55 nömrəli tam orta məktəb

Şagirdimizin uğuru

Məktəbin kollektivi olaraq növbəti bir qələbənin sevincini yaşayırıq. Məktəbimizin 3 "B" sinif şagirdi Laçinov Rəhim respublika miqyasında təşkil olunmuş "BİLBACAR" müsabiqəsində uğurla çıxış edərək III yerin qalibi olmuşdur.
Bu nailiyyət münasibətilə istedadlı şagirdimizi, onun valideynlərini və üzərində əməyi olan müəllimini təbrik edir, Rəhimə təhsil yolunda daimi müvəffəqiyyətlər arzulayırıq.

Məktəbimizdə "Son Zəng" tədbiri keçirilib

13.06.2026-cı il tarixində məktəb həyətində 2025-2026-cı tədris ili üzrə "Son Zəng" tədbiri təntənəli şəkildə qeyd olunub. Tədbirdə məktəb rəhbərliyi, müəllimlər, Xətai Rayon İcra Hakimiyyətinin nümayəndəsi Elyar Babayev, valideynlər, birinci sinif şagirdləri və günün qəhrəmanları olan məzunlar iştirak ediblər.
Tədbir Azərbaycan Respublikasının Dövlət Himninin səsləndirilməsi ilə açıq elan olunub. Daha sonra məktəbin şəhidi, leytenant Samir Əliyevin timsalında Vətən uğrunda canından keçən bütün şəhidlərimizin əziz xatirəsi bir dəqiqəlik sükutla yad edilib.
Açılış nitqi ilə çıxış edən məktəbin direktoru Yaqut Kərimli təhsil ocağının il ərzində qazandığı uğurlardan bəhs edərək məzunlara müstəqil həyatda müvəffəqiyyətlər arzulayıb. Tədbirdə qonaq qismində iştirak edən Xətai RİH-nin nümayəndəsi Elyar Babayev məzunları bu əlamətdar gün münasibətilə təbrik edib və onlara gələcək fəaliyyətlərində uğurlar diləyib. Valideynlər adından çıxış edən Tahir Hüseynov isə müəllim kollektivinə fədakar əməyinə görə təşəkkürünü bildirərək, övladlarına parlaq gələcək arzu edib.
Məzunlar Əhmədli Nigar və Məcidzadə Fatimənin aparıcılığı ilə davam edən tədbirin bədii hissəsi olduqca rəngarəng və yaddaqalan anlarla zəngin olub. Məktəbin birinci sinif şagirdləri hazırladıqları şeirlərlə məzun doğmalarını təbrik ediblər. Daha sonra səhnəyə çıxan məzunlar öz istedadlarını nümayiş etdirərək hazırladıqları milli və xarici rəqslərdən ibarət geniş proqramla çıxış ediblər. Məzun Qurbanlı Ülkərin sazda ifa etdiyi "Ruhani" havası isə tədbirə xüsusi bir rəng və milli ruh qatıb.
Məktəbin ənənəsinə sadiq qalaraq, tədbirdə simvolik açarın ötürülməsi mərasimi keçirilib. Məzun Surxayeva Nübar məktəbin simvolik açarını gələcək estafet nümayəndələrinə, 10 "A" sinif şagirdi İsmayılzadə Şəmsə təqdim edib.
Tədbirin ən həyəcanlı və duyğulu anında məzun Əfəndiyev Əli və 1 "C" sinif şagirdi Yolçiyeva Zəhra birlikdə məktəb illərinin bitdiyini və yeni həyatın başladığını müjdələyən son zəngi çalıblar. 2025-2026-cı tədris ilinin "Son Zəng" tədbiri bütün iştirakçıların, müəllim və şagirdlərin böyük coşqu ilə qatıldığı "Yallı" rəqsi ilə yekunlaşıb.
Məktəb kollektivi olaraq bütün məzunlarımıza müstəqil həyat yolunda uğurlar, qarşıdan gələn imtahanlarda yüksək nailiyyətlər arzulayırıq! Yolunuz açıq olsun, əziz məzunlar!

1 İyun – Uşaqların Beynəlxalq Müdafiəsi Günü münasibətilə şagirdimiz təltif olunub

1 İyun - Uşaqların Beynəlxalq Müdafiəsi Günü hər il respublikamızın bütün bölgələrində böyük təntənə və coşqu ilə qeyd edilir. Bu əlamətdar gün çərçivəsində şagirdimiz daha bir qürurverici uğura imza atmışdır.
DOST İnklüziv İnkişaf və Yaradıcılıq Mərkəzinin benefisiarı, məktəbin 8 "Ç" xüsusi sinif şagirdi Novruzbəyov Rəhim Talıboviç Qusar Rayon İcra Hakimiyyətinin dəstəyi ilə keçirilən "Memarlıq ili - uşaqların gözü ilə" adlı uşaq festivalında uğurlu çıxışına görə "Təşəkkürnamə" ilə təltif olunmuşdur.
Məktəb rəhbərliyi və bütün kollektivi adından istedadlı şagirdimiz Rəhim Novruzbəyovu bu gözəl nailiyyəti münasibətilə ürəkdən təbrik edir, ona gələcək yaradıcılıq fəaliyyətində və addımlarında yeni-yeni uğurlar diləyirik!

Azərbaycan Kosmik Agentliyinin nəzdində fəaliyyət göstərən Kosmik Akademiyanın, ABŞ-nin “Blue Origin” şirkətinin, “Club for the Future” təşkilatının, Azərbaycan Respublikası Təhsil İnstitutunun, Məktəbəqədər və Ümumi Təhsil üzrə Dövlət Agentliyinin və “Azərpoçt” MMC-nin birgə həyata keçirdiyi Məktəblilərarası Milli Kosmik Poçt Kartı Müsabiqəsinin məktəbimiz üzrə seçim turu baş tutmuşdur.Daxili müsabiqədə 60 poçt kartdan ən çox səs toplayan 1 ədəd poçt kart seçilmiş və Kosmik Akademiyaya göndərilmişdir.

Sonuncu mərhələdə ölkə üzrə seçilmiş 2000 ədəd poçt kartı raket missiyası ilə kosmosa göndəriləcək və geri qayıtdıqdan sonra “Kosmosa uçmuşdur” təsdiq möhürü ilə iştirakçılara təqdim ediləcək. Bu təşəbbüs çərçivəsində məktəblilər yaratdıqları poçt kartları ilə kosmosa mesaj göndərmək imkanı qazanacaqlar.

Məktəbin 5"B" sinif şagirdləri il ərzində göstərdiyi yüksək nailiyyətlərə, aktivliyinə və fəallığına görə məktəb rəhbərliyi tərəfindən təşəkkürnamə ilə təltif edilmişdir. Sinif şagirdləri həm dərs prosesində oxumağa məsuliyyətlə yanaşmaları, həm də məktəbdə keçirilən tədbirlərdə fəal iştirak etmələri ilə seçilmişlər. Eyni zamanda, təlim-tərbiyə işlərində nizam-intizamlı davranışları və müəllimlərlə əməkdaşlıqları xüsusi qiymətləndirilmişdir. Afərin sizə 5"B" komandası!

Məktəbin 4"B" sinif şagirdi Dilək Fəttah Pur Vüqar qızı Beyin Olimpiada Mərkəzi tərəfindən 02.05.2026 tarixində keçirilən Qlobal Riyaziyyat Olimpiadasında Bürünc medal, 2"B" sinif şagirdi Sabutay İbrahim isə Gümüş medal qazandığına görə Sertifikatla təltif olunub. Şagirdlərimizi təbrik edir, gələcək fəaliyyətlərində yeni-yeni uğurlar arzulayırıq!