21 nömrəli tam orta məktəb

1 Mart- Mülki Müdafiə Günü münasibətilə məktəbdə maarifləndirici tədbir keçirilib. Tədbir çərçivəsində məktəbin hərbi müəllimi Cəfər Mehdiyev tərəfindən şagirdlər üçün maarifləndirici təlim təşkil olunub. Təlim zamanı şagirdlərə mülki müdafiənin məqsədi və əhəmiyyəti, fövqəladə hallar zamanı təhlükəsizlik qaydaları, düzgün davranış və ilkin mühafizə tədbirləri haqqında ətraflı məlumat verilib. Praktik nümunələr əsasında aparılan təlim şagirdlərin mövzu ilə bağlı bilik və bacarıqlarının artırılmasına xidmət edib. Şagirdlər təlimdə fəal iştirak edərək onları maraqlandıran suallara cavab alıblar.

“Ana dili fənn aylığı” çərçivəsində monitorinq keçirilib.
26.02.2026-cı il tarixində məktəbdə keçirilən “Ana dili fənn aylığı” çərçivəsində Azərbaycan dili və ədəbiyyat metodbirləşməsinin təşəbbüsü ilə VI sinif şagirdləri arasında monitorinq təşkil olunub. Monitorinq “Dinləyib-anlama” məzmun xətti üzrə şagirdlərin dinlədiyini qavrama, əsas fikri müəyyənləşdirmə, mətn üzrə sualları cavablandırma və məzmunu düzgün ifadə etmə bacarıqlarının qiymətləndirilməsi məqsədilə keçirilib. Tapşırıqlar şagirdlərin dinləmə bacarıqlarının inkişaf səviyyəsini müəyyən etmək və təlim prosesində əldə olunan nəticələri təhlil etmək üçün hazırlanıb. Monitorinq şagirdlərdə ana dilinə marağın artırılması və nitq bacarıqlarının formalaşdırılması baxımından mühüm əhəmiyyət daşıyıb.

“Xocalı – ağrı və qürur tariximiz” adlı tədbir keçirilib.
Xocalı soyqırımının ildönümü ilə əlaqədar olaraq məktəbdə silsilə anım tədbirləri davam edir. Bu çərçivədə məktəbin ibtidai sinif müəllimi Lamiyə Xudiyeva tərəfindən 3 “A” sinif şagirdləri ilə “Xocalı – ağrı və qürur tariximiz” adlı tədbir təşkil olunub. Tədbirin keçirilməsində əsas məqsəd şagirdlərə Xocalı faciəsi haqqında yaş səviyyələrinə uyğun məlumat vermək, onlarda vətənpərvərlik hisslərini gücləndirmək və şəhidlərimizin əziz xatirəsinə hörmət ruhunu aşılamaq olub. Müəllim tərəfindən Xocalı soyqırımının tarixi həqiqətləri haqqında məlumat verilib, faciənin xalqımızın yaddaşında xüsusi yer tutduğu vurğulanıb. Şagirdlər mövzuya həsr olunmuş şeirlər səsləndirib, hazırladıqları kompozisiyalarla çıxış ediblər.

Xocalı soyqırımı — xalqımızın qan yaddaşı.
Xocalı soyqırımının ildönümü ilə əlaqədar olaraq məktəbdə şagirdlərə tarixi həqiqətlərin çatdırılması, vətənpərvərlik ruhunun gücləndirilməsi və şəhidlərin əziz xatirəsinin yad edilməsi məqsədilə xüsusi dərslər keçirilib. 1992-ci ilin fevral ayında baş vermiş Xocalı soyqırımı Azərbaycan tarixinin ən faciəli səhifələrindən biri kimi yadda qalıb və günahsız insanların qətli ilə nəticələnən bu hadisə xalqımızın yaddaşında dərin iz buraxıb. Keçirilən xüsusi dərslərdə müəllimlər tərəfindən Xocalı hadisələrinin tarixi səbəbləri, faciənin miqyası və beynəlxalq aləmdə tanıdılması istiqamətində aparılan işlər haqqında ətraflı məlumat verilib. Şagirdlər təqdimatlarla çıxış edib, mövzuya həsr olunmuş şeirlər səsləndirib, sənədli videoçarxlar izləyiblər. Xocalı şəhidlərinin xatirəsi bir dəqiqəlik sükutla yad olunub.

Xocalı soyqırımının 34-cü ildönümü ilə əlaqədar məktəbin informatika müəllimi Aygün Xəlilli tərəfindən şagirdlər üçün maarifləndirici film nümayişi təşkil olunub. Nümayiş etdirilən film vasitəsilə şagirdlər Xocalı faciəsinin tarixi, hadisələrin mahiyyəti və günahsız insanların yaşadığı acı talelər haqqında məlumat əldə ediblər. Film izlənildikdən sonra mövzu ətrafında müzakirə aparılıb, şagirdlərin sualları cavablandırılıb və Xocalı həqiqətlərinin gələcək nəsillərə çatdırılmasının vacibliyi vurğulanıb. Tədbirin keçirilməsində əsas məqsəd şagirdlərdə vətənpərvərlik hisslərini gücləndirmək, tarixi yaddaşı qorumaq və milli dəyərlərə hörmət aşılamaq olub.

24.02.2026-cı il tarixində məktəbdə şagirdlərin dünyagörüşünün artırılması və onların vətənpərvərlik ruhunda tərbiyə olunması məqsədilə maarifləndirici ekskursiya təşkil olunub. Məktəbin texnologiya müəllimi Ülviyyə Qurbanovanın rəhbərliyi ilə 6 “C” sinif şagirdləri Hərb Tarixi Muzeyinə ekskursiyada iştirak ediblər. Ekskursiya zamanı şagirdlər Azərbaycan hərb tarixini əks etdirən eksponatlarla yaxından tanış olub, müxtəlif dövrlərə aid silah nümunələri, hərbi geyimlər və tarixi sənədlər haqqında ətraflı məlumat əldə ediblər. Muzey əməkdaşları tərəfindən təqdim olunan məlumatlar şagirdlərin böyük marağına səbəb olub.

Azərbaycan tarixinin ən faciəli və ağrılı səhifələrindən biri olan Xocalı faciəsi xalqımızın yaddaşına silinməz iz salmışdır. Bu soyqırım insanlığa qarşı törədilmiş ən ağır cinayətlərdən biri kimi tarixə düşmüş və hər il ölkəmizdə dərin ehtiramla anılır. Xocalı soyqırımının 34-cü ildönümü ilə əlaqədar məktəbdə də anım tədbirləri təşkil olunub. Məktəbin təsviri incəsənət müəllimi Kəmalə Əliyevanın təşəbbüsü ilə şagirdlərin rəsm işlərindən ibarət sərgi təşkil edilib. Sərgidə nümayiş olunan rəsmlərdə şagirdlər Xocalı faciəsinin ağrı-acısını, günahsız insanların taleyini, həmçinin Vətənə sevgi və sülh arzularını bədii şəkildə əks etdiriblər.

Məktəbdə 21 Fevral – Beynəlxalq Ana Dili Günü münasibətilə silsilə tədbirlər çərçivəsində növbəti maarifləndirici və yaradıcı fəaliyyət təşkil olunub. Ana dili müəllimləri Maral Quliyeva və Amid Məmmədov tərəfindən “Sözlə yaşanan Vətən” adlı şeir müsabiqəsi keçirilib. Müsabiqədə məktəbin VI, VII və VIII sinif şagirdləri fəal iştirak edərək ana dilimizin zənginliyini, gözəlliyini və milli-mənəvi dəyərlərimizi əks etdirən şeirlərlə çıxış ediblər. Şagirdlər tərəfindən səsləndirilən nümunələrdə Vətənə sevgi, ana dilinə hörmət və milli kimliyimizin qorunmasının vacibliyi xüsusi vurğulanıb.

21 Fevral – Beynəlxalq Ana Dili Günüdür. Bu gün dünyada dil müxtəlifliyinin qorunması, ana dillərinin yaşadılması və inkişaf etdirilməsinin vacibliyini diqqətə çatdırmaq məqsədilə qeyd olunur. Ana dili hər bir xalqın milli kimliyini, tarixini, mədəniyyətini və mənəvi dəyərlərini özündə yaşadan ən böyük sərvətdir. Bu əlamətdar gün münasibətilə məktəbimizdə ana dilinə sevgi və hörmət hissinin aşılanmasına xidmət edən maarifləndirici və ədəbi-bədii tədbirlər təşkil olunur. Məktəbin ibtidai sinif müəllimi Rəziyyə Novruzova 2 “A” sinif şagirdləri ilə “Ana dilim – keçmişimdən gələcəyimə” adlı tədbir keçirib. Tədbirin keçirilməsində əsas məqsəd şagirdlərdə ana dilinə sevgi və hörmət hissini gücləndirmək, dilimizin zənginliyini və milli-mənəvi dəyərlərimizin qorunmasının əhəmiyyətini aşılamaq olub. Tədbir zamanı şagirdlər ana dilinə həsr olunmuş şeirlər səsləndirib, mahnılar ifa edib və müxtəlif səhnəciklərlə çıxış ediblər. Onlar hazırladıqları təqdimatlar vasitəsilə Azərbaycan dilinin gözəlliyini və əhəmiyyətini nümayiş etdiriblər.

Məktəbdə Xocalı faciəsinin 34-cü ildönümünə həsr olunmuş əl işləri sərgisi təşkil edilib. Məktəbin texnologiya müəllimi Arzu Qaraxanova tərəfindən Xocalı faciəsinin 34-cü ildönümü ilə əlaqədar şagirdlərin əl işlərindən ibarət sərgi təşkil olunub. Sərgidə şagirdlərin hazırladıqları kompozisiyalar və müxtəlif əl işləri nümayiş etdirilib. Əsərlərdə Xocalı faciəsinin ağrı-acısı, xalqımızın yaşadığı ağır günlər, eyni zamanda sülhə və ədalətə çağırış motivləri öz əksini tapıb. Şagirdlər yaradıcılıq vasitəsilə tarixi hadisələrə münasibətlərini ifadə edərək duyğu və düşüncələrini sənət dili ilə təqdim ediblər.

Xocalı soyqırımının 34-cü ildönümünə həsr olunmuş dəyirmi masa keçirilib. Məktəbin tarix müəllimi Elza Dursunova tərəfindən 8 “B” sinfində Xocalı soyqırımının 34-cü ildönümünə həsr olunmuş “Dəyirmi masa” təşkil olunub. Tədbirin keçirilməsində əsas məqsəd şagirdlərə xalqımızın tarixində dərin iz buraxmış bu faciə haqqında ətraflı məlumat vermək, onlarda vətənpərvərlik ruhunu gücləndirmək və tarixi yaddaşın qorunmasının vacibliyini aşılamaq olub. Dəyirmi masa zamanı müəllim Xocalı faciəsinin başvermə səbəbləri, hadisələrin gedişi və onun Azərbaycan xalqı üçün ağır nəticələri barədə geniş məlumat verib. Bildirilib ki, Xocalı soyqırımı insanlığa qarşı törədilmiş ən ağır cinayətlərdən biri kimi tarixə həkk olunub və bu faciənin unudulmaması hər bir vətəndaşın mənəvi borcudur. Şagirdlər mövzu ətrafında çıxışlar edib, hazırladıqları təqdimat və məlumatları bölüşərək hadisələrə öz münasibətlərini bildiriblər. Tədbir zamanı şəhidlərin əziz xatirəsi bir dəqiqəlik sükutla yad olunub.

20.02.2026-cı il tarixində məktəbdə 21 Fevral – Beynəlxalq Ana Dili Gününə həsr olunmuş silsilə tədbirlər çərçivəsində ana dili müəllimləri Səadət Bağırova, Xanım Səfərova və Nəzakət Zeynalovanın təşkilatçılığı ilə “Ana dilim – ruhumun səsi” adlı ədəbi-bədii kompozisiya keçirilib. Tədbirin əsas məqsədi şagirdlərdə ana dilinə sevgi və hörmət hissini gücləndirmək, Azərbaycan dilinin zənginliyini, saflığını və milli-mənəvi dəyərlərimizin qorunması rolunu şagirdlərə aşılamaq olub. Kompozisiyada məktəbin müxtəlif sinif şagirdləri fəal iştirak edərək ana dilinə həsr olunmuş şeirlər səsləndirib, ədəbi nümunələrlə çıxış ediblər. Tədbir Azərbaycan dilinin tarixindən, inkişaf yolundan və milli kimliyimizin formalaşmasındakı əhəmiyyətindən bəhs edən təqdimatla başlayıb. Şagirdlər görkəmli söz ustadlarının ana dili haqqında fikirlərini səsləndirərək dilimizin xalqın mənəvi varlığının əsas daşıyıcısı olduğunu vurğulayıblar. Tədbir zamanı şagirdlərin ifasında vətənpərvərlik ruhunda şeirlər, ana dilini tərənnüm edən musiqi nömrələri təqdim olunub. Sonda müəllimlər çıxış edərək ana dilimizin qorunmasının və düzgün istifadəsinin gələcək nəsillərin mənəvi inkişafında mühüm rol oynadığını qeyd edib, şagirdləri Azərbaycan dilini sevməyə, onu daim yaşatmağa və zənginləşdirməyə çağırıblar.