Ağdam şəhər Q.Pirimov adına 2 saylı uşaq musiqi məktəbi

Ağdam şəhər Q.Pirimov adına 2 saylı uşaq musiqi məktəbi Qarabağ Regional Mədəniyyət idarəsi Ağdam şəhər Qurban Pirimov adına 2 saylı U.M.M🎵🎶🪕🎹🪗🥁🎤🎼🎸

18/09/2026

18 Sentyabr – Milli Musiqi Günü

Azərbaycan professional musiqi sənətinin banisi, dahi bəstəkar Üzeyir Hacıbəylinin doğum günü ölkəmizdə Milli Musiqi Günü kimi qeyd olunur.

17/09/2026

Türk dünyası və İslam aləmində birlik və həmrəyliyin gücləndirilməsi vacibdir

Azərbaycan Respublikasının Prezidenti cənab İlham Əliyev sentyabrın 15-də Türk Dövlətləri Təşkilatının (TDT) müsəlman dini idarə rəhbərləri Şurasının üzvlərindən və müşahidəçilərindən, Yəhya Bakuvi Beynəlxalq Konfransının həmtəşkilatçılarından və Qafqaz Xalqları Ali Dini Şurasının üzvlərindən ibarət nümayəndə heyətini qəbul edib. Cənab Prezident görüşdəki çıxışı bir neçə mühüm istiqaməti özündə birləşdirib. Çıxışın əsas xəttini Türk dünyası və İslam aləmində həmrəylik, Azərbaycanın regional rolu, Qarabağın bərpası və Ermənistanla sülh prosesi təşkil edib. Prezident Bakıda keçirilən dini liderlərin toplantısını yalnız dini tədbir kimi deyil, həm də Türk dünyası, Qafqaz və İslam aləmi arasında əlaqələrin gücləndirilməsi baxımından əhəmiyyətli platforma kimi təqdim edib. İlham Əliyev Azərbaycanın həm Türk dünyasının, həm Qafqazın, həm də İslam aləminin bir hissəsi olduğunu vurğulayıb. Onun çıxışında Azərbaycanın bu coğrafiyalar arasında əlaqələndirici roluna xüsusi diqqət yetirilib. Dini liderlərin sülh, əməkdaşlıq və qarşılıqlı anlaşma istiqamətində verdiyi mesajların müsəlman cəmiyyətləri üçün əhəmiyyətli olduğu qeyd olunub. Prezident belə görüşlərin mütəmadi keçirilməsini də təklif edib. Çıxışın əvvəlində Seyid Yəhya Bakuvinin yaradıcılığına xüsusi yer ayrılması təsadüfi deyil. Prezident Azərbaycan xalqının dünya mədəniyyətinə bəxş etdiyi Nizami Gəncəvi, Xaqani Şirvani, İmadəddin Nəsimi, Seyid Yəhya Bakuvi, Şah İsmayıl Xətai və Məhəmməd Füzuli kimi şəxsiyyətlərin irsini milli-mənəvi dəyərlərin mühüm hissəsi kimi təqdim edib. Beləliklə, dini liderlərin Bakıda toplanması həm müasir dini əməkdaşlıq, həm də ortaq tarixi-mədəni irsin təbliği kontekstində qiymətləndirilib. Prezidentin çıxışının geniş hissəsi Qarabağ məsələsinə həsr olunub. O, 30 illik işğal dövründə Azərbaycan ərazilərində baş vermiş dağıntılardan, məcburi köçkünlükdən və dini-mədəni abidələrin məhv edilməsindən danışıb. İlham Əliyev Qarabağ məsələsini yalnız Azərbaycan-Ermənistan münasibətləri çərçivəsində deyil, eyni zamanda beynəlxalq hüquq və ədalət məsələsi kimi təqdim edib. Xüsusilə məscidlərin dağıdılması və dini irsə vurulan zərər dini liderlərdən ibarət auditoriya qarşısında ayrıca vurğulanıb. Prezidentin fikrincə, Azərbaycanın ərazi bütövlüyünün bərpasından sonra Qarabağda yeni mərhələ başlayıb. Bu mərhələnin əsas istiqamətləri şəhər və kəndlərin yenidən qurulması, keçmiş məcburi köçkünlərin qayıdışı və dini-mədəni irsin bərpasıdır. Çıxışda Ağdam məscidinin bərpasına xüsusi diqqət ayrılıb. Prezident bildirib ki, Qarabağda bərpa işlərinə məsciddən başlanması Azərbaycanın dini və milli-mənəvi dəyərlərə münasibətinin göstəricisidir. Bu yanaşma həm də Qarabağın yenidən qurulmasının yalnız iqtisadi və infrastruktur layihəsi olmadığını, bölgənin tarixi və mənəvi simasının da bərpa edilməsinin nəzərdə tutulduğunu göstərir. Çıxışın digər mühüm hissəsi beynəlxalq təşkilatlara və Qərb institutlarına münasibətlə bağlıdır. Prezident Azərbaycanın keçmiş münaqişə dövründə beynəlxalq qurumlardan gözləntilərinin lazımi şəkildə qarşılanmadığını bildirib və bunu “ikili standartlar” kontekstində qiymətləndirib. Avropa Parlamenti və digər Avropa institutları ilə bağlı səsləndirilən sərt fikirlər çıxışın ən kəskin siyasi hissəsini təşkil edir.
Çıxışın qlobal gündəmlə bağlı hissəsində islamofobiya məsələsi də ön plana çıxarılıb. Prezident İslam dininin terror və zorakılıqla eyniləşdirilməsinə, dini dəyərlərin və müqəddəs kitabların təhqir edilməsinə qarşı müsəlman ölkələrinin həmrəyliyinin vacibliyini vurğulayıb. Bu kontekstdə birlik yalnız siyasi və iqtisadi əməkdaşlıq kimi deyil, həm də dini və mədəni dəyərlərin müdafiəsi vasitəsi kimi təqdim olunur. Çıxışın mühüm mesajlarından biri Azərbaycan-Ermənistan münasibətlərinin gələcəyi ilə bağlıdır. Prezident Azərbaycan tərəfindən sülh gündəliyinin seçildiyini və bu istiqamətin davam etdirilməsinin vacibliyini bildirib. İlham Əliyev hərbi qarşıdurmadan sonra sülhə keçidin Azərbaycanın siyasi seçimlərindən biri olduğunu vurğulayıb. Eyni zamanda, keçmişdə baş vermiş hadisələrin unudulmayacağını və Azərbaycanın öz təhlükəsizliyini təmin etmək üçün hərbi imkanlarını qoruyacağını bildirib. Prezidentin dini liderlərlə görüşündə verdiyi əsas mesajlardan biri də budur: regional və qlobal çağırışlar qarşısında ayrı-ayrı dövlətlərin deyil, ortaq maraqları olan ölkələrin və xalqların əməkdaşlığı daha böyük əhəmiyyət daşıyır. Bu baxımdan Bakıda keçirilən tədbirlər yalnız dini toplantı kimi deyil, mədəni diplomatiya, regional əməkdaşlıq və sülh gündəliyinin təşviqi baxımından siyasi mesaj daşıyan platforma kimi çıxış edir.

15/09/2026

Diplomatik korpus nümayəndələrinin Qarabağ və Şərqi Zəngəzura səfərinə Ermənistanın reaksiyası bölgədə sülhə olan etimadı sarsıdır

Azərbaycanda akkreditə olunmuş diplomatik korpusun nümayəndələrinin Qarabağ və Şərqi Zəngəzura səfərinə Ermənistanın bir sıra siyasi və ictimai dairələri tərəfindən göstərilən reaksiya təəssüf və narahatlıq doğurur. Xarici diplomatların Azərbaycanın suveren ərazisinə səfərinə qarşı kampaniya xarakterli çıxışlar Ermənistan cəmiyyətində revanşist və dözümsüz yanaşmaların hələ də mövcud olduğunu göstərir. Qarabağ Azərbaycanın beynəlxalq səviyyədə tanınmış ərazisidir. Azərbaycanın ərazi bütövlüyünün tanınması və dəstəklənməsi Ermənistanın özü tərəfindən də müxtəlif sənədlərdə ifadə olunub. Bu baxımdan, Azərbaycanda akkreditə olunmuş diplomatik nümayəndələrin ölkəmizin müxtəlif bölgələrinə, o cümlədən Qarabağ və Şərqi Zəngəzura səfərinə etiraz edilməsi Azərbaycanın daxili işlərinə müdaxilə kimi qiymətləndirilməlidir. Diplomatik korpusun nümayəndələrinin sözügedən səfəri onların təmsil etdikləri dövlətlərin Azərbaycanın suverenliyi və ərazi bütövlüyünə münasibətinin də aydın göstəricisidir. Ermənistanın ayrı-ayrı dairələrinin bu səfəri hədəfə alması isə regionda yeni reallıqların qəbul edilməsinə qarşı müqavimətin davam etdiyini göstərir. Son reaksiyalarda Qarabağdakı tarixi-mədəni irslə bağlı məsələlərin də siyasi müstəviyə gətirilməsi müşahidə olunur. Gəncəsər və Xudavəng kimi dini və tarixi abidələrin yalnız etnik-milli mənsubiyyət üzərindən təqdim edilməsi regionun mürəkkəb tarixinin birtərəfli şəkildə izahına gətirib çıxarır. Qafqaz Albaniyasının Azərbaycan ərazisində mövcudluğu və onun zəngin tarixi-mədəni irsi tarixşünaslıqda geniş araşdırılmış məsələlərdəndir. Bu irsin yalnız müasir siyasi kimliklər üzərindən izah edilməsi tarixi proseslərin obyektiv araşdırılmasına xidmət etmir.Azərbaycan ərazisində yerləşən tarixi və mədəni abidələrin qorunması Azərbaycan dövlətinin məsuliyyətidir. Bu abidələrin gələcək nəsillərə çatdırılması, onların tarixi xüsusiyyətlərinin qorunması və beynəlxalq ictimaiyyətə təqdim edilməsi dövlət siyasətinin mühüm istiqamətlərindən biridir. Eyni zamanda, Ermənistan ərazisində Azərbaycan xalqının tarixi və mədəni irsi ilə bağlı məsələyə münasibət də ciddi suallar doğurur. Azərbaycanlıların əsrlər boyu yaşadığı yaşayış məntəqələrinin, məscidlərin, qəbiristanlıqların və digər tarixi-mədəni obyektlərin vəziyyəti ilə bağlı çoxsaylı faktlar mövcuddur. Bir tərəfdən Qarabağdakı tarixi irsin qorunması məsələsini gündəmə gətirib, digər tərəfdən indiki Ermənistan ərazisində Azərbaycan xalqının tarixi-mədəni irsinin mövcudluğunu inkar etmək obyektiv və prinsipial yanaşma sayıla bilməz.Tarixi irs siyasi məqsədlər üçün seçmə şəkildə istifadə olunmamalıdır. Regionun bütün xalqlarının yaratdığı mədəni irsə hörmət göstərilməsi Cənubi Qafqazda davamlı sülh və barışığın formalaşması üçün mühüm şərtdir. Ermənistan daxilində revanşist mövqelərin mövcudluğu yeni məsələ deyil. Narahatlıq doğuran məqam isə bu yanaşmanın təkcə ayrı-ayrı radikal siyasi qüvvələrin mövqeyi kimi deyil, bəzən daha geniş ictimai və siyasi diskursun tərkib hissəsi kimi ortaya çıxmasıdır. Bu baxımdan, Ermənistan parlamentinin sədri Ruben Rubinyanın mövzu ilə bağlı açıqlaması da diqqətdən kənarda qala bilməz. Azərbaycanın daxili məsələləri ilə bağlı Ermənistanın yüksək vəzifəli siyasi nümayəndələrinin açıqlamalar verməsi iki ölkə arasında sülh və etimad mühitinin formalaşdırılması baxımından konstruktiv yanaşma hesab edilə bilməz.14 sentyabr tarixində Ermənistan parlamentində 12–13 sentyabr 2022-ci il hadisələri zamanı həlak olmuş hərbçilərin xatirəsinin bir dəqiqəlik sükutla yad edilməsi də mövcud siyasi atmosfer kontekstində diqqət çəkir. Bu kimi addımların necə təqdim edilməsindən asılı olaraq cəmiyyətdə revanşist əhval-ruhiyyənin güclənməsinə xidmət edə biləcəyi nəzərə alınmalıdır.Baş verənlər Ermənistanın sülh prosesinə münasibəti ilə bağlı sualların yenidən gündəmə gəlməsinə səbəb olur. Azərbaycan və Ermənistan arasında sülhün təmin olunması yalnız rəsmi sənədlərin qəbul edilməsi ilə deyil, həm də cəmiyyətlərdə qarşılıqlı hörmət və ərazi bütövlüyünün qəbul edilməsi ilə mümkündür.Ermənistanın Azərbaycanın ərazi bütövlüyünü tanıması ilə bağlı siyasi mövqeyi praktiki addımlarla da təsdiqlənməlidir. Azərbaycanda akkreditə olunmuş diplomatların Qarabağ və Şərqi Zəngəzura səfərinin hədəfə alınması isə bu baxımdan ziddiyyətli siqnallar yaradır.Sülh prosesinin uğuru üçün Ermənistan cəmiyyətində və siyasi dairələrdə revanşist yanaşmaların aradan qaldırılması, Azərbaycanın suverenliyinə və ərazi bütövlüyünə hörmətin möhkəmləndirilməsi və tarixi məsələlərin siyasi qarşıdurma vasitəsinə çevrilməsindən imtina edilməsi vacibdir.Azərbaycan öz ərazisindəki bütün tarixi və mədəni irsin qorunmasında maraqlıdır. Eyni prinsip Ermənistan ərazisində mövcud olmuş Azərbaycan irsi ilə bağlı da tətbiq edilməlidir.Tarixi saxtalaşdırmaq, ayrı-ayrı xalqların regionun tarixindəki rolunu inkar etmək və mədəni irsi siyasi qarşıdurmanın alətinə çevirmək Cənubi Qafqazda uzunmüddətli sülhə xidmət etmir.Azərbaycanın mövqeyi aydındır: regionda sülh və sabitlik yalnız qarşılıqlı ərazi bütövlüyünün tanınması, suverenliyə hörmət, tarixi-mədəni irsə obyektiv münasibət və revanşist çağırışlardan imtina əsasında mümkündür. Bu prinsiplərə hörmət həm Azərbaycan, həm də Ermənistan üçün davamlı sülhün əsas şərtidir.

24/08/2026

Azərbaycan–Özbəkistan münasibətləri: qardaşlıqdan strateji tərəfdaşlığa doğru inkişaf yolu

Cənab Prezident İlham Əliyevin 2026-cı il avqustun 23-də Daşkənddə səsləndirdiyi bəyanat Azərbaycan-Özbəkistan münasibətlərinin strateji tərəfdaşlıqdan daha yüksək səviyyəyə – hərtərəfli və qardaşlıq münasibətlərinə doğru inkişaf etdiyini göstərir.
Dövlət başçısı ilk növbədə Özbəkistanda son illərdə həyata keçirilən genişmiqyaslı islahatları və sürətli sosial-iqtisadi inkişafı yüksək qiymətləndirib. O, Daşkəndin və bütövlükdə Özbəkistanın sürətli inkişafını Prezident Şavkat Mirziyoyevin həyata keçirdiyi məqsədyönlü siyasətin nəticəsi kimi dəyərləndirib. Bu yanaşma Azərbaycanın Özbəkistanın əldə etdiyi uğurlara verdiyi siyasi və mənəvi dəstəyi nümayiş etdirir.
Bəyanatda xüsusi diqqət çəkən məqamlardan biri Azərbaycan-Özbəkistan iqtisadi əlaqələrinin inkişafıdır. Prezident İlham Əliyev iki ölkə arasında ticarət dövriyyəsinin yaxın illərdə 1 milyard dollara çatdırılması perspektivini real hədəf kimi təqdim edib. Qarşılıqlı investisiyaların, enerji, nəqliyyat, avtomobil sənayesi, kənd təsərrüfatı, turizm, bankçılıq və digər sahələrdə birgə layihələrin genişlənməsi münasibətlərin yalnız siyasi deyil, həm də möhkəm iqtisadi əsaslara söykəndiyini göstərir.
Prezidentin fikirlərindən aydın olur ki, Azərbaycan və Özbəkistanın inkişaf prosesləri bir-birini tamamlayır. Hər iki ölkənin iqtisadi potensialının artması qarşılıqlı əməkdaşlıq imkanlarını genişləndirir. Bu baxımdan Mərkəzi Asiya ilə Azərbaycanın vahid geosiyasi və geoiqtisadi məkan kimi təqdim edilməsi xüsusi əhəmiyyət daşıyır. Azərbaycanın Mərkəzi Asiya dövlətləri ilə əməkdaşlığının genişlənməsi də bu prosesin mühüm tərkib hissəsi kimi qiymətləndirilir.
Bəyanatda Azərbaycanın işğaldan azad edilmiş ərazilərinin bərpasında Özbəkistanın göstərdiyi dəstəyə də xüsusi yer ayrılıb. Füzulidə Mirzə Uluqbəy adına məktəbin inşası, Xankəndidə tikiş fabriklərinə investisiya yatırılması və digər layihələr Özbəkistanın Azərbaycanın Qarabağ və Şərqi Zəngəzurda apardığı quruculuq prosesinə verdiyi töhfənin göstəriciləridir. Bu fakt iki ölkə arasında münasibətlərin yalnız iqtisadi maraqlara deyil, qarşılıqlı həmrəylik və mənəvi bağlılığa da əsaslandığını nümayiş etdirir.
Prezident İlham Əliyevin “münasibətlər çox möhkəm – həm mənəvi, həm də maddi təməl üzərində qurulub” fikri bu əməkdaşlığın mahiyyətini ümumiləşdirir. Azərbaycan və Özbəkistan arasında tarixi, mədəni və mənəvi yaxınlıq iqtisadi və siyasi əməkdaşlıqla tamamlanır. Bu sintez isə ikitərəfli münasibətləri regionda fərqləndirən əsas xüsusiyyətlərdən biridir.
Daşkənddə keçirilmiş Azərbaycan və Özbəkistan Ali Dövlətlərarası Şuranın 3-cü iclası da münasibətlərin institusional əsaslarının möhkəmləndiyini göstərir. Eyni zamanda, prezidentlərin qarşılıqlı təltif olunması iki dövlət başçısı arasında şəxsi dostluğun və dövlətlərarası münasibətlərin yüksək səviyyəsinin simvolik ifadəsi kimi qiymətləndirilə bilər.
Ümumilikdə, İlham Əliyevin bəyanatı göstərir ki, Azərbaycan-Özbəkistan münasibətləri artıq ayrı-ayrı layihələrlə məhdudlaşmır. Qarşılıqlı investisiyalar, ticarət, enerji, nəqliyyat və sənaye əməkdaşlığı ilə yanaşı, iki ölkənin regional proseslərdə koordinasiyası da getdikcə artır. Qarşıya qoyulan konkret fəaliyyət planları və yeni layihələr bu münasibətlərin gələcəkdə daha da dərinləşəcəyinə əsas verir.
Beləliklə, Daşkənddə səsləndirilən fikirlər Azərbaycan və Özbəkistanın yalnız ikitərəfli əlaqələri inkişaf etdirmədiyini, eyni zamanda Mərkəzi Asiya ilə Cənubi Qafqaz arasında yeni iqtisadi və geosiyasi əlaqələrin formalaşmasına töhfə verdiyini göstərir. Prezidentin Özbəkistan Prezidentini Azərbaycana dövlət səfərinə dəvət etməsi isə bu strateji və qardaşlıq münasibətlərinin qarşıdakı dövrdə də yüksək dinamika ilə davam etdiriləcəyinə işarədir.

24/08/2026

İşğaldan Cənnətə: Laçının Strateji İnkişaf Modeli

1923-cü ildə Abdallar kənd yaşayış məntəqəsinə Laçın adlandırılıb və şəhər statusu almış, Laçın rayonu isə 1930-cu ildə inzibati ərazi vahidi statusunu əldə etmişdir.
​1930-cu il avqustun 8-də təşkil edilmiş Laçın rayonunun mərkəzi Laçın şəhəri müəyyən olunmuşdur.
​Rayonun coğrafi sərhədləri şimaldan Kəlbəcər, cənubdan Qubadlı, şərqdən Xocalı, Şuşa və Xocavənd rayonları ilə, qərbdən isə Ermənistanla həmsərhəddir.
​İnzibati strukturuna 1 şəhər, 1 qəsəbə və 125 kənd daxil olan Laçın rayonunun ümumi sahəsi 1835 kvadrat kilometr təşkil edir.
​Rayon təbii ehtiyatlar baxımından zəngin olmaqla 72 min hektar yaylaq sahəsinə və 34 min hektar zəngin meşə massivinə malikdir.
​İşğal dönəmi, vurulan zərər və məkrli siyasi proseslər
​strateji baxımdan böyük əhəmiyyət daşıyan Laçın rayonu 1992-ci il mayın 18-də Ermənistan silahlı qüvvələri tərəfindən işğala məruz qalmışdır.
​İşğal prosesi zamanı yerli əhali etnik təmizləməyə məruz qalmış, 300-dən çox hərbi və mülki şəxs həlak olmuş və ya itkin düşmüşdür.
​Düşmən tərəfindən 217 mədəniyyət, 101 təhsil, 142 səhiyyə müəssisəsi, 462 ticarət, 30 rabitə obyekti, 133 idarə və müəssisə, 5 musiqi məktəbi, 1 internat məktəbi, 1 orta texniki peşə məktəbi, 2 avtonəqliyyat və müxtəlif istehsalat obyektləri talan edilərək dağıdılmışdır.
​Rayon ərazisində olan 54 dərəcəli dünya, 200-dən çox yerli əhəmiyyətli tarixi-mədəni abidə vandalizmə məruz qalmışdır.
​Laçının düşmənə təhvil verilməsinin arxasında hakimiyyətə can atan AXC-Müsavat cütlüyünün çirkin və məkrli siyasi niyyətləri dayanmışdı.
​Hakimiyyəti hər vəchlə ələ keçirmək istəyən bu qüvvələrin fəaliyyəti nəticəsində Şuşa və Laçın demək olar ki, düşmənə təhvil verilmişdir.
​Hər bir yaşayış məntəqəsinin itkisi böyük faciə olsa da, Laçının işğalı Ermənistanla keçmiş Dağlıq Qarabağ Muxtar Vilayəti arasında coğrafi əlaqə yaradır və sonrakı ərazi itkilərimizin əsasını qoyurdu.

​Ermənistanın beynəlxalq hüquq pozuntuları

​Ermənistan işğalçı tərəf kimi Cenevrə konvensiyalarının tələblərini kobudcasına pozmuşdur.
​Rəsmi İrəvan Laçında coğrafi adları dəyişdirmiş, təbii resursları talayaraq qazanc mənbəyinə çevirmişdir.
​Suriyadan və digər yerlərdən olan ermənilərin rayona köçürülməsi ilə qanunsuz məskunlaşma həyata keçirilmiş və bölgənin demoqrafik tərkibi məqsədyönlü şəkildə dəyişdirilmişdir.
​Zəfər, azadlıq və "Laçının azad olunmasına görə" medalı
​Vətən müharibəsindəki qələbə və imzalanmış üçtərəfli bəyanata əsasən 2020-ci il dekabrın 1-də Laçın rayonu Azərbaycana təhvil verilmişdir.
​2022-ci il avqustun 26-da servesiz olaraq Laçın şəhəri, Zabux və Sus kəndləri tam Azərbaycan Silahlı Qüvvələrinin nəzarətinə keçmişdir.
​Müzəffər Ali Baş Komandan, Cənab Prezident İlham Əliyevin sərəncamları ilə rayonun azad edilməsində şücaət göstərmiş 8418 hərbi qulluqçu "Laçının azad olunmasına görə" medalı ilə təltif edilmişdir.

​Yeni inkişaf dönəmi və "Laçın Şəhəri Günü"

Cənab ​Prezident İlham Əliyev Qarabağ və Şərqi Zəngəzurun cənnətə çevriləcəyini, Laçının təbiəti, əzəmətli dağları və zövqlə tikilən evləri ilə Azərbaycanın uğurlarına yaraşan müasir simaya qovuşduğunu bəyan etmişdir.
​Dövlət başçısının 31 iyul 2023-cü il tarixli Sərəncamına əsasən 26 Avqust "Laçın şəhəri günü" kimi təsbit olunmuşdur.
​Enerji potensialı və "Yaşıl Enerji" layihələri
​Laçın rayonunda ümumi gücü 65,5 MVt, illik istehsal potensialı 194 milyon kilovat-saat olan 9 su elektrik stansiyası (SES) fəaliyyət göstərəcəkdir.
​2021-ci ildə işə salınan 8 MVt gücündə "Güləbird" SES təxminən 7000 nəfər əhalini, Xanlıq kəndini, Laçının cənubunu və digər infrastruktur obyektlərini elektrik enerjisi ilə təmin edir.
​Hoçaz çayı üzərində dağıdılmış "Ağbulaq" (14,25 MVt), "Mişni" (8,25 MVt) və "Alxaslı" (6 MVt) stansiyaları tam yenidən qurulmuşdur; "Mişni" və "Alxaslı" KSES-ləri 2023-cü il avqustun 25-də işə salınmışdır.
​2024-cü il mayın 10-da "Zabux" və "Qarıqışlaq" KSES-ləri istifadəyə verilmişdir.
​2025-ci il mayın 27-də Zabux çayı üzərində inşa olunan 3,1 MVt-lıq "Aşağı Malıbəyli" və 3,5 MVt-lıq "Mirik" SES-lərinin açılışı olmuşdur.
​Bu stansiyalar mərkəzləşdirilmiş SCADA sisteminə qoşularaq il ərzində 20 milyon kilovat-saat yaşıl enerji istehsal edəcək, 4,3 milyon kubmetr qaza qənaət edəcək və 8 min ton karbon qazının havaya atılmasının qarşısını alacaqdır.
​2026-cı il iyulun 11-də Hoçaz çayı üzərində "Ağbulaq-1" (14,7 MVt), "Ağbulaq-2" (14,25 MVt) və "Şeylanlı" (4 MVt) SES-ləri açılmışdır.
​Rayonun mövcud 8-10 MVt-lıq elektrik tələbatı tam olaraq yaşıl enerji ilə ödənilir və artıq qalan hissə ölkənin enerji sisteminə ötürülür.
​Hazırda tikintisi davam edən 10,7 MVt gücündə 3 yeni SES ilin sonunadək istismara veriləcəkdir.
​2040-cı ildə elektrik tələbatının 80 MVt olacağı gözlənilir və planlaşdırılan SES-lər vasitəsilə Laçın 15 il sonra da tam yaşıl enerji ilə təmin ediləcəkdir.

​Yol-nəqliyyat infrastrukturu

​Prezidentin sərəncamı ilə tikilən Kəlbəcər-Laçın avtomobil yolunun uzunluğu 75,8 km-dir (əvvəlkindən 32,2 km qısa).
​Yol I və II texniki dərəcəli olmaqla 2, 3 və 4 zolaqdan ibarət olacaqdır; üzərində ümumi uzunluğu 13,3 km olan 16 tunel (ümumi 17 tuneldən) və 4163 metr uzunluğunda 23 körpü inşa olunur.
​Laçın Beynəlxalq Hava Limanı
​2021-ci ildə təməli qoyulan və 28 may 2025-ci ildə istifadəyə verilən Laçın Beynəlxalq Hava Limanı dəniz səviyyəsindən 1700 m hündürlükdə (Qorçu kəndi) yerləşir və 130 hektardan çox ərazini əhatə edir.
​Azərbaycanın dəniz səviyyəsindən ən yüksəkdə yerləşən bu hava limanı 3000x60 metr ölçülərində uçuş-enmə zolağına və saatda 200 sərnişinə xidmət edə bilən 5000 kv.m terminal binasına malikdir.
​Hava limanı Laçın şəhərindən 30 km, Şuşadan 70 km, Kəlbəcərdən 60 km məsafədə yerləşir.
​Şəhərsalma və "15 dəqiqəlik şəhər" konsepsiyası
​Nazirlər Kabinetinin 13 iyun 2025-ci il tarixli Qərarı ilə “Laçın şəhərinin 2040-cı ilədək inkişafına dair Baş Planı” təsdiq edilmişdir.
​Plan çərçivəsində xəstəxana, Memorial Park (İşğal və Zəfər muzeyləri), təhsil müəssisələri və peşə məktəbi yaradılacaqdır.
​"15 dəqiqəlik şəhər" prinsipi yaşayış məhəllələri və gündəlik obyektlərin piyada/qısa məsafədə olmasını təmin edir.
​Şəhərdə 1000-dən çox ev bərpa edilib və ya tikilib; 626 fərdi ev, 138 çoxmənzilli ev və 87 qeyri-yaşayış sahəsi istifadəyə verilib.
​Hazırda 89 fərdi ev, 28 çoxmənzilli bina və 26 qeyri-yaşayış sahəsinin tikintisi sürür, daha 237 fərdi ev və 29 binanın (436 mənzil) tikintisi planlaşdırılır.
​510 şagirdlik 2 nömrəli tam orta məktəb (4550 kv.m) ən müasir sinif və laboratoriyalarla təmin olunub. 2023-cü ildə Zabux kəndində 176 şagirdlik məktəb istifadəyə verilib.
​57 min 470 kv.m sahədə 19 binadan (340 mənzil) ibarət yeni yaşayış məhəlləsi salınacaqdır (1, 2, 3, 4 və 5-otaqlı mənzillər).
​Turizm, mədəniyyət və sənaye obyektləri

​Zerti kəndində 2025-ci ildə açılan 11,2 hektarlıq "Laçın" İstirahət Kompleksi 120 otaq, 8 kottec (324 qonaq) və 500 nəfərlik tədbir zalları ilə təmin olunub (174 nəfər işlə təmin edilib).
​2023-cü il avqustun 25-də açılan “Hoçazfilm” yaradıcılıq studiyası regionun audiovizual salnaməsini yaradan mərkəz kimi fəaliyyət göstərir.
​Sənaye zonasında yaradılan Mebel fabriki (illik 3 min cu.m, 54 işçi) və Prefabrik modul evlər müəssisəsi (illik 200 ev, 100 işçi) fəaliyyət göstərir. İllik 17 min baş heyvan kəsimi məntəqəsi 30 nəfəri işlə təmin edəcək.
​"Laçın Aqro-Sənaye Parkı"nda 46 müəssisə fəaliyyət göstərəcək; bura "PIRSHAGHI" ayaqqabı fabriki (ayda 1500 cüt, 15 işçi) və "LATIFA" tikiş fabriki (günə 2 min məhsul, 30 işçi) daxildir.
​Kənd təsərrüfatı, asudə vaxt və su infrastrukturu

​2023-cü il avqustun 25-də açılan “Həkəri Balıq Təsərrüfatı”nda il ərzində 35 ton nərə, 1,5 ton çökə və 5 ton forel yetişdirilir (gələcək hədəf: 70 ton nərə, 3 ton kürü, 10 ton forel).
​Həkəri çayında bulvar, göl, asma körpü, çimərlik və kotteclər salınmışdır.
​Təməli 2025-ci ildə qoyulan Laçın kanat yolu 1720 metr uzunluğunda (300 m hündürlük, 17 kabinə) olacaq və saatda 800 sərnişin daşıyacaqdır.
​2026-cı il iyulun 11-də təməli qoyulan "Həkəriçay" su anbarı (100 mln cu.m) 172 km-lik boru kəməri ilə 7 rayonda 700 min nəfəri içməli su ilə təmin edəcək və üzərində 10.81 MVt gücündə 3 SES tikiləcəkdir.
​Böyük Qayıdış və Kəndlərin Bərpası

​2023-cü il mayın 28-dən başlayan qayıdış çərçivəsində 2026-cı ilin iyul ayına qədər Laçın şəhərinə 614 ailə (2264 nəfər), Zabuxa 217 ailə (823 nəfər), Susa 59 ailə (215 nəfər) və Bəylik kəndinə 89 ailə (363 nəfər) köçürülmüşdür.
​Zabux kəndi: 81 hektarlıq kənddə 223 ailə köçürüləcək, 50 yerlik bağça, tibb məntəqəsi və yaşıl enerji işıqlandırması var.
​Sus kəndi: 25 hektarlıq kənddə 59 fərdi ev, 132 yerlik məktəb, 50 yerlik bağça və park istifadəyə verilib.
​Bəylik kəndi: 29,6 hektarda 91 fərdi ev, dərnəkləri olan klub-icma mərkəzi tikilib, damında günəş panelləri quraşdırılıb və bütün kommunikasiyalar çəkilib.

​Beynəlxalq status və Prezidentin səfərlər xronologiyası

​Laçın şəhəri 2025-ci ildə “MDB-nin mədəniyyət paytaxtı” elan olunmuş və rəsmi açılışı 2025-ci il iyunun 3-də keçirilmişdir.
​14.02.2021: Güləbirdə Bayrağın ucaldılması və SES-in açılışı.
​16.08.2021: Laçın Hava Limanının təməlqoyma mərasimi.
​26.06.2022: Kəlbəcər-Laçın yolu, "Qorçu" yarımstansiyası və Hava limanında tikinti ilə tanışlıq.
​21.09.2022: Tunellə tanışlıq, Şəhər mərkəzində Bayrağın ucaldılması, yarımstansiyanın təməli.
​28.05.2023: Baş planın təqdimatı və sakinlərlə ilk görüş.
​25-26.08.2023: "Mişni" və "Alxaslı" SES-ləri, "Hoçazfilm", məktəb, mebel fabriki, balıq təsərrüfatının açılışı, Zabuxda sakinlərlə görüş və "Şəhər Günü" bayramı.
​10.05.2024: Sus kəndində sakinlərlə görüş, "Zabux" və "Qarıqışlaq" SES-lərinin açılışı.
​27.05.2025: LATIFA və PIRSHAGHI fabriklərinin, Bəylik kəndinin, İstirahət Kompleksinin, Hava Limanının açılışları; Kanat yolunun təməlqoyması; Pakistanın Baş naziri və Türkiyə Prezidenti ilə Zirvə görüşləri və Müstəqillik Günü konserti.
​11.07.2026: "Həkəriçay" su anbarının təməlqoyması və Hoçaz çayı üzərindəki yeni SES-lərin onlayn açılışı.

22/08/2026

Azərbaycan–Özbəkistan münasibətləri: qardaşlıqdan strateji müttəfiqliyə

Azərbaycan Respublikasının Prezidenti İlham Əliyevin Özbəkistanın Milli İnformasiya Agentliyinə verdiyi müsahibə Azərbaycan–Özbəkistan münasibətlərinin bugünkü vəziyyətini və gələcək inkişaf perspektivlərini geniş şəkildə əks etdirir. Müsahibədə iki qardaş ölkə arasında tarixən formalaşmış dostluq və mənəvi yaxınlığın son illərdə dövlətlərarası strateji tərəfdaşlıq və müttəfiqlik səviyyəsinə yüksəlməsi xüsusi vurğulanır.

Azərbaycan və Özbəkistan xalqlarını ortaq tarix, dil, mədəniyyət və mənəvi dəyərlərlə yanaşı, əsrlər boyu formalaşmış qarşılıqlı hörmət və rəğbət birləşdirir. Məhz bu möhkəm tarixi və mənəvi təməl üzərində qurulan münasibətlər son illərdə yeni məzmun qazanaraq çoxşaxəli əməkdaşlıq modelinə çevrilib. Dövlət başçıları İlham Əliyev və Şavkat Mirziyoyev arasında mövcud olan səmimi dostluq, qarşılıqlı hörmət və etimad da bu münasibətlərin inkişafında mühüm rol oynayır.

Son illərdə Azərbaycan və Özbəkistan arasında siyasi dialoqun intensivliyi nəzərəçarpacaq dərəcədə artıb. Dövlət başçılarının qarşılıqlı səfərləri münasibətlərin daha da möhkəmlənməsinə şərait yaradıb. 2024-cü ildə Azərbaycan Prezidentinin Özbəkistana dövlət səfəri, 2025-ci ildə isə Özbəkistan Prezidentinin Azərbaycana dövlət səfəri zamanı imzalanmış mühüm sənədlər iki ölkənin strateji tərəfdaşlığının və müttəfiqlik münasibətlərinin hüquqi-siyasi əsaslarını daha da gücləndirib.

2023-cü ildə yaradılmış Ali Dövlətlərarası Şura isə Azərbaycan–Özbəkistan əlaqələrinin inkişafında mühüm institusional mexanizmə çevrilib. Şuranın fəaliyyəti iki ölkə arasında uzunmüddətli əməkdaşlıq prioritetlərinin müəyyənləşdirilməsinə, yeni təşəbbüslərin irəli sürülməsinə və müxtəlif sahələrdə qarşılıqlı fəaliyyətin əlaqələndirilməsinə imkan yaradır. Bu platformanın fəaliyyəti Azərbaycan və Özbəkistan arasında siyasi dialoqun ardıcıl və strateji xarakter daşıdığını nümayiş etdirir.

İki ölkə arasındakı münasibətlərin mühüm istiqamətlərindən biri də iqtisadi və ticari əməkdaşlıqdır. Son illərdə ticarət dövriyyəsində müşahidə olunan artım iqtisadi əlaqələrin sürətlə genişləndiyini göstərir. 2025-ci ildə Azərbaycan ilə Özbəkistan arasında ticarət dövriyyəsinin 795 milyon dollara çatması və əvvəlki illə müqayisədə üç dəfədən çox artması iqtisadi tərəfdaşlığın real göstəricilərindən biridir.

İnvestisiya sahəsində də mühüm addımlar atılıb. Ümumi kapitalı 500 milyon ABŞ dolları olan Azərbaycan–Özbəkistan İnvestisiya Şirkətinin yaradılması qarşılıqlı investisiyaların artırılması və birgə layihələrin maliyyələşdirilməsi baxımından böyük əhəmiyyət daşıyır. Azərbaycan şirkətləri Özbəkistanda, özbək şirkətləri isə Azərbaycanda müxtəlif sahələrdə layihələr həyata keçirirlər. Bu proses iki ölkənin iqtisadi potensiallarının bir-birini tamamladığını göstərir.

Sənaye kooperasiyası da Azərbaycan–Özbəkistan iqtisadi əməkdaşlığının diqqətçəkən istiqamətlərindəndir. Azərbaycanda “Chevrolet” və “Isuzu” markalı avtomobillərin istehsalının həyata keçirilməsi iki ölkə arasında birgə istehsal imkanlarının genişləndirilməsi baxımından mühüm nümunədir. Eyni zamanda, Azərbaycanın Özbəkistanda həyata keçirdiyi hotel, yaşayış və turizm layihələri qarşılıqlı investisiya əməkdaşlığının yeni imkanlarını nümayiş etdirir.

Energetika sahəsində əməkdaşlıq da strateji əhəmiyyət daşıyır. Azərbaycan və Özbəkistan neft-qaz sektorunda birgə layihələr həyata keçirir, eyni zamanda bərpaolunan enerji istiqamətində yeni əməkdaşlıq imkanları formalaşdırırlar. Azərbaycan, Qazaxıstan və Özbəkistan arasında yaradılmış “Yaşıl Dəhliz Birliyi” gələcəkdə Mərkəzi Asiyanın yaşıl enerjisinin Azərbaycan üzərindən Avropa bazarlarına çıxarılması baxımından mühüm perspektivlər açır. Bu təşəbbüs həm enerji təhlükəsizliyinə, həm də regionlararası əməkdaşlığın genişlənməsinə töhfə verə bilər.

Nəqliyyat və logistika sahəsində də Azərbaycan və Özbəkistanın maraqları üst-üstə düşür. Azərbaycanın Cənubi Qafqazda, Özbəkistanın isə Mərkəzi Asiyada yerləşməsi hər iki ölkəni Şərqlə Qərbi birləşdirən marşrutların inkişafında təbii tərəfdaşlara çevirir. Orta Dəhlizin inkişafı və müxtəlif dəmir yolu layihələrinin bu marşrutla inteqrasiyası Azərbaycan və Özbəkistan arasında tranzit imkanlarının daha da genişlənməsinə şərait yarada bilər.

Azərbaycan–Özbəkistan əməkdaşlığının xüsusi istiqamətlərindən biri də Qarabağ və Şərqi Zəngəzurun bərpası prosesində Özbəkistanın göstərdiyi dəstəkdir. Füzuli şəhərində Mirzə Uluqbəy adına məktəbin inşası, Füzulidə “Dostluq bağı”nın salınması qardaş Özbəkistanın Azərbaycanın işğaldan azad edilmiş ərazilərinin bərpasına verdiyi dəstəyin konkret nümunələridir. Bu layihələr iqtisadi və sosial əhəmiyyətlə yanaşı, iki xalq arasında qardaşlığın rəmzi məzmununu da daşıyır.

Mədəni-humanitar sahədə əməkdaşlıq isə iki ölkə arasındakı münasibətlərin mənəvi dayaqlarını daha da möhkəmləndirir. Azərbaycan və Özbəkistanın mədəniyyət günləri, incəsənət festivalları, elmi tədbirləri və müxtəlif humanitar layihələri xalqların bir-birini daha yaxından tanımasına imkan yaradır. Özbəkistan Milli Pedaqoji Universitetinin böyük Azərbaycan şairi və mütəfəkkiri Nizami Gəncəvinin adını daşıması da ortaq mədəni irsin mühüm göstəricilərindən biridir.

Təhsil sahəsində qarşılıqlı əlaqələrin genişlənməsi gələcək nəsillər arasında dostluq və əməkdaşlığın möhkəmləndirilməsi baxımından xüsusi əhəmiyyət daşıyır. Azərbaycanlı və özbək tələbələrin qarşılıqlı olaraq hər iki ölkədə təhsil alması, Füzulidə Mirzə Uluqbəy adına məktəbin fəaliyyət göstərməsi bu istiqamətdə görülən işlərin əhəmiyyətini artırır.

Media və vətəndaş cəmiyyəti sahəsində keçirilən forumlar da ikitərəfli əlaqələrin daha geniş ictimai müstəviyə keçdiyini göstərir. Azərbaycan və Özbəkistan media nümayəndələrinin, qeyri-hökumət təşkilatlarının iştirakı ilə keçirilən tədbirlər informasiya və ictimai diplomatiya sahəsində qarşılıqlı əlaqələrin inkişafına xidmət edir.

İki ölkənin əməkdaşlığı Türk Dövlətləri Təşkilatı çərçivəsində də xüsusi əhəmiyyət daşıyır. Azərbaycan və Özbəkistan TDT-ni ortaq türk tarixinin, mədəniyyətinin və mənəvi dəyərlərinin qorunması ilə yanaşı, siyasi, iqtisadi və nəqliyyat əməkdaşlığının genişləndirilməsi üçün mühüm platforma kimi qiymətləndirirlər. Özbəkistanın Türk Mədəniyyəti və İrsi Fonduna tamhüquqlu üzv olması da Türk dünyasının ortaq irsinin qorunması istiqamətində mühüm addım kimi dəyərləndirilir.

Azərbaycan–Özbəkistan münasibətləri eyni zamanda daha geniş regional proseslərin mühüm tərkib hissəsidir. Azərbaycanın Mərkəzi Asiya ölkələri ilə münasibətlərinin inkişafı və Mərkəzi Asiya Dövlət Başçılarının Məşvərət görüşlərində tamhüquqlu iştirakının təmin edilməsi Azərbaycanın regionla əlaqələrində yeni mərhələ yaradıb. Bunun nəticəsində Azərbaycan Cənubi Qafqazla Mərkəzi Asiya arasında siyasi, iqtisadi və nəqliyyat əlaqələrinin gücləndirilməsində daha fəal rol oynamaq imkanına malikdir.

Bütün bunlar göstərir ki, Azərbaycan və Özbəkistan arasında münasibətlər artıq yalnız ikitərəfli əməkdaşlıq çərçivəsi ilə məhdudlaşmır. Bu münasibətlər Türk dünyasının inteqrasiyası, regional nəqliyyat əlaqələrinin inkişafı, enerji təhlükəsizliyi, iqtisadi tərəfdaşlıq və humanitar əməkdaşlıq kimi daha geniş istiqamətləri əhatə edir.

Prezident İlham Əliyevin müsahibəsində səsləndirilən fikirlərdən aydın olur ki, Azərbaycan–Özbəkistan münasibətlərinin əsasını qarşılıqlı etimad, siyasi iradə, ortaq tarixi-mədəni irs və qarşılıqlı maraqlar təşkil edir. Bu möhkəm təməl üzərində qurulan müttəfiqlik münasibətlərinin gələcəkdə daha da dərinləşməsi üçün geniş imkanlar mövcuddur.

Azərbaycan və Özbəkistanın qarşılıqlı səyləri nəticəsində formalaşan bu strateji tərəfdaşlıq iki xalqın rifahına xidmət etməklə yanaşı, Cənubi Qafqaz və Mərkəzi Asiya arasında əlaqələrin möhkəmlənməsinə, Türk dünyasında inteqrasiya proseslərinin sürətlənməsinə və regionda sülh, sabitlik və davamlı inkişafın təmin olunmasına mühüm töhfə verə bilər.

Address

Sabunçu Rayonu Bakıxanov Qəsəbəsi Sülh Küç 32
Bakikhanov
[email protected]

Website

Alerts

Be the first to know and let us send you an email when Ağdam şəhər Q.Pirimov adına 2 saylı uşaq musiqi məktəbi posts news and promotions. Your email address will not be used for any other purpose, and you can unsubscribe at any time.

Contact The School

Send a message to Ağdam şəhər Q.Pirimov adına 2 saylı uşaq musiqi məktəbi:

Shortcuts

Share

Category