82 nomrəli tam orta məktəb

Qanlı Yanvar qan içəndən yadigardı,
Ona - ləkə, bizə - Vətən yadigarı.
O şanlı gün, o kin-qisas unudulmaz.

Gör nə deyib qoca Qafqaz, Azərbaycan:
Qar nə qədər çox yağsa da, yaza qalmaz, Azərbaycan.

19.01.2026-cı il tarixində Nərimanov rayonu 82 N-li tam orta məktəbin "Bədii qiraət" dərnəyinin üzvləri olan V sinif şagirdləri dərnək rəhbəri Sürəyya Paşayevanın təşkilatçılığı ilə 20 Yanvar 1990-cı il hadisələrinə həsr olunmuş "20 Yanvar - Qan yaddaşımız" adlı tədbir təşkil etdilər.

Səttar Bəhlulzadə!
Əzmkar və fədakar insan, sənətini çox sevən və bütün həyatını öz sənətinə həsr edən sənətkar....
Bu ad Azərbaycan xalqının mədəniyyət tarixindən heç vaxt silinməyəcək.
Səttar Bəhlulzadənin tabloları respublika, xarici ölkələrdə, habelə rəssamın fərdi sərgilərində göstərilib, Əlcəzair, Misir, Livan, Suriya, Tunis, Norveç, Almaniya, Çexiya, Bolqarıstan, Macarıstan, Rumıniya, İraq, Kuba, Kanada, Belçika, Fransa, Yaponiya və s. ölkələrdə keçirilən sərgilərdə nümayiş etdirilib.
15 dekabr 2025-ci il tarixində Nərimanov rayonu
82 N-li tam orta məktəbin kitabxana müdiri Aytəkin Qasımovanın təşkilatçılığı ilə keçirilən "Tarixdə iz buraxanlar: Səttar Bəhlulzadə" adlı tədbirdə Azərbaycanın böyük rəssamı Səttar Bəhlulzadənin həyat və yaradıcılığı haqqında 5C sinif şagirdləri maraqlı məlumatlar səsləndirdi, sənətkarın əsərlərinin sərgisini təşkil edərək, bu əsərlərin tərbiyəvi əhəmiyyətindən bəhs etdilər.

Bəli, illər hiss olunmadan və sürətlə keçir. Hər tədris ilinin sonunda məzunlarımızın qəlbində xoş və unudulmaz xatirəyə çevrilən "Son Zəng" günündə biz onlara "Yolunuz açıq olsun, əziz məzunlarımız! Həmişə xoş sədalarınızı eşidək, bizim dəyərlilərimiz!" deyirik.
Nərimanov rayonu 82 N-li tam orta məktəbin 2024-2025-ci tədris ilinin 11B sinif şagirdi, hal-hazırda isə Bakı Ali Neft Məktəbinin tələbəsi Yusifli Vasif Asif oğlu da bizim qürur duyduğumuz məzunlarımızdandır.

Əzizimiz VASİF, sənə bütün işlərində ancaq uğurlar arzu edirik!

Sənin simanda bütün məzunlarımiza, gənclərimizə bir daha müraciət edərək deyirik ki, hər biriniz bizim üçün çox dəyərlisiniz! Həyatınız gözəl, canınız sağlam, mənəviyyatınız güclü olsun! Vətəniniz, millətiniz üçün, dünya insanlığı üçün çox çalışın, öz qəhrəmanlıq hekayələrinizi yazın!

29.12.2025-ci il tarixində Nərimanov rayonu 82 N-li tam orta məktəbin "Bədii qiraət" dərnəyinin üzvləri olan V sinif şagirdləri dərnək rəhbəri Sürəyya Paşayevanın təşkilatçılığı ilə 31 Dekabr Dünya Azərbaycanlılarının Həmrəylik Günü və Yeni il Bayramı ⛄🌲❄️ münasibətilə maraqlı kompozisiya ilə çıxış etdilər. Onlar şeir söyləyib "Həmrəy olaq" dedilər, mahnı oxuyub, rəqs edib hamınin Yeni ilini təbrik etdilər.
2026-cı il, xoş gəlmisən!
Ölkəmizə əmin-amanlıq, sülh, aydin səma, ailələrimizə sağlamlıq və səadət gətir!

Nərimanov rayonu 82 N-li tam orta məktəbin Azərbaycan dili müəllimi Şəlalə Məmmədovanın təşkilatçilığı və 8A sinif şagirdlərinin iştirakı ilə
"31 Dekabr - Dünya Azərbaycanlılarının Həmrəylik Günü"nə və Yeni ilə həsr olunmuş tədbirdən şirin xatirələr

Nərimanov rayonu 82 N-li tam orta məktəbin biologiya müəllimləri Aygün Qasımova və Aytən Yusubova 24.12.2025-ci il tarixində "Ümumi təhsil müəssisələrinin VIII-IX siniflərində reproduktiv sağlamlıq mövzusunda məşğələlər üzrə metodiki vəsait"in tətbiqi çərçivəsində VIII siniflərdə
"Gigiyena və düzgün qidalanma sağlamlığın əsasıdır" mövzusunda seminar-məşğələlər keçirərək şagirdlərlə (oğlan və qızlarla ayrı-ayrılıqda) maarifləndirici söhbətlər aparmış, hər bir insan üçün bu qaydalara düzgün əməl etməyin vacibliyini elmi və praktiki əsaslara söykənən konkret nümunələrlə izah etmişlər. Şagirdlərin suallarını cavablandırmışlar.