Bakı şəhəri Ayaz Məhərrəmov adına 95 saylı tam orta məktəb

Pedaqoji şuranın növbəti iclası keçirildi

Məktəbimizdə pedaqoji şuranın növbəti iclası keçirildi. İclasda IX və XI sinif şagirdlərinin təhsil göstəriciləri, buraxılış imtahanlarına hazırlıq vəziyyəti, əldə olunan nəticələr və qarşıda duran vəzifələr müzakirə olundu.
İclas zamanı məktəbin direktoru Pərvanə Abbasova və ATİAHİ-nin məktəb üzrə sədri Xalidə Mirzəxanova tərəfindən 65 yaşı tamam olan müəllimlər təbrik edildi. ATİAHİ tərəfindən yubilyar müəllimlərə hədiyyələr və fəxri fərmanlar təqdim olundu.
Müəllimlər onlara göstərilən diqqət və qayğıya görə təşəkkürlərini bildirdilər.

Məktəbimizdə 2025–2026-cı tədris ilinin başa çatması münasibətilə “Son Zəng” tədbiri keçirildi. Tədbirdə məktəb rəhbərliyi, müəllimlər, şagirdlər və valideynlər iştirak etdilər.
Məzunlar məktəb illərini əks etdirən çıxışlar, şeirlər və musiqi nömrələri ilə tədbirə rəng qatdılar. Məktəb rəhbərliyi məzunları təbrik edərək onlara gələcək həyatlarında uğurlar arzuladı.
Sonda xatirə şəkilləri çəkdirildi və məzunlar üçün məktəb zəngi son dəfə səsləndi🎓🔔

9-cu sinif buraxılış imtahanında yüksək nəticə göstərən şagirdlərlə görüş keçirildi.

Məktəbimizin 9-cu sinif buraxılış imtahanında yüksək nəticə göstərən şagirdləri ilə görüş keçirilib. Görüş zamanı məktəbin direktoru Pərvanə Abbasova şagirdləri əldə etdikləri uğurlara görə təbrik edib, onlara gələcək təhsillərində yeni nailiyyətlər arzulayıb.
Direktor müavinləri və müəllimlər də şagirdləri təbrik edərək onların bu uğurunda əməyi olan valideynlərə və pedaqoji kollektivə təşəkkürlərini bildiriblər.
Sonda yüksək nəticə göstərən şagirdlərlə xatirə şəkilləri çəkdirilib. Məktəb kollektivi adından bütün şagirdlərimizi təbrik edir, onlara gələcək həyatlarında və təhsillərində uğurlar arzulayırıq.

“Gülüşdə gizlənən həqiqət” adlı tədbiri keçirilib

08.06. 2026-cı il tarixində “1 nömrəli Uşaq-Gənclər İnkişaf Mərkəzi” publik hüquqi şəxsin 95 nömrəli tam orta məktəbdə fəaliyyət göstərən “Kitab klubu” dərnəyinin üzvlərinin iştirakı ilə “Gülüşdə gizlənən həqiqət” adlı hesabat tədbiri keçirilib.
Tədbirdə Cəlil Məmmədquluzadənin “Poçt qutusu” hekayəsi əsasında hazırlanmış tamaşa nümayiş etdirilib. Əvvəlcə şəhidlərimizin əziz xatirəsi bir dəqiqəlik sükutla yad edilib, daha sonra Azərbaycan Respublikasının Dövlət Himni səsləndirilib. Həmçinin yazıçının həyat və yaradıcılığına həsr olunmuş videoçarx təqdim olunub.
Tədbirin məqsədi uşaqlarda mütaliəyə marağı artırmaq, klassik ədəbiyyatı təbliğ etmək və mənəvi dəyərləri aşılamaq olub. Tədbirin sonunda il ərzində fəallığı ilə seçilən dərnək üzvləri diplomlarla təltif ediliblər.
Tədbirdə Prezident mükafatçısı, Azərbaycan Dövlət Gənc Tamaşaçılar Teatrının aktyoru Rəşad Səfərov, məktəb rəhbərliyi Pərvanə Abbasova, müəllimlər və şagirdlər iştirak ediblər.

Şagirdimizin Beynəlxalq Olimpiadalardakı Böyük Uğuru

Məktəbimizin istedadlı və çalışqan şagirdi Əli Şükürzadə müxtəlif beynəlxalq olimpiadalarda uğurla iştirak edərək bir sıra yüksək nəticələr əldə etmişdir. O, Beynəlxalq Brainiacs İngilis dili Olimpiadasında gümüş medal, Beynəlxalq Brainiacs Coğrafiya Olimpiadasında gümüş medal, International Spirit of Math Contest olimpiadasında bürünc medal, UAMO Akdeniz Universiteti Riyaziyyat Olimpiadasında gümüş medal, USA Math Olimpiadasında gümüş medal və Beynəlxalq Eynşteyn Olimpiadasında gümüş medala layiq görülmüşdür.
Əldə etdiyi bu nailiyyətlər Əli Şükürzadənin bilik və bacarığının, zəhmətinin və əzmkarlığının bariz nümunəsidir.
Şagirdimizi bu əlamətdar uğur münasibətilə ürəkdən təbrik edir, ona gələcək təhsil həyatında daha böyük nailiyyətlər, yeni qələbələr və uğurlar arzulayırıq.

1 İyun – Beynəlxalq Uşaqların Müdafiəsi Gününə həsr olunmuş asfalt üzərində rəsm müsabiqəsi keçirilib

1 İyun – Beynəlxalq Uşaqların Müdafiəsi Günü münasibətilə məktəbdə asfalt üzərində rəsm müsabiqəsi keçirilib. Məktəbin Uşaq Birliyi Təşkilatı Rəhbərinin təşkilatçılığı ilə baş tutan müsabiqədə 7-ci sinif şagirdləri iştirak ediblər.
Şagirdlər asfalt üzərində “Yer kürəsinin ətrafında uşaqlar”, “Əllərində şar tutmuş uşaqlar”, “Şagirdlər dərs oxuyarkən” və digər mövzularda rəngarəng rəsmlər çəkiblər. Çəkilən rəsmlərdə uşaqların xoşbəxtliyi, dostluq, sülh, birlik və təhsilin əhəmiyyəti öz əksini tapıb.
Müsabiqə zamanı şagirdlər yaradıcılıq bacarıqlarını nümayiş etdirərək maraqlı kompozisiyalar təqdim ediblər. Tədbirin sonunda məktəbin direktoru, Pərvanə Abbasova, iştirakçıları təbrik edib və onlara Tərifnamələr təqdim edib.
Tədbirin əsas məqsədi şagirdlərin yaradıcılıq qabiliyyətlərini inkişaf etdirmək, onların asudə vaxtlarını səmərəli təşkil etmək və Beynəlxalq Uşaqların Müdafiəsi Gününün əhəmiyyətini təbliğ etmək olub.

1 İyun – Beynəlxalq Uşaqların Müdafiəsi Günü məktəbimizdə qeyd olundu
Məktəbimizdə 1 İyun – Beynəlxalq Uşaqların Müdafiəsi Günü münasibətilə tədbir keçirildi. Tədbirdə 1-ci və 4-cü sinif şagirdləri iştirak etdilər.
Şagirdlər tərəfindən bir-birindən maraqlı mahnılar və çıxışlar təqdim olundu. Tədbirdə məktəb direktoru Pərvanə Abbasova çıxış edərək uşaqları bu əlamətdar gün münasibətilə təbrik etdi, onlara sağlam, xoşbəxt və uğurlu gələcək arzuladı.
1 İyun uşaqların hüquqlarının qorunmasına, onların sağlam və təhlükəsiz mühitdə böyüməsinə diqqət çəkən əlamətdar günlərdən biridir. Tədbir şagirdlərin yüksək əhval-ruhiyyəsi və sevinc dolu anları ilə yadda qaldı.

Biologiya aylığı çərçivəsində məktəbdə yaşıllaşdırma aksiyası keçirildi.

95 saylı tam orta məktəbdə keçirilən biologiya aylığı çərçivəsində şagirdlər məktəb həyətinin yaşıllaşdırılması və abadlaşdırılması istiqamətində fəal iştirak etmişlər. Şagirdlər birlik və əməkdaşlıq nümayiş etdirərək təhsil aldıqları məkanı daha da gözəlləşdirmək məqsədilə müxtəlif bitkilər, güllər əkmişlər.
Məktəbin həyətinin müxtəlif guşələrində aparılan yaşıllaşdırma işləri ətraf mühitə qayğıkeş münasibətin formalaşdırılmasına, şagirdlərdə ekoloji düşüncənin inkişafına xidmət etmişdir. Əkilən güllər və dekorativ bitkilər məktəbimizə xüsusi gözəllik və rəngarənglik qatmışdır.
Bu cür tədbirlər şagirdlərin təbiətə sevgi ruhunda tərbiyə olunmasına, eyni zamanda kollektiv fəaliyyət bacarıqlarının inkişafına mühüm töhfə verir.