Bakı Turizm Peşə Məktəbi

Bakı Turizm Peşə Məktəbində 20 Yanvar – Ümumxalq Hüzn Gününə həsr olunmuş anım tədbiri təşkil olunub. Tədbirin keçirilməsində məqsəd 20 Yanvar faciəsinin tarixi əhəmiyyətini tələbələrə çatdırmaq, şəhidlərin xatirəsini yad etmək və gənclər arasında vətənpərvərlik ruhunu gücləndirmək olub.

Tədbir çərçivəsində çıxış edənlər 20 Yanvar hadisələrinin Azərbaycan xalqının azadlıq və müstəqillik mübarizəsində tutduğu mühüm yerdən bəhs edib, bu faciənin milli yaddaşımızda silinməz iz qoyduğunu vurğulayıblar. Tələbələrə həmin gün baş verən hadisələr, onların səbəbləri və nəticələri barədə ətraflı məlumat verilib.

Anım mərasimi bədii hissə ilə davam etdirilib. Tələbələr tərəfindən 20 Yanvar şəhidlərinin xatirəsinə həsr olunmuş şeirlər və ədəbi-bədii kompozisiyalar səsləndirilib.

Tədbirin sonunda Bakı Turizm Peşə Məktəbinin müəllim və tələbə heyəti Şəhidlər Xiyabanını ziyarət edərək 20 Yanvar şəhidlərinin əziz xatirəsini ehtiramla yad edib, məzarları önünə gül dəstələri qoyublar.

2025-ci ilin dekabr ayında Bakı Turizm Peşə Məktəbində tədris prosesinin keyfiyyətinin yüksəldilməsi, qabaqcıl pedaqoji təcrübənin paylaşılması və müasir təlim metodlarının tətbiqi məqsədilə bir sıra açıq dərslər təşkil olunmuşdur.

12.12.2025-ci il tarixində “İKT-dən istifadə” modulundan müəllim Aytən Süleymanovanın “Qrafik dizayner” ixtisası üzrə 321 nömrəli qrupda açıq dərsi keçirilmişdir. Dərs zamanı informasiya-kommunikasiya texnologiyalarının tədris prosesində səmərəli tətbiqi və praktiki yanaşmalar nümayiş etdirilmişdir.

19.12.2025-ci il tarixində “Bələdçilik” modulu üzrə müəllim Gülnar Mürvətovanın “Turizm təşkilatçısı” ixtisası üzrə II kurs, 286 nömrəli qrupda açıq dərsi təşkil olunmuşdur. Açıq dərsdə bələdçilik fəaliyyətinin əsas prinsipləri və peşəkar yanaşmalar ətraflı izah edilmişdir.

24.12.2025-ci il tarixində “Şəxsi inkişaf və karyera planlaşdırması” modulundan müəllim Şəlalə İsayevanın “Reklam dizayneri” ixtisası üzrə qrupda açıq dərsi keçirilmişdir. Dərs tələbələrin şəxsi inkişafı, karyera planlaması və əmək bazarına hazırlığı mövzularını əhatə etmişdir.

25.12.2025-ci il tarixində “Tədbirlərin təşkilatçısı” modulundan müəllim Amilə Həsənovanın II kurs “Turizm təşkilatçısı” ixtisası üzrə qrupda açıq dərsi baş tutmuşdur. “İlk tibbi yardım qaydaları” mövzusunda keçirilən dərsdə fövqəladə hallarda ilkin tibbi yardımın göstərilməsinə dair nəzəri və praktik biliklər təqdim edilmişdir.

Keçirilmiş açıq dərslər Bakı Turizm Peşə Məktəbində tədrisin keyfiyyətinin yüksəldilməsinə, müəllimlərin peşəkar inkişafına və tələbələrin bilik və bacarıqlarının artırılmasına xidmət edir.

Dövlət Turizm Agentliyinin tabeliyindəki Bakı Turizm Peşə Məktəbinin və “CASA Baku” Kulinariya Məktəbinin birgə təşkilatçılığı ilə Aşpazlıq ixtisası üzrə ikinci pilot tədris qrupunun “Məzun günü” keçirilib.

“CASA Baku” Kulinariya Mərkəzində baş tutan mərasimdə Dövlət Turizm Agentliyinin, Elm və Təhsil Nazirliyi yanında Peşə Təhsili üzrə Dövlət Agentliyinin, Azərbaycan Milli Kulinariya Mərkəzinin, “CASA Baku” Kulinariya Məktəbinin nümayəndələri, yerli və xarici kulinariya mütəxəssisləri, həmçinin tələbələrin valideynləri və dəvət olunmuş qonaqlar iştirak ediblər.

Ətraflı: www.btpm.edu.az

Bakı Turizm Peşə Məktəbinin “Mehmanxana inzibatçısı” ixtisası üzrə təhsil alan tələbələri üçün real iş mühiti ilə tanışlıq məqsədilə paytaxt hotellərində infoturlar təşkil edilib.

10 dekabr 2025-ci il tarixində tələbələr “Safran Otel”-də infoturda iştirak ediblər. İnfotur çərçivəsində tələbələr otelin qeydiyyat–qəbul (Front Office) şöbəsi, müxtəlif nömrə kateqoriyaları, restoran və konfrans zalı ilə yaxından tanış olublar. Otelin Front Office meneceri Rafael Sadıqov tərəfindən tələbələrə mehmanxananın fəaliyyət istiqamətləri, xidmət standartları və gündəlik əməliyyat prosesi barədə ətraflı məlumat verilib. Görüşün sonunda tələbələr onları maraqlandıran sualları ünvanlayaraq xatirə fotosu çəkdiriblər.

17 dekabr 2025-ci il tarixində isə Bakı Turizm Peşə Məktəbinin tələbələri Arium Hotel Baku-da infoturda iştirak ediblər. Otelin qəbul, yerləşdirmə və xidmət şöbəsində çalışan Fərid İsmayılzadə tərəfindən tələbələrə otel haqqında ümumi məlumat verilib, qonaq kontingenti, istifadə olunan bronlaşdırma sistemləri və xidmət mexanizmləri izah edilib. İnfotur zamanı tələbələr Arium Hotel-in nömrə fondu və digər sahələri ilə tanış olub, butik otel konsepsiyası və xidmət mühiti barədə əyani təsəvvür əldə ediblər.

Tədris prosesinin istehsalat təcrübəsi ilə əlaqələndirilməsi məqsədilə təşkil olunan bu infoturlar tələbələrin nəzəri biliklərinin praktik müstəvidə möhkəmləndirilməsinə, eyni zamanda gələcək peşə fəaliyyətlərinə daha hazırlıqlı olmalarına töhfə verib.

Dekabrın 12-də Bakı Turizm Peşə Məktəbində keçirilən ilk dərslər Ümummilli Lider Heydər Əliyevin həyat və fəaliyyətinə həsr olunub. Dərslər zamanı Ulu Öndərin Azərbaycan dövlətçiliyinin möhkəmləndirilməsində, təhsil sisteminin inkişafında və gənc nəslin formalaşmasında göstərdiyi misilsiz xidmətlərdən bəhs edilib, onun zəngin irsinin bu gün də aktual olduğu vurğulanıb.

Daha sonra Bakı Turizm Peşə Məktəbinin müəllim və tələbə kollektivi Fəxri Xiyabana gələrək Ümummilli Lider Heydər Əliyevin məzarını ziyarət edib, əziz xatirəsini dərin ehtiramla yad edərək məzar önünə gül dəstələri qoyub.

Hörmətlə yad edirik...

27–29 noyabr tarixlərində Özbəkistan Respublikasında keçirilən “Delicious Uzbekistan” beynəlxalq kulinariya yarışmasında Bakı Turizm Peşə Məktəbinin və paralel olaraq Casa Baku tədris proqramında iştirak edən tələbələri uğurla çıxış ediblər.

Yarışmada məktəbin tələbələri aşağıdakı nəticələri qazanıblar:

- Seymur Məharəmov – Ət kateqoriyası, Qızıl Medal
- Hüseyn Məmmədov – Ət kateqoriyası, Qızıl Medal
- Kamran Nağıyev – Balıq kateqoriyası, Gümüş Medal
- Komanda – “Black Box” üzrə, Qızıl Medal və Kubok

Qazanılan bu nailiyyətlər Bakı Turizm Peşə Məktəbinin tələbələrinin peşəkarlığını, həmçinin məktəbdə həyata keçirilən tədris və praktiki hazırlıq prosesinin yüksək səviyyədə olduğunu bir daha göstərir.

Bakı Turizm Peşə Məktəbi beynəlxalq arenada Azərbaycanı layiqincə təmsil edən bütün tələbələri təbrik edir və onların gələcək fəaliyyətində daha böyük uğurlar arzulayır.

Bakı Turizm Peşə Məktəbinin ötən ilki məzunu, aşpaz ixtisası üzrə təhsil almış Seymur Məhərrəmov “Casa Cup 2025” kulinariya yarışmasında üç nominasiyada qalib olub.

O, yarışmada aşağıdakı mükafatlara layiq görülüb:

“İlin ən yaxşı Şefi” nominasiyasının qalibi

Pastry kateqoriyasında Gold Medal

“Ən yaxşı Pastry” mükafatının sahibi

Seymur Məhərrəmovun qazandığı bu uğurlar onun peşəkarlığının və hazırlığının yüksək göstəricisi olmaqla yanaşı, Bakı Turizm Peşə Məktəbinin məzunlarının beynəlxalq kulinariya yarışlarında rəqabət qabiliyyətini bir daha təsdiqləyir.

Bakı Turizm Peşə Məktəbi gənc mütəxəssisin nailiyyətlərini təqdir edir və ona gələcək fəaliyyətində uğurlar arzulayır.

Bakı Turizm Peşə Məktəbində Zəfərin 5 illiyinə həsr edilmiş stolüstü tennis yarışı keçirilib

Bakı Turizm Peşə Məktəbində Zəfər Gününün 5 illiyi münasibətilə stolüstü tennis üzrə məktəbdaxili yarış təşkil edilib. Yarışın məqsədi şagirdlər arasında sağlam həyat tərzini təşviq etmək, gənclərin idmana marağını artırmaq və Zəfər Gününün əhəmiyyətini vurğulamaq olub.

Turnirdə müxtəlif ixtisas qruplarından olan tələbələr iştirak edərək güclü rəqabət nümayiş etdiriblər. Yarış həm oğlanlar, həm də qızlar arasında keçirilib və qaliblər aşağıdakı kimi müəyyən olunub:

Oğlanlar üzrə nəticələr:
1-ci yer – Əli Qarayev, Qrup 318, Aşpaz
2-ci yer – Turan Əsgərli, Qrup 291, Aşpaz
3-cü yer – Turan Şahbazov, Qrup 313, Aşpaz
3-cü yer – Elnur Qasımzadə, Qrup 328, Bərbər

Qızlar üzrə nəticələr:
1-ci yer – Aytən Məmmədəliyeva, Qrup 310, Tədbirlər Təşkilatçısı
2-ci yer – Rəna Quluzadə, Qrup 309, Mehmanxana İnzibatçısı
3-cü yer – Leyla Qədirli, Qrup 320, Qənnadçı-Şirniyyatçı
3-cü yer – Naylan Sarıyeva, Qrup 285, Turizm Təşkilatçısı

Qaliblər məktəb rəhbərliyi tərəfindən təltif olunub və yarış iştirakçılarına fəal iştiraklarına görə təşəkkür bildirilib.

8 Noyabr – Zəfər Günü münasibətilə Bakı Turizm Peşə Məktəbində silsilə tədbirlər təşkil olunub. Tədbir çərçivəsində məktəbin tələbələrinin əl işlərindən ibarət rəsm sərgisi nümayiş etdirilib və Azərbaycanın tarixi Qələbəsinin əhəmiyyəti barədə çıxışlar edilib.

Tədbir iştirakçıları əvvəlcə Vətən uğrunda canından keçən şəhidlərin əziz xatirəsini bir dəqiqəlik sükutla yad ediblər. Daha sonra çıxış edənlər 8 Noyabr Zəfər Gününün xalqımızın qəhrəmanlığı, dövlətimizin gücü və milli birliyimizin təntənəsi olduğunu vurğulayıblar.

Məktəbin rəhbərliyi və müəllim kollektivi çıxışlarında qeyd ediblər ki, bu gün Azərbaycan xalqının tarixində şanlı səhifə kimi yazılıb və gənc nəslin bu Qələbənin mənəvi dəyərini dərindən dərk etməsi xüsusi önəm daşıyır.

Tədbirin davamında tələbələrin hazırladığı rəsm əsərləri və əl işləri nümayiş etdirilib. Sərgidə Zəfər mövzusunda müxtəlif kompozisiyalar, qəhrəman əsgərlərimizin təsvirləri və Qarabağ motivləri yer alıb.

Bakı Turizm Peşə Məktəbində gənclərin sağlam həyat tərzi barədə məlumatlılığının artırılması məqsədilə növbəti maarifləndirici tədbir təşkil olunub. Görüşdə 10 №-li Bakı Şəhər Poliklinikasının həkim-terapevti Aysel Nağıyeva “Sağlam həyat, zərərli vərdişlər” mövzusunda mühazirə ilə çıxış edib.

Mühazirə zamanı həkim gənclər arasında sağlam həyat tərzinin təşviqinin vacibliyini vurğulayaraq, siqaret, alkoqol, enerji içkiləri və digər zərərli vərdişlərin insan orqanizminə mənfi təsirləri barədə ətraflı məlumat verib. O, həmçinin balanslı qidalanma, fiziki aktivlik və stressin idarə olunması kimi sağlam həyatın əsas prinsiplərindən danışıb.

Tədbirin məqsədi tələbələrdə sağlamlıq mədəniyyətinin formalaşdırılması, zərərli vərdişlərin qarşısının alınması və gənclərin öz sağlamlıqlarına məsuliyyətli yanaşmasının təşviq edilməsi olub.

Görüş interaktiv şəkildə davam edib, tələbələr həkimə sağlam həyat tərzi ilə bağlı onları maraqlandıran suallar ünvanlayıblar.