Bakı Slavyan Universiteti - BSU

📢BSU doktoranturaya fəlsəfə doktoru proqramı üzrə qəbul elan edir

🔹Bakı Slavyan Universiteti (BSU) 2026-cı il üçün doktoranturaya fəlsəfə doktoru proqramı üzrə qəbul elan edir!

Doktoranturaya sənəd qəbulu “Təhsil Mərkəzləşdirilmiş İnformasiya Sistemi” (TİMS) vasitəsilə elektron qaydada həyata keçiriləcəkdir. Doktoranturaya sənəd təqdim etmək istəyən şəxslər Azərbaycan Respublikası Elm və Təhsil Nazirliyinin portal.edu.az saytına daxil olaraq “Ali və orta ixtisas təhsil müəssisələrinə təhsilalan qeydiyyatı” xidmətini seçməli və təlimata uyğun şəkildə qeydiyyatdan keçməlidirlər.

Qeydiyyatdan keçən vətəndaşların sənədləri ali təhsil müəssisəsi üzrə təyin edilmiş məsul şəxs tərəfindən yoxlanılaraq təsdiq ediləcəkdir.

Portal.edu.az vasitəsilə müraciətlərin qəbulu 19 may 2026-cı il tarixindən başlayaraq 9 iyun 2026-cı il tarixinədək davam edəcəkdir.

Dövlət İmtahan Mərkəzində (DİM) keçiriləcək xarici dil imtahanını müvəffəqiyyətlə verən şəxslər növbəti mərhələyə buraxılacaqlar. Xarici dil imtahanının 25 iyun 2026-cı il tarixində, fəlsəfə fənni üzrə imtahanın 1–3 sentyabr 2026-cı il tarixlərində, ixtisas imtahanlarının isə 8–10 sentyabr 2026-cı il tarixlərində keçirilməsi nəzərdə tutulur.

Əlaqə üçün: +994 (12) 599 08 70 (daxili 519)
Elektron poçt ünvan: [email protected]

Ətraflı: https://bsu-uni.edu.az/news/elanlardetails/1655

📢BSU-da vakansiya!

Bakı Slavyan Universitetinin Yüksək Təhsil Mərkəzinə baş mütəxəssis vəzifəsinə vakansiya elan edilir!

🔹Vəzifə öhdəlikləri:

- Yüksək Təhsil Mərkəzinin fəaliyyət istiqamətləri üzrə sənədləşmə və təşkilati işlərin həyata keçirilməsi;
- Magistratura, doktorantura və əlavə təhsil üzrə proseslərin koordinasiyasında iştirakı;
- Tədris və elmi fəaliyyətlə bağlı hesabatların, arayışların və məlumat bazalarının hazırlanması;
- Təhsil proqramları, layihələr, seminar və elmi tədbirlərin təşkilində iştirakı;
- Elektron sənəd dövriyyəsi və məlumat sistemləri ilə işin aparılması;
- Təhsilalanların müraciətlərinin cavablandırılması və məlumatlandırılması;
- Tədris prosesinə dair statistik məlumatların təhlili və təqdim olunması;

🔹Namizəd üçün tələblər:

* Ali təhsil;
* Təhsil sahəsində minimum 2 il iş təcrübəsi;
* MS Office proqram bilikləri;
* Rəsmi sənədlərlə iş, işgüzar yazışma və hesabat hazırlamaq bacarığı;
* Komandada işləmək və yüksək kommunikasiya bacarığı.

🔹İş şəraiti:
- İş qrafiki: 5 günlük iş həftəsi, 09:00 – 18:00;
- Əmək haqqı: ştat cədvəlinə uyğun;

Qeyd: CV-lər azərbaycan dilində, mövzu qismində “Baş mütəxəssis” qeyd olunaraq 26.05.2026-cı il tarixinədək “[email protected]” ünvanına göndərilməlidir. Yalnız vakansiyanın tələblərinə cavab verən namizədlər müsahibə mərhələsinə dəvət olunacaqlar.

BSU-nun əməkdaşları və tələbələri WUF13-ün açılış mərasimində iştirak ediblər

Mayın 18-də Bakı Slavyan Universitetinin əməkdaşları və tələbələri Bakıda keçirilən Ümumdünya Şəhərsalma Forumunun 13-cü sessiyasınım (WUF13) açılış mərasimində iştirak ediblər.

“Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” mövzusuna həsr olunan forum BMT-nin Məskunlaşma Proqramı (UN-Habitat) və Azərbaycan Hökumətinin birgə təşkilatçılığı ilə keçirilir.

BSU-da abituriyentlər üçün fürsət: maarifləndirici infoturlar davam edir

Bakı Slavyan Universitetində (BSU) 16 nömrəli Texniki Humanitar Liseyin 9-cu sinif şagirdləri üçün universitet mühiti ilə yaxından tanış olmaları məqsədilə infotur təşkil olunub.

Tədbir çərçivəsində iştirakçılara BSU-nun yaranma tarixi, keçdiyi inkişaf yolu, fakültə və ixtisasları, universitetdə tədris olunan xarici dillər, eləcə də beynəlxalq əməkdaşlıq və tələbə mübadilə proqramları haqqında geniş məlumat verilib.

İnfotur zamanı abituriyentlər universitetin tədris infrastrukturu ilə, o cümlədən əsas tədris binasında yerləşən Kitabxana Öyrənmə Mərkəzi, müasir auditoriyalar, Yüksək təhsil mərkəzi, Müəllim inkişaf mərkəzi, Müasir dillərin öyrənmə və sertifikasiya mərkəzi və digər otaqlarla tanış olublar.

Tədbirin davamında universitetin Akt zalında tələbə həyatı ilə bağlı təqdimat keçirilib. Təqdimat zamanı BSU haqqında videoçarx nümayiş olunub, Tələbə Gənclər Təşkilatının fəaliyyəti və tələbələr üçün yaradılan imkanlar barədə məlumat verilib. Eyni zamanda BSU-nun “Zəfər” yaradıcılıq qrupunun ifasında qısa musiqili proqram təqdim olunub.

Sonda abituriyentlərin sualları cavablandırılıb, qəbul qaydaları, təqaüd imkanları, tələbə həyatı və beynəlxalq proqramlar barədə ətraflı məlumat verilib.

BSU-da elektron sənəd dövriyyəsi ilə bağlı təlim keçirilib

Bakı Slavyan Universitetində (BSU) əməkdaşlar üçün elektron sənəd dövriyyəsi sisteminin tətbiqi və istifadəsinə dair təlim keçirilib. Təlimin əsas məqsədi universitetdə sənədlərlə iş prosesinin daha operativ, şəffaf və effektiv şəkildə həyata keçirilməsi, rəqəmsal idarəetmə mexanizmlərinin təkmilləşdirilməsi və əməkdaşların sistemdən istifadə bacarıqlarının artırılması olub.

Təlim zamanı iştirakçılara elektron sənəd dövriyyəsi sisteminin funksional imkanları, sənədlərin elektron qaydada hazırlanması, qeydiyyatı, yönləndirilməsi, arxivləşdirilməsi və icra nəzarəti mexanizmləri barədə ətraflı məlumat verilib. Eyni zamanda sistem üzərindən praktiki nümunələr nümayiş etdirilərək iştirakçıların sualları cavablandırılıb.

BSU-da Tələbə Həmkarlar İttifaqı Komitəsinə yeni sədr seçilib

🔹Bakı Slavyan Universitetinin (BSU) Sosial elmlər və regionşünaslıq fakültəsinin Beynəlxalq münasibətlər ixtisasının II tədris ili tələbəsi Verdiyev Səid Şirulla oğlu Tələbə Həmkarlar İttifaqı Komitəsinin sədri seçilib.

🔹Səid Verdiyevi yeni təyinatı münasibətilə təbrik edir, fəaliyyətində uğurlar arzulayırıq!

BSU-da İnteqrasiya Olunmuş Kitabxana İdarəetmə Sisteminin tətbiqinə dair praktiki təlimlərə başlanılıb

Mayın 14-də Bakı Slavyan Universitetində (BSU) kitabxana sisteminin müasir standartlara uyğunlaşdırılması və kitab fondunun rəqəmsallaşdırılması məqsədilə əməkdaşlar üçün KOHA İnteqrasiya Olunmuş Kitabxana İdarəetmə Sisteminin — Integrated Library System (ILS) tətbiqinə dair praktiki təlimlərə başlanılıb.

Təlimlər BSU-nun Kitabxana Öyrənmə Mərkəzi ilə ADA Unuversitetinin Kitabxanası arasında əməkdaşlıq və təcrübə mübadiləsi çərçivəsində, ADA Universitetinin Kitabxana direktoru, texnika üzrə fəlsəfə doktoru Elçin Məmmədov tərəfindən keçirilir.

Proqramın tətbiqində əsas hədəf BSU-da müasir elektron kataloq sisteminin səmərəli şəkildə qurulması və beynəlxalq standartlara uyğun idarəetmə modelinin formalaşdırılmasıdır.

BSU-nun “Abituriyent Proqramının Təqdimatı” layihəsi çərçivəsində regionlarda görüşlər davam edir

Bakı Slavyan Universitetinin (BSU) nümayəndə heyəti “BSU – Abituriyent Proqramının Təqdimatı” layihəsi çərçivəsində Lənkəran şəhərinə səfər edərək yuxarı sinif şagirdləri ilə görüşlər keçirib.

Səfər çərçivəsində Lənkəran şəhər Mehman Bağırov adına 1 nömrəli tam orta məktəbində şagirdlərlə maarifləndirici görüş təşkil olunub.

Görüş zamanı şagirdlərə BSU-da mövcud ixtisaslar, qəbul imkanları, beynəlxalq əməkdaşlıq proqramları, universitetdə fəaliyyət göstərən SABAH qrupları və tələbə həyatı barədə ətraflı məlumat verilib. Eyni zamanda universitetin təhsil mühiti və gələcək karyera perspektivləri ilə bağlı təqdimatlar keçirilib.

Təqdimat zamanı şagirdlərin sualları cavablandırılıb, onların ali təhsil seçimində düzgün istiqamətlənməsi məqsədilə tövsiyələr verilib.

Belə görüşlərin əsas məqsədi region gənclərinin ali təhsilə marağını artırmaq, onların gələcək planlarına dəstək olmaq və düzgün seçim etmələrinə kömək göstərməkdir.

BSU Lənkəranda Xarici Dil Müəllimlərinin III Regional Forumunu keçirib

Mayın 15-də Lənkəran şəhərində Bakı Slavyan Universitetinin (BSU) Müasir Dillər layihəsi çərçivəsində Lənkəran-Astara Regional Təhsil İdarəsi ilə birgə təşkilatçılığı ilə Xarici Dil Müəllimlərinin III Regional Forumu keçirilib.

Forum Lənkəran-Astara Regional Təhsil İdarəsiinin tabeliyində fəaliyyət göstərən ümumtəhsil məktəblərinin bir qrup xarici dil müəllimlərini, təhsil mütəxəssislərini və akademik heyəti bir araya gətirərək müasir tədris yanaşmalarının müzakirəsi üçün mühüm platforma rolunu oynayıb. Tədbir çərçivəsində xarici dil tədrisinin aktual problemləri, innovativ metodların tətbiqi və müəllim hazırlığının keyfiyyətinin artırılması məsələləri geniş müzakirə olunub.

Forumda çıxış edən BSU-nun rektoru Anar Nağıyev bildirib ki, universitet əsasən pedaqoji kadr hazırlığı istiqamətində fəaliyyət göstərsə də, onun fəaliyyəti daha geniş spektri əhatə edir. Rektor qeyd edib ki, BSU-da 11 dil üzrə müxtəlif ixtisaslarda kadr hazırlığı həyata keçirilir.

Anar Nağıyev vurğulayıb ki, Regional Xarici Dil Müəllimləri Forumunun əsas məqsədi xarici dil müəllimlərinin məktəblərdə daha effektiv və səmərəli fəaliyyət göstərə bilməsi üçün mövcud ehtiyacları müəyyənləşdirməkdir.

Rektor qeyd edib ki, bu görüşlər vasitəsilə ümumtəhsil məktəblərində çalışan müəllimlərin müasir dövrün tələbləri, tədris texnologiyaları və ehtiyac duyulan bilik-bacarıqlarla bağlı fikirlərinin öyrənilməsi nəzərdə tutulur.

Anar Nağıyev forum çərçivəsində müəllimlərlə ali təhsil müəssisələri arasında davamlı əməkdaşlıq və peşəkar şəbəkələşmənin formalaşdırılmasının vacibliyini də diqqətə çatdırıb.

Çıxışında müəllim peşəsinin cəmiyyətdəki roluna da toxunan rektor Azərbaycan müəlliminin ölkənin inkişafında mühüm missiya daşıdığını vurğulayıb. O qeyd edib ki, müəllimlərin yetişdirdiyi gənclər dövlətin gələcəyinin qurulmasında mühüm rol oynayırlar və müəllimlər bu məsuliyyətli vəzifəni böyük peşəkarlıq və fədakarlıqla yerinə yetirirlər.

Lənkəran-Astara Regional Təhsil İdarəsinin müdir müavini Rəhim Rəhimov çıxışında forumun keçirilməsinin əhəmiyyətini qeyd edərək, belə platformaların müəllimlərin peşəkar inkişafına və tədris keyfiyyətinin yüksəldilməsinə mühüm töhfə verdiyini bildirib.

Daha sonra forum çərçivəsində Lənkəran-Astara Regional Təhsil İdarəsinin tabeliyində fəaliyyət göstərən ümumtəhsil məktəblərinin bir qrup xarici dil müəllimi çıxış edərək öz fikir və təkliflərini səsləndirib.

Tədbir qarşılıqlı müzakirələr ilə davam edib.

BSU və LDU Anlaşma Memorandumu imzalayıblar

Mayın 15-də Bakı Slavyan Universiteti (BSU) ilə Lənkəran Dövlət Universitetiarasında Anlaşma Memorandumu imzalanıb.

Memoranduma əsasən tərəflər arasında təhsil və elm sahəsində əməkdaşlıq genişləndiriləcək, birgə elmi-tədqiqat layihələri, akademik mübadilə proqramları və elmi tədbirlər həyata keçirilərək, tələbə və müəllim mübadiləsi inkişaf etdiriləcək.