüfatı tikintisi" kafedrasında ezamiyyətdə olan Qazaxıstan Respublikasının Qızılorda Universitetinin professoru Emirbek Umbetulı universitet tələbələri üçün "Urbanizasiya və su ehtiyatlarının rəqəmsallaşdırılması" mövzusunda master-klass keçmişdir.

Tədbir çərçivəsində professor Emirbek Umbetulı urbanizasiya proseslərinin su ehtiyatlarına təsiri, müasir idarəetmə yanaşmaları, rəqəmsal platformalar vasitəsilə su resurslarının monitorinqi və modelləşdirilməsi kimi aktual məsələlərə toxunmuşdur. O, Qazaxıstan təcrübəsi əsasında real nümunələr təqdim edərək, tələbələrin mövzuya olan marağını artırmış və geniş diskussiya mühiti yaratmışdır.

Master-klass iştirakçılar tərəfindən böyük maraqla qarşılanmış, su ehtiyatlarının səmərəli idarə olunması və rəqəmsallaşdırılması istiqamətində yeni baxış bucaqları təqdim olunmuşdur.
Daha sonra mövzu ətrafında diskusiya aparılmışdır və sonda xatirə şəkli çəkdirilmişdir.

BİR PEDAQOQUN İŞIQLI HƏYAT YOLU

Svetlana Səttar qızı Mollayeva

Bəşər övladı yarandığı gündən bugünədək cəmiyyətlər öz inkişaf dövrlərində müəyyən mərhələlərdən keçmiş, tikmiş, qurmuş, yaratmışlar. Məhz Müqəddəs kitabımız “Qurani – Kərim”in də hərfi mənası “quran”, “tikən”, “yaradan” anlamına gəlir və bu proseslərin həyata keçməsində “Müəllimlik” peşəsi başlıca rol oynayır. Xalq arasında belə bir fikir də mövcuddur ki, müəllim dəyişəndə cəmiyyət də dəyişir. Bu, onunla bağlıdır ki, insanların fikir və düşüncələrinin, həyata baxışlarının formalaşmasında, dəyişməsində müəllim müstəsna rol oynamaqla bütün cəmiyyətin şüurunda dəyişiklik yaratmaq gücünə malikdir: Əlbəttə, tanınmış insanların, böyük alim və mütəfəkkirlərin belə deyimləri kifayət qədərdir. Müxtəlif dövrlərdə yaşamış müdriklərin müəllim haqqında deyimləri göstərir ki, dövründən asılı olmayaraq, həmişə əsl Müəllim milli sərvət kimi qəbul edilmişdir. Cəmiyyətin gələcək inkişaf mərhələlərində hansı dəyərlərin əsas kimi qəbul ediləcəyini, hansı yeni dəyərlərin yaranacağını indidən demək çətindir. Lakin bir şey aydındır ki, müəllim və tələbələr həmişə olub və qətiyyətlə demək olar ki, yeganə dəyərdir ki, zamandan asılı olmayaraq, daim olacaqdır. Çünki insan bilik və təcrübənin yeni nəsillərə ötürülməsi ilə sivilizasiyanın yüksək zirvəsinə çata bilər. Həmin təcrübəni nəsillərə ötürmək missiyası isə müəllimin üzərinə düşür, müəllim gələcəyə yol açır. Müəllim peşəsini digərlərindən fərqləndirən daha bir cəhət ondan ibarətdir ki, bütün insanlar müəllimdən öyrənir. Elə bir insan tapılmaz ki, onun müəllimi olmasın. Dünyanı dəyişən, idarə edən, tarixi yaradan dahi şəxsiyyətləri də müəllim yetişdirib. Müəllimlik yeganə peşədir ki, həyatda onun heç bir alternativi yoxdur. On illər, yüz illər ötəcək, cəmiyyət və həyat daha yüksək inkişaf mərhələsinə çatacaq, lakin müəllim peşəsi yenə də bütün peşələrin zirvəsində dayanacaqdır. Təsadüfi deyildir ki, əsl müəllimlər üçün başqa peşə olmur, onlar heç bir zaman öz peşələrini dəyişə bilmirlər.
Əzizimiz Svetlana xanım da öz həyatını pedaqogikaya həsr etmiş şəxsiyyətlərdəndir. Svetlana Səttar qızı Mollayeva 1946-cı ildə iyulun 5-də anadan olmuşdur. 1964-cü ildə 150 saylı ixtisaslaşdırılmış məktəbi qurucu-çertyojçu ixtisasını bitirərək Azərbaycan Politexniki İnstitutunun “Hidrotexniki qurğular” ixtisasına qəbul olunmuşdur. Həmin İnstitututu 1969-cu ildə bitirdikdən sonra gənc mütəxəssis kimi kafedrada “baş laborant” vəzifəsində fəaliyyətə başlamışdır. 1970-ci ildən etibarən “Hidrotexniki qurğular” kafedrasında tədris fəaliyyətinə başlamış, Leninqrad şəhərində stajkeçmədən sonra aspirantlarla işləmişdir. 1974-cü ildə aspiranturaya qəbul olub, aspiranturanı fərqlənmə dilpomu ilə bitirmişdir. 1975-ci ildə assistent vəzifəsində fəaliyyətinə davam etmişdir. 1989-cu ildən baş müəllim vəzifəsində çalışır. Fəaliyyəti dövründə xarici tələbələrə kuratorluq etmiş, Həmkarlar təşkilatının və Fakültə Elmi Şurasının üzvü olmuşdur. 8 dərs vəsaitinin və 40-dan çox elmi məqalələrin müəllifidir. Ailəlidir, üç qız övladı və 7 nəvəsi vardır.

Bugün "Meliorasiya və su təsərrüfatı tikintisi" kafedrasında Svetlana xanımın pedaqoji fəaliyyətinin son tədris ili münasibətilə görüş keçirilmişdir. Svetlana xanımın həmkarları ona ürək sözlərini və arzularını çatdırmış, ən xoş arzularını bildirmişlər. Biz də fakültə dekanlığı adından Svetlana xanıma müvəffəqiyyətlər arzulayır, ona həyatın ən şirin neməti olan can sağlığını arzulayırıq!

"Mühəndis sistemləri və qurğularının tikintisi" kafedrasının COP29: "Azərbaycanın Su təhlükəsizliyinin təmin olunmasının prioritet istiqamətləri" mövzusunda növbəti elmi seminarı keçirilmişdir.
Kafedra müdiri, professor N.Y.Məmmədov seminarda çıxış edərək, planetimizin qlobal miqyasda ciddi ekoloji fəlakətlərə doğru yaxınlaşdığını, artıq dünyada həyəcan təbilinin çalındığını və bu istiqamətdə təxirəsalınmaz işlərin vacibliyini qeyd etmiş, bu problemlərindən biri olan su ehtiyatlarının inteqrasiyalı idarə olunması haqqında ətraflı məlumat vermişdir. Seminarın gedişatında bir sıra fikirlər səsləndirilmiş, müzakirələr aparılmışdır. Seminar sual-cavab və fikir mübadilələri ilə davam etmişdir.

"ST və MKS" fakültəsi COP29-da!

AzMİU-nun "Mühəndis sistemləri və qurğularının tikintisi" kafedrasının müdiri prof. N.Y.Məmmədov COP29-da "Azərbaycanın su təhlükəsizliyinin təmin olunmasının prioritet istiqamətləri" adlı panel müzakirədə çıxış etmişdir. Prof. N.Məmmədovun çıxışı böyük maraqla qarşılanmışdır. Panel sessiya sual-cavab və müzakirələrlə davam etmişdir.

AzMİU-nun "Meliorasiya və su təsərrüfatı tikintisi" kafedrasının əməkdaşları COP29-da!

AzMİU-nun "Meliorasiya və su təsərrüfatı tikintisi" kafedrasının əməkdaşları və Qazaxıstan Respublikasından "Meliorasiya və su təsərrüfatı tikintisi" kafedrasında ezamiyyətdə olan müəllimlər COP29-da iştirak etmişlər. COP29-a səfər zamanı əməkdaşlar Green Zone-da olmuşlar.

Bakı Ali Neft Məktəbində “Bridging the Gap Youth and Green Jobs Market” adlı Ideathon keçirilmişdir. Ideathonda "ST və MKS" fakültəsinin "ECO-SU" komandası da iştirak etmişdir. "ECO-SU" komandası 16 komanda sırasından 3-cü yeri tutaraq 1000 AZN pul mükafatı qazanmış və bütün iştirakçılar sertifikatla təmin olunmuşlar. Komandamızı təbrik edir, gələcək fəaliyyətlərində uğurlar arzulayırıq.

Ailə,Qadın və Uşaq Problemləri üzrə Dövlət Komitəsi, Azərbaycan Dövlət Su ehtiyatları Agentliyi və ADA universitetinin birgə təşkilatçılığı ilə COP-29-a həsr olunmuş “Su və gender bərabərliyi” mövzusunda konfrans keçirilmişdir.
“ST və MKS” fakültəsinin bir qrup professor-müəllim heyəti və tələbələri konfransda iştirak etmişdir. Fakültəniin dekan müavini, “Meliorasiya və su təsərrüfatı tikintisi” kafedrasının müəllimi Hamlet Əliyev panel sessiyada çıxış etmişdir.

Azərbaycan Dövlət Su Ehtiyatları Agentliyinin Elm və İnnovasiya şöbəsinin əməkdaşları ilə "ST və MKS" fakültəsinin professor- müəllim heyətinin dairəvi masada görüşü baş tutmuşdur. Görüşdə COP-29-a dair müzakirələr aparılmış, qarşıda nəzərdə tutulan görüləcək işlər barəsində fəaliyyət planı tərtib edilmişdir.

AzMİU-nun “Meliorasiya mühəndisliyi” ixtisasında təhsil alan 3-cü kurs, 321r və 321 a4 qrupunun tələbələri, “Torpaqşünaslıq” fənnindən məşğələ dərslərinin mövzularına uyğun kafedranın müəllimləri, dos. F.H. Həsənov, ass. A.X. Həsənova və ass. S.Y. Məhərrəmovanın rəhbərliyi ilə ARETN-nin (Torpaqşünaslıq və Aqrokimya İnstitutu) “Torpaqların meliorasiyası” və “Torpaq ekologiyası” laboratoriyalarında təcrübə keçmişlər. Keçirilən təcrübələr zamanı tələbələr torpaqda duzluluğun təyini, PH və EC- nin ölçülməsi, İSP-7000 aparatında torpağın tərkibindəki mikroelementlərin təyini kimi bir sıra təcrübələrlə ətraflı tanış olmuş, həmçinin təcrubələrdə iştirak etmişlər.
Təcrübənin məqsədi tələbələri universitet nəzdində keçirilən nəzəri dərslərin daha da yaxşı yiyələnməsindən ibarət olub.
Keçirilən təcrübədə AzMİU-nun müəllim və tələbə heyətinin yüksək səviyyədə qarşılanaraq ayırdıqları zamana, keçirilən təcrübələrlə bağlı ətraflı məlumata görə ilk öncə AMEA-nın müxbir üzvü, a.e. d., professor, Torpaqşünaslıq və Aqrokimya İnstitutunun direktoru Ə. G. Quliyevə, ARETN-nin “Torpaqların meliorasiyası” laboratoriyasının rəhbəri a.e.d., M.Q. Mustafayevə, a.e.f.d, dos. L. Cəlilovaya, a.e.f.d. A. Cəfərovaya, a.e.f.d, dos. S. Osmanovaya, elmi işçilərdən N. Mehdiyevaya, G. Məmmədovaya, Q. Qasımova dərin təşəkkürümüzü bildiririk.