Ağdam şəhər Q.Pirimov adına 2 saylı uşaq musiqi məktəbi

04 iyun 2026-cı il tarixində Qarabağ Regional Mədəniyyət idarəsi Ağdam şəhər Qurban Pirimov adına 2 saylı Uşaq Musiqi Məktəbinin 2025/2026-cı tədris ilinə həsr edilmiş "Bir ilin hesabatı, Gələcəyin hədəfləri" adlı yekun hesabat konserti keçirilib.

Azərbaycan enerji təhlükəsizliyinin təmin edilməsində etibarlı tərəfdaş kimi mövqeyini möhkəmləndirir

Azərbaycan Respublikasının Prezidenti cənab İlham Əliyev “Bakı Enerji Həftəsi”nin açılış mərasimində çıxışı zamanı ölkənin enerji siyasətinin keçdiyi inkişaf yolundan, beynəlxalq əməkdaşlıq sahəsində əldə olunan uğurlardan və gələcək perspektivlərdən bəhs edib. Dövlət başçısı vurğulayıb ki, vaxtilə əsası qoyulan Xəzər Neft və Qaz Sərgisi Azərbaycanın müasir enerji strategiyasının formalaşmasında mühüm rol oynayıb və zaman keçdikcə regionun ən nüfuzlu enerji platformalarından biri olan “Bakı Enerji Həftəsi”nə çevrilib. Prezident qeyd edib ki, bu il Azərbaycanın enerji tarixində mühüm hadisələrdən birinin – “Şahdəniz” qaz yatağı üzrə müqavilənin imzalanmasının 30-cu ildönümü qeyd olunur. 1996-cı ildə imzalanan bu müqavilə ölkənin müasir qaz sənayesinin əsasını qoyaraq Azərbaycanın qlobal enerji bazarındakı mövqeyini əhəmiyyətli dərəcədə gücləndirib. Dövlət başçısı bildirib ki, hazırda Azərbaycan Avrasiyanın enerji təhlükəsizliyinə mühüm töhfə verən ölkələrdən birinə çevrilib. Çıxışında beynəlxalq tərəfdaşlarla əməkdaşlığın əhəmiyyətinə toxunan cənab Prezident “Bakı Enerji Həftəsi” münasibətilə ABŞ Prezidenti Donald Tramp, Türkiyə Prezidenti Rəcəb Tayyib Ərdoğan və Böyük Britaniyanın Baş naziri Kir Starmer tərəfindən ünvanlanmış məktubları yüksək qiymətləndirib. O qeyd edib ki, bu cür mesajlar Azərbaycanın enerji sahəsində qazandığı uğurların və beynəlxalq nüfuzunun göstəricisidir. Dövlət başçısı son illər qlobal enerji siyasətində müşahidə olunan tendensiyalara da münasibət bildirib. O vurğulayıb ki, uzun müddət neft və qaz istehsal edən ölkələr müxtəlif təzyiqlərlə və əsassız ittihamlarla üzləşiblər. Bununla belə, dünya iqtisadiyyatının və sənayesinin inkişafı üçün ənənəvi enerji mənbələrinin hələ də mühüm əhəmiyyət daşıdığını qeyd edən Prezident enerji təhlükəsizliyinin qorunmasının bütün dövlətlər üçün prioritet məsələ olduğunu bildirib. Azərbaycan enerji siyasətində balanslaşdırılmış yanaşma tətbiq edir. Bir tərəfdən neft və qaz ehtiyatlarından səmərəli istifadə edilir, digər tərəfdən isə bərpaolunan enerji mənbələrinin inkişafına böyük həcmdə investisiyalar yönəldilir. Qlobal enerji siyasətinin gələcəyi məhz bu tarazlığın qorunmasından keçir. Çıxış zamanı Prezident Azərbaycanın müstəqilliyinin ilk illərində üzləşdiyi ağır sosial-iqtisadi vəziyyəti də xatırladıb. O bildirib ki, 1990-cı illərin əvvəllərində ölkə iqtisadi böhran, siyasi qeyri-sabitlik, işğal faktı və bir milyondan artıq qaçqın problemi ilə üzləşmişdi. Həmin dövrdə Azərbaycanın əsas çıxış yolu malik olduğu təbii sərvətlərin beynəlxalq əməkdaşlıq çərçivəsində səmərəli şəkildə istifadəsi olub. Prezident vurğulayıb ki, 1994-cü ildə imzalanan və sonradan “Əsrin müqaviləsi” adlandırılan enerji sazişi ölkənin inkişafında dönüş nöqtəsinə çevrilib. Bu müqavilə sayəsində Azərbaycan beynəlxalq investisiyalar üçün açıq və etibarlı tərəfdaş kimi tanınıb. Nəticədə enerji sektorundan əldə edilən gəlirlər iqtisadiyyatın şaxələndirilməsinə, sosial rifahın yüksəldilməsinə və müasir infrastrukturun yaradılmasına yönəldilib. Dövlət başçısı qeyd edib ki, son otuz ildə Azərbaycan böyük transformasiya yolu keçib. Yoxsulluq səviyyəsi 50 faizdən 5 faizə qədər azalıb, işsizlik minimum səviyyəyə enib, ölkənin maliyyə dayanıqlığı əhəmiyyətli dərəcədə möhkəmlənib. Bu gün Azərbaycanın strateji valyuta ehtiyatları xarici borcunu dəfələrlə üstələyir və ölkə bir çox beynəlxalq reytinq agentlikləri tərəfindən investisiya üçün etibarlı məkan kimi qiymətləndirilir. Prezident enerji gəlirlərinin yalnız iqtisadi deyil, həm də milli təhlükəsizlik baxımından mühüm rol oynadığını vurğulayıb. Onun sözlərinə görə, bu vəsaitlər hesabına müasir və güclü ordu formalaşdırılıb, müdafiə potensialı artırılıb və nəticədə Azərbaycanın ərazi bütövlüyünün bərpası mümkün olub. Dövlət başçısı qeyd edib ki, iqtisadi güc və milli birlik ölkənin əldə etdiyi uğurların əsas amillərindəndir. Prezident bildirib ki, Bakı-Tbilisi-Ceyhan və Bakı-Supsa neft kəmərləri, eləcə də Cənubi Qafqaz Boru Kəməri, TANAP və TAP layihələri regionun enerji xəritəsini dəyişdirən strateji təşəbbüslərdir. Ümumi uzunluğu minlərlə kilometr olan bu infrastruktur sistemi Xəzər hövzəsini Avropa bazarları ilə birləşdirərək qitənin enerji təhlükəsizliyinə mühüm töhfə verir. Hazırda Azərbaycan qazı 16 ölkəyə ixrac olunur və bu ölkələrin 10-u Avropa İttifaqının üzvüdür. Son illərdə Azərbaycan qazına tələbatın artması ölkənin enerji tərəfdaşı kimi strateji əhəmiyyətini daha da yüksəldib. Prezident vurğulayıb ki, yaxın illərdə yeni yataqların istismara verilməsi hesabına ixrac həcmlərinin artırılması nəzərdə tutulur. Prezident “Azəri-Çıraq-Günəşli” dərin qaz layihəsi, Abşeron yatağı və digər perspektivli sahələr üzrə görülən işlərdən danışaraq bildirib ki, bu layihələr ölkənin qaz potensialını daha da genişləndirəcək. Bununla yanaşı, SOCAR artıq yalnız milli şirkət kimi deyil, beynəlxalq enerji oyunçusu kimi fəaliyyət göstərir və Yaxın Şərq, Afrika, Avropa və Mərkəzi Asiyada iri layihələr həyata keçirir. Dövlət başçısı Azərbaycanın enerji siyasətində bərpaolunan enerji sektorunun xüsusi yer tutduğunu da vurğulayıb. O bildirib ki, ölkədə günəş, külək və hidroenerji sahələrinə böyük sərmayələr yatırılır. Qarabağ və Şərqi Zəngəzur bölgələri artıq yaşıl enerji zonası kimi inkişaf etdirilir və burada bir sıra hidroelektrik stansiyalar istifadəyə verilib. Gələn ilin sonuna qədər Azərbaycanda günəş və külək enerjisi üzrə istehsal gücü 2 giqavata çatdırılacaq, 2032-ci ilədək isə bu göstərici 8 giqavat olacaq. Bu layihələr ölkənin enerji balansını gücləndirməklə yanaşı, ixrac imkanlarını da genişləndirəcək. Çıxışda regional əməkdaşlıq və nəqliyyat-logistika layihələri də geniş yer alıb. Prezident bildirib ki, Qara dəniz Enerji Kabeli layihəsi Azərbaycanı Gürcüstan, Rumıniya, Macarıstan və digər Avropa ölkələri ilə birləşdirəcək. Bununla yanaşı, Azərbaycan–Gürcüstan–Türkiyə–Bolqarıstan elektrik kabeli layihəsi və Xəzərin şərq sahillərindən Azərbaycana qədər uzanacaq yaşıl enerji dəhlizi üzərində işlər davam etdirilir. Dövlət başçısı vurğulayıb ki, Azərbaycanın uğurunun əsas səbəblərindən biri balanslaşdırılmış xarici siyasət və beynəlxalq əməkdaşlıq modelidir. Dənizə birbaşa çıxışı olmayan ölkə kimi Azərbaycan enerji və nəqliyyat layihələrinin həyata keçirilməsi üçün həm qonşu dövlətlərlə, həm də daha geniş region ölkələri ilə etibarlı tərəfdaşlıq münasibətləri qurmağa nail olub. “Bakı Enerji Həftəsi” çərçivəsində keçirilən müzakirələr, imzalanacaq yeni sazişlər və qurulacaq əməkdaşlıq əlaqələri enerji təhlükəsizliyinin möhkəmləndirilməsinə, iqtisadi inkişafın sürətlənməsinə və regionda sabitliyin daha da güclənməsinə mühüm töhfə verəcək.

Əziz övladlar! 1 İyun - Uşaqların Beynəlxalq Müdafiəsi Günü münasibətilə hər birinizi təbrik edir, hamınıza cansağlığı və xoşbəxtlik arzulayıram.

1 İyun - Uşaqların Beynəlxalq Müdafiəsi Günüdür

28 May - Azərbaycanın Müstəqillik Günü

Əziz həmkarlar!

Sizləri və Azərbaycan xalqını Qurban bayramı münasibətilə səmimi qəlbdən təbrik edirik.
İnanırıq ki, Qarabağ Regional Mədəniyyət İdarəsinin tabeliyində çalışan bütün əməkdaşlarımız bundan sonra da rəhbərliyinin etimadını layiqincə doğruldacaq, göstərilən diqqət və qayğıya cavab olaraq Vətənə, xalqa, dövlətə sədaqət nümayiş etdirəcəklər.
Ümummilli məqsədlərimizin gerçəkləşməsi, xalqımızın mənafelərinin qorunması naminə birlik və həmrəyliyimizin daimi olmasını ürəkdən arzulayır, Qurban bayramının hər bir Azərbaycan vətəndaşına xoşbəxtlik gətirməsini diləyirik.

Bayramınız mübarək!

Qarbağ Regional Mədəniyyət İdarəsinin kollektivi adından rəis Aydın Bəşirov

Azərbaycanın dövlət müstəqilliyi əbədidir, sarsılmazdır, dönməzdir

28 may 1918-ci ildə müsəlman Şərqində ilk dünyəvi demokratik dövlət olan Azərbaycan Xalq Cümhuriyyəti yaranmışdır. Azərbaycan Xalq Cümhuriyyəti türk və islam dünyasında ilk parlamentli Respublika, demokratik, hüquqi və dünyəvi dövlət nümunəsidir. Müstəqil, azad, demokratik respublika qurmaq məqsədini qarşıya qoyan Azərbaycan Xalq Cümhuriyyəti mürəkkəb bir tarixi şəraitdə fəaliyyətə başladı. Cümhuriyyət gərgin və mürəkkəb ictimai-siyasi şəraitdə fəaliyyət göstərsə də, bütün sahələrdə ciddi dönüş yaratmağa və böyük tədbirlər reallaşdırmağa müvəffəq oldu. Qısa vaxt ərzində AXC hökuməti cəmiyyət həyatının müxtəlif sahələrini əhatə edən əsaslı, vacib qərarlar qəbul etdi. Azərbaycan Xalq Cümhuriyyəti bütün ölkə vətəndaşlarına eyni hüquqlar verərək irqi, milli, dini, sinfi bərabərlik yaratdı. Cəmi 23 ay yaşamış Cümhuriyyət xalqımızın tarixində böyük iz qoyan tədbirlər həyata keçirdi, Azərbaycanın gələcək müstəqilliyi üçün möhkəm zəmin yaratdı.
Azərbaycanın ilk Parlamenti və Hökuməti, dövlət aparatı təşkil edildi, ölkənin sərhədləri müəyyənləşdirildi, 1918-ci il iyunun 27-də "Azərbaycan dilinin dövlət dili elan edilməsi haqqında", avqustun 11-də isə "Azərbaycan Xalq Cümhuriyyətinin vətəndaşlığı haqqında" fərmanlar imzalandı. Dövlətin bayrağı, himni və gerbi təsis edildi, dövlət quruculuğu sahəsində ciddi addımlar atıldı.
Ölkənin hər yerində müxtəlif pillədən olan məktəblər, gimnaziyalar, qız məktəbləri, uşaq bağçaları, qısa müddətli müəllim kursları, kitabxanalar açıldı. 1919-cu il sentyabrın 1-də Parlament “Bakı Dövlət Universitetinin təsis olunması haqqında” Qanun qəbul etdi. Milli universitetin açılması Cümhuriyyət xadimlərinin doğma xalq qarşısında çox mühüm tarixi xidməti idi.
Xalq Cümhuriyyəti dövründə qısa zaman kəsiyində ölkənin ərazi bütövlüyü və milli təhlükəsizliyinin təmin edilməsi, qısa müddətdə yüksək döyüş qabiliyyətli hərbi hissələrin yaradılması, milli tələblərə və demokratik prinsiplərə uyğun dövlət orqanlarının qurulması, maarifin və mədəniyyətin inkişafına xüsusi diqqət yetirilməsi, təhsilin milliləşdirilməsi kimi müstəsna əhəmiyyətli işlər həyata keçirilmişdir. Mürəkkəb ictimai-siyasi şəraitdə yaranaraq fəaliyyət göstərmiş Azərbaycan Xalq Cümhuriyyətinin demokratik dövlət quruculuğu, iqtisadiyyat, mədəniyyət, təhsil, hərbi quruculuq kimi sahələrdə həyata keçirdiyi işlər Azərbaycan tarixinin parlaq səhifəsidir.
Azərbaycan Respublikası 1991-ci ildə öz müstəqilliyini bərpa edərək, Xalq Cümhuriyyətinin siyasi varisi kimi onun milli atributlarını – bayrağını, gerbini, himnini qəbul etdi. Ümummilli Lider Heydər Əliyev çoxəsrlik dövlətçilik tariximizdə mühüm yeri olan Azərbaycan Xalq Cümhuriyyətinin xidmətlərini yüksək qiymətləndirərək demişdir:
«Bu respublikanın yaranması və az müddətdə də olsa yaşaması Azərbaycan xalqının dövlətçiliyinin bərpasında, Azərbaycanın dövlət müstəqilliyini əldə etmək yolunda, demokratik quruluş yaratmaq istiqamətində tarixi rol oynamışdır. Azərbaycan Xalq Cümhuriyyəti bir çox dəyərli işlər görmüş və Azərbaycanı bir müstəqil demokratik respublika kimi yaşatmağa çalışmışdır».
Ulu Öndərin təşəbbüsü ilə 1998-ci ildə Cümhuriyyətimizin 80 illik yubileyi keçirilmiş və Azərbaycan Xalq Cümhuriyyətinin şərəfinə “İstiqlal bəyannaməsi” abidəsi ucaldılmış, onun görkəmli siyasi və dövlət xadimlərinin xatirəsi əbədiləşdirilmişdir.
2018-ci ildə Azərbaycan Respublikasının Prezidenti cənab İlham Əliyev tərəfindən "Azərbaycan Xalq Cümhuriyyətinin 100 illik yubileyi haqqında" sərəncam imzalanmış və bu tarixi hadisə münasibətilə 2018-ci il "Azərbaycan Xalq Cümhuriyyəti İli" elan olunaraq ölkədə və onun hüdudlarından kənarda silsilə tədbirlər keçirilmişdir.
Bu gün xalqımız Müstəqillik Gününü bir başqa ovqatda, fərqli hisslərlə - qalib ölkənin vətəndaşları kimi qeyd edir. Rəşadətli ordumuz 44 günlük Vətən Müharibəsində və 2023-cü ilin 19-20 sentyabr tarixlərində həyata keçirdiyi lokal antiterror tədbirlərində öz şücaətini bütün dünyaya nümayiş etdirdi. Parlaq Zəfərə imza atdı. Müzəffər Ali Baş Komandanın rəhbərliyi ilə Şanlı Ordumuz 30 ilə yaxın düşmən tapdağında qalan əzəli torpaqlarımızı mənfur düşmənin azad etdi. 2020-ci il 27 sentyabr tarixindən başlanan Zəfər yolu xalqımızın tarixinə qızıl hərflərlə yazıldı. Bu gün Şanlı Ordumuzun, Ali Baş Komandan cənab İlham Əliyevin azad olunmuş ərazilərdə qaldırdığı üçrəngli bayrağımız tarixi və əzəli torpaqlarımızda qürurla dalğalanır.
2021-ci il 15 oktyabr tarixində “Müstəqillik günü haqqında” Azərbaycan Respublikasının Qanunu qəbul edilmiş, sözügedən Qanunla 28 May Müstəqillik Günü, oktyabrın 18-i isə Müstəqilliyin Bərpası Günü kimi təsbit olunmuşdur. 28 may tarixinin Müstəqillik Günü, 18 oktyabr tarixinin isə Müstəqilliyin Bərpası Günü kimi qeyd olunması Azərbaycanın dövlət suverenliyinin məhz 1918-ci ildə bərqərar olunması faktına əsaslanır. Bu, ərazi bütövlüyünü bərpa etmiş müasir Azərbaycanın 1918-ci ildə qurulmuş Azərbaycan Xalq Cümhuriyyətinin tamhüquqlu varisi olduğunu göstərir.
2025-ci il Azərbaycan Respublikasının Prezidenti cənab İlham Əliyev tərəfindən imzalanan 28 dekabr 2024-cü il tarixli sərəncam ilə Azərbaycan Respublikasında “Konstitusiya və Suverenlik İli” elan edilib. “Konstitusiya və Suverenlik İli” dövlətin hüquqi əsaslarının möhkəmləndirilməsi, dövlət suverenliyinin daha da gücləndirilməsi məqsədi daşıyır.

Müasir inkişaf və tarixi irsin qorunması Azərbaycanın şəhərsalma siyasətinin əsasını təşkil edir

Cənab Prezident İlham Əliyev 2026-cı il mayın 18-də Bakıda keçirilən Ümumdünya Şəhərsalma Forumunun 13-cü Sessiyası zamanı etdiyi çıxışda Azərbaycanın şəhərsalma sahəsində əldə etdiyi nailiyyətlərdən, tarixi-mədəni irsin qorunmasından və müasir urbanizasiya siyasətindən bəhs edib. Prezident bildirib ki, forumda 182 ölkədən 45 mindən artıq iştirakçı qeydiyyatdan keçib və bu tədbir iştirakçı sayına görə Azərbaycanda keçirilən ən böyük beynəlxalq toplantılardan biridir. O qeyd edib ki, forum ölkənin şəhərsalma sahəsində gördüyü işlərin beynəlxalq ictimaiyyətə təqdim olunması baxımından mühüm əhəmiyyət daşıyır. Çıxışında cənab Prezident Azərbaycanın coğrafi mövqeyinə və tarixi inkişafına toxunaraq vurğulayıb ki, ölkə tarix boyu Şərqlə Qərbin qovuşduğu məkan olub. Bu xüsusiyyət Bakının memarlığında da özünü göstərir. İçərişəhərin qədim tarixi abidələri ilə müasir şəhər infrastrukturu arasında harmoniyanın yaradıldığını qeyd edən dövlət başçısı Bakı Bulvarının genişləndirilməsini, Avropa memarlığının təsiri ilə inşa edilmiş XIX əsr binalarını və müasir urbanizasiya layihələrini şəhərin inkişaf nümunəsi kimi göstərib. Cənab Prezident İlham Əliyev 2026-cı ilin Azərbaycanda “Şəhərsalma və Memarlıq İli” elan olunduğunu diqqətə çatdıraraq, ölkənin bu sahəyə xüsusi önəm verdiyini bildirib. O, son illərdə BMT-nin Məskunlaşma Proqramı ilə əməkdaşlıq çərçivəsində Ağdam, Zəngilan və Xankəndidə milli şəhərsalma forumlarının keçirildiyini qeyd edib. Dövlət başçısı Azərbaycanın qədim şəhərlərinin zəngin memarlıq irsinə malik olduğunu vurğulayaraq Şamaxı, Naxçıvan, Gəncə, Qəbələ, Şəki, Lahıc və Şuşa kimi şəhərlərin tarixi əhəmiyyətindən danışıb. O bildirib ki, bu şəhərlərdə yerləşən məscidlər, türbələr, qalalar və digər memarlıq nümunələri xalqın qədim tarixini və mədəniyyətini əks etdirir. Prezident xüsusilə vurğulayıb ki, Azərbaycan öz tarixi irsini qorumaq və gələcək nəsillərə çatdırmaq istiqamətində mühüm işlər həyata keçirir. Çıxış zamanı Bakı şəhərinin inkişaf modeli də diqqətə çatdırılıb. Prezident Formula 1 Bakı Qran-Prisini nümunə göstərərək şəhərsalmada həm cəsarətli, həm də ehtiyatlı qərarların vacibliyini qeyd edib. Müasir inkişaf ilə tarixi irsin qorunması arasında balansın saxlanılmalı olduğunu vurğulayıb. Prezident İlham Əliyev işğaldan azad olunmuş Qarabağ və Şərqi Zəngəzurda aparılan genişmiqyaslı yenidənqurma işləri barədə də məlumat verib. Dövlət başçısı bildirib ki, Ağdam 30 il ərzində erməni işğalı altında qalaraq tamamilə dağıdılıb və viranəyə çevrilib. Beynəlxalq müşahidəçilər şəhəri dağıntıların miqyasına görə “Qafqazın Xirosiması” adlandırıblar. Şəhərdə yaşayış binaları, tarixi abidələr, ictimai tikililər və infrastruktur sistemli şəkildə məhv edilib. Ağdamın dağıdılması bir gün ərzində deyil, 30 illik işğal dövründə məqsədli şəkildə həyata keçirilib. O bildirib ki, uzun illər ərzində dağıdılmış şəhər və kəndlər yenidən qurulur, yollar, tunellər, körpülər, hava limanları, məktəblər, xəstəxanalar və yaşayış məntəqələri inşa edilir. “Böyük Qayıdış” proqramı çərçivəsində artıq minlərlə insanın doğma torpaqlarına qayıtdığını qeyd edən cənab Prezident, bölgədə məşğulluğun təmin olunması üçün sənaye zonalarının yaradıldığını da vurğulayıb. Ətraf mühit məsələlərinə toxunan dövlət başçısı Bakının uzun illər neft sənayesinin təsiri nəticəsində ciddi ekoloji problemlərlə üzləşdiyini bildirib. O qeyd edib ki, son 20 ildə şəhərdə böyük abadlıq və ekoloji yenilənmə layihələri həyata keçirilib. Vaxtilə “Qara şəhər” kimi tanınan ərazilərin müasir və ekoloji cəhətdən təmiz yaşayış məkanlarına çevrildiyini deyən cənab Prezident, şəhərsalmanın digər təzahürü olan “Sea Breeze” istirahət məkanından, paytaxtda yeni parkların, ictimai məkanların və müasir nəqliyyat sistemlərinin yaradıldığından bəhs etmişdir. Sonda Prezident İlham Əliyev vurğulayıb ki, Azərbaycanın bir çox bölgələrində şəhərsalma sürətlə inkişaf edir və beynəlxalq əməkdaşlıq bu sahədə təcrübə mübadiləsinə mühüm töhfə verir. O bildirib ki, şəhərsalma sahəsində keçmişdə yol verilən səhvlərdən nəticə çıxarılıb və gələcək inkişaf daha planlı və dayanıqlı şəkildə həyata keçiriləcək.

10 may müasir Azərbaycanın qurucusu, Ümummilli Lider Heydər Əliyevin anadan olmasının 103-cü ildönümüdür.

Azərbaycan dövlətçiliyinin möhkəmləndirilməsi, milli-mənəvi dəyərlərimizin qorunması və milli mədəniyyətimizin inkişafı istiqamətində misilsiz xidmətlər göstərən Ulu Öndər Heydər Əliyevin əziz xatirəsini dərin hörmət və minnətdarlıqla yad edirik.

Onun müəyyən etdiyi mədəniyyət siyasəti bu gün də Azərbaycanın mədəni inkişaf strategiyasının əsas ideoloji sütunlarından biri olaraq yaşayır və ölkəmizin zəngin irsinin gələcək nəsillərə çatdırılmasına xidmət edir.