BDU Hüquq Fakültəsinin rəsmi səhifəsi

23/04/2026

Bakı Dövlət Universitetinin Hüquq fakültəsi və Azərbaycan Dövlət Dəniz Akademiyasının birgə təşkilatçılığı ilə 23 aprel 2026-cı il tarixində “Süni intellektin gəmiçilik sahəsinə inteqrasiyası və hüquqi məsuliyyət problemləri” mövzusunda dairəvi masa formatında debat və geniş fikir mübadiləsi keçirilmişdir.
Tədbirin əsas məqsədi süni intellekt texnologiyalarının dəniz nəqliyyatında tətbiqinin üstünlüklərini, potensial risklərini, eləcə də bu sahədə yaranan hüquqi məsuliyyət məsələlərini elmi müstəvidə təhlil etmək olmuşdur.
Tədbiri açan Akademiyanın kafedra müdiri Yusif Həsənov çıxışında mövzunun aktuallığını vurğulamış, süni intellektin müasir nəqliyyat sistemlərində, xüsusilə gəmiçilik sahəsində artan rolunu qeyd etmiş və bu texnologiyaların tətbiqi ilə bağlı hüquqi çərçivələrin formalaşdırılmasının zəruriliyini önə çəkmişdir.
Daha sonra Akademiyanın Tələbə Elmi Cəmiyyətinin sədri Ruslan Fərəcov iştirakçıları salamlayaraq bu cür tədbirlərin tələbələr arasında bilik mübadiləsini gücləndirdiyini, tənqidi düşüncəni inkişaf etdirdiyini və gələcək peşə fəaliyyətləri üçün mühüm təcrübə qazandırdığını bildirmişdir. Bakı Dövlət Universiteti Hüquq fakültəsinin Tələbə Gənclər Təşkilatının sədri Vaqif Xəlil çıxış edərək tələbə təşkilatlarının bu tip elmi tədbirlərin təşkilindəki rolunu vurğulamış, gənclərin innovativ sahələrə marağının artırılmasının və onların fəal iştirakının əhəmiyyətini qeyd etmişdir. Dairəvi masa çərçivəsində mövzu ətrafında geniş müzakirələr aparılmış, tərəflər arasında qarşılıqlı fikir mübadiləsi həyata keçirilmiş, iştirakçıları maraqlandıran suallar cavablandırılmışdır. Tədbir yüksək fəallıq və mövzuya göstərilən dərin maraq ilə yadda qalmışdır.

20/04/2026

Bakı Dövlət Universiteti Hüquq fakültəsi Tələbə Gənclər Təşkilatı tərəfindən dekan Zaur Əliyevin təşəbbüsü ilə həyata keçirilən “Tələbədən Məktəbliyə” layihəsi çərçivəsində 153 nömrəli tam orta məktəbdə növbəti təlim keçirilmişdir. Layihənin əsas məqsədi şagirdlər arasında hüquq mədəniyyətinin, hüquqi düşüncənin və hüquqi şüurun formalaşdırılması, həmçinin onların hüquqa və qanuna dair biliklərinin artırılması olmuşdur. Təlimçi qismində Hüquq fakültəsinin tələbələri Şükriyyə Yusifova və Nuray Məmmədli çıxış etmişlər. Təlim interaktiv formada təşkil olunmuş, şagirdlərlə qarşılıqlı müzakirələr aparılmışdır. Şükriyyə Yusifova hüquq və qanunun nisbəti mövzusuna toxunmuş, həmçinin Konstitusiyada təsbit olunmuş insan və vətəndaş hüquq və azadlıqları barədə məlumat vermişdir. Nuray Məmmədli isə şagirdlərlə təhsil hüququ və dövlət rəmzlərinə hörmət mövzularında müzakirələr aparmış, həmçinin hüquqşünasların malik olmalı olduqları şəxsi və peşəkar keyfiyyətlər barədə məlumat vermişdir. Təlimin sonunda Şükriyyə Yusifova Bakı Dövlət Universitetinin Hüquq fakültəsinin yaranma tarixi və əldə etdiyi uğurlar haqqında ətraflı məlumat təqdim etmişdir. Təlim şagirdlərin hüquq haqqında biliklərinin formalaşdırılması və hüquqşünas peşəsinə marağın artırılması baxımından olduqca faydalı olmuş və həm şagirdlər, həm də müəllimlər tərəfindən böyük maraqla qarşılanmışdır.

18/04/2026

Bakı Dövlət Universiteti Tələbə Həmkarlar İttifaqı Komitəsi və İdman-Sağlamlıq Mərkəzinin birgə təşkilatçılığı ilə Ümummilli Lider Heydər Əliyevin anadan olmasının 103-cü ildönümünə və “Şəhərsalma və Memarlıq ili”nə həsr olunmuş futbol turniri çərçivəsində 18 aprel 2026-cı il tarixində keçirilmiş yarımfinal mərhələsində Hüquq fakültəsinin komandası Tətbiqi Riyaziyyat və Kibernetika fakültəsinin komandasına qalib gələrək finala vəsiqə qazanmışdır.
Komandamızı ürəkdən təbrik edir, final oyununda uğurlar və yeni qələbələr arzulayırıq!

13/04/2026

Bakı Dövlət Universitetinin Hüquq fakültəsinin ll kurs tələbəsi Məmmədli Aybəniz Samir qızı tələbələr arasında keçirilmiş seçki nəticəsində Hüquq fakültəsinin Tələbə Həmkarlar İttifaqı Komitəsinin sədri seçilmişdir. Aybəniz Məmmədlini təbrik edir və ona bu vəzifədə uğurlar arzulayırıq!

12/04/2026

Bakı Dövlət Universitetinin Hüquq fakültəsində görkəmli alim, Kriminalistika və məhkəmə ekspertizası kafedrasının müdiri, hüquq elmləri doktoru, professor Kamil Səlimovun 70 illik yubileyinə həsr olunmuş tədbir keçirilmişdir. BDU-nun sosial məsələlər, tələbələrlə iş və ictimaiyyətlə əlaqələr üzrə prorektoru Əliş Ağamirzəyev hüquq elminin inkişafında mühüm rol oynamış Kamil Səlimovu yubileyi münasibətilə təbrik etmişdir. O, bildirmişdir ki, Universitet fəaliyyət göstərdiyi illər ərzində daim öz müəllim və professor heyəti ilə fəxr edib. 40 ildən artıq hüquq elminə sədaqətlə xidmət göstərən Kamil Səlimov kriminalistika sahəsində fundamental tədqiqatlar aparıb, Azərbaycanda bu istiqamətin elmi əsaslarının möhkəmlənməsinə mühüm töhfələr verib. Alim yalnız elmi fəaliyyəti ilə deyil, həm də pedaqoji fəaliyyəti ilə yüzlərlə hüquqşünasın yetişməsində mühüm rol oynayıb. Onun rəhbərliyi ilə formalaşan kriminalistika məktəbi bu gün də ölkənin hüquq-mühafizə və məhkəmə sistemində çalışan mütəxəssislərin hazırlanmasına töhfə verir. Prorektor qeyd etmişdir ki, Kamil Səlimovun elmi irsi, hazırladığı dərslik və monoqrafiyalar hüquq elmi üçün qiymətli mənbədir. BDU-nun Hüquq fakültəsinin dekanı Zaur Əliyev Kamil Səlimovun zəngin elmi və pedaqoji fəaliyyətindən bəhs etmiş, onun müəllifi olduğu 27 il bundan əvvəl nəşr olunmuş "Terrorizmin müasir problemləri" monoqrafiyasının bu gün də öz aktuallığını qoruyub saxladığını diqqətə çatdırmışdır. Əmək və ekologiya hüququ kafedrasının müdiri Alış Qasımov “Professor Kamil Səlimovun həyat və yaradıcılığı haqqında”, Kriminalistika və məhkəmə ekspertizası kafedrasının dosenti Bəxşeyiş Əsgərov “Azərbaycan Respublikasında kriminalistika elminin inkişafında professor Kamil Səlimovun rolu” mövzularında məruzələrlə çıxış etmişlər. Qeyd olunmuşdur ki, Kamil Səlimovun rəhbərliyi ilə Kriminalistika və məhkəmə ekspertizası kafedrası mühüm inkişaf yolu keçib, tədris prosesinə müasir və innovativ yanaşmalar tətbiq olunub. Onun təşəbbüsü ilə “Rəqəmsal kriminalistika” və “Molekulyar kriminalistika” kimi yeni istiqamətlər üzrə tədris proqramları hazırlanıb. Kamil Səlimovun elmi fəaliyyəti yalnız akademik çərçivə ilə məhdudlaşmır. Onun terrorizmə qarşı mübarizə sahəsində apardığı tədqiqatlar, xüsusilə “Terrorizmin müasir problemləri” adlı monoqrafiyası beynəlxalq elmi ictimaiyyət tərəfindən maraqla qarşılanıb və bu sahədə aparılan araşdırmaların əsas mənbələrindən birinə çevrilib. Azərbaycan Respublikası Vəkillər Kollegiyasının Ağsaqqallar Şurasının sədri, əməkdar hüquqşünas İkram Kərimov, Baş Prokurorluğun Elm-Tədris Mərkəzinin rəisi Fazil Həsənəliyev, Dövlət Təhlükəsizliyi Xidmətinin Heydər Əliyev adına Akademiyasının rəisi, general-mayor Elşad Nəsirov, Vəkillər Kollegiyasının sədr müavini Aydın Axundov, BDU-nun Jurnalistika fakültəsinin kafedra müdiri Qulu Məhərrəmli və digərləri professor Kamil Səlimovun hüquq elminin inkişafındakı xidmətlərini, elmi və pedaqoji fəaliyyətini yüksək qiymətləndirilmiş, yubilyara uğurlar arzulamışlar. Tədbirin sonunda professor Kamil Səlimov çıxış edərək öz xatirələrini bölüşmüş və iştirakçılara təşəkkürünü bildirmişdir.

09/04/2026

Bakı Dövlət Universitetinin Hüquq fakültəsinin dekanı, hüquq elmləri üzrə fəlsəfə doktoru, dosent Zaur Əliyev tərəfindən Azərbaycan Respublikası Daxili İşlər Nazirliyinin Polis Akademiyasında kursantlar üçün “İnsan hüquqları” mövzusunda mühazirə keçirilmişdir. Mühazirədə insan hüquqlarının formalaşmasının tarixi mərhələləri və bu sahədə əsas beynəlxalq hüquqi aktlar barədə ətraflı məlumat verilmişdir. Eyni zamanda qeyd edilmişdir ki, Azərbaycanda insan hüquqları sahəsində islahatların əsası Ümummilli lider Heydər Əliyev tərəfindən qoyulmuş, bu sahə dövlət siyasətinin prioritet istiqamətlərindən biri kimi müəyyən edilmişdir. Bildirilmişdir ki, ilk milli Konstitusiyada insan hüquqlarının primatlığı prinsipi təsbit olunmuş, 1998-ci ildə bu sahədə ilk dövlət proqramı qəbul edilmiş, ölüm hökmü ləğv olunmuşdur.
Diqqətə çatdırılmışdır ki, Prezident İlham Əliyev tərəfindən İnsan Hüquqları Gününün təsis edilməsi, milli fəaliyyət plan və proqramlarının qəbul olunması bu siyasətin uğurla davam etdirildiyini göstərir. Həmçinin vurğulanmışdır ki, Heydər Əliyev Fondu və Birinci vitse-prezident Mehriban xanım Əliyevanın fəaliyyəti insan hüquqlarının, xüsusilə sosial hüquqların təmininə mühüm töhfə verir. Mühazirənin sonunda kursantların sualları cavablandırılmış, mühazirə və mövzu ətrafında aparılan müzakirələr iştirakçılar tərəfindən maraqla qarşılanmışdır.

08/04/2026

Bakı Dövlət Universitetinin Hüquq fakültəsinin IV kurs tələbələri, Prezident təqaüdçüləri Həmidə Sadıqova və Nəzrin Sadıqova böyük uğura imza atmışlar. Belə ki, tələbələrimiz Times Higher Education dünya universitet reytinqinə əsasən ilk 3-lükdə yer alan dünyanın nüfuzlu ali təhsil müəssisələrinə qəbul olmuşlar. Sadıqova Nəzrin Böyük Britaniyanın Oxford Universitetinin Hüquq və Maliyyə üzrə magistratura proqramına (MSc in Law and Finance), Sadıqova Həmidə isə Kembric Universitetinin Siyasət və Beynəlxalq Araşdırmalar üzrə magistratura proqramına (MPhil in Politics and International Studies) qəbul olmuşlar.
Tələbələrimizi təbrik edir, uğurlar arzulayırıq.

03/04/2026

Bakı Dövlət Universitetinin Hüquq fakültəsində 3 aprel 2026-cı il tarixində “Şanlı Zəfərə gedən yolun başlanğıcı – Aprel döyüşlərinin 10-cu ildönümü” adlı tədbir keçirilmişdir. Ulu Öndər Heydər Əliyevin və Vətən uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilmişdir. Tədbirdə açılış nitqi ilə çıxış edən Hüquq fakültəsinin dekanı Zaur Əliyev Azərbaycan Respublikasının şanlı qələbə tarixində mühüm yer tutan Aprel döyüşlərinin əhəmiyyətindən bəhs etmiş, Müzəffər Ali Baş Komandan cənab İlham Əliyevin rəhbərliyi ilə zəfər salnaməsinin yazıldığını xüsusi vurğulamışdır.
Dekan, həmçinin Hüquq fakültəsinin məzunu olan Aprel döyüşləri iştirakçıları haqqında ətraflı məlumat vermiş, fakültənin şəhid məzunu Ceyhun Şalıyevin Aprel döyüşləri və Vətən müharibəsində göstərdiyi qəhrəmanlıqlardan bəhs etmişdir. Sonra çıxış edən Kriminaslitika və məhkəmə ekspertizası kafedrasının müdiri, professor Kamil Səlimov şanlı Aprel qələbəsinin əhəmiyyətini vurğulamış, həmçinin Azərbaycanın zəfər tarixini mərhələli şəkildə təqdim etmişdir. Daha sonra Hüquq fakültəsinin şəhid məzunu Ceyhun Şalıyevin qardaşı, BDU-nun tələbəsi Kamal Şalıyev çıxış edərək onunla bağlı xatirələrini bölüşmüşdür. Tədbirin davamında Hüquq fakültəsinin tələbəsi Jalə Babazadə çıxış edərək şəhidlərimizin qanı bahasına qazanılmış Aprel döyüşlərinin tarixi və mənəvi əhəmiyyətindən bəhs etmişdir.
Tədbir gənc nəslin vətənpərvərlik ruhunun yüksəldilməsi, şanlı zəfər tariximizin təbliği baxımından əhəmiyyətli olmuşdur.

31/03/2026

25/03/2026

Bakı Dövlət Universitetinin Hüquq fakültəsi dünyanın nüfuzlu reytinq təşkilatı Quacquarelli Symonds (QS) tərəfindən açıqlanan “QS World University Rankings by Subject 2026” nəticələrinə əsasən, respublikamızda ilk dəfə olaraq böyük uğur əldə edərək reytinq siyahısında yer almışdır. Belə ki, BDU cari ildə ilk dəfə olaraq geniş ixtisas kateqoriyaları ilə yanaşı, bir sıra dar ixtisas sahələri üzrə də reytinqə daxil olmuşdur. Hüquq fakültəsinin dünyaca məşhur bu nüfuzlu akademik siyahıda yer alması ölkəmizin hüquq təhsili tarixində ilk belə nailiyyət kimi xüsusi əhəmiyyət kəsb edir.
Eyni zamanda bu hadisə BDU Hüquq fakültəsinin dünya miqyasında hüquq təhsili sahəsində artan nüfuzunun və akademik potensialının bariz göstəricisi olmaqla yanaşı, beynəlxalq səviyyədə Azərbaycan hüquq təhsilinin yüksək səviyyəsini bir daha sübut edir.
Qeyd edək ki, Bakı Dövlət Universiteti respublikamızda bu nüfuzlu reytinq cədvəlində hüquq təhsili üzrə yer alan ilk və yeganə ali təhsil müəssisəsidir.
Bu böyük uğur münasibətilə fakültənin professor-müəllim heyətini və tələbələrini təbrik edir və uğurlar arzu edirik!